“Hlawulani . . . Loyi Mi Nga Ta N’wi Tirhela”

1. Hi fanele hi endla yini leswaku hi tsaka? (Esaya 48:​17, 18)

TATA wa hina wa le tilweni wa hi rhandza swinene naswona u lava leswaku hi tiphina hi vutomi sweswi ni le nkarhini lowu taka. (Ekl. 3:​12, 13) U hi nyike tinyiko to hambanahambana kambe a nga hi vumbanga hi ri ni vuswikoti byo kota ku tifuma kumbe ku tivekela milawu ya leswinene ni leswi nga riki swinene. (Ekl. 8:9; Yer. 10:23) Wa swi tiva ku leswaku hi tsaka hi fanele hi n’wi gandzela ni ku tlhela hi hanya hi milawu yakwe.—Hlaya Esaya 48:​17, 18.

2. Sathana u lava leswaku hi tshemba yini naswona Yehovha u swi kombise njhani leswaku leswi Sathana a swi vulaka i mavunwa?

² Sathana u lava hi tshemba leswaku hi nga swi kota ku tifuma ni leswaku hi nga tsaka handle ko fumiwa hi Yehovha. (Gen. 3:​4, 5) Yehovha u tshike vanhu va tifuma ku ringana nkarhi wo karhi leswaku swi ta va erivaleni ku leswi Sathana a swi vulaka i mavunwa. A swi kali swi lava khandlhela leswaku hi ta swi vona ku vanhu va tsandzeka ku tifuma. Hi hala tlhelo, eBibeleni ku ni swikombiso swo tala swa vavanuna ni vavasati lava tiphineke hi vutomi hileswi va tirheleke Yehovha. Un’wana wa vanhu volavo i Yesu Kreste. A hi rhangeni hi bula hi swivangelo leswi endleke a hlawula ku gandzela Yehovha. Endzhaku hi ta kambisisa leswaku hikwalahokayini swi fanerile leswaku hi gandzela Tatana wa hina wa le tilweni. Xo hetelela, hi ta bula hi swivangelo swin’wana leswi endlaka hi hlawula ku tirhela Yehovha.

HIKWALAHOKAYINI YESU A HLAWULE KU TIRHELA YEHOVHA

3. Yesu u tshembisiwe yini kambe u hlawule ku endla yini?

³ Loko Yesu a ri laha misaveni, a a fanele a hlawula leswaku u ta gandzela mani. Endzhakunyana ka loko a khuvuriwile, Sathana u n’wi byele leswaku u ta n’wi nyika mifumo hinkwayo ya misava loko o endla nchumu wun’we ntsena, ku nga ku n’wi gandzela. Kambe Yesu u te: “Suka, Sathana! Hikuva ku tsariwile: ‘U fanele u gandzela Yehovha Xikwembu xa wena u tirhela yena ntsena.’” (Mat. 4:​8-10) Xiya swivangelo swin’wana leswi endleke Yesu a teka xiboho xexo.

4-5. Hi swihi swivangelo swin’wana leswi endleke Yesu a hlawula ku gandzela Yehovha?

⁴ Xivangelonkulu lexi endleke Yesu a hlawula ku gandzela Yehovha hileswi a a n’wi rhandza naswona a ku nga ri na nchumu lexi a xi ta n’wi hambanisa ni Tata wakwe. (Yoh. 14:31) Nakambe Yesu u gandzele Yehovha hileswi a a swi tiva leswaku swa n’wi fanela ku gandzeriwa. (Yoh. 8:​28, 29; Nhlav. 4:11) Wa swi tiva leswaku Yehovha i Munyiki wa vutomi, wa tshembeka naswona wa hanana. (Ps. 33:4; 36:9; Yak. 1:17) A nga si tshama a n’wi hembela naswona swilo hinkwaswo leswi Yesu a a ri na swona a a nyikiwe hi yena. (Yoh. 1:14) Ku hambana na Yehovha, Sathana u vange rifu, i muhembi, u ni makwanga naswona u khathala hi yena n’wini ntsena. (Yoh. 8:44) Hikwalaho ka leswi Yesu a a tiva swilo leswi, a nga kalanga a ehleketa hi ku xandzukela Yehovha ku fana na Sathana.—Filp. 2:​5-8.

