Xana U Xi ‘Dyondzile Xihundla’ Xa Ku Eneriseka?

1. I yini leswi vulaka swona ni leswi nga vuleki swona ku eneriseka?

XANA wa eneriseka? Munhu loyi a enerisekaka hi loyi a tsakisiwaka hi leswi a nga na swona ni ku tlhela a va ni ku rhula. Loko a vona van’wana va ri na swo karhi leswi a swi pfumalaka, a nga hlundzuki kumbe a kwata. Nilokoswiritano, ku eneriseka a swi vuli swona leswaku a ha ha ri na mhaka ni swilo swin’wana. Hi xikombiso, Mukreste u tikarhatela ku lava tindlela ta ku tirhela Yehovha hilaha ku engetelekeke. (Rhom. 12:1; 1 Tim. 3:1) Loko a ri karhi a endla tano, a nga heleriwi hi ntsako loko a nga hatli a kuma xiavelo lexi a xi languteleke.

2. Hikwalahokayini ku nga eneriseki swi ri na khombo?

² Hi nga weriwa hi switandzhaku swo vava loko hi ri ni moya wa ku nga eneriseki. Lava nga enerisiwiki hi nchumu va nga ha tirha tiawara to tala leswaku va ta kota ku kuma swilo leswi entiyisweni va nga swi laviki. Lexi twisaka ku vava, Vakreste vo hlayanyana va hetelele va yive mali kumbe swilo leswi a va swi navela. Kumbexana a va tibyela leswi, ‘Na mina swa ndzi fanela,’ ‘Phela i khale ndzi swi rindzerile,’ kumbe ‘Ndzi ta yi tlherisa loko ndzi ri na yona.’ Nilokoswiritano, Yehovha wa ma nyenya makhamba naswona ma n’wi thyakisa vito. (Swiv. 30:9) Van’wana va hele matimba hileswi va nga kumangiki xiavelo lexi a va xi lava lerova va tshike hambi ku ri ku tirhela Yehovha. (Gal. 6:9) Xana swi vangiwa hi yini ku va mugandzeri wa Yehovha loyi a tinyiketeleke a endla sweswo? Swi va swi vangiwa hileswi a nga ha enerisekiki.

3. Hi yihi dyondzo ya nkoka leyi nga eka Vafilipiya 4:​11, 12?

³ Hinkwerhu hi nga dyondza ku eneriseka. Muapostola Pawulo u tsale leswaku u “dyondze ku eneriseka eka xiyimo xin’wana ni xin’wana lexi [a a ri] eka xona.” (Hlaya Vafilipiya 4:​11, 12.) Loko a tsala marito lawa a a pfaleriwile ejele. Hambiswiritano, a nga heleriwanga hi ntsako hikuva u “dyondze xihundla” xa ku eneriseka. Loko swi hi tikela ku eneriseka, marito ya Pawulo ni leswi n’wi endlekeleke swi nga hi tiyisekisa leswaku hi nga swi kota ku dyondza ku eneriseka. A hi fanelanga hi tibyela leswaku swo tiendlekela ku va hi titwa hi enerisekile hi swiyimo swa hina. Ematshan’weni ya sweswo, hi fanele hi dyondza ku eneriseka. Njhani? A hi buleni hi swilo leswi nga ta hi pfuna hi dyondza xihundla xa ku eneriseka.

KHENSA LESWI U NGA NA SWONA

4. Ku tlangela swi hi pfuna njhani leswaku hi eneriseka? (1 Vatesalonika 5:18)

⁴ Loko hi ri ni moya wo khensa swi ta hi olovela ku eneriseka. (Hlaya 1 Vatesalonika 5:18.) Loko hi khensa swilo swa nkoka leswi hi nga na swona evuton’wini a hi nge vileli ngopfu hi swilo leswi hi swi lavaka kambe hi nga riki na swona. Loko hi tlangela swiavelo leswi hi tiphinaka ha swona sweswi, swi ta hi pfuna leswaku hi tirha hi matimba loko hi ri karhi hi endla swiavelo sweswo ematshan’weni yo vilela hi ku kuma swin’wana. A swi hlamarisi leswi Matsalwa ma hi khutazaka leswaku loko hi khongela eka Yehovha hi n’wi khensa. Loko hi titolovete ku khensa hi ta va ni “ku rhula ka Xikwembu loku tlulaka ku twisisa hinkwako.”—Filp. 4:​6, 7. 

