Papila Leri Humaka Eka Huvo Leyi Fumaka
HI NI nkateko lowukulu! Tanihi Timbhoni ta Yehovha, hi ni lunghelo ra ku tiva Yehovha, Xikwembu xi ri xin’we ntsena xa ntiyiso lexi hanyaka, Mutumbuluxi wa vuako hinkwabyo, kasi hi hala tlhelo hi ni lunghelo ra ku byarha vito ra yena ni ku n’wi tirhela. Lowu i nkateko lowukulu hakunene!—Esa. 43:12; Hev. 8:11.
Hi ni ntshembo wa ku ponisiwa naswona hi lerisiwe ku ya chumayela mahungu lamanene ya Mfumo leswaku ni van’wana va ta gandzela Yehovha, va tlhela va va ni ntshembo lowu na hina hi nga na wona. (Mat. 24:14; Rhom. 10:13, 14; 1 Tes. 5:8) Nakambe ha tsaka leswi hi nga ni vagandzeri-kulorhi ematikweni hinkwawo, lava rhandzanaka ni ku chivirikela ku pfunana. Leswi hinkwaswo swa vuyerisa swinene!
Hikwalaho, Bibele ya hi khutaza: “Tirhelani Yehovha hi ku tsaka. . . . Tanani etinyangweni ta yena hi ku nkhensa, eswivaveni swakwe hi ku dzunisa. N’wi nkhenseni, vongani vito rakwe. Hikuva Yehovha hi lonene; musa wakwe wa rirhandzu i wa hilaha ku nga riki na makumu, ni ku tshembeka kakwe ku suka eka xitukulwana xin’wana ku ya eka xitukulwana xin’wana.” (Ps. 100:2-5) Ku tirhela Yehovha hi ku tsaka swi fambisana hi ku kongoma ni ku va ni vuxaka lebyi tiyeke na yena. U endle lunghiselelo ra vuxaka byo tano, kutani hina hi ni lunghelo ra ku byi hlakulela. Loko hi ri ni vuxaka byo tano, ha swi tiva leswaku Yehovha u tshama a lunghekele ku hi pfuna ni ku hi tiyisa loko ku ri ni xilaveko xa sweswo. Ha tiyiseka leswaku u ta hi tiyisa emoyeni ni ku hi kongomisa hilaha ku faneleke leswaku hi kota ku hlangavetana ni swiphiqo swa vutomi bya masiku yo hetelela ya mafambiselo lawa ya swilo. Ku nga khathariseki swiphiqo leswi hi langutanaka na swona, ha tsaka evutirhelini bya hina, naswona hi nkhensa Yehovha siku ni siku, hikuva, hilaha Rito rakwe ri hi tsundzuxaka hakona, ‘wa hi khathalela.’—1 Pet. 5:7.
N’wexemu, Yehovha u hi katekisile hilaha ku fuweke hakunene. ENtsombanweni wa Muganga wa “Vaendli Va Rito Ra Xikwembu,” swi hi tsakise ngopfu ku hlangana kun’we ni vapfumeri-kulorhi lava rhandzekaka va magidi-gidi, hi yimbelela ni ku dya swin’we etafuleni ra Yehovha ra swakudya swa moya. ETidyondzweni ta hina ta Buku ya Vandlha, hi tiyisiwe swinene eripfumelweni hi ku dyondza swin’we buku leyi nge Nyikela Nyingiso Eka Vuprofeta Bya Daniyele! Naswona ku tlhandlekela eka leswi hinkwaswo, swi hi tsakise ngopfu loko hi kuma Vholumo yo Sungula ya buku leyintshwa leyi nge Vuprofeta Bya Esaya—I Rivoningo Eka Vanhu Hinkwavo! ‘Xinwelo xa hina xi tele kahle.’—Ps. 23:5.
Swa tsakisa hakunene ku tiva leswaku hi ni timiliyoni ta vamakwerhu va moya, hi tirhela Yehovha hi vun’we! Swa khutaza hakunene ku hlaya hi ta tinhlohlorhi letintshwa leti fikeleriweke evutirhelini bya nsimu! Ha tsaka hileswi vanhu va timiliyoni va veke kona eXitsundzuxweni xa rifu ra Hosi ya hina—naswona va endle tano ku nga khathariseki swiyimo swa misava. Loko hi languta nsimu ya misava hinkwayo, ha swi vona leswaku “hakunene, ntshovelo i wukulu.” (Luka 10:2) N’wexemu, swichudeni swa Bibele swa 5 555 hi xiringaniso swi endle nhluvuko vhiki ni vhiki, lerova swi kombisa ku tinyiketela ka swona hi ku khuvuriwa. Hambileswi ntshovelo wu nga wukulu etindhawini tin’wana ta misava ku tlula eka tin’wanyana, hinkwerhu ha tsaka hi leswi Yehovha a swi endlaka. Hi vona vumbhoni lebyi tiyeke bya leswaku u katekisa matshalatshala lama endliwaka hi malandza yakwe hi vun’we.
