Amukela Leswaku Yehovha Wa Ku Rhandza

1. Hikwalahokayini u tinyiketele eka Yehovha? (Nakambe vona xifaniso.)

XANA wa ha tsundzuka loko u tinyiketela eka Yehovha? U endle tano hileswi u dyondzeke ha yena ivi u n’wi rhandza. U n’wi tshembise leswaku u ta rhangisa ku endla ku rhandza ka yena evuton’wini bya wena ni leswaku u ta ya emahlweni u n’wi rhandza hi mbilu ya wena hinkwayo, hi vutomi, hi mianakanyo ya wena ni hi matimba ya wena hinkwawo. (Mar. 12:30) Ku sukela kwalaho, u ye u n’wi rhandza swinene. Kutani a wu ta ku yini loko un’wana o ku vutisa a ku, “Xana hakunene wa n’wi rhandza Yehovha?” Handle ko kanakana a wu ta ku, “Ndzi n’wi rhandza ku tlula munhu un’wana ni un’wana kumbe nchumu wun’wana ni wun’wana.”

2-3. Xana Yehovha u lava hi tiyiseka hi yini naswona hi ta kambisisa yini eka nhlokomhaka leyi? (Yeremiya 31:3)

² A wu ta hlamula njhani loko un’wana o ku vutisa a ku, “Xana wa tiyiseka leswaku Yehovha wa ku rhandza?” Xana a swi ta ku tikela ku hlamula hileswi u ehleketaka leswaku a wu faneleki ku rhandziwa hi Yehovha? Makwerhu wa xisati loyi a a titwa a nga rhandziwi loko a ha kula u ri: “A ndzi kanakani leswaku ndza n’wi rhandza Yehovha kambe lexi mikarhi yo tala xi ndzi kanakanisaka hileswaku xana yena wa ndzi rhandza?” Xana Yehovha u titwisa ku yini hi wena?

³ Yehovha u lava u tiyiseka leswaku wa ku rhandza. (Hlaya Yeremiya 31:3.) I ntiyiso leswaku Yehovha u ku kokele eka yena. Loko u tinyiketela eka yena ni ku khuvuriwa, u amukele nyiko ya risima ku nga rirhandzu rakwe. Rolero i rirhandzu lerikulu naswona a ri heli. Ri endla leswaku a vona vagandzeri vakwe vo tshembeka ku katsa na wena va ri “nhundzu [yakwe] yo hlawuleka.” (Mal. 3:​17, nhlamuselo ya le hansi) Yehovha u lava leswaku u tiyiseka ku wa ku rhandza hilaha muapostola Pawulo a a tiyiseka hakona. Leswi a a tiyiseka hi mhaka leyi u tsale a ku: “Ndza kholwa leswaku rifu kumbe vutomi kumbe tintsumi kumbe mifumo kumbe swilo leswi nga laha sweswi kumbe swilo leswa ha taka kumbe matimba kumbe ku tlakuka kumbe vuenti kumbe xivumbiwa xihi ni xihi, a swi nge swi koti ku hi hambanisa ni rirhandzu ra Xikwembu.” (Rhom. 8:​38, 39) Eka nhlokomhaka leyi, hi ta kambisisa leswaku hikwalahokayini hi fanele hi ya hi tshemba ku Yehovha wa hi rhandza nileswi nga hi pfunaka ku endla tano.

HIKWALAHOKAYINI HI FANELE HI TSHEMBA LESWAKU YEHOVHA WA HI RHANDZA?

4. Hi nga lwisana njhani ni miringo ya Sathana?

⁴ Loko hi tshemba leswaku Yehovha wa hi rhandza, hi ta swi kota ku lwisana ni “miringo” ya Sathana. (Efe. 6:11) Sathana u ta endla xin’wana ni xin’wana leswaku a hi tshikisa ku gandzela Yehovha. Nakambe ndzingo wun’wana lowu Sathana a wu tirhisaka ngopfu i mavunwa ya leswaku Yehovha a nga hi rhandzi. U nga rivali leswaku Sathana u tshama a rhiye ntlhamu leswaku a hi phasa. U tala ku hi ringa loko hi hele matimba, kumbexana loko hi karhatekile hi leswi nga tshama swi endleka, mitlhontlho leyi hi langutanaka na yona namuntlha kumbe hi vilela hileswi hi nga swi tiviki leswaku mundzuku u hi khomele yini. (Swiv. 24:10) Sathana u fana ni nghala leyi lavaka ku hlasela xiharhi lexi nga kotiki ku tilwela. Hikwalaho, u ringeta ku hi ringa loko hi tsanile leswaku hi ta lahlela thawula. Kambe loko hi ya hi tiyiseka leswaku Yehovha wa hi rhandza, hi ta swi kota ku ‘lwa’ na Sathana ku katsa ni tindlela leti a ti tirhisaka leswaku a hi ringa.—1 Pet. 5:​8, 9; Yak. 4:7.

