Xiviko Xa Nawu

Eka tinyimpi ta le nawini ni le ka swiyimo swo tika, vamakwerhu va swi kombisa erivaleni leswaku va tshama va tshembekile eka Yehovha Xikwembu. Xikombiso xa vona xa hi khutaza hinkwerhu ka hina leswaku hi tshama hi tiyile eripfumelweni, hi ri karhi hi tshemba leswaku “Yehovha u ta hlawula la tshembekeke wakwe.”—Ps. 4:3.

ARGENTINA | Mfanelo Yo Dyondzisa N’wana Tidyondzo Ta Vukhongeri

Ruth u kuriseriwe endyangwini wa Vakreste kambe u horile loko a ri muntshwa. Endzhakunyana, u rhandzane ni jaha rin’wana kutani hi ku famba ka nkarhi a kuma n’wana wa nhwanyana. Siku rin’wana loko Ruth a ri edorobeni ra le La Plata, u vone Timbhoni ta Yehovha ti ri etafuleni ra minkandziyiso kutani a tsundzuka leswaku u kurisiwe endyangwini wa Vakreste. U sungule ku tlhela a tihlanganisa ni vandlha kutani a sungula ku dyondzisa n’wana wakwe wa nhwanyana Bibele. Leswi tata wa n’wana a nga fambisani na byona vukhongeri bya Ruth, u yise xivilelo ehubyeni leswaku a sivela Ruth ku dyondzisa n’wana wa vona Bibele kumbe ku famba na yena eminhlanganweni ya vandlha.

Gqweta ra Ruth ri vule leswaku vatswari havambirhi va ni mfanelo yo dyondzisa n’wana wa vona tidyondzo ta vukhongeri ni leswaku huvo a yi nge ngheneleli eka sweswo handle ka loko ku ri ni vumbhoni bya leswaku vukhongeri byebyo a byi n’wi khomi kahle n’wana yoloye. Huvo yi teke xiboho xa leswaku vatswari va fanele va xixima mfanelo ya n’wana wa vona yo gandzela a ntshunxekile, hambileswi hi nkarhi wolowo a a ri ni malembe ya mune! Huvo yo endla xivilelo yi vule leswaku n’wana loyi wa ha ri ntsongo lerova a nga tiendlela swiboho malunghana ni tidyondzo ta vukhongeri ni leswaku vatswari havambirhi va ni timfanelo leti ringanaka ta ku n’wi dyondzisa tidyondzo ta vukhongeri.

N’wana wa Ruth u hlaya Bibele madyambu man’wana ni man’wana naswona sweswi u va kona eminhlanganweni ni mana wakwe. U swi langutele hi mahlongati ku endzela eBethele ya le Buenos Aires.

AZERBAIJAN | Mfanelo Yo Endla Mintirho Leyi Fambisanaka Ni Vukhongeri

Muapostola Pawulo u xiye leswaku evandlheni ra Vakreste va ntiyiso, “loko xirho xin’we xi xaniseka, swirho leswin’wana hinkwaswo swi xaniseka na xona.” (1 Kor. 12:26) Marito lawa ma hetisekile loko Timbhoni ta Yehovha emisaveni hinkwayo ti twe ku vava swinene hi ku xaniseka ka Makwerhu wa xisati Irina Zakharchenko na Valida Jabrayilova va le Azerbaijan. Hi February 2015, maphorisa ma vone vamakwerhu lava vambirhi nandzu wa leswaku va endla ntirho wa vukhongeri lowu nga riki enawini. Muavanyisi u va pfalele ekhotsweni loko va nga si ya tenga naswona hikwalaho ka leswi nandzu wa vona a wu tshamela ku hundziseriwa emahlweni, vamakwerhu lava va tshame lembe ekhotsweni laha va tiyiseleke ku xanisiwa va tlhela va aleriwa ku kuma swilo leswi va swi lavaka.

Loko se ku fike siku ro tenga hi January 2016, muavanyisi u vone vamakwerhu lava nandzu kutani a va gweva kambe u sule swigwevo leswi hikwalaho ka leswi va rhangeke va xanisiwa loko va nga si ya tenga ivi a va pfumelela ku tlhelela emakaya. Loko Huvo ya Swikombelo ya le Baku yi bakanye swikombelo swa vona malunghana ni vugevenga lebyi a va hehliwa hi byona, va yise xikombelo xa vona eka Huvo leyi Tlakukeke. Ku engetela kwalaho, va yise swivilelo swa vona eka Komiti ya Timfanelo ta Vanhu hikwalaho ka leswi va khomiweke hi ndlela ya tihanyi ni leswi mfanelo ya vona yo endla mintirho leyi fambisanaka ni vukhongeri yi nga xiximiwangiki.

