NHLOKOMHAKA LEYI DYONDZIWAKA YA VU 15
RISIMU 30 Tatana, Xikwembu Xa Mina Ni Nakulorhi
“Ku Tshinela Eka Xikwembu I Swinene” Eka Hina!
“Loko ku ri mina, ku tshinela eka Xikwembu i swinene eka mina.”—PS. 73:28.
LESWI HI NGA TA SWI DYONDZA
Hi ta dyondza hi ndlela leyi hi nga tshinelaka hayona eka Yehovha ni ndlela leyi swi hi vuyerisaka hayona ku endla tano.
1-2. (a) Hi fanele hi endla yini loko hi lava ku va munghana wa munhu wo karhi? (b) Hi ta bula hi yini eka nhlokomhaka leyi?
XANA u na yena munghana lonkulu? Loko ku ve u na yena kumbexana u tinyike nkarhi wo va swin’we na yena, u tiva mitlhontlho leyi a langutaneke na yona, leswi a swi rhandzaka ni leswi a nga swi rhandziki naswona sweswo swi endle leswaku mi va vanghana. U tlhele u xiya vumunhu lebyinene lebyi a nga na byona lebyi endleke u n’wi rhandza naswona u lava ku n’wi tekelela.
2 Ku fana ni leswi swi lavaka nkarhi ni matshalatshala leswaku hi va munghana wa munhu wo karhi, hi fanele hi endla leswi fanaka leswaku hi va munghana wa Yehovha Xikwembu. Eka nhlokomhaka leyi, hi ta dyondza ndlela leyi hi nga tshinelaka hayona eka Xikwembu ni vuyelo lebyi hi nga ta byi kuma loko hi endla tano. A hi sunguleni hi bula hi leswaku hikwalahokayini swi ri swinene ku tshinela eka Yehovha Munghana wa hina lonkulu.
3. Hikwalahokayini hi fanele hi anakanyisisa hi vuyelo lebyi hi byi kumaka loko hi tshinela eka Yehovha? Kombisa.
3 A swi kanakanisi ku wa pfumela leswaku ku tshinela eka Yehovha i swinene. Kambe loko hi anakanyisisa hi ndlela leyi swi nga swinene hayona ku tshinela eka yena, swi ta hi susumetela ku ya hi tshinela swinene eka yena. (Ps. 63:6-8) Hi xikombiso, ha swi tiva leswaku ku dya swakudya leswi nga ni rihanyo, ku endla vutiolori, ku etlela tiawara leti ringaneke ni ku nwa mati lama eneleke swa pfuna swinene emirini. Hambiswiritano, vanhu vo tala a va swi endli swilo leswi. Kambe loko hi ya hi ehleketa hi ndlela leyi swilo leswi swi hi pfunaka hayona emirini, a hi nge tshiki ku swi endla. Hilaha ku fanaka, ha swi tiva leswaku ku tshinela eka Yehovha i swinene eka hina. Kambe loko hi ehleketisisa hi vuyelo lebyi hi byi kumaka loko hi endla tano, swi ta hi pfuna leswaku hi ya hi tshinela eka Munghana wa hina.—Ps. 119:27-30.
4. Hi ku ya hi Pisalema 73:28, mupisalema u te yini?
4 Hlaya Pisalema 73:28. Mutsari wa Pisalema 73 a ku ri Mulevhi loyi a nyikiweke xiavelo xo yimbelela etempeleni ya Yehovha. Nakambe swi nga endleka leswaku se a a ri ni malembe a ri karhi a tirhela Yehovha hi ku tshembeka. Hambiswiritano, a a vona swi ri swa nkoka ku titsundzuxa leswaku “ku tshinela eka Xikwembu” i swinene eka yena naswona a a lava ni van’wana va swi tiva leswaku i swa nkoka ku tshinela eka Xikwembu. Hi byihi vuyelo byin’wana leyi hi byi kumaka loko hi tshinela eka Yehovha?
“KU TSHINELA EKA XIKWEMBU” SWI ENDLA HI TSAKA
5. (a) Hikwalahokayini ku tshinela eka Yehovha swi endla hi tsaka? (b) Hi ku ya hi Swivuriso 2:6-16, hlamusela ndlela leyi vutlhari bya Yehovha byi nga ku vuyerisaka ni ku ku sirhelela hayona.
5 Loko hi ya hi tshinela eka Yehovha, hi ta tsaka swinene. (Ps. 65:4) Ku ni swivangelo swo tala leswi endlaka hi tsaka. Hi xikombiso, ha vuyeriwa loko hi tirhisa vutlhari lebyi pfunaka lebyi kumekaka eRitweni ra Xikwembu, ku nga Bibele. Vutlhari byebyo bya hi sirhelela eka minkucetelo yo biha naswona byi hi pfuna leswaku hi papalata ku endla swihoxo leswikulu. (Hlaya Swivuriso 2:6-16.) Hi yona mhaka Bibele yi vulaka leswi: “Wa tsaka munhu la kumaka vutlhari ni munhu loyi a kumaka ku twisisa.”—Swiv. 3:13.