5. Hikwalahokayini hi fanele hi titwa hi rhandziwa naswona hi ri va nkoka eka Yehovha?

⁵ Loko hi tshemba leswaku Yehovha wa hi rhandza, hi ta ya hi tshinela eka yena. Xiya leswi endlaka hi vula sweswo. Yehovha u hi tumbuluxe hi kota ku rhandza ni ku lava ku rhandziwa. Hi ntumbuluko loko munhu a hi rhandza, hi susumeteleka ku n’wi rhandza. Loko hi ya hi vona ndlela leyi Yehovha a hi rhandzaka ni ku hi teka hi ri va nkoka hayona swi endla leswaku hi n’wi rhandza swinene. (1 Yoh. 4:19) Nakambe loko hi ya hi n’wi rhandza, na yena u ya a hi rhandza. Bibele yi hi byela leswi: “Tshinelani eka Xikwembu, kutani xi ta tshinela eka n’wina.” (Yak. 4:8) Hi nga endla yini leswaku hi ya hi tshemba leswaku Yehovha wa hi rhandza?

I YINI LESWI NGA HI PFUNAKA HI AMUKELA LESWAKU YEHOVHA WA HI RHANDZA?

6. Hi fanele hi khongelela yini leswaku hi ta tshemba ku Yehovha wa hi rhandza?

⁶ Byela Yehovha hi ku kongoma leswi u swi lavaka ni ku tlhela u phikelela eswikhongelweni swa wena. (Luka 18:1; Rhom. 12:12) Siku ni siku khongela ko tala eka Yehovha u n’wi kombela a ku pfuna u tivona hi ndlela leyi yena a ku vonaka hayona. Mikarhi yin’wana u nga tivona nandzu lerova swi ku tikela ku tshemba leswaku Yehovha wa ku rhandza. Kambe tsundzuka leswaku Yehovha i nkulu eka mbilu ya wena. (1 Yoh. 3:​19, 20) U ku tiva ku tlula ndlela leyi u titivisaka xiswona naswona u kota ku vona nileswi wena u nga kotiki ku swi vona. (1 Sam. 16:7; 2 Tikr. 6:30) Hikwalaho, u nga kanakani ku n’wi ‘chululela’ ta le mbilwini, u kombela a ku pfuna u tshemba leswaku wa ku rhandza. (Ps. 62:8) Endzhaku, hanya hi ku pfumelela ni swikhongelo swa wena hi ku va u tirhisa swiringanyeto leswi landzelaka.

7-8. Mupisalema u hi tiyisekisa njhani leswaku Yehovha wa hi rhandza?

⁷ Tshemba leswi Yehovha a swi vulaka. U huhutele vatsari va Bibele leswaku va hlamusela leswi a nga xiswona. Vona ndlela leyinene leyi mupisalema Davhida a hlamuseleke Yehovha hayona. “Yehovha u le kusuhi ni lava tshovekeke timbilu; u ponisa lava hetiweke matimba.” (Ps. 34:18) Loko u nga tsakanga, u nga ha titwa u ri wexe. Kambe loko u ri eka xiyimo xo tano, Yehovha u tshembisa leswaku u le kusuhi na wena hikuva wa swi vona leswaku u n’wi lava ku tlula rini na rini. Eka pisalema yin’wana, Davhida u tsale a ku: “Chela mihloti ya mina eguleni ra wena ra dzovo.” (Ps. 56:8) Yehovha wa swi vona loko u koka exilogweni. Wa khathala swinene hi wena naswona u twa ku vava loko u xaniseka. Hi ndlela yo karhi, u hlengeleta mihloti ya wena naswona u yi teka yi ri ya nkoka ku fana ni ndlela leyi mati lama nga eguleni ra dzovo ma nga ya nkoka hayona eka munhu loyi a fambaka emananga. Eka Pisalema 139:​3, hi hlaya leswi: “[Yehovha] u tiva tindlela ta mina hinkwato.” Yehovha u vona tindlela ta wena hinkwato kambe u xiyisisa swilo leswinene leswi u swi endlaka. (Hev. 6:10) Hikwalahokayini? Hikuva u ma teka ma ri ya nkoka matshalatshala lawa u ma endlaka leswaku u n’wi tsakisa.a

