Ha Vuyeriwa Loko Hi Tshama Hi Ri eKusuhi Ni Vamakwerhu

1-2. Hi wihi nchumu wun’wana lowu nga wa nkoka ngopfu eka Yehovha naswona u lava hi endla yini?

SWIN’WANA swa swilo swa nkoka eka Yehovha i ndlela leyi hi va khomaka hayona van’wana. Yesu u hi dyondzise leswaku hi fanele hi rhandza vanhu van’wana hilaha hi tirhandzaka hakona. (Mat. 22:​37-39) Sweswo swi katsa ku va ni musa ni le ka vanhu lava nga riki Timbhoni. Loko hi endla tano, hi kombisa leswaku hi tekelela Yehovha Xikwembu loyi “[a endlaka] dyambu ra yena ri voningela lavo homboloka ni lavanene, naswona u nisa mpfula eka lava lulameke ni lava nga lulamangiki.”—Mat. 5:45.

² Hambileswi Yehovha a rhandzaka vanhu hinkwavo, u va rhandza swinene lava n’wi yingisaka. (Yoh. 14:21) U lava leswaku hi n’wi tekelela. U hi byela leswaku hi va ‘rhandza swinene’ vamakwerhu ni ku tlhela hi ‘rhandzana tanihi vamakwavo.’ (1 Pet. 4:8; Rhom. 12:10) Loko hi ehleketa hi ku kombisa munhu rirhandzu ro tano, swi nga hi endla hi ehleketa hi ndlela leyi hi va rhandzaka hayona vanghana kumbe maxaka ya hina.

3. I yini leswi hi faneleke hi swi tsundzuka hi rirhandzu?

³ Rirhandzu ri fana ni ximilana lexi lavaka ku khathaleriwa leswaku xi kula. Muapostola Pawulo u khutaze Vakreste a ku: “Yanani emahlweni mi rhandzana tanihi vamakwavo.” (Hev. 13:1) Yehovha u lava leswaku hi ya emahlweni hi kombisa van’wana rirhandzu. Eka nhlokomhaka leyi, hi ta bula hileswaku hikwalahokayini hi fanele hi ya hi tshinela eka vamakwerhu ni leswaku hi nga ya emahlweni hi swi endla njhani sweswo?

LESWI ENDLAKA HI YA HI TSHINELA EKUSUHI NI VAMAKWERHU

4. Hilaha Pisalema 133:1 yi vulaka hakona, hi nga swi kombisa njhani leswaku ha byi tlangela vun’we lebyi hi nga na byona ni vamakwerhu? (Nakambe vona swifaniso.)

⁴ Hlaya Pisalema 133:1. A swi kanakanisi leswaku hi pfumelelana ni mupisalema loyi a tsaleke leswaku swi ‘xongile’ ni ku ‘tsakisa’ ku va ni vanghana va ntiyiso lava rhandzaka Yehovha. Kambe ku fana ni munhu loyi a nga ha sungulaka ku nga wu tekeli enhlokweni murhi lowu hlamarisaka lowu a wu vonaka siku ni siku, na hina hi nga ha sungula ku nga byi tekeli enhlokweni vun’we lebyi hi nga na byona ni vamakwerhu. Hikuva hi va vona nkarhi na nkarhi kumbe masiku yo hlayanyana evhikini. I yini leswi nga hi pfunaka leswaku swi nga hi endlekeli sweswo? Hi ta ya hi va rhandza swinene vamakwerhu loko hi tinyika nkarhi wo anakanyisisa hi ndlela leyi va nga va nkoka hayona evandlheni ni le ka hina.