⁵ Xivangelo xin’wana lexi endleke Yesu a hlawula ku gandzela Yehovha hileswi a a swi tiva leswaku loko a tshama a tshembekile Yehovha a a ta n’wi katekisa. (Hev. 12:2) A a swi tiva leswaku loko a tshama a tshembekile a ku ta kwetsimisiwa vito ra Tata wakwe naswona a swi ta koteka leswaku vanhu va kuma nkutsulo lowu a wu ta herisa ku xaniseka loko vangiweke hi Diyavulosi.

LESWI ENDLAKA YEHOVHA A FANERIWA HI KU GANDZERIWA

6-7. Hikwalahokayini vanhu vo tala namuntlha va nga n’wi gandzeli Yehovha kambe hikwalahokayini swi fanerile leswaku hi n’wi gandzela?

⁶ Ku fana ni vanhu lava muapostola Pawulo a va chumayeleke eAtena, vanhu vo tala namuntlha a va n’wi gandzeli Yehovha hikuva a va swi tivi leswaku i Xikwembu xa njhani nileswaku xi va endlele yini.—Mit. 17:​19, 20, 30, 34.

⁷ Pawulo u byele vayingiseri vakwe leswaku Xikwembu xa ntiyiso “xi [nyika] vanhu hinkwavo vutomi ni moya ni swilo hinkwaswo.” U tlhele a ku: “Hikuva ha xona hi ni vutomi, ha famba hi tlhela hi hanya.” Xikwembu i Mutumbuluxi wa hina, lexi hi ku tirhisa “munhu un’we xi endle[ke] tinxaka hinkwato ta vanhu,” hikwalaho swa fanela leswaku hi xi gandzela.—Mit. 17:​25, 26, 28.

8. I yini leswi Yehovha a nga taka a nga pfuki a swi endlile? Hlamusela.

⁸ Leswi Yehovha a nga Muvumbi tlhelo Hosi leyi Tlakukeke, a a nga ta tsandzeka ku sindzisa vanhu leswaku va n’wi gandzela. Kambe a nge pfuki a swi endlile sweswo. Ku ri na sweswo, u hi nyika vumbhoni lebyi endlaka hi tshemba leswaku u kona nileswaku wa hi rhandza swinene. U lava leswaku vanhu vo tala va va vanghana vakwe hilaha ku nga heriki. (1 Tim. 2:​3, 4) Hi yona mhaka Yehovha a hi letelaka leswaku hi dyondzisa vanhu hi xikongomelo xakwe ni ku tlhela hi va byela hi swilo leswinene leswi a nga ta hi endlela swona. (Mat. 10:​11-13; 28:​19, 20) U endle leswaku ku va ni mavandlha ni ku hi nyika vakulu lava nga ni rirhandzu lava khathalaka hi hina.—Mit. 20:28.

9. Yehovha u swi kombisa njhani leswaku wa hi rhandza?

⁹ Hi kota ku vona rirhandzu lerikulu leri Yehovha a nga na rona eka ndlela leyi a va khomaka hayona vanhu lava nga n’wi gandzeliki. Ehleketa hi leswi: Se swi endla malembe yo tala vanhu va tibiliyoni va ri karhi va hlawula ku hanya hi milawu ya vona loko swi ta eka leswinene ni leswi nga riki swinene. Hambiswiritano, Yehovha u va nyika leswi va swi lavaka leswaku va kota ku hanya ni ku tlhela va tiphina hi vutomi. (Mat. 5:​44, 45; Mit. 14:​16, 17) Hikwalaho ka yena, va kota ku va ni vanghana, mindyangu leyi va rhandzaka ni ku tlhela va tiphina hi mitirho ya vona. (Ps. 127:3; Ekl. 2:24) Swilo leswi hinkwaswo swi kombisa leswaku Tata wa hina wa le tilweni u rhandza vanhu hinkwavo. (Eks. 34:6) Sweswi a hi titsundzuxeni swin’wana swa swivangelo leswi endlaka hi hlawula ku gandzela Yehovha ni ndlela leyi a hi katekisaka hayona loko hi hlawula ku n’wi gandzela.