⁸ Yehovha u tirhisa Rito rakwe ku nga Bibele leswaku a ku chavelela. Entiyisweni swi fana ni loko a ku byela a ku: “Ndzi lava u swi tiva leswaku ndzi ku rhandza ku fikela kwihi naswona ndza khathala hi wena.” Kambe hilaha hi dyondzeke hakona eku sunguleni, Sathana u lava u tshemba leswaku Yehovha a nga ku rhandzi. Hikwalaho, loko mikarhi yin’wana u kanakana leswaku wa ku rhandza, tivutise leswi, ‘Xana ndzi ta tshemba mani, “tata wa mavunwa” kumbe “Xikwembu xa ntiyiso”?’—Yoh. 8:44; Ps. 31:5.

9. Xana Yehovha u va tiyisekisa yini lava n’wi rhandzaka? (Eksoda 20:​5, 6)

⁹ Ehleketa ndlela leyi Yehovha a titwaka hayona loko u kombisa leswaku wa n’wi rhandza. Xiya leswi Yehovha a swi byeleke Muxe ni Vaisrayele. (Hlaya Eksoda 20:​5, 6.) Yehovha u tshembisa leswaku u ta ya emahlweni a rhandza lava n’wi rhandzaka. Marito wolawo ma hi tiyisekisa leswaku Xikwembu xa hina lexi tshembekaka a xi nge pfuki xi tshike ku rhandza vagandzeri va xona lava xi rhandzaka. (Neh. 1:5) Loko u sungula ku vona onge Yehovha a nga ku rhandzi, yimanyana ivi u tivutisa leswi, ‘Xana ndza n’wi rhandza Yehovha?’ Kutani ehleketa hi leswi: Loko u n’wi rhandza naswona u tirha hi matimba leswaku u n’wi tsakisa, u nga tiyiseka leswaku wa ku rhandza swinene. (Dan. 9:4; 1 Kor. 8:3) Hi marito man’wana, loko u nga kanakani leswaku wa n’wi rhandza Yehovha, hikwalahokayini u kanakana leswaku wa ku rhandza? U nga tiyiseka leswaku Yehovha u ta tshama a ri karhi a ku rhandza naswona a nge ku tshiki.

10-11. Xana Yehovha u lava u wu teka njhani nkutsulo? (Vagalatiya 2:20)

¹⁰ Anakanyisisa hi nkutsulo. Gandzelo ra Yesu Kreste ra nkutsulo i nyiko leyikulu swinene leyi Yehovha a yi nyikeke vanhu. (Yoh. 3:16) Kambe xana Yehovha u rhumele n’wana wakwe leswaku a ta fela na wena? Ina. Xiya xikombiso xa muapostola Pawulo. Loko a nga si va Mukreste u endle swidyoho leswikulu naswona a a tshamela ku lwisana ni ku tsana kakwe. (Rhom. 7:​24, 25; 1 Tim. 1:​12-14) Nilokoswiritano, u teke nkutsulo ku ri nyiko leyi Yehovha a n’wi nyikeke yona hi ku kongoma. (Hlaya Vagalatiya 2:20.) Tsundzuka leswaku Yehovha u huhutele Pawulo leswaku a tsala marito wolawo naswona hinkwaswo leswi nga eBibeleni swi tsaleriwe ku letela hina. (Rhom. 15:4) Marito ya Pawulo ma kombisa ndlela leyi Yehovha a lavaka u wu teka hayona nkutsulo, ku nga nyiko leyi A ku nyikaka yona. Loko u teka nkutsulo hi ndlela leyi, u ta ya u tiyiseka leswaku Yehovha wa ku rhandza.

