Papila Leri Humaka Eka Huvo Leyi Fumaka

Eka Vamakwerhu:

Tata wa hina wa le tilweni, Yehovha i xikombiso lexinene xa rirhandzu. Hikwalaho, Bibele yi ri: “Xikwembu i rirhandzu.” (1 Yoh. 4:8) Hambileswi Yehovha a nga wa Matimba Hinkwawo, Rito rakwe a ri vuli ni kan’we ri ku, “Xikwembu i matimba.” Ku fuma kakwe ku titshege ngopfu hi rirhandzu. Entiyisweni leswi swi endla leswaku hi va ekusuhi swinene na yena!

Lexi tsakisaka, Yehovha a nga hi sindzisi leswaku hi n’wi tirhela. A hi mufumi wa tihanyi. U lava leswaku hi n’wi tirhela hileswi hi n’wi rhandzaka. Loko hi endla tano, hi kombisa leswaku hi lava mfumo wakwe hikuva ha tshemba leswaku ndlela leyi a fumaka ha yona i yinene naswona yi ni rirhandzu. Leswi swi vonake ku sukela loko vanhu va vumbiwa.

Ematshan’weni ya leswaku a sindzisa Adamu na Evha leswaku va n’wi yingisa, Yehovha u va nyike lunghelo ro tiendlela xiboho hi voxe. Loko a va rhandza Yehovha hakunene ni ku tlangela leswi a va endleleke swona, a va ta va va lwisane ni matshalatshala ya Sathana yo va endla leswaku va xandzuka.

Endzhakunyana, loko Muxe a vulavula ro hetelela ni tiko ra Israyele, u te: “Waswivo, ndzi veka emahlweni ka wena namuntlha vutomi ni vunene, rifu ni vubihi.” (Det. 30:15) Vanhu a va ri ni ntshunxeko wa ku tihlawulela ndlela leyi a va lava ku hanya ha yona. Hilaha ku fanaka, Yoxuwa u byele Vaisrayele a ku: “Loko swi bihile ematihlweni ya n’wina ku tirhela Yehovha, hlawulani namuntlha loyi mi nga ta n’wi tirhela.” Vanhu va hlamule Yoxuwa va ku: “A hi swinene eka hina ku siya Yehovha.” (Yox. 24:15, 16) Na hina namuntlha hi titwa hi ndlela leyi fanaka. Leswi hi rhandzaka Yehovha, a hi “swinene” leswaku hi n’wi fularhela.

Tanihi Vakreste va ntiyiso, ha swi tiva leswaku ntshunxeko wo tihlawulela wu vula yini. Hambileswi vakulu va nyikiweke lunghelo ro laya ni ku tshinya, a va fanelanga va lawula vutomi kumbe ripfumelo ra van’wana. Muapostola Pawulo u tsale a ku: “Ku nga ri swona leswaku hi valawuri va ripfumelo ra n’wina, kambe hi vatirhi-kuloni entsakweni wa n’wina, hikuva mi yimile hikwalaho ka ripfumelo ra n’wina.”—2 Kor. 1:24.

Hakunene swa enerisa ku endla xo karhi hi ku tirhandzela ku ri ni ku sindzisiwa! Yehovha wa hi rhamba leswaku hi endla leswinene hi ku susumetiwa hi rirhandzu. Nkoka wa leswi wu vonaka eka marito ya Pawulo lama huhuteriweke lama nge: “Loko ndzi humesa leswi nga swa mina hinkwaswo ndzi phamela van’wana, niloko ndzi nyiketa miri wa mina, leswaku ndzi ta tibuma, kambe ndzi nga ri na rirhandzu, a ndzi pfuneki nikatsongo.”—1 Kor. 13:3.

Swa tsakisa ni ku dzunisa Yehovha swinene ku vona timiliyoni ta vamakwerhu ti ri karhi ti n’wi tirhela hileswi ti n’wi rhandzaka hi timbilu ta tona hinkwato!

Hilaha ku fanaka, Yehovha u ma rhandza swinene malandza yakwe, ku katsa na n’wina vana ni vantshwa lava mi kombisaka leswaku ma n’wi rhandza ematshan’weni ya misava ni swilo swa vutianakanyi leswi nga eka yona. Tiyisekani leswaku ha mi rhandza swinene.—Luka 12:42, 43.

Leswi mi rhandzaka Yehovha, n’wexemu, n’wina vamakwerhu va xinuna, va xisati ni vantshwa mi hete tiawara ta 1 748 697 447 mi ri karhi mi chumayela mahungu lamanene. Hi ku susumetiwa hi rirhandzu, vanhu va 7 782 346 emisaveni hinkwayo va hlanganyerile eka ntirho wa nsimu. Ha tsaka hileswi vanhu lavantshwa va 268 777, lava katsaka vantshwa vo tala, va nga kombisa ku tinyiketela ka vona eka Yehovha hi ku khuvuriwa ematini. Leswi swi vula leswaku hi xiringaniso, vhiki ni vhiki a ku khuvuriwa vanhu va 5 168. Hakunene leswi swa tsakisa swinene!

Enkarhini lowu wa makumu, vanhu va Yehovha va fanele va tiyiselela swiphiqo swa ntsandza-vahlayi, nxaniso, vuvabyi naswona van’wana va langutana ni ku dyuhala. Kambe hi tiyimisele leswaku hi nga tshuki hi ‘tlhelela endzhaku’ kumbe ‘hi tshika.’ Hinkwenu ka n’wina ha mi rhandza swinene.—Hev. 10:39; 2 Kor. 4:16.

Vamakwenu,