Rirhandzu Ra Xikwembu A Ri Heli

1-2. Vakreste vo tala va langutana ni tlhontlho wihi?

EHLEKETA hi xikepe lexi nga elwandle leri nga ni xidzedze lexikulu. Xi yisiwa ehansi ni le henhla hi magandlati lamakulu naswona xi ta ya kun’wana ni kun’wana laha magandlati ma xi yisaka kona handle ka loko munhu o lahlela nsoma elwandle. Nsoma wolowo wu ta endla leswaku xi nga yi le na le kambe xi tshama endhawini yin’we.

² Ku fana ni xikepe xolexo, loko u ri endzingweni lowukulu ndlela leyi u titwaka hayona yi nga cincacinca hi ku hatlisa. Namuntlha wa tiyiseka leswaku Yehovha wa ku rhandza naswona wa ku seketela. Kambe mundzuku a wa ha titwi tano, wa tivutisa loko a swi vona leswi u langutaneke na swona. (Ps. 10:1; 13:1) Kumbexana munghana wa wena wa ku chavelela naswona sweswo swi ku endla u titwa u antswa ku ringana nkarhi wo karhi. (Swiv. 17:17; 25:11) Kambe ku kanakana lokuya ku tlhela ku vuya. U nga ha tivutisa loko Yehovha a ku tshikile. U nga tiyisiwa hi yini loko u ri endzingweni? Hi marito man’wana, i yini leswi nga endlaka u tshama u ri karhi u tiyiseka leswaku Yehovha wa ku rhandza naswona a nga ku lahlelanga mavoko?

3. Xiga lexi nge “rirhandzu lerikulu” lexi boxiwaka eka Pisalema 31:7 na 136:1 xi vula yini naswona hikwalahokayini hi vula leswaku Yehovha hi yena xikombiso lexikulu xa rirhandzu ro tano? (Nakambe vona xifaniso.)

³ Ndlela yin’wana leyi nga ku pfunaka leswaku u tshama u tiyile loko u ri endzingweni, i ku tsundzuka rirhandzu lerikulu ra Yehovha. (Hlaya Pisalema 31:7; 136:1.) Xiga lexi nge, “rirhandzu lerikulu” xi vula rirhandzu lerikulu leri nga heriki leri munhu a nga na rona eka munhu un’wana. Yehovha hi yena xikombiso lexikulu xa rirhandzu ro tano. Entiyisweni Bibele yi n’wi hlamusela a ri “ni rirhandzu.” (Eks. 34:​6, 7) Yi tlhela yi vula leswaku Yehovha “u rhandza hinkwavo lava [n’wi] vitanaka.” (Ps. 86:5) Ehleketa hi leswi sweswo swi vulaka swona: Yehovha a nge pfuki a tshike malandza yakwe yo tshembeka! Nakambe ku tsundzuka leswaku Yehovha wa tshembeka swi ta ku tiyisa loko u langutane ni ndzingo wo tika ku fana ni nsoma lowu endlaka leswaku xikepe xi nga khukhuriwi.—Ps. 23:4.

TEKA RIRHANDZU RA YEHOVHA TANIHI YIN’WANA YA TIDYONDZO TA MASUNGULO TA BIBELE

4. Vula swikombiso swa tidyondzo ta masungulo ta Bibele ni ku hlamusela leswaku hikwalahokayini hi nga kanganyisiwi hi ku olova.

