Yehovha U Pfule Timbilu Ta Vanhu Vo Tala

ENDZHAKU ka n’hweti Trujillo a dlayiwile hi 1961, ndzi khuvuriwe loko ndza ha dyondzela vugqweta eyunivhesiti. Tatana a lava leswaku ndzi dyondzela vugqweta, kambe ndzi vone dyondzo ya Xikwembu yi ri leyi tlakukeke. Hambileswi tatana a ndzi tshikilela, ndzi tshike ku ya eyunivhesiti. Endzhakunyana ka sweswo, ndzi hlawuriwe ku va phayona ro hlawuleka.

Xin’wana xa swiavelo swa mina a ku ri ku tirha eLa Vega, laha vanhu vo tala a va nghena Kereke ya Khatoliki. Loko ndzi ri kwalaho, ku hava ni un’we loyi a amukeleke ntiyiso. Loko ndzi nyikela tinkulumo ta le rivaleni, a ko va ni munhu un’we ntsena, ku nga phayona leri a ndzi tirha na rona. Kambe, Yehovha u ndzi tiyisile hi ku tirhisa dyondzo ya munhu hi yexe ya Bibele, ku va kona etinhlengeletanweni ni hi swikhongelo leswi humaka embilwini. Loko ndzi khongela, ndzi kombele Yehovha leswaku ku va ni vandlha eLa Vega. Ndza tsaka ku vika leswaku sweswi ku ni Tiholo ta Mfumo ta tsevu, mavandlha ya 14 ni vahuweleri va Mfumo vo tlula 800.

Hi 1965 ndzi tekane na nsati wa mina Ángela kutani hi 1981 hi vitaniwe ku ya tirha eBethele. Loko ndzi khuvuriwa, a ku ri ni vahuweleri va 681 ntsena etikweni. Sweswi hi ni vahuweleri vo tlula 36 000 naswona vanhu va magidi-gidi va va kona etinhlengeletanweni ta hina to hambana-hambana. Loko ndzi anakanyisisa hi leswi humeleleke, swa ndzi hlamarisa ku vona ndlela leyi Yehovha a pfuleke timbilu ta vanhu vo tala ha yona leswaku va amukela ntiyiso wa Bibele.