Hatla U Pfuna Vanhu Lava Tsakelaka

1. Xana vanhu va endla yini loko va twa mahungu lamanene? (Mitirho 13:​47, 48; 16:​14, 15)

EMIKARHINI ya Vakreste vo sungula, vanhu vo tala a va amukela ntiyiso kwala na kwala. (Hlaya Mitirho 13:​47, 48; 16:​14, 15.) Ninamuntlha, van’wana va kombisa ku tsakela loko va twa mahungu lamanene ro sungula. Swi tano ni hi lava a va nga ma amukeli eku sunguleni. Hi ku famba ka nkarhi, va cinca ivi va kombisa ku tsakela. Hi fanele hi endla yini loko hi kuma lava tsakelaka ensin’wini ya hina?

2. Xana ntirho wo endla vanhu vadyondzisiwa wu fana njhani ni wa murimi?

² Hi xikombiso, ntirho wa hina wo endla vanhu vadyondzisiwa wu nga fanisiwa ni ntirho wa murimi. Loko muhandzu wu wupfile, murimi wa wu tshovela hambiloko a ha ri eku rimeni kumbe eku byaleni kun’wana. Hilaha ku fanaka, loko hi hlangana ni munhu loyi a lavaka ku twa mahungu lamanene, hi hatla hi n’wi pfuna leswaku a va mudyondzisiwa wa Kreste. Nilokoswiritano, hi ya emahlweni hi pfuna lava lavaka nkarhi lowu engetelekeke leswaku na vona va navela ku dyondza. (Yoh. 4:​35, 36) Hikwalaho, loko hi va tiva kahle vanhu lava hi va chumayelaka, swi ta hi pfuna leswaku hi tiva ndlela leyinene yo va pfuna. Sweswi a hi buleni hi leswi hi nga swi endlaka loko hi sungula ku chumayela munhu loyi a tsakelaka ku dyondza. Hi ta tlhela hi bula hi ndlela leyi hi nga va pfunaka hayona vanhu vo tano leswaku va ya emahlweni va dyondza hi Yehovha.

NDLELA YO PFUNA VANHU LAVA TSAKELAKA

3. Hi nga endla yini loko hi hlangana ni vanhu lava tsakelaka ensin’wini ya hina? (1 Vakorinto 9:26)

³ Loko hi kuma vanhu lava tsakelaka ensin’wini, hi lava ku hatla hi va pfuna leswaku va sungula ku famba endleleni leyi yisaka evuton’wini. Nakambe a hi fanelanga hi kanakana ku kombela ku dyondza na vona Bibele ni ku va rhamba etinhlengeletanweni ta vandlha to ho suka.—Hlaya 1 Vakorinto 9:26.

4. Hlamusela ntokoto wa munhu loyi a a lunghekele ku dyondza Bibele hi nkarhi wolowo.

⁴ Kombela dyondzo ya Bibele. Van’wana lava hi va chumayelaka va lava ku dyondza Bibele to ho suka. Hi xikombiso, siku rin’wana hi Ravumune, sesi un’wana wa le Canada u tshinelele xigolonyana kutani a teka broxara leyi nge, Tiphine Hi Vutomi Hilaha Ku Nga Heriki! Makwerhu wa xisati loyi a a yime exigolonyanini u n’wi byele leswaku va nga sungula ku dyondza Bibele mahala hi ku tirhisa broxara yoleyo. Leswi sesi yoloye a a tsakela, u n’wi nyike tinomboro ta yena ta foni. Endzhakunyana hi siku rero, sesi yoloye u tsalele makwerhu wa xisati a n’wi vutisa leswaku va nga sungula rini ku dyondza. Loko makwerhu wa xisati a n’wi byele leswaku va ta sungula hi mahelovhiki, sesi yoloye u te: “Ndzi kombela hi sungula mundzuku hikuva ndza kumeka.” Va sungule ku dyondza hi xamundzuku wa kona. Nakambe u ye etidyondzweni ro sungula hi mahelovhiki wolawo naswona u ye emahlweni a endla nhluvuko hi ku hatlisa.