⁴ Ndlela yin’wana leyi nga ku pfunaka leswaku u tshama u tiyile loko u ri endzingweni, i ku teka rirhandzu ra Yehovha tanihi yin’wana ya tidyondzo ta masungulo ta Bibele. U ehleketa yini loko u twa xiga lexi nge, “tidyondzo ta masungulo ta Bibele”? Kumbexana u ehleketa hi tidyondzo leti u ti dyondzeke eRitweni ra Xikwembu. Hi xikombiso, u dyondze leswaku vito ra Xikwembu i Yehovha, Yesu i N’wana wa Xikwembu la tswariweke a ri swakwe, vafi a va tivi nchumu ni leswaku misava yi ta va paradeyisi leyi vanhu va nga ta hanya eka yona hilaha ku nga heriki. (Ps. 83:18; Ekl. 9:5; Yoh. 3:16; Nhlav. 21:​3, 4) Endzhaku ka loko u khorwisekile hi tidyondzo toleto, a wu pfumelelanga munhu leswaku a ku tshikisa. Hikwalahokayini? Hikuva u tive leswaku i ntiyiso. A hi voneni ndlela leyi ku teka rirhandzu ra Yehovha tanihi tidyondzo ta masungulo ta Bibele, swi ku pfunaka hayona u bakanya miehleketo ya leswaku Yehovha a nga swi voni kumbe ku khathala hi swilo leswi u langutanaka na swona.

5. Hlamusela ndlela leyi tidyondzo ta mavunwa hi ti tshikaka hayona.

⁵ Loko u sungula ku dyondza Bibele, i yini leswi ku pfuneke leswaku u tshika ku pfumela eka tidyondzo ta mavunwa? Kumbexana u pfuniwe hi ku kambisisa leswi a wu swi dyondza eMatsalweni ni leswi dyondzisiwaka ekerekeni ya wena. Ehleketa hi xikombiso lexi: A hi nge u tshame u pfumela leswaku Yesu i Xikwembu xa Matimba Hinkwawo. Loko u ri karhi u dyondza Bibele, kumbexana u tivutise leswi, ‘Xana dyondzo leyi i ntiyiso hakunene?’ Endzhaku ka loko u kambisise vumbhoni bya le Matsalweni, u swi vonile leswaku dyondzo yoleyo a hi ntiyiso. Hiloko u siva dyondzo yoleyo ya mavunwa hi ntiyiso wa le Bibeleni wa leswaku Yesu i “mativula ya ntumbuluko hinkwawo” tlhelo “N’wana wa Xikwembu loyi a tswariweke a ri swakwe.” (Kol. 1:15; Yoh. 3:18) I ntiyiso leswaku tidyondzo ta mavunwa ti nga fanisiwa ni “swilo leswi simekiweke swi tiya” leswi tikaka ku swi tsuvula. (2 Kor. 10:​4, 5) Kambe leswi u ti tsuvuleke, a wa ha tlhelelanga eka tidyondzo toleto leti u tshikeke ku ti pfumela.—Filp. 3:13.

6. I yini leswi nga ku tiyisekisaka leswaku ‘rirhandzu lerikulu ra Yehovha a ri heli’?

⁶ U nga endla leswi fanaka loko swi ta eka leswi Bibele yi swi dyondzisaka hi rirhandzu ra Yehovha. Loko u ri endzingweni ivi u sungula ku kanakana leswaku Yehovha wa ku rhandza, tivutise leswi, ‘Xana leswi ndzi swi ehleketaka i ntiyiso?’ Endzhaku, ehleketisisa hi leswi ku kanakanisaka ni marito ya Pisalema 136:1 leyi ku nga tsalwankulu ra nhlokomhaka leyi. Rito ra Xiheveru leri hundzuluxeriweke ri va ‘rirhandzu’ ri katsa ni ku tshembeka. Hikwalahokayini Yehovha a endle leswaku mupisalema a hlamusela rirhandzu rakwe hi ndlela leyi? Nakambe hikwalahokayini rirhandzu ra Xikwembu ri phindhiwe ka 26 eka pisalema yoleyo? Hilaha hi dyondzeke hakona, ndlela leyi Yehovha a va rhandzaka hayona vanhu vakwe, i yin’wana ya tidyondzo ta masungulo ta Bibele leti fanaka ni tidyondzo tin’wana leti se u ti tshembaka naswona ti humaka eRitweni ra Xikwembu. Mhaka ya leswaku Yehovha u ku teka u nga pfuni nchumu naswona u nga rhandzeki, i mavunwa ya rihlaza. Bakanya dyondzo yoleyo hilaha a wu ta endla hakona loko swi ta eka tidyondzo letin’wana ta mavunwa.