LESWI ENDLAKA HI HLAWULA KU GANDZELA YEHOVHA

10. (a) Hi xihi xivangelo lexikulu lexi endlaka hi gandzela Yehovha? (Matewu 22:37) (b) U vuyeriwe njhani hikwalaho ka leswi Yehovha a lehisaka mbilu? (Pisalema 103:​13, 14)

¹⁰ Ku fana na Yesu, hi gandzela Yehovha hileswi hi N’wi rhandzaka swinene. (Hlaya Matewu 22:37.) Hi tshinela eka yena loko hi ri karhi hi dyondza hi vumunhu byakwe. Hi xikombiso, ehleketa hi ndlela leyi Yehovha a hi lehiselaka mbilu hayona. Loko Vaisrayele va nga n’wi yingisi, u va kombele a ku: “Ndzi kombela mi tshika tindlela ta n’wina leto biha.” (Yer. 18:11) Yehovha a nga swi rivali leswaku hi ntshuri nileswaku ha swi endla swihoxo. (Hlaya Pisalema 103:​13, 14.) Loko u anakanyisisa hi ndlela leyi Yehovha a lehisaka mbilu hayona ni hi vumunhu byin’wana bya yena lebyinene, xana a swi ku endli u lava ku n’wi gandzela hilaha ku nga heriki?

11. Hi swihi swivangelo swin’wana leswi endlaka hi hlawula ku gandzela Tata wa hina wa le tilweni?

¹¹ Xivangelo xin’wana lexi endlaka hi gandzela Yehovha hileswi a faneriwaka hi ku gandzeriwa. (Mat. 4:10) Nakambe ha swi tiva leswaku loko hi tshama hi tshembekile eka yena u ta hi katekisa. Ku engetela kwalaho, loko hi tshembeka hi pfuneta ku kwetsimisa vito ra Yehovha, hi kombisa leswaku Diyavulosi i muhembi naswona hi tsakisa mbilu ya Tata wa hina. Loko hi hlawula ku gandzela Yehovha namuntlha, hi ta va ni nkateko wo n’wi tirhela hilaha ku nga heriki.—Yoh. 17:3.

12-13. U dyondza yini eka ntokoto wa Jane na Pam?

¹² Hi nga swi kota ku dyondza ku rhandza Yehovha hambiloko ha ha ri vatsongo naswona loko hi kula rirhandzu rero ri ta ya emahlweni ri kula. Xiya ntokoto wa vamakwavo lava landzelaka ku nga Jane na Pam.a Jane a a ri na 11 kasi Pam a a ri na 10 wa malembe loko va sungula ku dyondza Bibele. Hambileswi vatswari va vona a va nga swi tsakeli ku dyondza, va va pfumelele leswaku va dyondza Bibele ni Timbhoni loko ntsena va nga tshiki ku ya ekerekeni na vona hi mahelovhiki. Jane u ri, “Leswi Timbhoni ti ndzi dyondziseke swona swi ndzi pfunile leswaku ndzi nga pfumeli loko tintangha ta mina ti ndzi sindzisa ku dzaha tidraksi ni ku tikhoma ku biha.”