5. I yini leswi nga hi pfunaka hi kota ku sungula ku dyondza Bibele na munhu? (Nakambe vona swifaniso.)

⁵ I ntiyiso ku a hi langutelanga leswaku vanhu hinkwavo lava hi va chumayelaka va va ni torha ro lava ku dyondza ntiyiso ku fana ni sesi loyi hi buleke ha yena. Van’wana va nga ha lava nkarhi lowu engetelekeke. Van’wana swi nga lava hi sungula hi ku bula na vona hi timhaka leti va tsakisaka. Hambiswiritano, swi nga lava hi va ni langutelo lerinene ni ku kombisa leswaku ha khathala hi vona, kumbexana siku rin’wana hi nga ha sungula dyondzo ya Bibele. Hi nga kombela njhani ku dyondza na munhu Bibele? Xivutiso lexi xi vutisiwe vamakwerhu vo hlayanyana lava nga ni vuswikoti byo sungula tidyondzo ta Bibele.

6. Hi nga vula yini leswaku hi ya emahlweni hi bula ni munhu la tsakelaka?

⁶ Vahuweleri ni maphayona lama vutisiweke hi tindlela to sungula tidyondzo ta Bibele, ma hlamusele leswaku ematikweni man’wana i swinene ku papalata marito lama nge, “dyondzo,” “dyondzo ya Bibele” kumbe “ku ku dyondzisa” loko hi hlamusela leswi endlekaka eka dyondzo. Va xiye leswaku leswi pfunaka swinene i ku tirhisa marito lama fanaka ni lama nge, “ku burisana” ni lama nge, “tiva swo tala hi Bibele.” Leswaku u pfula ndlela yo tlhela u bula ni munhu hi Bibele, u nga ha ku, “Yi nga ku hlamarisa ndlela leyi Bibele yi swi hlamulaka hayona swivutiso swa hina swa nkoka leswi hi nga na swona evuton’wini” kumbe “Bibele a ko va buku ya kereke ntsena; yi nga hi pfuna eka vutomi bya hina bya siku ni siku.” U nga tlhela u ku, “A hi nge teki nkarhi wo leha; hi to bula timinete ta 10 ku ya eka 15 leswaku u dyondza swilo swa nkoka.” Hi nga papalata ku vula marito lama nge, “hi ta dyondza vhiki ni vhiki” leswi nga endlaka a titwa a boheka ku dyondza.

7. Van’wana va swi xiye rini leswaku va kume ntiyiso? (1 Vakorinto 14:​23-25)

⁷ N’wi rhambe etidyondzweni. Swi tikomba onge hi nkarhi wa muapostola Pawulo, van’wana va sungule ku twisisa ntiyiso wa le Bibeleni loko va sungula ku ya etinhlengeletanweni ta vandlha ta Vukreste. (Hlaya 1 Vakorinto 14:​23-25.) Swi tano ninamuntlha. Vo tala lava sungulaka ku dyondza Bibele va endla nhluvuko loko va sungula ku ta etidyondzweni. Kambe hi fanele hi va rhamba rini etidyondzweni? Dyondzo 10 ya buku leyi nge, Tiphine Hi Vutomi Hilaha Ku Nga Heriki! yi ni xirhambo lexi rhambaka vanhu etinhlengeletanweni ta vandlha kambe a swi kali swi lava hi rindza kukondza hi fika eka dyondzo yoleyo. Loko hi va chumayela ro sungula, hi nga namba hi va rhamba etinhlengeletanweni ta vandlha ta mahelovhiki, kumbexana hi va byela nhlokomhaka ya mbulavulo kumbe leswi hi nga ta swi dyondza eka dyondzo ya Xihondzo xo Rindza ya vhiki rero.