7. Vula swikombiso swin’wana swa matsalwa lama hi tiyisekisaka leswaku Yehovha wa hi rhandza.

⁷ Bibele yi ni vumbhoni byo tala bya leswaku Yehovha wa hi rhandza. Hi xikombiso, Yesu u byele valandzeri vakwe a ku: “Mi va nkoka ku tlula swindzingiri swo tala.” (Mat. 10:31) Yehovha na yena u tlhele a byela vanhu vakwe a ku: “Ndzi ta [mi] tiyisa, ina, ndzi ta [mi] pfuna. Ndzi ta [mi] khoma swi tiya hi voko ra mina ra xinene ra ku lulama.” (Esa. 41:10) Xiya ndlela leyi marito lawa ma nga erivaleni hayona. Yesu a nga vulanga a ku, ‘Swi nga endleka mi ri va nkoka ku tlula,’ nakambe Yehovha a nga vulanga a ku, ‘Kumbexana ndzi ta ku pfuna.’ Ku ri na sweswo va ri: “Mi va nkoka ku tlula” naswona “Ndzi ta [mi] pfuna.” Loko ku ve u tshama u kanakana leswaku Yehovha wa ku rhandza loko u ri endzingweni, matsalwa yo fana ni lawa ma ta endla u titwa u antswa ni ku tlhela ma ku tiyisekisa leswaku Yehovha wa ku rhandza. Phela leswi ma swi vulaka i ntiyiso. Loko u khongela ni ku anakanyisisa hi mhaka leyi, swi ta ku endla u pfumelelana ni marito ya 1 Yohane 4:16 leyi nge: “Ha swi tiva leswaku Xikwembu xa hi rhandza naswona ha swi tshemba.”a

8. U nga endla yini loko mikarhi yin’wana u kanakana leswaku Yehovha wa ku rhandza?

⁸ Kambe ku vuriwa yini loko mikarhi yin’wana u kanakana leswaku Yehovha wa ku rhandza? Ehleketa hi ndlela leyi u titwaka hayona ni leswi u swi tivaka. Ndlela leyi hi titwaka hayona ya cincacinca ku hambana ni ntiyiso lowu nga cinciki lowu hi wu dyondzeke eMatsalweni wa leswaku Yehovha i rirhandzu. Loko hi nga swi tshembi leswaku Yehovha wa hi rhandza, swi fana ni loko hi nga swi tshembi leswaku yena hi yexe i rirhandzu.—1 Yoh. 4:8.

ANAKANYISISA HI NDLELA LEYI YEHOVHA A KU ‘RHANDZAKA’ HAYONA

9-10. Yesu a a vula yini loko a ku, “Tatana wa mi rhandza” eka Yohane 16:​26, 27? (Nakambe vona xifaniso.)

⁹ Hi nga dyondza swo tala hi rirhandzu ra Yehovha loko hi kambisisa marito lawa Yesu a ma byeleke valandzeri vakwe, lama nge: “Tatana wa mi rhandza.” (Hlaya Yohane 16:​26, 27.) Yesu a nga byelanga valandzeri vakwe marito lawa ntsena hileswi a a lava leswaku va tsaka. Ku ri na sweswo, mongo wa tsalwa leri wu kombisa leswaku a a nga vulavuli hi ndlela leyi a va titwa hayona hi nkarhi wolowo. Kambe a a vulavula hi mhaka yin’wana ku nga xikhongelo.