Ku akiwa ka Tiholo letintshwa ta Mfumo ku ve xivangelo xin’wana xa ntsako lowukulu! A hi tikoti hi ntsako, loko hi vona vamakwerhu va seketela ntirho lowu hi timbilu hinkwato ematikweni lama ha hluvukaka. Ana se ku akiwe madzana ya Tiholo ta Mfumo hi mpfuno wa Mintlawa yo Aka Tiholo ta Mfumo leyi kumeke vuleteri lebyi lavekaka. Vamakwerhu lava va suka evandlheni rin’wana va ya eka rin’wana etikweni ra ka vona leswaku va ya rhangela entirhweni wo aka Tiholo ta Mfumo. Leswi ka ha riki ni Tiholo ta Mfumo ta magidi leta ha lavaka ku akiwa, ku komberiwa vamakwerhu lava engetelekeke ematikweni lama ha hluvukaka leswaku va pfuneta entirhweni lowu wa xihatla. Loko u tshama etikweni ro tano, xana u nga tinyiketela ku hlanganyela entirhweni lowu? Vamakwerhu lava rhandzekaka va swi tlangela swinene ku va ni Holo ya vona ya Mfumo leyi va nga ta gandzela eka yona! Naswona va wu tlangela swinene mpfuno wa vamakwerhu va misava hinkwayo wa timali!
Timhaka ta ku hlula etihubyeni ta hi tsakisa. Kambe etindhawini to tala ku ni vanhu va vuntswaka lava rhandzaka ku rhikinyela vugandzeri bya Yehovha. Eku langutaneni ka hina ni swiyimo swo tano, ha tiyiseka leswaku loko swi ta emhakeni ya ku pfunana, eka Yehovha a swi na mhaka leswaku i vangani vakaneti lava nga kona, kumbe leswaku malandza yakwe ma vonaka ma hlaseleka ku fikela kwihi. (2 Tikr. 14:11) Ha mi bumabumela swinene n’wina hinkwenu vamakwerhu lava mi hambetaka mi yima mi tiyile evugandzerini bya ntiyiso.
Hambetani mi tiyisa ripfumelo ra n’wina ni ku titshega hi ku helela hi Yehovha leswaku a mi kongomisa, loko mi ri karhi mi tsakela ku hetisisa vutihlamuleri bya n’wina bya Vukreste. (Swiv. 3:5, 6) A xi kona xivangelo xa ku hela matimba, ku nga khathariseki leswi nala a nga tshikiwaka leswaku a hi endla swona. Tsundzukani xikhutazo lexi Elixa a xi nyikeke nandza wakwe la karhatekeke: “U nga chavi, hikuva va tele lava va nga na hina ku tlula lava va nga na vona.” (2 Tih. 6:15-17) Namuntlha, vuthu ra Yehovha ra le tilweni ri tshama ri lunghekele ku sirhelela vugandzeri lebyi tengeke, hilaha ri endleke hakona enkarhini wa Elixa. A hi kanakani hi vumundzuku. Yehovha hi yena a lawulaka. Matiko a ma nge n’wi endli nchumu. U nyike N’wana wakwe matimba lama heleleke ya vulawuri. “Va tsaka hinkwavo lava tumbelaka eka yena.”—Ps. 2:1-6, 12.
Hinkwenu n’wina vamakwerhu lava rhandzekaka, tsundzukani leswaku hi tshama hi ri karhi hi mi anakanya hikwalaho ka rirhandzu leri hi nga na rona eka n’wina. Lexi hi xi khongelelaka hi mbilu hinkwayo hi leswaku, onge hinkwenu mi nga “yima mi hetiseka naswona mi va ni ku khorwiseka loku tiyeke hi ku rhandza ka Xikwembu hinkwako.”—Kol. 4:12.
Vamakwenu,
Huvo Leyi Fumaka Ya Timbhoni Ta Yehovha