8. Hi nga n’wi hlamusela yini munhu loyi hi n’wi rhambaka etinhlengeletanweni ta vandlha? (Esaya 54:13)

⁸ Loko u rhamba munhu la tsakelaka, n’wi hlamusele ndlela leyi tinhlengeletano ta hina ti hambanaka hayona ni leswi endlekaka etikerekeni tin’wana. Loko xichudeni xin’wana xi ve kona ro sungula eka Dyondzo ya Xihondzo xo Rindza, xi vutise makwerhu loyi a a xi dyondzela xi ku, “Xana loyi a a fambisa Xihondzo u tiva mavito ya vanhu hinkwavo?” Makwerhu yoloye u xi byele leswaku hinkwerhu hi ringeta ku tiva mavito ya vanhu hinkwavo evandlheni hilaha hi tivaka mavito ya swirho swa ndyangu wa hina. Xichudeni xexo xi vone leswi swi hambane ekule ni leswi xi swi toloveleke ekerekeni ya xona. Hilaha ku fanaka, vo tala lava hi va rhambaka a va swi tolovelanga leswi hi swi endlaka etidyondzweni. (Hlaya Esaya 54:13.) Ha hlengeletana leswaku hi gandzela Yehovha, hi dyondza ha yena ni ku tlhela hi khutazana. (Hev. 2:12; 10:​24, 25) Hikwalaho ka sweswo, tinhlengeletano ta hina ti hlelekile naswona a hi endli mihivahivani. (1 Kor. 14:40) Tiholo ta hina ta Mfumo a ti endliwanga hi ndlela yo hlamarisa hikuva xikongomelonkulu i ku gandzela eka tona. A hi byeriwi ku seketela ntlawa wo karhi wa politiki hikuva a hi katseki eka tona naswona a hi endli minjhekanjhekisano kumbe hi phikizana loko hi ri eHolweni ya Mfumo. Swi nga pfuna ku komba xichudeni vhidiyo leyi nge, Ku Endliwa Yini eHolweni ya Mfumo? xi nga si ya etinhlengeletanweni ta vandlha. Hi ndlela yoleyo xi ta tiva leswi nga ta endleka loko xi ya.

9-10. Loko hi rhamba munhu etidyondzweni, hi nga n’wi tiyisekisa njhani leswaku a nge sindzisiwi ku va Mbhoni ya Yehovha kumbe ku hlamula? (Nakambe vona xifaniso.)

⁹ Van’wana va kanakana ku ta etinhlengeletanweni ta vandlha hikuva va chava ku byeriwa leswaku va fanele va va Timbhoni ta Yehovha. Tiyisekisa munhu loyi u n’wi rhambaka leswaku ha swi rhandza ku endzeriwa naswona a hi sindzisi munhu leswaku a va Mbhoni ya Yehovha kumbe ku hlamula etidyondzweni. Vanhu hinkwavo va amukelekile ku katsa ni mindyangu leyi nga ni vana. ETinhlengeletanweni ta hina a ku na mitlawa laha vana va dyondzisiwaka va ri voxe. Ku ri na sweswo, vana va tshama ni vatswari va vona loko hi ri karhi hi dyondzisiwa. Hi ndlela yoleyo, vatswari va swi tiva leswaku vana va vona va na mani naswona va dyondzisiwa yini. (Det. 31:12) A ku kolekiwi mali ya minyikelo kumbe hi nyikiwa timvhilopho to chela mali ya munyikelo. Ku ri na sweswo, hi yingisa xileriso xa Yesu lexi nge: “Mi nyikiwe mahala, nyikani mahala.” (Mat. 10:8) U nga tlhela u n’wi hlamusela leswaku a swi kali swi lava leswaku a ambala swiambalo swo durha leswaku a kota ku ta etidyondzweni. Xikwembu xi languta mbilu ya munhu ku nga ri ndlela leyi a langutekaka hayona.—1 Sam. 16:7.

¹⁰ Loko a ta etidyondzweni, n’wi endle a titwa a ri ekaya. U nga endla tano hi ku n’wi tivisa eka vakulu ni le ka vamakwerhu. Phela loko a titwa a amukelekile, u ta navela ku tlhela a vuya. Nakambe hi nkarhi wa tidyondzo, loko a nga ri na Bibele hlaya na yena naswona n’wi pfune a fambisana ni xivulavuri.