6. I yini leswi endleke mupisalema a heleriwa hi ntsako?
6 I ntiyiso leswaku hambi ku ri vanghana va Yehovha mikarhi yin’wana va pfa va heleriwa hi ntsako. Mutsari wa Pisalema 73 u heleriwe hi ntsako hileswi a sunguleke ku languta swilo hi tihlo leri hoxeke. U sungule ku karhateka ni ku vondzoka vanhu vo homboloka hikuva a swi vonaka onge swilo swi va fambela kahle hambileswi a va nga ri na mhaka na Xikwembu kumbe milawu ya xona. Nakambe a a ehleketa leswaku vanhu lava nga ni madzolonga ni lava tikukumuxaka, mikarhi hinkwayo i swigwili, va ni rihanyo lerinene naswona a va xaniseki. (Ps. 73:3-7, 12) Mupisalema a a karhatekile lerova u kale a vona onge matshalatshala lawa a ma endlaka leswaku a gandzela Yehovha i ya hava. Hi ku twa mbilu ku vava u te: “Kunene ndzi yi basisele swa hava mbilu ya mina ndzi tlhela ndzi hlamba mavoko hi ku pfumala nandzu.”—Ps. 73:13.
7. Hi nga endla yini loko hi heleriwe hi ntsako? (Nakambe vona xifaniso.)
7 Hambileswi mupisalema a yi n’wi dyisa mbitsi mhaka leyi, u endle swo karhi leswaku a cinca langutelo rakwe. U “nghene endhawini yo kwetsima ya Xikwembu,” laha xi lulamiseke langutelo rakwe. (Ps. 73:17-19) Yehovha Munghana wa hina lonkulu wa swi tiva loko hi nga khomekanga kahle. Loko hi khongela eka yena leswaku a hi kongomisa kutani hi amukela mpfuno wakwe lowu a hi nyikaka wona eRitweni rakwe ni le vandlheni, hi ta kuma matimba yo ya emahlweni hi n’wi tirhela hambiloko hi nga tsakanga. Yehovha u ta hi chavelela ni ku tlhela a hi thova loko hi heleriwe hi ntsako.—Ps. 94:19.a
Mulevhi loyi a tsaleke Pisalema 73 a yime “endhawini yo kwetsima ya Xikwembu” (Vona ndzimana 7)
“KU TSHINELA EKA XIKWEMBU” SWI HI NYIKA NTSHEMBO NI KU HANYA VUTOMI LEBYI NGA NI XIKONGOMELO
8. Xana ku tshinela eka Xikwembu i swinene eka hina hi tindlela tihi tin’wana ta nkoka?
8 Ku tshinela eka Xikwembu i swinene eka hina hi tindlela timbirhi ta nkoka. Yo sungula, swi endla hi swi tiva leswaku hi hanyela yini. Ya vumbirhi, a hi nge kanakani leswaku hi ta kuma vumundzuku lebyinene. (Yer. 29:11) A hi buleni hi swilo leswi hi vuenti.
9. Ku tshinela eka Yehovha swi hi pfuna njhani?
9 Ku tshinela eka Yehovha swi endla hi swi tiva leswaku hi hanyela yini. Vanhu vo tala lava nga pfumeliki leswaku Xikwembu xi kona, va ehleketa leswaku vutomi a byi na xikongomelo nileswaku vanhu va ta hela va ku bii! Hambiswiritano, loko hi ri karhi hi dyondza Rito ra Xikwembu, swi endle hi tiyiseka leswaku Xikwembu “xi kona ni leswaku hi xona lexi hakelaka lava xi lavaka hi mbilu hinkwayo.” (Hev. 11:6) Hambi ku ri namuntlha, hi tshama hi tsakile hikuva hi le ku endleni ka leswi hi vumberiweke swona, ku nga ku gandzela Yehovha Tata wa hina wa le tilweni.—Det. 10:12, 13.
10. Xana Pisalema 37:29 yi vula leswaku lava tshembaka Yehovha va ta kuma vumundzuku bya njhani?
10 Nchumu wa nkoka eka vanhu vo tala namuntlha i ku ya entirhweni, ku va ni ndyangu ni ku hlayisa mali leyi va nga ta tihanyisa ha yona loko va dyuharile. A va ehleketi hi Xikwembu. Ku hambana na vona, vanhu va Yehovha va n’wi tshemba. (Ps. 25:3-5; 1 Tim. 6:17) Ha xi tshemba Xikwembu lexi se hi tshineleke eka xona ni switshembiso leswi xi hi tshembiseke swona. Swin’wana swa swilo leswi hi nga ta swi endla enkarhini lowu taka, i ku gandzela Xikwembu eParadeyisini hilaha ku nga heriki.—Hlaya Pisalema 37:29.