Vamakwerhu lava va le ku hlakarheleni eka ku xaniseka loku va langutaneke na kona. Va phofule ndlela leyi va swi tlangelaka ha yona swikhongelo ni marito ya vanhu lava kombisaka leswaku va khathala hi vona. Makwerhu wa xisati Jabrayilova u tsalele Huvo leyi Fumaka a ku: “Swikhongelo swa n’wina swi hi pfune leswaku hi tiyisela maxangu naswona ndzi swi xiyile. A ndzi nge ri rivali rirhandzu ni nkhathalelo lowu n’wina, Yehovha swin’we ni vamakwerhu emisaveni hinkwayo mi wu kombiseke.”

ERITREA | Ti Khotsiwa Hikwalaho Ka Ripfumelo Ra Tona

Hi July 2016, hulumendhe ya le Eritrea yi khotse Timbhoni ta Yehovha ta 55 hikwalaho ka ripfumelo ra tona. Vamakwerhu vanharhu, Paulos Eyassu, Isaac Mogos na Negede Teklemariam—va le khotsweni ku sukela hi September 1994 naswona hulumendhe yi khotse vamakwerhu van’wana va kaye ku ringana malembe ya khume.

Hi January 2016 ku endleke mhaka yo tsakisa loko huvo yi tengisa Timbhoni leti khotsiweke eXitsundzuxweni lexi a xi khomeriwe eAsmara hi April 2014. A ku ri ro sungula ku va maphorisa ma hehla Timbhoni hi “vugevenga” ni ku tlhela ma ti pfumelela leswaku ti tiyimelela. Hilaha swi tolovelekeke ha kona, vamakwerhu vo tala lava a va ri eku tengisiweni va voniwe nandzu wo ya eminhlanganweni leyi nga riki “enawini,” va hakerisiwa mali kutani va ntshunxiwa. Hambiswiritano, Saron Gebru, un’wana wa vamakwerhu va xisati lava hehliweke, u ale ku humesa mali. Hikwalaho ka sweswo, u gweviwe ku tshama ekhotsweni tin’hweti ta tsevu. Makwerhu Gebru a pfumeleriwa leswaku a endzeriwa kan’we hi vhiki naswona u vule leswaku a khomiwe kahle. Yena swin’we ni Timbhoni tin’wana ta 54 leti nga ekhotsweni va swi tlangela swikhongelo leswi va endleriwaka swona tanihi leswi hinkwerhu hi ‘anakanyaka hi lava nga etimpecanini ta khotso onge hiloko hi bohiwe na vona.’—Hev. 13:3.

JARIMANI | Ntshunxeko Wa Vukhongeri—Ti Tiveka Ximfumo

Hi December 21, 2015, xifundzha xa le Bremen, lexi nga en’walunguvupeladyambu bya Jarimani, xi endle xiboho xa leswaku Nhlangano wa Vukhongeri wa Timbhoni ta Yehovha wu tiveka ximfumo ku tlula enkarhini lowu nga hundza. Mhaka leyi ya leswaku ti tiveka ximfumo yi hete malembe ya mune etihubyeni ta le Jarimani. Hi ku landzelela xiboho xa Huvo leyi Tlakukeke ya le Berlin, swifundzha swa 16 swa le Jarimani swi pfumerile leswaku Timbhoni ta Yehovha ti tiveka ximfumo. Hambiswiritano, maphorisa ya le Bremen a ma yimanga na xona xiboho xa leswaku Timbhoni ti tiveka ximfumo, ngopfungopfu hikwalaho ka leswi a ti hehliwa hi swihehlo swa mavunwa leswi a swi huma eka vakaneti va tona.

Hi 2015, Huvo ya Milawu ya Muganga ya le Jarimani yi endle xiboho xa leswaku mhaka yo va xifundzha xa Bremen xi ala leswaku Timbhoni ti tiveka ximfumo yi lwisana ni timfanelo ta tona ta nawu. Xiboho xexo a xi tiyisekisa leswaku mfanelo yo gandzela ti ntshunxekile a yi sirhelela ntirho wa tona eBremen. Mavandlha ya kwalaho a ma nga boheki ku humesa xibalo naswona a ma tiphina hi vukorhokeri byin’wana lebyi vukhongeri byo tala bya le Jarimani a byi endleriwa byona.