LESWI HI FANELEKE HI SWI ENDLA LOKO HI SUNGULE KU DYONDZA NA MUNHU BIBELE

11. U nga swi kombisa njhani leswaku u xixima nkarhi wa n’wini wa muti ni leswi a lavaka ku swi endla?

¹¹ I yini leswi hi faneleke hi swi tekela enhlokweni loko hi dyondza na munhu Bibele? Xixima nkarhi wa n’wini wa muti na ku tsundzuka leswaku ku ni leswi a faneleke a swi endla. Hi xikombiso, loko u twane ni n’wini wa muti leswaku u ta fika hi nkarhi wo karhi, fika hi wona hambiloko vanhu va le ndhawini ya ka n’wina ku nga ri vanhu va ku khoma nkarhi. Nakambe swi nga va kahle loko u nga lehisi loko ma ha ku sungula ku dyondza. Vamakwerhu van’wana lava nga ni ntokoto va vula leswaku i swinene ku hatla mi heta dyondzo hambiloko munhu a ha lava ku twa swo tala. U nga vulavuli ngopfu kambe tshika n’wini wa muti a tiphofula loko mi ri karhi mi dyondza.—Swiv. 10:19.

12. U fanele u sungula dyondzo ya Bibele hi xikongomelo xihi?

¹² To ho tswee, xikongomelo xa wena ku fanele ku va ku pfuna loyi u dyondzaka na yena Bibele leswaku a tiva Yehovha na Yesu ni ku tlhela a va rhandza swinene. U nga endla tano hi ku va u n’wi dyondzisa leswi humaka eRitweni ra Xikwembu ku nga ri leswi humaka eka wena. (Mit. 10:​25, 26) Leswaku Yehovha a hi pfuna hi n’wi tiva kahle ni ku tlhela hi n’wi rhandza, u rhume Yesu Kreste loyi mikarhi yo tala muapostola Pawulo a a dyondziseke ha yena. (1 Kor. 2:​1, 2) Pawulo u tlhele a swi veka erivaleni leswaku i swa nkoka ku pfuna vadyondzisiwa lavantshwa leswaku va va ni vumunhu lebyinene lebyi hi nga byi fanisaka na nsuku, silivhere ni maribye ya risima. (1 Kor. 3:​11-15) Leswi swi katsa ku va ni ripfumelo, vutlhari, ku twisisa ni ku chava Yehovha. (Ps. 19:​9, 10; Swiv. 3:​13-15; 1 Pet. 1:7) Tekelela ndlela leyi Pawulo a a dyondzisa hayona hi ku pfuna xichudeni xa wena leswaku xi va ni ripfumelo leri tiyeke ni ku va ni vuxaka lebyinene ni Tata wa xona wa le tilweni la nga ni rirhandzu.—2 Kor. 1:24.

13. Hi nga swi kombisa njhani leswaku hi lehisa mbilu naswona ha twisisa loko hi ri karhi hi pfuna vanhu lava tsakelaka? (2 Vakorinto 10:​4, 5) (Nakambe vona xifaniso.)

¹³ Tekelela ndlela leyi Yesu a a dyondzisa hayona hi ku va u lehisa mbilu ni ku va munhu la twisisaka. Papalata ku vutisa swivutiso leswi nga ta endla munhu a titwa a nga tshunxekanga. Loko swi fanerile, hundzani tinhla leti tikelaka xichudeni ku ti twisisa ivi mi tlhelela eka tona endzhaku. Ematshan’weni yo xi sindzisa leswaku xi tshemba tidyondzo leti xi ti dyondzaka hambiloko xi nga si ti twisisa, xi nyike nkarhi wa leswaku ntiyiso wu rhanga wu dzima timitsu embilwini ya xona. (Yoh. 16:12; Kol. 2:​6, 7) Bibele yi vula leswaku tidyondzo ta mavunwa ti fana ni “swilo leswi simekiweke swi tiya” leswi hi faneleke hi swi “wisetela.” (Hlaya 2 Vakorinto 10:​4, 5.) Hi fanele hi pfuna xichudeni leswaku xi tshemba Yehovha ematshan’weni yo ringeta ku xi tshikisa hi nkarhi wun’we tidyondzo ta mavunwa leti ku nga khale xi ti tshemba.—Ps. 91:9.