11. Ku tshinela eka Xikwembu swi hi vuyerisa njhani naswona xi titwa njhani loko hi endla tano?
11 Ku tshinela eka Xikwembu swa hi vuyerisa hi tindlela tin’wana to tala. Hi xikombiso, Yehovha u tshembisa ku rivalela swidyoho swa vanhu vakwe lava hundzukeke. (Esa. 1:18) Hikwalaho ka leswi a hi rivalelaka, a hi fanelanga hi ya emahlweni hi titwa nandzu hikwalaho ka swidyoho leswi hi nga tshama hi swi endla. (Ps. 32:1-5) Nakambe Yehovha wa tsaka loko hi tshinela eka yena. (Swiv. 23:15) A swi kanakanisi leswaku u ehleketa hi mikateko yin’wana leyi hi yi kumaka hileswi hi nga vanghana va Xikwembu. Kambe u nga endla yini leswaku u ya emahlweni u tshinela eka Xikwembu?
NDLELA YO YA EMAHLWENI HI “TSHINELA EKA XIKWEMBU”
12. U endle yini leswaku u tshinela eka Xikwembu?
12 Loko u ri Mukreste la khuvuriweke, u dyondze ntiyiso hi Yehovha Xikwembu na Yesu Kreste. U hundzukile eswidyohweni swa wena, u kombise leswaku u ni ripfumelo leri tiyeke eka Xikwembu ni ku tlhela u endla swilo leswi fambisanaka ni ku rhandza ka xona. Nakambe sweswo swi endle leswaku u tshinela eka Yehovha. Hambiswiritano, leswaku hi ya hi tshinela swinene eka Yehovha, hi fanele hi ya emahlweni hi endla swilo leswi.—Kol. 2:6.
13. Hi swihi swilo swinharhu leswi nga ta hi pfuna hi ya emahlweni hi tshinela eka Yehovha?
13 I yini leswi nga ta hi pfuna leswaku hi ya emahlweni hi tshinela eka Yehovha? (1) Hi fanele hi nga tshiki ku hlaya Bibele. Loko hi ri karhi hi endla tano, hi fanele hi tikarhatela ku endla leswi engetelekeke hi ku va hi tikarhatela ku twisisa leswi Xikwembu xi lavaka hi swi endla ni ku kongomisiwa hi milawu leyi nga eRitweni ra xona. (Efe. 5:15-17) (2) Hi fanele hi tiyisa ripfumelo ra hina hi ku anakanyisisa hi vumbhoni lebyi nga kona bya leswaku Xikwembu xa hi rhandza. (3) Hi fanele hi ya emahlweni hi venga swilo leswi Yehovha a swi vengaka ni ku fambela ekule ni vanhu lava swi endlaka.—Ps. 1:1; 101:3.
14. Hi ku ya hi 1 Vakorinto 10:31, hi nga endla yini siku ni siku leswaku hi tsakisa Yehovha? (Nakambe vona swifaniso.)
14 Hlaya 1 Vakorinto 10:31. I swa nkoka leswaku hi ya emahlweni hi endla swilo leswi tsakisaka Yehovha. Nakambe swilo sweswo a swi katsi ku ya etidyondzweni ni le nsin’wini ntsena kambe swi katsa ni leswi hi swi endlaka eka vutomi bya hina bya siku ni siku. Hi xikombiso, loko hi tshembeka eka swilo hinkwaswo ni ku tlhela hi hanana hi tsakisa Yehovha. (2 Kor. 8:21; 9:7) Nakambe u lava hi xixima nyiko ya vutomi. Hi tshinela eka Munyiki wa vutomi hi ku va hi ringanisela loko swi ta eka ku dya ni ku nwa ni ku tlhela hi khathalela rihanyo ra hina. Yehovha u ta ya a hi rhandza loko hi endla matshalatshala leswaku hi n’wi tsakisa hambi ku ri eka timhaka leti swi vonakaka onge a ti nyawuli.—Luka 16:10.