KYRGYZSTAN | Mfanelo Yo Endla Mintirho Leyi Fambisanaka Ni Vukhongeri

Hi March 2013, maphorisa ya le Osh, eKyrgyzstan ma hehle Oksana Koriakina ni mana wakwe, Nadezhda Sergienko hi vugevenga. Muchuchisi u hehle Timbhoni hi leswaku ti karhata vanhu loko ti ri karhi ti dyondzisa Bibele naswona muavanyisi u ti khotse leswaku ti tshama ekaya loko nandzu wa tona wa ha hundziseriwe emahlweni. Hi October 2014, huvo yi kume leswaku vumbhoni bya kona a va lo tisungulela, a ku nga landzeleriwanga milawu naswona vamakwerhu lava va xisati a va voniwanga nandzu. Huvo yo endla xikombelo yi teke xiboho xexo hi October 2015.

Hambiswiritano, muchuchisi wa le dorobeni ra Osh u tlhele a endla xikombelo, kambe sweswi u xi endle eka Huvo leyi Tlakukeke ya Vuavanyisi ya le Kyrgyzstan. Huvo yoleyo yi ale leswaku vamakwerhu volavo va xisati va ntshunxiwa kutani yi lerisa leswaku va tlhela va tengisiwa. Loko ku ri karhi ku tengiwa hi April 2016, magqweta lama yimelaka vamakwerhu volavo ma kombele leswaku nandzu wolowo wu herisiwa hikuva a wu hundzeriwe hi nkarhi. A ku ri hava lexi muavanyisi a ta xi endla handle ka leswaku a herisa nandzu.

Eka maxangu hinkwawo lawa va langutaneke na wona, vamakwerhu lava a va ri ni langutelo lerinene. Makwerhu Sergienko u te: “Hakanyingi vanhu va hlundzuka loko vanhu van’wana va va khoma hi ndlela yo biha, kambe ndzi swi xiyile leswaku Yehovha wa ndzi rhandza ni ku ndzi khathalela hi ku tirhisa vamakwerhu—a hi nga ri hexe.” Vamakwerhu lava va xisati va swi vonile leswaku Yehovha u ya emahlweni a hetisisa xitshembiso xakwe lexi nga eka Esaya 41:10, lexi nge: “U nga chavi . . . Kunene ndzi ta ku khoma swi tiya hi voko ra mina ra xinene ra ku lulama.”

KYRGYZSTAN | Ntshunxeko Wa Vukhongeri—Ti Tiveka Ximfumo

Hi August 9, 2015, maphorisa ya khume ma nghene eminhlanganweni ya vandlha edorobeni ra Osh, eKyrgyzstan. Ma lerise leswaku minhlangano leyi a ma vula leswaku a yi le “nawini” yi yimisiwa hi nkarhi wolowo naswona ma tlhele ma xungeta hi ku vula leswaku ma ta duvula vanhu vo tlula 40 lava a va ri kwalaho. Maphorisa ma yise vamakwerhu va khume exitichini xa maphorisa, laha ma fikeke ma xanisa kaye wa vona hi ku va ba kutani ma va ntshunxa. Endzhaku ka masiku mambirhi, maphorisa ma khome Nurlan Usupbaev, un’wana wa vamakwerhu lava biweke hi tihanyi kutani ma n’wi hehla hi leswaku u fambisa nhlangano wa vukhongeri lowu nga riki enawini.

Loko nandzu wa Makwerhu Usupbaev wu yisiwa eHubyeni ya le Dorobeni ra Osh, muavanyisi u kume leswaku a ku na vumbhoni eka nandzu lowu a hehliwaka hi wona kutani a wu herisa. Muchuchisi u endle xikombelo eka Huvo ya Xifundzha ya le Osh, laha yi xi bakanyeleke etlhelo xikombelo xakwe hi ku vula leswaku Makwerhu Usupbaev a nga voniwi nandzu hikwalaho ko endla ntirho wa vukhongeri hikuva Timbhoni ta Yehovha ti tsarisiwe hi nawu eKyrgyzstan.

