Papila Leri Humaka Eka Huvo Leyi Fumaka

Eka Timbhoni-kulorhi Ta Yehovha:

Vamakwerhu lava rhandzekaka, ha tsaka ku mi tsalela papila leri! Hi titwa hilaha muapostola Yohane a nga titwa hakona loko a vula leswaku u va ‘rhandze hi ntiyiso’ vapfumeri-kulobye nileswaku a a tsaka loko a twa leswaku “va famba entiyisweni.” (2 Yoh. 1, 4) Hakunene i nkateko leswi hinkwerhu hi tivaka ntiyiso! Ntiyiso wu hi ntshunxe eka Babilona Lonkulu ni le ka tidyondzo ni mikhuva ya yena leyi nga xi tsakisiki Xikwembu. Ku yingisa Xikwembu swi endla leswaku hi va ni rirhandzu, musa ni tintswalo. Naswona ntiyiso wu endla leswaku hi tshama hi basile emahlweni ka Xikwembu nileswaku hi va ni ntshembo wo kuma vutomi lebyi nga heriki.

Nakambe ha wu nkhensa moya wa Yehovha lowu hi tiyisaka ni ku hi kongomisa siku ni siku! Hi tshemba leswaku mi swi tsakerile ku kambisisa tindlela to hambana-hambana ta ndlela leyi Yehovha a hi kongomisaka ni ku hi tiyisa ha yona hi rirhandzu, hi moya wa yena loko hi ri eNtsombanweni Wa Muganga lowu nge “Kongomisiwa Hi Moya Wa Xikwembu.” Tanihi leswi xiyimo xa misava xi yaka xi nyanya ku biha, i swa nkoka leswaku hi titshega hi moya wa Yehovha lowu nga ni matimba leswaku wu hi kongomisa emasikwini ya mangava lama nga kwala nyongeni.

Ha tiyiseka leswaku timbilu ta n’wina ta khumbeka loko mi hlaya Buku Ya Lembe mi twa hi ta vamakwerhu lava tiyiseleke hambiloko va xaniseriwa ripfumelo ra vona. Lexi tsakisaka hi leswaku vo tala eka vona a va ha ku khuvuriwa kumbe a va nga si khuvuriwa loko va sungula ku langutana ni maxangu. Vamakwerhu lava ha va rhandza hikwalaho ka ku tshembeka ka vona! Entiyisweni, xikombiso xa vona xa hi tiyisa leswaku hi tama hi tshembekile eka Mfumo wa Xikwembu hambiloko hi langutana ni maxangu.—1 Tes. 1:6-8.

Vamakwerhu lava rhandzekaka, ha swi tiva leswaku swiphiqo swa timali ni swin’wana leswi mi langutanaka na swona, swi endla leswaku swi mi tikela ku hanyisana hi rirhandzu ni mindyangu ya n’wina. Van’wana va n’wina swa mi tikela ku chumayela minkarhi hinkwayo naswona swi pfa swi mi tikela ku va kona eminhlanganweni ya vandlha. Hikwalaho ka sweswo, hi bule hi tlhela hi khongela ko tala hi mhaka yoleyo kutani hi vona swi fanerile ku cinca minhlangano ya hina ku sukela hi January 1, 2009. Hi tshemba leswaku mi ta va ni nkarhi lowu engetelekeke wa dyondzo ya n’wina vini ni ya ndyangu.

Hakunene swi hi tsakisile ku vona vanhu vo tala va khuvuriwa etinhlengeletanweni ni le mintsombanweni yo hambana-hambana elembeni ra ntirho ra nan’waka naswona eka lava nga khuvuriwa, a ku ri ni vantshwa vo hlayanyana. N’wina vatswari ha mi bumabumela hileswi mi dyondzisaka vana va n’wina ku rhandza Yehovha ni ku va khutaza leswaku va tinyiketela eka yena loko va ha ri vantshwa. Swa tikomba leswaku vantshwa lava, lava rhandzekaka va leteriwa kahle emakaya hikuva ku nga khathariseki swiphiqo swo tala leswi va langutanaka na swona exikolweni, va fanelekele ku khuvuriwa.—Ps. 128:1-6.

Nakambe swi tsakisa ngopfu leswi vanhu lava ku dyondziwaka na vona Bibele va andzaka swinene, naswona varhumiwa ni maphayona yo hlawuleka ma pfuneta ngopfu eka ku andza loku. Hinkwerhu eka Huvo leyi Fumaka hi wu tlangela swinene ntirho wa nkoka lowu mi wu endlaka emisaveni hinkwayo hi ku vula mi ku, “Tana!” eka vanhu va timbilu letinene niloko mi rhamba vanhu hinkwavo lava nga ni torha leswaku va ‘nwa mati ya vutomi mahala.’ (Nhlav. 22:17) Hi va amukela hi mandla mambirhi enhlengeletanweni ya Yehovha vanhu va 289 678 lava tinyiketeleke ivi va khuvuriwa eka lembe ra ntirho ra n’wexemu!

I swa nkoka leswaku hi tshama hi ri karhi hi titsundzuxa marito ya muapostola Yohane lama nge: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yoh. 2:17) I ntiyiso leswaku ‘misava leyi yi ta hundza’ ku nga ri khale! Kutani i swa nkoka leswaku hi ‘endla ku rhandza ka Xikwembu’ hi tlhela hi ‘tshama hi rindzile.’ (Mat. 24:42) Loko hi endla tano a hi nge tisoli nikatsongo naswona Yehovha u ta hi katekisa hi musa wa yena wa rirhandzu.—Esa. 63:7.

Hi tshemba leswaku swiviko swa matiko yo tala leswi khutazaka leswi nga eka Buku Ya Lembe ya nan’waka, swi ta mi khutaza hinkwenu leswaku mi rhangisa swilo swa Mfumo evuton’wini bya n’wina. Hi tsakela ku mi byela leswaku hi tshama hi ri karhi hi mi khongelela nileswaku ha mi rhandza swinene. Onge Yehovha a nga mi katekisa swinene.

Vamakwenu,

Huvo Leyi Fumaka Ya Timbhoni Ta Yehovha