¹³ Endzhaku ka malembe ma nga ri mangani, Jane na Pam va ve vahuweleri naswona hi ku famba ka nkarhi va ve maphayona va ri karhi va khathalela vatswari va vona lava kuleke. Loko Jane a ehleketa hileswi va endlekeleke u ri: “Ndzi swi vonile leswaku Yehovha wa va khathalela vanghana vakwe hilaha 2 Timotiya 2:19 yi vulaka hakona loko yi ku, ‘Yehovha wa va tiva lava nga va yena.’” Swi le rivaleni leswaku Yehovha wa va khathalela lava n’wi rhandzaka ni ku tlhela va hlawula ku n’wi gandzela.

14. Hi nga ri yimela njhani vito ra Yehovha hi marito ni hi swiendlo? (Nakambe vona swifaniso.)

¹⁴ Hi lava ku endla hinkwaswo leswi hi nga swi kotaka leswaku hi basisa vito ra Yehovha eka swihehlo hinkwaswo leswi ri phyarhekiweke swona. Ehleketa hileswi: A hi nge u ni munghana loyi a nga ni musa, malwandla naswona a rivalelaka. Hiloko siku rin’wana u twa un’wana a n’wi hehla hi leswaku i munhu wo biha naswona a nga tshembekanga. Xana a wu ta endla yini? Swi le rivaleni leswaku a wu ta n’wi yimelela. Hilaha ku fanaka, loko Sathana ni lava n’wi seketelaka va onha ndhuma ya Yehovha hi ku va va N’wi hembela, hina hi yimela vito ra Yehovha hi ku va hi vula ntiyiso. (Ps. 34:1; Esa. 43:10) Hi kombisa leswaku hi lava ku gandzela Yehovha hi mbilu hinkwayo hi marito ni hi swiendlo.

15. Muapostola Pawulo u vuyeriwe njhani hileswi a tshikeke swo karhi leswaku a kota ku gandzela Yehovha? (Vafilipiya 3:​7, 8)

¹⁵ Hi ku swi rhandza, hi titsona swo karhi leswaku hi kota ku gandzela Yehovha hi ndlela leyi a yi amukelaka ni ku endla leswi engetelekeke entirhweni wakwe. Hi xikombiso, muapostola Pawulo u hlawule ku tshika xikhundlha lexi a a ri na xona leswaku a kota ku landzela Kreste ni ku gandzela Yehovha. (Gal. 1:14) Kutani sweswo swi endle leswaku a nga tisoli hikwalaho ka vutomi lebyi a byi hlawuleke naswona u kume nkateko wo ya fuma na Kreste etilweni. Ku fana na Pawulo na hina a hi nge tisoli loko hi hlawula ku tirhela Yehovha.—Hlaya Vafilipiya 3:​7, 8.

16. U dyondza yini eka Julia? (Nakambe vona swifaniso.)

¹⁶ Loko hi rhangisa ku gandzela Yehovha evuton’wini bya hina hi ta tiphina hi vutomi sweswi ni le nkarhini lowu taka. Ehleketa hi ntokoto wa makwerhu waxisati Julia. Ku sukela loko a ha ri ntsongo, a a yimbelela eka khwayere ya le kerekeni a nga si dyondza ntiyiso. Xiyimbeleri xin’wana xa opera lexi nga ni vutshila xi n’wi twile hiloko xi sungula ku n’wi letela. A swi tekanga nkarhi leswaku Julia a sungula ku duma ni ku tlhela a yimbelela etiholweni letikulu. Loko a ri exikolweni lexi dumeke xo dyondzela ku yimbelela, mudyondzikulobye u sungule ku vulavula na yena hi Xikwembu ni ku tlhela a n’wi hlamusela leswaku Xikwembu xi ni vito, ku nga Yehovha. Swi nga si ya kwihi, u sungule ku dyondza Bibele kambirhi hi vhiki naswona eku heteleleni u teke xiboho xo tirhela Yehovha ivi a tshika swo yimbelela. A swi nga olovi ku endla xiboho xexo. U ri: “Vanhu vo tala va ndzi byele leswaku ndzi tlanga hi nyiko ya mina kambe a ndzi lava ku tirhela Yehovha hilaha ku heleleke.” Xana u titwa njhani namuntlha hikwalaho ka xiboho lexi a xi endleke eka malembe ya 30 lama hundzeke? U ri, “Sweswi ndzi ni ku rhula naswona ndza tshemba leswaku Yehovha u ta swi hetisisa swilo hinkwaswo leswi ndzi swi navelaka enkarhini lowu taka.”—Ps. 145:16.