5. Hi swihi swivangelo leswi Vaisrayele a va ri na swona swo va va khensa? (Nakambe vona xifaniso.)

⁵ A hi bule hi leswi endlekeleke Vaisrayele. Va gungulele Yehovha ko tala va vula leswaku va tsundzuka swakudya leswi a va tiphina ha swona eEgipta. (Tinhl. 11:​4-6) I ntiyiso leswaku vutomi a byi tika emananga kambe i yini leswi a swi ta va swi va pfune leswaku va eneriseka? A va fanele va tlangele swilo leswi Yehovha se a va endleleke swona. Loko va ri eEgipta a va xanisiwa tanihi hi mahlonga naswona Yehovha u xupule lava a va va xanisa hi makhombo ya khume. Endzhaku ka loko Vaisrayele va tshuxiwile, va ‘tekele Vaegipta swilo swa vona’ ku nga silivhere, nsuku ni swiambalo. (Eks. 12:​35, 36) Endzhaku ka loko Vaisrayele va pfalelekile eLwandle ro Tshwuka, hi singita Yehovha u ave mati leswaku va kota ku hundza. Nakambe loko va ri karhi va famba emananga, u va nyike manna siku ni siku. Hikwalaho, xiphiqo a ku ri yini? Vaisrayele a va nga eneriseki, ku nga ri hileswi a va pfumala swakudya kambe hikwalaho ka leswi a va nga swi tlangeli swilo leswi se a va ri na swona.

6. Hi tihi tindlela tin’wana leti nga hi pfunaka leswaku hi va vanhu lava khensaka?

⁶ I yini leswi nga ku pfunaka leswaku u va munhu wo khensa? Xo sungula, tinyike nkarhi siku ni siku wa ku anakanyisisa hi swilo leswi u tiphinaka ha swona. U nga tlhela u tsala swilo swimbirhi kumbe swinharhu leswi u swi khensaka. (Swir. 3:​22, 23) Xa vumbirhi, swi khense. Vana wo rhanga ku khensa van’wana hikwalaho ka leswi va ku endlelaka swona. Kasi xa nkoka swinene, khensa Yehovha mikarhi hinkwayo. (Ps. 75:1) Hlawula vanghana lava khensaka. Ku khensa swa tlulela; swi tano na hi moya wa ku nga eneriseki, wu ta ku tlulela. (Det. 1:​26-28; 2 Tim. 3:​1, 2, 5) Loko hi tidyondzise ku khensa, hi ta papalata ku nga eneriseki.

7. I yini leswi pfuneke Aci leswaku a va munhu loyi a khensaka naswona ku ve ni vuyelo byihi?

⁷ Twana leswi endlekeleke Aci wa le Indonesia. U ri: “Hi nkarhi wa ntungu wa COVID-19, ndzi sungule ku tiringanisa ni vamakwerhu van’wana naswona hikwalaho ka sweswo a ndzi nga ha enerisekanga.” (Gal. 6:4) I yini leswi n’wi pfuneke ku cinca langutelo? U ri: “Ndzi sungule ku hlayela mikateko leyi a ndzi yi kuma siku ni siku ni ku anakanyisisa hi swilo swo tala leswi ndzi swi kumeke hileswi ndzi nga xirho xa nhlangano wa Xikwembu. Endzhaku ndzi khense Yehovha hikwalaho ka swona. Hi kona ndzi nga sungula ku titwa ndzi enerisekile.” Loko u nga ri na langutelo lerinene, endla hilaha ku fanaka leswaku u ta va munhu la tlangelaka.