Ku chayela kahle, ku khathalela rihanyo ra hina hi ku endla vutiolori ni ku dya swakudya leswi nga ni rihanyo ni ku va ni malwandla hi swin’wana swa swilo leswi hi nga swi endlaka leswaku hi tsakisa Yehovha (Vona ndzimana 14)
15. Yehovha u lava hi va khoma njhani vanhu van’wana?
15 Yehovha u ni musa eka lava lulameke ni lava nga lulamangiki. (Mat. 5:45) U lava hi n’wi tekelela. Hi xikombiso, hi fanele hi ‘nga onhi vanhu van’wana mavito, hi nga rhandzi timholovo kambe hi va ni ku rhula ni vanhu hinkwavo.’ (Tito 3:2) A hi nyaji vanhu van’wana hikwalaho ka leswi va nga va vukhongeri byin’wana. (2 Tim. 2:23-25) Loko hi anakanyela vanhu van’wana ni ku tlhela hi va ni musa, hi tshinela eka Yehovha.
HI NGA “TSHINELA EKA XIKWEMBU” HAMBILOKO HI ENDLA SWIHOXO
16. Xana mutsari wa Pisalema 73 u sungule ku titwa njhani hi ku famba ka nkarhi?
16 Kambe ku vuriwa yini loko hi ku famba ka nkarhi u sungula ku vona onge a swi ku faneli ku rhandziwa hi Yehovha? Hilaha hi dyondzeke hakona, ku endleke nchumu lowu fanaka eka mutsari wa Pisalema 73. U te: “A ku sele katsongo milenge ya mina yi hambukile; a ku sele katsongo milenge ya mina yi rhetile.” (Ps. 73:2) U vule leswaku a a “karhatekile,” a a “nga ehleketi” naswona eka Yehovha a a titwa ku “fana ni xiharhi lexi nga ehleketiki.” (Ps. 73:21, 22) Xana u tibyele leswaku a a nga faneleki ku va a rhandziwa hi Yehovha hileswi a endleke swihoxo?
17. (a) Xana mupisalema u endle yini loko a titwe a hele matimba? (b) Xikombiso xakwe xi hi dyondzisa yini? (Nakambe vona swifaniso.)
17 Loko ku ve mupisalema a a ehleketa leswaku Yehovha u n’wi lahlile, swi vonaka onge u titwe hi ndlela yoleyo swa xinkarhana. Loko mupisalema a ta va a titwe hi ndlela yoleyo u swi xiyile leswaku a a fanele a tshinela eka Xikwembu, hilaha marito yakwe ma swi kombisaka hakona: “Kambe sweswi ndzi tshama ndzi ri na wena [Yehovha]; u khome voko ra mina ra xinene. Wa ndzi kongomisa hi xitsundzuxo xa wena, kutani endzhaku ka sweswo u ta ndzi komba musa.” (Ps. 73:23, 24) Na hina hi nga titshega hi Yehovha leswaku a hi tiyisa loko hi hele matimba. (Ps. 73:26; 94:18) Hambiloko ho pfa hi endla swihoxo, loko hi tlhelela eka Yehovha hi nga tiyiseka leswaku u “lunghekele ku [hi] rivalela.” (Ps. 86:5) I swa nkoka swinene ku tshinela eka Xikwembu ngopfungopfu loko hi titwa hi hele matimba.—Ps. 103:13, 14.
Loko hi vona leswaku a ha ha ri na vuxaka lebyinene na Yehovha, hi fanele hi tshinela eka yena hi xikhongelo ni ku tlhela hi va kona etidyondzweni nkarhi ni nkarhi (Vona ndzimana 17)
“TSHINELA EKA XIKWEMBU” HILAHA KU NGA HERIKI
18. Hikwalahokayini hi fanele hi tshinela eka Yehovha hilaha ku nga heriki?
18 Ku dyondza hi Yehovha a swi heli naswona hi ta ya emahlweni hi tshinela eka yena hilaha ku nga heriki. Bibele yi vula leswaku tindlela ta Yehovha, vutlhari ni vutivi byakwe a swi “landzerisiseki.”—Rhom. 11:33.
19. Tipisalema ti hi tiyisekisa yini?
19 Pisalema 79:13 yi ri: “Hina vanhu va wena, hina ntlhambi wa wena, hi ta ku khensa hilaha ku nga heriki; naswona hi ta ku dzunisa hilaha ku nga heriki.” Na wena u nga tiyiseka leswaku u ta kuma mikateko ya hilaha ku nga heriki loko u ya emahlweni u tshinela eka Xikwembu naswona u ta vula u nga kanakani u ku: “Xikwembu i ribye ra mbilu yanga ni ndzhaka ya mina hilaha ku nga heriki.”—Ps. 73:26.
RISIMU 32 Yima Na Yehovha!
a Lava nga ni nkarhi wo leha va karhatiwa hi ntshikilelo ni ku vilela swi nga lava va kuma mpfuno wa dokodela. Leswaku u kuma leswi engetelekeke, hlaya Xihondzo xo Rindza xa No. 1 2023.