5. Ndlela leyi hi rhandzanaka hayona yi nga va khumba njhani van’wana?

⁵ Van’wana lava taka etidyondzweni ro sungula, va fika va hlamarisiwa hi ndlela leyi hi rhandzanaka hayona. Sweswo ntsena swi nga endla va tshemba leswaku va kume ntiyiso. Yesu u te: “Hinkwavo va ta tiva leswaku mi vadyondzisiwa va mina loko mi rhandzana.” (Yoh. 13:35) Xiya ntokoto wa muntshwa loyi a vuriwaka Chaithra loyi a a dyondza ni Timbhoni ta Yehovha. U pfumele ku ya enhlengeletanweni ya xifundzha. Endzhaku ka siku ro sungula ra nhlengeletano, u byele loyi a dyondzaka na yena Bibele a ku: “Vatswari va mina a va si tshama va ndzi haga. Kambe enhlengeletanweni ya n’wina ndzi hagiwe ka 52 hi siku rin’we! Yehovha u tirhise vanhu lava ku ndzi komba leswaku wa ndzi rhandza. Ndzi lava ku va un’wana wa vona.” Chaithra u ye emahlweni a dyondza naswona u khuvuriwe hi 2024. Loko vanhu lava ha ku sungulaka ku tihlanganisa na hina va vona rirhandzu leri hi kombanaka rona, swi nga va susumetela leswaku va lava ku gandzela Yehovha.—Mat. 5:16.

6. Swi nga hi sirhelela njhani ku tshama hi ri ekusuhi ni vamakwerhu?

⁶ Swi nga hi sirhelela ku tshinela ekusuhi ni vamakwerhu. Pawulo u khutaze Vakrestekulobye a ku: “Yanani emahlweni mi khutazana siku ni siku . . . leswaku ku nga vi ni munhu eka n’wina loyi a nonon’hwisiwaka hi matimba lama kanganyisaka ya xidyoho.” (Hev. 3:13) Loko hi hetiwa matimba lerova hi sungula ku hambuka entiyisweni, Yehovha a nga ha tirhisa makwerhu wo karhi loyi a nga ni vuxiyaxiya leswaku a hi vuyisa endleni. (Ps. 73:​2, 17, 23) Entiyisweni ha wu lava mpfuno wolowo.

7. Rirhandzu ni vun’we swi fambisana njhani? (Vakolosa 3:​13, 14)

⁷ Hi xiphemu xa ntlawa wa vanhu lava tirhaka hi matimba leswaku va kombisana rirhandzu naswona hi tiphina hi mikateko yo tala hikwalaho ka sweswo. (1 Yoh. 4:11) Hi xikombiso, rirhandzu ri endla leswaku hi ya ‘emahlweni hi lehiselana mbilu’ naswona sweswo swi endla leswaku hi va ni vun’we. (Hlaya Vakolosa 3:​13, 14; Efe. 4:​2-6) Hi yona mhaka, loko hi ri etidyondzweni hi tiphina hi ku va ni vamakwerhu, ku nga ntsako lowu nga kumekiki kun’wana.

XIXIMANANI

8. Yehovha u hi pfuna hi ndlela yihi leswaku hi va ni vun’we?

⁸ Vun’we lebyi hi nga na byona emisaveni hinkwayo bya hlamarisa swinene. Hambileswi hi endlaka swihoxo, Yehovha u endla leswaku hi va ni vun’we. (1 Kor. 12:25) Bibele yi vula leswaku hi “dyondzisiwa hi Xikwembu leswaku [hi] rhandzana.” (1 Tes. 4:9) Hi marito man’wana, Yehovha u tirhisa Bibele ku hi byela leswi hi faneleke hi swi endla leswaku hi va nyandza yin’we. Hi “dyondzisiwa hi Xikwembu” loko hi kambisisa tidyondzo ta xona ni ku tlhela hi ti tirhisa. (Hev. 4:12; Yak. 1:25) Sweswo hi leswi Timbhoni ta Yehovha ti tikarhatelaka ku swi endla.

9. Hi dyondza yini eka Varhoma 12:​9-13 loko swi ta emhakeni ya ku xiximana?

⁹ Rito ra Xikwembu ri hi dyondzisa njhani ku tshinela ekusuhi ni vamakwerhu? Xiya leswi Pawulo a swi vuleke emhakeni leyi hilaha swi kombisiweke hakona eka Varhoma 12:​9-13. (Yi hlaye.) Xana a a vula yini loko a ku “vanani lavo rhanga eku xiximaneni”? Hi fanele hi va vo rhanga ku kombisana ‘rirhandzu’ hi ku va hi rivalela, hi kombisa malwandla, hi hanana ni ku endla swin’wana swo tala. (Efe. 4:32) U nga yimeli vamakwerhu leswaku ku rhanga ku va vona va tshinelaka eka wena. U nga va wo “rhanga” ku endla tano. Loko u endla tano, u ta vona ku hetiseka ka marito lama Yesu a ma vuleke loko a ku: “Ku nyika swi tisa ntsako lowukulu ku tlula ku amukela.”—Mit. 20:35.