¹⁰ Yesu a ha ku byela vadyondzisiwa vakwe leswaku va fanele va tirhisa vito rakwe loko va khongela kambe va nga khongeli eka yena. (Yoh. 16:​23, 24) A swi ri swa nkoka leswaku va yi tiva mhaka leyi. Endzhaku ka loko Yesu a pfuxiwile, swi nga endleka a va ringeta ku khongela eka yena. Phela a va n’wi teka a ri munghana wa vona. Kumbexana a va ehleketa leswaku leswi a a va rhandza, a a ta yingisela swikhongelo swa vona ivi a swi hundzisela eka Tata wakwe. Hambiswiritano, Yesu u va byele leswaku a va nga fanelanga va ehleketa hi ndlela leyi. Hikwalahokayini? Hikuva u va byele leswi: “Tatana wa mi rhandza.” Ntiyiso lowu hi lowu dyondziwaka eka dyondzo ya masungulo mayelana ni xikhongelo eBibeleni. Ehleketa hi leswi sweswo swi vulaka swona eka wena: Loko u ri karhi u dyondza Bibele, u tive Yesu ni ku tlhela u n’wi rhandza. (Yoh. 14:21) Kambe ku fana ni vadyondzisiwa volavo, u nga khongela eka Xikwembu u ri karhi u tiyiseka leswaku ‘xa ku rhandza.’ Nkarhi ni nkarhi loko u khongela eka Yehovha, u kombisa leswaku wa swi tshemba leswi.—1 Yoh. 5:14.

TIVA LESWI KU ENDLAKA U KANAKANA

11. Hikwalahokayini Sathana a tsaka loko hi kanakana leswaku Yehovha wa hi rhandza?

¹¹ I mani loyi a endlaka hi kanakana leswaku Yehovha wa hi rhandza? U nga ha ku i Sathana naswona u be kona loko u ehleketa sweswo. Diyavulosi u ‘lava ku hi dya’ naswona u ta tsaka ni swikunwana loko hi kanakana leswaku Yehovha wa hi rhandza. (1 Pet. 5:8) Entiyisweni, hikwalaho ka leswi Yehovha a hi rhandzaka u hi nyike nkutsulo kambe Sathana u lava hi titwa wu nga hi faneli. (Hev. 2:9) Kambe i mani la tsakaka loko hi kanakana leswaku Yehovha wa hi rhandza? I Sathana. Nakambe i mani a tsakaka loko hi tshika ku tirhela Yehovha? A ku na un’wana handle ka Sathana. Sathana u lava hi ehleketa leswaku Yehovha a nga hi rhandzi, ku nga leswi nga riki ntiyiso. Kahlekahle hi yena loyi Yehovha a nga n’wi rhandzeki. Entiyisweni, yin’wana ya “miringo” leyi Sathana a yi tirhisaka ngopfu, i ku hi endla hi titwa onge hi hina lava Yehovha a nga hi rhandzeki naswona a hi fularheleke. (Efe. 6:11) Loko hi xiya leswi nala wa hina a ringetaka ku swi endla, hi ta ya hi tiyimisela ku “kaneta Diyavulosi.”—Yak. 4:7.

12-13. Xana xidyoho lexi hi velekiweke na xona xi nga endla leswaku hi kanakana ndlela leyi Yehovha a hi rhandzaka hayona hi ndlela yihi?

¹² I yini xin’wana lexi nga endlaka hi kanakana leswaku Yehovha wa hi rhandza? I xidyoho lexi hi velekiweke na xona. (Ps. 51:5; Rhom. 5:12) Xidyoho xi onhe vuxaka bya hina na Xikwembu. Xi tlhele xi onha miehleketo, timbilu ni miri ya hina.