TITSONGAHATE

8. Xana Baruku u sungule ku endla yini?

⁸ Baruku a a ri matsalana wa muprofeta Yeremiya naswona a a nyikiwe xiavelo xo tika xa ku seketela muprofeta yoloye loko a ri karhi a byela tiko leri a ri nga yingisi rungula ro tika leri a ri huma eka Yehovha. Kambe hi ku famba ka nkarhi Baruku u sungule ku ka a nga ha eneriseki. Ematshan’weni yo ehleketa hileswi Yehovha a a lava a swi endla, u sungule ku ehleketa ngopfu hi yena ni leswi a lavaka ku swi endla. Hikwalaho hi ku tirhisa Yeremiya, Yehovha u n’wi byele a ku: “U tilavela swilo leswikulu. Tshika ku lava swilo sweswo.” (Yer. 45:​3-5) Hi marito man’wana Yehovha a n’wi byela leswaku a eneriseka hileswi a nga na swona. Baruku u yi amukerile ndzayo yoleyo naswona u ye emahlweni a amukeriwa hi Yehovha.

9. Hi ku ya hi 1 Vakorinto 4:​6, 7, xana ku titsongahata swi ta hi pfuna leswaku hi va ni langutelo rihi? (Nakambe vona swifaniso.)

⁹ Mikarhi yin’wana Mukreste a nga ha vona onge u faneriwa hi xiavelo xo karhi. Swi nga ha endleka a ri ni vuswikoti, a ri na ntokoto naswona a tirha hi matimba kumbe a ri na swona hinkwaswo. Hambiswiritano, swi nga endleka xiavelo lexi a xi lavaka xi nyikiwa wun’wana. Xana u fanele a endla yini? A nga ha anakanyisisa hi leswi muapostola Pawulo a swi tsaleke eka 1 Vakorinto 4:​6, 7. (Yi Hlaye.) Xiavelo xin’wana ni xin’wana lexi hi xi kumaka ni vuswikoti lebyi hi nga na byona swi huma eka Yehovha. A hi swi tirhelanga swilo leswi naswona a swi hi faneli. Yehovha u hi endle vanhu hikwalaho ka musa wakwe lowukulu.—Rhom. 12:​3, 6; Efe. 2:​8, 9.

10. I yini leswi nga hi pfunaka leswaku hi titsongahata?

¹⁰ Swi nga hi pfuna leswaku hi titsongahata loko hi anakanyisisa hi xikombiso lexi Yesu a hi vekeleke xona. Ehleketa hi leswi endlekeke hi vusiku lebyi Yesu a hlambiseke vaapostola vakwe milenge. U endle tano hambileswi a a swi tiva leswaku i N’wana wa Xikwembu naswona a a ri ni vulawuri lebyikulu. Muapostola Yohane u tsale a ku: “Yesu a a swi tiva leswaku Tatana u veke swilo hinkwaswo emavokweni yakwe ni leswaku u te a huma eka Xikwembu naswona a a tlhelela eka xona . . . [u sungule] ku hlambisa vadyondzisiwa vakwe milenge.” (Yoh. 13:​3-5) Phela Yesu a ta va a vone ku ri yena a a fanele a hlambisiwa milenge. Kambe loko a ri laha misaveni, Yesu a nga si tshama a vona onge u faneriwa hi ku hanya vutomi bya vulovolovo ni ku tirheriwa. (Luka 9:58) Yesu a a titsongahata naswona a a eneriseka. Hikwalaho, u hi vekele xikombiso lexinene ngopfu.—Yoh. 13:15.

11. Xana ku titsongahata ku n’wi pfune njhani Dennis leswaku a titwa a enerisekile?

¹¹ Dennis wa le Netherlands, u endle swo karhi leswaku a tekelela ndlela leyi Yesu a titsongahataka hayona kambe u vula leswaku a hi mikarhi hinkwayo swi olovaka. U ri: “Mikarhi yin’wana loko un’wana a kuma xiavelo lexi a ndzi xi lava a ndzi kwata. Loko sweswo swi endleka, a ndzi dyondza hi nhlokomhaka leyi vulavulaka hi ku titsongahata. Eka app ya JW Library^® ndzi hlayise matsalwa lama vulavulaka hi ku titsongahata leswaku ndzi ta hatla ndzi ma kuma loko ndzi lava ku ma hlaya. Ndzi tlhele ndzi dawuniloda mimbulavulo leyi vulavulaka hi ku titsongahata efonini ya mina naswona mikarhi yo tala ndza yi yingisela. Ndzi dyondze leswaku ntirho hinkwawo lowu hi wu endlaka, hi wu endlela ku dzunisa Yehovha ku nga ri leswaku hi voniwa. Nakambe Yehovha wa hi pfumelela leswaku hi pfuneta eka leswi a swi fikelelaka.” Loko u sungula ku ka u nga ha eneriseki hi swiavelo leswi u swi endlaka entirhweni wa Xikwembu, dyondza ku titsongahata. Sweswo swi ta tiyisa vuxaka bya wena na Yehovha ni ku ku pfuna leswaku u titwa u enerisekile.—Yak. 4:​6, 8.