Handle ko hela matimba, muchuchisi u tlhele a endla xikombelo eka Huvo leyi Tlakukeke ya Vuavanyisi ya le Kyrgyzstan. Huvo leyi Tlakuke yi herise nandzu wa makwerhu Usupbaev hi March 2016, hi ndlela yoleyo a yi kombisa leswaku yi yima ni swiboho leswinene leswi endliweke hi tihuvo ta swikombelo naswona a yi tiyisekisa leswaku Timbhoni ta Yehovha ti ni mfanelo yo khoma minhlangano ya tona eKyrgyzstan. Nandzu lowu vikiweke hi lava xanisiweke hi maphorisa ya le Osh wa ha rindzele ku tengiwa.

RHAXIYA | Ntshunxeko Wa Vukhongeri

Leswi maphorisa ya le Rhaxiya ma lwisanaka ni timfanelo ta vanhu, hulumendhe ya le Rhaxiya yi ya emahlweni yi hlasela Timbhoni ta Yehovha ni ntirho wa tona wa vukhongeri. Enkarhini lowu nga hundza, maphorisa ma vule leswaku minkandziyiso ya hina ya 88 yi ni “khombo” naswona ma yirise website ya le nawini ya Timbhoni ta Yehovha ya jw.org. Hi 2015, vatirhelamfumo lava tirhaka eka ndzawulo yo amukela ni ku rhumela swilo va ale leswaku ku rhumeriwa Vuhundzuluxeri Bya Misava Leyintshwa Bya Matsalwa Yo Kwetsima, naswona huvo ya le Vyborg yi le ku endleni ka xiboho xa loko Bibele leyi yi ri ni “khombo” kumbe yi amukeleka. Hi March 2016, Hofisi ya Muchuchisinkulu yi teke goza, yi xungeta ku pfala ntsindza wa tihofisi wa Timbhoni ta Yehovha lowu nga eSolnechnoye, lowu nga ehandle ka St. Petersburg, hi ku vula leswaku wu endla “ntirho lowu nga ni khombo.”

Ku nga khathariseki matsima lawa a ma seketeriwa hi mfumo lawa a ma lwisana ni Timbhoni ta Yehovha, a ku ri ni mahungu yo tsakisa. Hi October 2015, muchuchisi u lave ku herisa Nhlangano wa Vukhongeri wa Timbhoni ta Yehovha wa le Tyumen ku nga ndhawu leyi nga eka tikhilomitara ta 2 100 evuxa bya Moscow. Ku nga khathariseki vumbhoni lebyi a byi kombisa leswaku maphorisa ma lo tisungulela mhaka leyi a ma hehla Timbhoni ha yona, Huvo ya Xifundzha ya le Tyumen yi vone Nhlangano lowu nandzu. Hambiswiritano, hi April 15, 2016, Huvo leyi Tlakukeke ya le Rhaxiya yi bakanye xiboho xa tihuvo letitsongo, hi ku vula leswaku “a ku na vumbhoni byo herisa Nhlangano wa Vukhongeri wa Timbhoni ta Yehovha eDorobeni ra Tyumen.” Loko muavanyisi a gimeta hi xiboho lexi tekiweke hi Huvo leyi Tlakukeke, vamakwerhu va 60 lava a va ri ehubyeni va yimile kutani va ba mavoko hi ntsako.

Vanhu va Yehovha va le Rhaxiya va tiyimisele ku ya emahlweni va n’wi gandzela ku nga khathariseki “tlhari rihi ni rihi leri nga ta endleriwa [vona].”—Esa. 54:17.

RWANDA | Mfanelo Yo Nghena Xikolo U Ntshunxekile Handle Ko Kombiwa Xihlawuhlawu Hikwalaho Ka Vukhongeri Bya Wena

Emalembeni ya sweswinyana, vana lava nga Timbhoni eRwanda va hlongoriwile eswikolweni hikwalaho ka leswi va aleke ku seketela vukhongeri byin’wana kumbe ku endla mintirho ya tiko leyi endliwaka exikolweni. Leswaku ku lulamisiwa xiphiqo lexi, hi December 14, 2015, hulumendhe yi endle xileriso xa leswaku ku herisiwa xihlawuhlawu xa vukhongeri lexi nga kona eswikolweni. Xileriso lexi a xi vula leswaku swikolo swi fanele swi xixima mfanelo ya swichudeni yo gandzela swi ntshunxekile.