¹³ Xidyoho xi endla hi tivona nandzu, hi karhateka, hi nga titshembi ni ku tlhela hi khomiwa hi tingana. Hi nga titwa hi ndlela yoleyo loko hi dyohile. Kambe hi nga tlhela hi titwa hi ndlela yoleyo hileswi hi tshamelaka ku titwa hi ri vadyohi, ku nga ndlela leyi Xikwembu a xi nga lavi leswaku hi titwa hayona loko xi hi vumba eku sunguleni. (Rhom. 8:​20, 21) Ku fana ni leswi movha lowu ponceke vhilwa wu nga kotiki ku famba kahle, swi tano na hi hina vanhu lava nga ni xidyoho. A hi swi koti ku va hi ndlela leyi Xikwembu a xi hi vumbe hayona. Hikwalaho, a swi hlamarisi leswi mikarhi yin’wana hi pfaka hi kanakana leswaku Yehovha wa hi rhandza. Loko sweswo swi endleka, hi fanele hi tsundzuka leswaku Yehovha i “Xikwembu lexikulu ni lexi xiximekaka, lexi . . . rhandzaka lava xi rhandzaka va tlhela va yingisa swileriso swa xona.”—Neh. 1:5.

14. Ku anakanyisisa hi nkutsulo swi nga hi pfuna njhani hi bakanya miehleketo ya leswaku Yehovha a nge pfuki a hi rhandzile? (Varhoma 5:8) (Nakambe vona bokisi leri nge, “Tivonele Eka ‘Matimba Lama Kanganyisaka Ya Xidyoho.’”)

¹⁴ I ntiyiso leswaku mikarhi yin’wana hi nga titwa swi nga hi faneli ku rhandziwa hi Yehovha. Ku vula ntiyiso a swi hi faneli, hikwalaho sweswo hi swona swi endlaka rirhandzu rakwe ri va ro hlawuleka. Leswaku Yehovha a hi rhandza, a swi titsheganga hi leswi hi swi endlaka. Nilokoswiritano, nkutsulo wu funengeta swidyoho swa hina naswona Yehovha u hi nyike wona hikwalaho ka leswi a hi rhandzaka. (1 Yoh. 4:10) Nakambe tsundzuka leswaku Yesu u tile leswaku a ta ponisa vadyohi, ku nga ri vanhu lava nga dyohiki. (Hlaya Varhoma 5:8.) A nga kona ni un’we wa hina la kotaka ku endla swilo kwatsaa! Nakambe Yehovha a nga langutelanga swona sweswo. Loko hi twisisa leswaku xidyoho lexi hi velekiweke na xona xi nga endla hi kanakana leswaku Yehovha wa hi rhandza, hi ta ya hi tiyimisela ku lwisana ni miehleketo yoleyo.—Rhom. 7:​24, 25.

HLAWULA KU TSHAMA U TSHEMBEKILE

15-16. Hi nga tiyiseka hi yini loko hi tshama hi tshembekile eka Yehovha naswona hikwalahokayini? (2 Samuwele 22:26)

¹⁵ Yehovha u lava hi endla xiboho lexinene hi ku va hi hlawula ku “n’wi namarhela.” (Det. 30:​19, 20) Loko hi endla tano, hi nga tiyiseka leswaku u ta tshama a tshembekile eka hina. (Hlaya 2 Samuwele 22:26.) Nakambe loko ntsena hi tshama hi tshembekile eka Yehovha, hi nga tiyiseka leswaku u ta hi pfuna eka xiyimo xin’wana ni xin’wana lexi hi langutanaka na xona evuton’wini bya hina.

¹⁶ Hilaha hi buleke hakona, hi ni swivangelo swo yima hi tiyile loko hi langutane na miringo. Ha swi tiva leswaku Yehovha wa hi rhandza naswona u ta hi seketela. Leswi hi leswi Bibele yi swi dyondzisaka. Loko mikarhi yin’wana hi kanakana leswaku wa hi rhandza, hi nga anakanyisisa hi leswi hi swi tivaka leswaku i ntiyiso ematshan’weni ya leswi hi twaka onge i ntiyiso. A hi tshameni hi ri karhi hi tiyiseka hi ntiyiso lowu wa le Bibeleni wa leswaku rirhandzu ra Yehovha lerikulu a ri heli.