ANAKANYISISA HI SWITSHEMBISO SWA YEHOVHA

12. I xitshembiso xihi lexi nga ta endleka enkarhini lowu taka lexi hi pfunaka hi eneriseka? (Esaya 65:​21-25)

¹² Hi titwa hi enerisekile swinene loko hi anakanyisisa hi ntshembo lowu hi wu languteleke. Eka buku ya Esaya, Yehovha u hi byela leswaku wa swi twisisa leswaku hi langutana na swiphiqo swo tala kambe u tlhela a hi tshembisa leswaku u ta swi susa swiphiqo sweswo. (Hlaya Esaya 65:​21-25.) Hi ta hanya vutomi bya ka byandlana naswona hi nga chavi nchumu. Hi ta tiphina hi ntirho wa hina, hi dya swakudya swo nandziha ni leswi nga na rihanyo. A hi nge he vileli hi makhombo lama nga welaka hina kumbe vana va hina. (Esa. 32:​17, 18; Ezek. 34:25) Hi langutele vumundzuku lebyinene ni lebyi sirhelelekeke.

13. Hi le ka swiyimo swihi laha swi nga ha lavaka leswaku hi ehleketisisa swinene hi ntshembo wa hina?

¹³ Hikwalahokayini swi ri swa nkoka ku anakanyisisa hi ntshembo wa hina? Hikuva hi hanya “emasikwini yo hetelela” naswona hinkwerhu hi na swiphiqo leswi hi ‘tikelaka.’ (2 Tim. 3:1) Siku ni siku Yehovha u hi pfuna leswaku hi tiyisela hi ku va a hi kongomisa, a hi nyika matimba ni ku tlhela a hi seketela. (Ps. 145:14) Ku engetela kwalaho, ntshembo lowu hi nga na wona tanihi Vakreste wa hi pfuna loko hi ri eka swiyimo swo tika. Xana swi le ku ku tikeleni ku khathalela ndyangu wa wena? Loko swi ri tano, xana sweswo swi vula leswaku u ta tshamela ku hlupheka? A swi tano nikatsongo! Yehovha u tshembisa ku hi nyika leswi hi swi lavaka ni swo tala eParadeyisini. (Ps. 9:18; 72:​12-14) Kumbexana u ni vuvabyi lebyi nga tshungulekiki kumbe u tshikilelekile emiehleketweni. Xana u to tshamela ku hlupheka vutomi bya wena hinkwabyo u nga kumi mpfuno? Nikatsongo. Mavabyi ni rifu a swi nge he vi kona emisaveni ya Xikwembu leyintshwa. (Nhlav. 21:​3, 4) Ntshembo wolowo wu ta hi pfuna leswaku hi eneriseka ni leswaku hi nga hlundzuki hambi ku ri sweswi. Hi nga eneriseka hambiloko hi nga khomiwi kahle, hi loveriwa, hi vabya kumbe hi langutana na miringo yin’wana. Hikwalahokayini? Hikuva swi nga ri na mhaka leswaku swiyimo swa hina swi tika ku fikela kwihi, ha swi tiva leswaku ‘nhlomulo i wa nkarhinyana’ ni leswaku swilo hinkwaswo leswi hi tikiselaka vutomi swi ta hela ku nga ri khale emisaveni leyintshwa.—2 Kor. 4:​17, 18.