U NGA TSHIKI KU TIRHELA YEHOVHA

17. Mhaka ya leswaku hi hanya enkarhini wa makumu ya misava leyi yi va khumba njhani lava hlawuleke ku gandzela Xikwembu ni lava nga xi gandzeliki?

¹⁷ Hi le kusuhi swinene ni makumu ya misava leyi. Muapostola Pawulo u tsale a ku: “Ku sele ‘nkarhinyana,’ kutani ‘loyi a taka u ta fika naswona a nge hlweli.’” (Hev. 10:37) Xana leswi swi hi khumba njhani? Nkarhi lowu saleke wa leswaku vanhu va hlawula ku gandzela Yehovha i wu ntsongo. (1 Kor. 7:29) Nakambe loko ku ve se hi hlawule ku gandzela Xikwembu, ha swi tiva leswaku miringo leyi hi nga ta boheka ku yi tiyisela yi ta va ya “nkarhinyana.”

18. Yehovha na Yesu va lava hi endla yini?

¹⁸ Yesu u khutaze vadyondzisiwa vakwe leswaku va n’wi landzela nkarhi hinkwawo. (Mat. 16:24) Loko ku ve se i khale hi tirhela Yehovha, a hi tiyimiseleni ku ya emahlweni hi endla tano. Hi fanele hi kulula hi n’watseka leswaku hi nga tshiki ku n’wi tirhela. A swi olovi kambe hi ta tiphina ni ku tlhela hi kuma mikateko hambi ku ri sweswi.—Ps. 35:27.

19. U dyondza yini eka ntokoto wa Gene?

¹⁹ Van’wana va vona onge ku tirhela Yehovha swi va tsona ntsako. Loko ku ve wa ha ri ntsongo, xana u vona onge u ta kayela swo karhi loko u hlawula ku tirhela Yehovha? Makwerhu un’wana loyi a ha riki muntshwa loyi a vuriwaka Gene u ri: “A ndzi twa onge ku va Mbhoni ya Yehovha swi ndzi tsonisa swilo. Phela tintangha ta mina to tala a ti tiphina hi ku ya etiphatini, ku jola kumbe hi ku tlanga tivhidiyo gemu leti nga ni madzolonga, loko mina ndzi boheka ku ya etidyondzweni ni le nsin’wini.” Xana langutelo leri a a ri na rona ri n’wi khumbe njhani? U ri: “Ndzi sungule ku hanya vutomi byimbirhi naswona ndzi tiphinile swa xinkarhana. Kambe ntsako wa kona a wu tlhaveriwanga hi dyambu. Ndzi sungule ku ehleketa hi milawu ya le Bibeleni leyi a ndzi nga hanyi hayona ivi ndzi hlawula ku gandzela Yehovha hi mbilu hinkwayo. Ku sukela kwalaho, ndzi xiye leswaku Yehovha u hlamula swikhongelo swa mina hinkwaswo.”

20. Hi fanele hi tiyimisela ku endla yini?

²⁰ Mupisalema u yimbelelele Yehovha a ku: “Wa tsaka loyi u n’wi hlawulaka u n’wi tshineta eka wena, leswaku a ta tshama eswivaveni swa wena.” (Ps. 65:4) Ku fana na Yoxuwa, onge hi nga vula hi ku: “Loko ku ri mina ni ndyangu wa mina, hi ta tirhela Yehovha.”—Yox. 24:15.