Hi June 9, 2016, eka xiyenge xa Mahungu xa le ka jw.org ku kandziyisiwe xihloko lexi nge “Tiko Ra Rwanda Ri Teka Goza Ro Herisa Xihlawuhlawu Lexi Nga Kona Eka Vukhongeri eXikolweni.” Lexi tsakisaka hileswaku, phephahungu leri dumeke ra le ka website ya le Rwanda ri tlhele ri kandziyisa xihloko lexi. Website ya phephahungu leri a yi tsakeriwa hi vanhu vo tlula 3 000 naswona vahlayi va rona vo tala va tsale mavonelo yo tsakisa malunghana ni goza leri hulumendhe yi ri tekeke. Timbhoni ta le Rwanda ti xi tlangela swinene xiboho lexi, lexi tiyisekisaka leswaku vana va tona va ta nghena xikolo handle ko kombiwa xihlawuhlawu hikwalaho ka vukhongeri bya vona.

SOUTH KOREA | Ntshunxeko Wo Tirhisa Ripfalo —Ku Nga Hlanganyeli eNyimpini Hikwalaho Ka Leswi Ripfalo Ri Nga Ti Pfumeleriki

Se swi endla malembe yo tlula 60, vavanuna hinkwavo lava nga Timbhoni eSouth Korea lava nga ni malembe ya 19 ku ya eka 35 va ri karhi va langutana ni mhaka ya ku joyina ntirho wa vusocha. Hulumendhe ya le South Korea yi yi bakanyela etlhelo mfanelo ya vanhu lava nga yiki enyimpini hikwalaho ka leswi ripfalo ra vona ri nga va pfumeleriki ni mhaka ya leswaku va fanele va nyikiwa mintirho leyi nga katsiki vusocha. Eka mindyangu yin’wana ya Timbhoni—kokwana wa xinuna, tatana ni n’wana wa jaha va boheke ku ya ekhotsweni hikwalaho ka leswi a va nga lavi ku ya enyimpini.

Huvo yo Endla Milawu yi endle xiboho kambirhi yi vula leswaku Nawu wa Vusocha wa boha kambe tihuvo letitsongo ni vanhu lava xupuriweke hi nawu wolowo va tlhele va yisa swivilelo swa vona eka Huvo leyi. Hi July 9, 2015, Huvo yi yingisele leswi vuriweke hi vanhu lava yimaka ni lava nga yiki enyimpini hikwalaho ka leswi ripfalo ra vona ri nga va pfumeleriki. Makwerhu Min-hwan Kim, loyi a heteke lembe ni hafu ekhotsweni hikwalaho ka leswi ripfalo rakwe a ri nga n’wi pfumeleli leswaku a ya evusocheni u ri: “Ndzi xanisiwile ni ku tlhela ndzi ntshunxiwa ekhotsweni. Kambe ndzi tshemba leswaku van’wana lava nga yiki evusocheni hikwalaho ka leswi ripfalo ra vona ri nga va pfumeleriki a va nge xanisiwi. Loko vo pfumeleriwa ku endla mintirho leyi nga fambisaniki na vusocha, va ta va mpfuno lowukulu etikweni.” Ku nga ri khale Huvo yo Endla Milawu yi ta tivisa xiboho lexi yi xi tekeke.

TURKMENISTAN | Bahram Hemdemov

Makwerhu Hemdemov, u ni malembe ya 53, u nghenele vukati naswona u ni vana va mune va majaha. U ni vuxaka lebyinene ni Xikwembu naswona u xiximiwa swinene endhawini leyi a tshamaka eka yona. Hi May 2015, huvo yi n’wi gweve ku tshama ekhotsweni malembe ya mune ni ku tlhela a endla mintirho yo tika hikwalaho ka leswi a yi vula leswaku u khoma minhlangano leyi nga riki “enawini” ekaya rakwe. U pfaleriwe ekampeni ya swigevenga leyi nga edorobeni ra Seydi laha a a tengisiwa hi ku phindhaphindha ni ku tlhela maphorisa ma n’wi ba hi ndlela ya tihanyi. Hambiswiritano, u tshame a tshembekile eka Yehovha Xikwembu, hilaha ndyangu wakwe wu endleke ha kona. Nsati wa makwerhu Hemdemov, ku nga Gulzira wa n’wi endzela nkarhi na nkarhi leswaku a n’wi khutaza.

Leswi hi vonaka vanhu va Yehovha va yaka emahlweni va kombisa ku tshembeka ka vona loko va langutane ni miringo, ha va khongelela. Nakambe xikombiso xa vona xa hi khutaza leswaku na hina hi tshama hi tshembekile eka Xikwembu, hi ri karhi hi tshemba xitshembiso lexi nga eka Pisalema 37:28, lexi nge: “A nge va siyi lava tshembekeke vakwe.”