¹¹ Ha n’wi khensa Yehovha hileswi a rhumeke Yesu leswaku a ta hi fela. Kambe xivangelo xin’wana lexi endleke Yesu a ta emisaveni hileswi a a fanele a dyondzisa vanhu ntiyiso hi Xikwembu. (Yoh. 18:37) Ntiyiso wolowo wu katsa ndlela leyi Yehovha a titwaka hayona hi vana vakwe.

NDLELA LEYI YESU A HI PFUNAKA HAYONA HI AMUKELA LESWAKU YEHOVHA WA HI RHANDZA

12. Hikwalahokayini hi tshemba ndlela leyi Yesu a hlamuseleke Yehovha hayona?

¹² Loko Yesu a ri laha misaveni, hi ku swi rhandza u paluxe leswaku Yehovha u njhani. (Luka 10:22) A hi na xona xivangelo xo kanakana ndlela leyi Yesu a n’wi hlamuseleke hayona Yehovha. Phela Yesu u hanye na Yehovha etilweni ku ringana malembe yo tala swinene a nga si ta laha misaveni. (Kol. 1:15) Yesu wa yi tiva ndlela leyi Tata wakwe a n’wi rhandzaka hayona naswona u vone ni ndlela leyi a rhandzaka tintsumi ni vanhu vo tshembeka hayona. Xana Yesu u va pfuna njhani vanhu va tshemba leswaku Yehovha wa va rhandza?

13. Xana Yesu u lava hi n’wi teka njhani Yehovha?

¹³ Yesu u lava hi tiva ndlela leyi Yehovha a titwaka hayona hi hina. Eka Tievhangeli, Yesu u vitane Yehovha “Tatana” ku tlula ka 160. Loko Yesu a vulavula na valandzeri vakwe u tirhise xiga lexi nge, “Tata wa n’wina” kumbe lexi nge, “Tata wa n’wina wa le tilweni.” (Mat. 5:16; 6:26) Loko Yesu a nga si ta emisaveni, malandza ya Yehovha yo tshembeka a ma vitana Yehovha ‘wa Matimba Hinkwawo,’ ‘La nge Henhlahenhla,’ ‘Mutumbuluxi Lonkulu,’ ni mavito man’wana. Kambe mikarhi yo tala Yesu u vitane Yehovha a ku i ‘Tata’ wa hina. Xiga xexo xi kombisa leswaku Yehovha u lava malandza yakwe ma titwa ma ri ekusuhi na yena ku fana ni n’wana loyi a titwaka a ri ekusuhi ni Tata wakwe loyi a n’wi rhandzaka. Kutani Yesu a hi dyondzisa leswaku Yehovha wa hi rhandza ku fana ni tatana lonene loyi a rhandzaka vana vakwe va risima. A hi kambisise swikombiso swimbirhi laha Yesu a tirhiseke rito “Tatana.”

14. Yesu u swi kombise njhani leswaku ha un’we wa hina hi va nkoka eka Tata wa hina wa le tilweni? (Matewu 10:​29-31) (Nakambe vona xifaniso.)

¹⁴ A hi rhangeni hi bula hi marito ya Yesu lama nga eka Matewu 10:​29-31. (Yi hlaye.) Swindzingiri i swinyenyana leswitsongo leswi nga ta pfuka swi nga swi koti ku rhandza Yehovha kumbe ku n’wi gandzela. Hambiswiritano, swindzingiri i swa nkoka eka Tata wa hina lerova wa swi tiva loko ku ri ni xin’we lexi weleke ehansi. Loko a khathala hi ndlela leyi hi swinyenyana leswi leswitsongo, a swi kanakanisi leswaku wa khathala swinene hi malandza yakwe yo tshembeka lama n’wi gandzelaka hileswi ma n’wi rhandzaka! Yesu u tlhele a vula leswaku Tata wa hina wa swi tiva leswaku hi na misisi yingani etinhlokweni ta hina. Hikwalaho, leswi Yehovha a tivaka ni swilo leswi leswitsongo hi hina, hi nga tiyiseka leswaku wa khathala swinene hi hina. A swi kanakanisi ku Yesu u lava hi tshemba leswaku hi va nkoka eka Tata wa hina wa le tilweni.