10. Hi nga swi kombisa njhani leswaku ha gingiriteka loko swi ta eku “xiximaneni”? (Nakambe vona xifaniso.)

¹⁰ Endzhaku ko hi byela leswaku hi va vo rhanga eku xiximaneni, Pawulo u hi khutaza leswaku hi ‘gingiriteka, hi nga lolohi.’ Munhu wo gingiriteka u tirha hi matimba, wa hiseka naswona loko a nyikiwe ntirho u wu endla hi ku tiyimisela. Swivuriso 3:​27, 28 yi hi khutaza leswi: “U nga tshuki u ala ku va nyika swilo leswinene lava u faneleke u va nyika swona loko swi ri ematimbeni ya wena ku va pfuna.” Hikwalaho, loko hi vona un’wana a lava ku pfuniwa, a hi koki milenge ivi hi tibyela leswaku un’wana u ta n’wi pfuna.—1 Yoh. 3:​17, 18.

11. I yini leswi nga hi pfunaka leswaku hi va ekusuhi ni vamakwerhu?

¹¹ Ndlela yin’wana leyi kombisaka leswaku ha va xixima van’wana i ku hatla hi va rivalela loko va hi dyoherile. Vaefesa 4:26 yi ri: “Dyambu ri nga peli ma ha hlundzukile.” Hikwalahokayini hi nga fanelanga hi endla sweswo? Ndzimana 27 yi vula leswaku loko hi endla tano hi ta va hi “nyik[a] Diyavulosi nkarhi.” ERitweni rakwe, Yehovha u hi byela ko tala leswaku hi rivalelana. Vakolosa 3:13 yi hi khutaza ku ‘ya emahlweni hi rivalelana hi ku tshunxeka.’ Loko hi swi ba hi makatla swihoxo swa van’wana, swi ta endla leswaku hi tshinela eka vona. Loko hi rivalela van’wana, swi ta hi pfuna leswaku hi ‘tshama hi ri ni vun’we lebyi hi byi kumaka hikwalaho ka moya lowo kwetsima.’ (Efe. 4:3) Entiyisweni, loko hi rivalela swi endla leswaku hi va ni vun’we ni ku rhula.

12. Yehovha u hi pfuna njhani leswaku hi rivalela?

¹² Mikarhi yin’wana swi nga hi tikela ku rivalela lava hi twiseke ku vava. Kambe hi nga swi kota ku va rivalela hi ku pfuniwa hi moya wa Xikwembu. Bibele yi hi byela leswaku hi ‘rhandzana tanihi vamakwavo’ hi tlhela hi ‘gingiriteka’ nakambe yi tlhela yi hi khutaza leswaku hi “hiseka hi ku pfuniwa hi moya lowo kwetsima.” Munhu loyi a ‘hisekaka’ u tirha hi matimba hileswi a pfuniwaka hi moya wo kwetsima. Hikwalaho, moya wa Xikwembu wu nga hi pfuna leswaku hi kombisa van’wana rirhandzu ni ku rivalela hi ku tshunxeka. Hi yona mhaka hi kombelaka Yehovha leswaku a hi pfuna.—Luka 11:13.

“KU NGA TSHUKI KU VA NI KU AVANA EXIKARHI KA N’WINA”

13. I yini leswi nga endlaka leswaku ku va ni ku avana exikarhi ka hina?

¹³ EVandlheni ku ni “vanhu” lava humaka eka mindhavuko yo hambanahambana. (1 Tim. 2:​3, 4) Hikwalaho ka sweswo, loko hi nga tivoneli ku nga ha va ni ku avana evandlheni loko swi ta eka swiboho leswi hi swi endlaka swa munhu hi yexe swo fana ni maambalelo ni ku tisasekisa, ku khathalela rihanyo kumbe vuhungasi lebyi hi byi hlawulaka. (Rhom. 14:4; 1 Kor. 1:10) Leswi Xikwembu xi hi dyondzisaka ku rhandzana, hi fanele hi tivonela leswaku hi nga sindzisi van’wana ku amukela mavonelo ya hina hileswi hi vonaka ma antswa ku tlula ya vona.—Filp. 2:3.

