A Ndzi Navela Ku Cinca Vutomi

HI 1985, loko ndzi ri ni malembe ya 18, valawuri va Soviet va ndzi byele leswaku ndzi fanele ndzi ya leteriwa ntirho wa vusocha. A ndzi karhatiwa hi ku pfumaleka ka vululami ni ku tshikileriwa loku a ku ri kona evusocheni lerova ndzi tibyele ndzi ku: ‘A ndzi lavi ku fana na vona. Ndzi lava ku hambana na vona.’ Minkarhi hinkwayo a ndzi swi xiya leswaku a ndzi nga hanyi hi ndlela leyi a ndzi lava ku hanya ha yona. A ndzi navela ku cinca vutomi.

Endzhaku ka loko ndzi hete ku leteriwa ntirho wa vusocha, ndzi vuye ekaya. Siku rin’wana nivusiku endzhaku ka loko hi endle xinkhubyana, ndzi khongele eka Xikwembu, ndzi xi kombela leswaku xi ndzi pfuna ndzi antswisa vutomi. Hi siku leri landzelaka loko ndzi ri endleleni yo ya entirhweni, ndzi endzele hahani wa mina loyi a a ri Mbhoni ya Yehovha. Loko ndzi nghena endlwini yakwe, ndzi tikume ndzi ri emahlweni ka ntlawa lowutsongo wa Timbhoni lowu a wu hlengeletane leswaku wu khoma nhlangano. Va ndzi amukele hi mandla mambirhi, kutani ndzi endle xiboho xo tshama ndzi yingisela.

Ndzi pfumele ku dyondzeriwa Bibele naswona endzhaku ka tin’hweti ta tsevu ndzi khuvuriwile. Yehovha u ndzi pfunile leswaku ndzi va munhu lonene, ku cinca loku a ndzi ta va ndzi nga ku endlanga hi ndzexe.