15. Marito ya Yesu lama nga eka Yohane 6:44 ma ku byela yini hi Tata wa wena wa le tilweni?

¹⁵ Xiya xikombiso xa vumbirhi xa ndlela leyi Yesu a ri tirhiseke hayona rito “Tatana.” (Hlaya Yohane 6:44.) Hikwalahokayini Tata wa wena wa le tilweni a ku kokele entiyisweni hi ndlela ya rirhandzu? Hikuva u swi vonile leswaku u ni mbilu leyinene. (Mit. 13:48) Loko Yesu a vula marito lama nga eka Yohane 6:​44, a a kombetela eka marito ya Yehovha lama nga eka Yeremiya 31:3. Eka ndzimana yoleyo, Yehovha u byele vanhu vakwe a ku: “Ndzi ku [kokele] eka mina hi rirhandzu.” (Yer. 31:3; nhlamuselo ya le hansi; ringanisa Hosiya 11:4.) Ehleketa hi leswi sweswo swi vulaka swona. Tata wa hina wa rirhandzu la nge matilweni, u ya emahlweni a vona leswinene eka wena hambiloko wena u nga swi voni.

16. (a) Yesu u hi byela yini naswona hikwalahokayini hi fanele hi n’wi tshemba? (b) I yini leswi nga ku pfunaka u tiyiseka leswaku Yehovha i Tata wa wena lonene? (Nakambe vona bokisi leri nge, ‘Tatana Loyi Hinkwerhu Hi N’wi Lavaka.’)

¹⁶ Loko Yesu a hlamusela Yehovha tanihi Tata wa hina, hi ndlela yo karhi a hi byela leswi: “Yehovha a hi Tata wa mina ntsena; na wena i Tata wa wena. Nakambe ndza ku tiyisekisa leswaku wa ku rhandza swinene naswona wa khathala hi wena.” Hikwalaho, loko mikarhi yin’wana u pfa u ehleketa onge Yehovha a nga ku rhandzi, yima u tivutisa leswi, ‘Xana a ndzi fanelanga ndzi tshemba N’wana loyi a n’wi tivaka kahle Tata wa hina naswona a vulavulaka ntiyiso mikarhi hinkwayo?’—1 Pet. 2:22.

YANA EMAHLWENI U TITIYISEKISA LESWAKU YEHOVHA WA KU RHANDZA

17. Hikwalahokayini hi fanele hi ya emahlweni hi titiyisekisa leswaku Yehovha wa hi rhandza?

¹⁷ Hi fanele hi tshamela ku titiyisekisa leswaku Yehovha wa hi rhandza. Hilaha hi dyondzeke hayona eku sunguleni, nala wa hina Sathana u ta ya emahlweni a ringeta ku hi tshikisa ku gandzela Yehovha. Sathana u lava ku hi tsanisa ripfumelo, hikwalaho a nge tshiki ku hi endla hi tshemba leswaku Yehovha a nga hi rhandzi. Hikwalaho, hi nga n’wi pfumeleli Sathana a hi humba mano.—Yobo 27:5.

18. U nga endla yini leswaku u ya u tiyiseka leswaku Yehovha wa ku rhandza?

¹⁸ Leswaku hi ya emahlweni hi tiyiseka leswaku Yehovha wa hi rhandza, hi fanele hi ya emahlweni hi khongelela leswaku a hi pfuna hi tivona hi ndlela leyi yena a hi vonaka hayona. Anakanyisisa hi ndlela leyi vatsari va Bibele va ri hlamuseleke hayona rirhandzu rakwe lerikulu. Tsundzuka leswaku mikarhi hinkwayo Yehovha u ta tshama a ri karhi a rhandza munhu loyi a n’wi rhandzaka. Nakambe anakanyisisa hi ndlela leyi nkutsulo ku nga nyiko leyi endleriweke wena hi ku kongoma. Tshemba leswaku Yehovha i Tata wa wena wa le tilweni hilaha Yesu a vuleke hakona. Hikwalaho, loko un’wana o ku vutisa a ku: “Xana wa tiyiseka leswaku Yehovha wa ku rhandza?” u ta n’wi hlamula u nga kanakani u ku: “Ina ndza tiyiseka naswona siku ni siku ndzi endla hinkwaswo leswi ndzi nga swi kotaka ku n’wi kombisa leswaku ndza n’wi rhandza!”