14. Xana hi fanele hi tikarhatela ku endla yini naswona hikwalahokayini?

¹⁴ Hi nga endla swo karhi leswaku ku nga vi na ku avana evandlheni hi ku va hi tikarhatela ku khutaza ni ku aka vamakwerhu mikarhi hinkwayo. (1 Tes. 5:11) Sweswinyana, vamakwerhu vo tala lava a va tshike ku ta etidyondzweni kumbe lava a va susiwile, va vuyerile evandlheni. Ha va hoyozela! (2 Kor. 2:8) Xiya leswi endlekeleke makwerhu un’wana wa xisati loyi a tlheleleke evandlheni endzhaku ka malembe ya khume a nga ti eTidyondzweni. U te: “Vamakwerhu va ndzi xewete va tsakile ni ku tlhela va ndzi qhavula.” (Mit. 3:19) Xana sweswo swi n’wi endle a titwa njhani? U ri: “Swi endle ndzi twa onge Yehovha a a ndzi pfuna leswaku ndzi tlhela ndzi tsaka.” Loko hi khutaza van’wana, Kreste a nga hi tirhisa leswaku hi phyuphyisa lava “karhaleke ni lava tikeriwaka.”—Mat. 11:​28, 29.

15. Hi nga endla yini swin’wana leswaku ku va ni vun’we evandlheni? (Nakambe vona xifaniso.)

¹⁵ Ndlela yin’wana leyi nga endlaka leswaku ku va ni vun’we, i mavulavulelo ya hina. Yobo 12:11 yi ri: “Xana ndleve a yi ringi marito hilaha ririmi ri ringaka swakudya hakona?” Tanihi leswi musweki a rhangaka hi ku ringa swakudya a nga si swi nyika van’wana, na hina hi endla kahle loko hi rhanga hi ehleketisisa hi leswi hi lavaka ku swi vula hi nga si swi vula. (Ps. 141:3) Mikarhi hinkwayo hi fanele hi tiyiseka leswaku leswi hi swi vulaka swa khutaza, swa phyuphyisa ni ku “pfuna lava swi twaka.”—Efe. 4:29.

16. I vamani lava ngopfungopfu va faneleke va tirhisa marito lama khutazaka?

¹⁶ Vavanuna lava tekeke ni vatswari va fanele va va xikombiso lexinene loko swi ta emhakeni yo khutaza van’wana hi mavulavulelo ya vona. (Kol. 3:​19, 21; Tito 2:4) Vakulu na vona va fanele va phyuphyisa ni ku chavelela van’wana tanihi varisi va ntlhambi wa Yehovha. (Esa. 32:​1, 2; Gal. 6:1) Xivuriso xin’wana xa le Bibeleni xi ri: “Rito leri vuriweke hi nkarhi lowu faneleke i rinene ngopfu!”—Swiv. 15:23.

A HI RHANDZANENI “HI SWIENDLO NI NTIYISO”

17. Hi nga swi kombisa njhani leswaku hi va rhandza swi suka embilwini vamakwerhu?

¹⁷ Muapostola Yohane u hi khutaza leswaku hi “rhandzana hi swiendlo ni ntiyiso ku nga ri hi marito kumbe nomu.” (1 Yoh. 3:18) Hi nga swi kombisa njhani leswaku hi rhandza vamakwerhu swi suka embilwini? Loko hi heta nkarhi ni vamakwerhu hi ta ya hi tshinela ekusuhi na vona ni ku tlhela hi va rhandza swinene. Tinyike nkarhi wo va ni vamakwerhu etidyondzweni, ensin’wini ni ku tlhela u va vhakela. Loko hi endla tano, hi kombisa leswaku hi “dyondzisiwa hi Xikwembu leswaku [hi] rhandzana.” (1 Tes. 4:9) Hi ta tivonela hi ya hina leswaku “a hi ku xonga ni ku tsakisa ka swona loko vamakwavo va tshama swin’we hi vun’we!”—Ps. 133:1.