A Wu Ri Kwihi Nkarhi Lowu Hinkwawo?

A NDZA ha ku khuvuriwa loko vakulu va ndzi vutisa loko ndzi ta swi tsakela ku ndlandlamuxa ntirho mina wa nsimu. Hi May 4, 1992, ndzi ye eka nhlangano wo hlawuleka lowu a wu endleriwe vanhu lava a va lava ku ya laha ku nga ni xilaveko lexikulu. Hi siku leri landzeleka, mina ni munhu loyi a ndzi tirha na yena nsimu hi rhurhele ehlalukweni ra Batumi le xifundzheni xa Ajaria.

Loko ndzi chumayela ro sungula eBatumi a ndzi chuhile swinene. A ndzi tivutisa ndzi ku: ‘Xana ndzi ta va chumayela njhani vanhu?’ Ndzi hlamarise hi ndlela leyi wansati wo sungula loyi ndzi hlanganeke na yena a anguleke ha yona loko a ku: “A wu ri kwihi nkarhi lowu hinkwawo?” A a lava ku tiva swo tala hi Timbhoni lerova u nambe a sungula ku dyondza Bibele na hina hi siku leri landzelaka.

Loko hi nga si rhurhela eBatumi, a hi kume nxaxamelo wa tiadirese ta vanhu lava tsakelaka. Tanihi leswi a hi nga ri tivi kahle doroba leri, hi kombele nkongomiso eka vanhu lava a hi hlangana na vona exitarateni. Vo tala va vona a va kotanga ku hi pfuna hikwalaho ka leswi switarata swo tala a swa ha ku cinciwa mavito, kambe a va ri tsakela rungula ra hina. Hi ku hatlisa, se a hi fambisa dyondzo ya Bibele ni mintlawa ya vanhu va 10 ku ya eka 15.

Endzhaku ka loko ku hundze tinh’weti ta mune hi fikile, se vanhu vo tlula 40 a va va kona eminhlanganweni. A hi tivutisa hi ku: ‘I mani loyi a nga ta khathalela swichudeni leswi leswintshwa?’ Kutani, hikwalaho ka nyimpi leyi veke kona exikarhi ka vuthu ra le Georgia swin’we ni vanhu lava a va lava ku ti sungulela mfumo eAbkhazia, swirho hinkwaswo swa vandlha leri a ndzi hlanganyela eka rona eku sunguleni, swi rhurhele eBatumi. Hi siku ntsena, ku simekiwe vandlha leri nga ni vakulu ni maphayona.