NDLELA YO PFUNA LAVA TAKA RO SUNGULA ETINHLENGELETANWENI TA VANDLHA

14. Hi fanele hi va khoma njhani vanhu lava taka ro sungula etidyondzweni?

¹⁴ Yehovha u lava leswaku hi khoma vanhu hinkwavo ku fana swi nga ri na mhaka leswaku i va ndhavuko wihi, xiyimo xa vona xa timali xi njhani kumbe i va rixaka rihi. (Yak. 2:​1-4, 9) Hikwalaho, hi nga endla yini ku kombisa leswaku ha va rhandza vanhu lava taka ro sungula etidyondzweni?

15-16. Hi nga va pfuna njhani vanhu lava taka ro sungula etidyondzweni leswaku va titwa va amukelekile?

¹⁵ Vanhu van’wana va ta etidyondzweni hileswi va lavaka ku vona leswaku hi endla yini loko hi hlengeletanile kasi van’wana hi leswi va rhambiweke hi munhu loyi a tshamaka endhawini yin’wana. Hikwalaho, a hi fanelanga hi fambela ekule na vona loko va tile. Va amukele kambe papalata ku va endla va titwa va nga tshunxekanga. Va kombele leswaku va tshama na wena, u hlaya na vona Bibele ku katsa ni leswi dyondziwaka kumbe u va nyika tikopi ta vona. Nakambe lava tindlela to va endla ta titwa va tshunxekile. Wanuna un’wana loyi a hi endzerile eHolweni ya Mfumo u byele makwerhu la n’wi amukeleke leswaku a a chuhile hileswi a ambaleke ku hambana ni vamakwerhu. Makwerhu u n’wi endle a titwa a tshunxeka ni ku tlhela a n’wi byela leswaku Timbhoni ta Yehovha ti fana ni vanhu van’wana ni van’wana. Wanuna yoloye a nga swi rivalanga leswi makwerhu a n’wi byeleke swona naswona eku heteleleni u endle nhluvuko ivi a khuvuriwa. Kambe tsundzuka leswi: Loko u vulavula ni vanhu lava hi endzeleke etidyondzweni, swi kombise leswaku wa khathala ha vona kambe u nga ngheneleli eka timhaka ta vona.—1 Pet. 4:15.

¹⁶ Hi nga tlhela hi endla vanhu lava hi endzeleke etidyondzweni va titwa va amukelekile hi ku va hi va xixima loko hi vulavula ha vona kumbe hi leswi va swi pfumelaka, ku nga ha va loko hi tidyela mabulo, hi hlamula kumbe loko hi nyikela mimbulavulo. Papalata ku tirhisa marito lama nga ha va khunguvanyisaka kumbe lama nga ta endla va nga ha swi tsakeli ku tlhela va hi endzela. (Tito 2:8; 3:2.) Hi xikombiso, a hi nge pfuki hi sandze tidyondzo ta vona. (2 Kor. 6:3) Hikwalaho loko swi ta emhakeni leyi, vamakwerhu va xinuna lava nyikelaka mimbulavulo va fanele va tivonela leswaku a va vulavuli ku biha hi vukhongeri bya vanhu van’wana. Nakambe va kombisa leswaku va ehleketelela vanhu lava nga riki Timbhoni lava nga kona eHolweni ya Mfumo hi ku hlamusela marito lama va nga ma tiviki.

17. Hi fanele hi endla yini loko hi kuma vanhu lava “kombi[saka] leswaku va lava ku kuma vutomi lebyi nga heriki” ensin’wini ya hina?

¹⁷ Ntirho wa hina wo endla vadyondzisiwa wu ya wu va wa xihatla siku rin’wana ni rin’wana naswona hi ya emahlweni hi kuma vanhu lava “kombi[saka] leswaku va lava ku kuma vutomi lebyi nga heriki.” (Mit. 13:48) Loko hi va kuma, hi fanele hi hatla hi kombela ku dyondza na vona Bibele kumbe hi va rhamba etinhlengeletanweni ta vandlha. Loko hi endla tano, hi ta va pfuna leswaku va sungula ku famba endleleni leyi “yisaka evuton’wini.”—Mat. 7:14.