14. Hi nga wu tiyisa njhani ntshembo wa hina?

¹⁴ Leswi ntshembo wu nga wa nkoka leswaku hi kota ku eneriseka, hi nga endla yini leswaku hi wu tiyisa? Ku fana na leswi swi nga lavaka leswaku munhu a sulasula manghilazi yakwe leswaku a kota ku wu vona kahle nchumu lowu nga ekule, swi nga lava hi endla swo karhi leswaku hi tiyisa ntshembo wa hina leswaku hi ta kota ku swi vona kahle switshembiso leswi nga ta hetiseka eParadeyisini. Loko hi vilela hikwalaho ka swa timali, hi nga anakanyisisa hi ndlela leyi vutomi bya hina byi nga ta va hayona loko swiphiqo hinkwaswo swa timali swi herile, hi nga ha ri na swikweleti naswona hi nga ha hlupheki. Loko ku ve hi hele matimba hikwalaho ka leswi hi nga kumangiki xiavelo xo karhi, hi nga anakanyisisa hi ndlela leyi swilo sweswo swi nga taka swi nga ha ri swa nkoka hayona loko swi pimanisiwa ni ndlela leyi vutomi byi nga ta va hayona loko hi nga ha ri na xidyoho. (1 Tim. 6:19) Eku sunguleni swi nga hi tikela ku anakanyisisa hi ndlela leyi vutomi byi nga ta va hayona enkarhini lowu taka hikwalaho ka leswi hi vilelaka hi swilo leswi endlekaka namuntlha. Hambiswiritano, hi ku famba ka nkarhi loko hi anakanyisisa hi leswi Yehovha a hi endlelaka swona swi ta ya swi hi olovela ku anakanyisisa ha swona.

15. U dyondza yini eka leswi vuriweke hi Christa?

¹⁵ Xiya ndlela leyi ntshembo wu n’wi pfuneke hayona Christa, nsati wa Dennis loyi hi vulavuleke ha yena. U ri: “Ndzi ni vuvabyi lebyi tsanisaka miri wa mina naswona hikwalaho ka byona ndzi famba hi xitulu xa lava lamaleke naswona ndzi heta nkarhi wo tala ndzi etlele. Ndzi tshamela ku twa ku vava masiku hinkwawo. Sweswinyana dokodela wa ha ku ndzi byela leswaku a ndzi nge antswi. Kambe ndzi tibyele leswi: ‘U vona swilo hi ndlela yo hambana.’ Kambe ndzi ehleketisisa hi ntshembo lowu ndzi nga na wona naswona wu ndzi nyika ku rhula ka miehleketo. Hambileswi namuntlha ndzi bohekaka ku tiyisela ku hanya emisaveni leyi kambe ndza tiyiseka leswaku emisaveni leyintshwa ndzi ta tiphina!”

“LAVA N’WI CHAVAKA A VA PFUMALI NCHUMU”

16. Hikwalahokayini Hosi Davhida a tsale leswaku lava chavaka Yehovha “a va pfumali nchumu”?

¹⁶ A swi vuli swona leswaku loko nandza wa Yehovha a enerisekile a nge langutani na swiphiqo. Hosi Davhida u loveriwe hi vana vanharhu, u hehliwile, a xengiwa ni ku va mubaleki ku ringana malembe yo tala. Nilokoswiritano, u vule leswi hi Yehovha hambiloko a ha ri emiringweni leyikulu: “Lava n’wi chavaka a va pfumali nchumu.” (Ps. 34:​9, 10) Hikwalahokayini a vule sweswo? Hikuva hambileswi hi nga vanhu va Yehovha, a hi langutelanga leswaku swilo swi khuluka kunene kambe ha tiyiseka leswaku a hi nge pfuki hi pfumale swilo leswi lavekaka. (Ps. 145:16) Nakambe hi nga titshega hi Yehovha leswaku a hi pfuna eka miringo ya hina hinkwayo. Hikwalaho, hi nga eneriseka.

17. Hikwalahokayini u tiyimisele ku dyondza xihundla xa ku eneriseka?

¹⁷ Yehovha u lava leswaku u eneriseka. (Ps. 131:​1, 2) Hikwalaho, dyondza xihundla xa ku eneriseka. Loko u tirha hi matimba leswaku u va loyi a tlangelaka, u titsongahata ni ku tiyisa ntshembo wa wena u ta kota ku vula u ku: “Ndzi enerisekile.”—Ps. 16:​5, 6.