“Mi Hambeta Mi Va Komba Xichavo Vanhu Va Muxaka Wolowo”

KU SUKELA hi 1992, Huvo leyi Fumaka yi avele vakulu lava nga ni ntokoto va tlhela va wupfa leswaku va pfuneta eka tikomiti ta yona.a (Vona nhlamuselo ya le hansi.) Vapfuneti lava, lava nga ntlawa wa “tinyimpfu tin’wana,” va yi pfuna swinene Huvo leyi Fumaka. (Yohane 10:16) Vhiki rin’wana ni rin’wana va va kona eka nhlangano wa komiti leyi va tirhaka eka yona. Ntirho wa vona i ku nyikela rungula leri lavekaka ni ku nyikela swiringanyeto. Swirho swa Huvo leyi Fumaka hi swona swi endlaka swiboho, kutani vapfuneti va swona va tiyiseka leswaku leswi swi bohiweke swa endliwa. Vamakwerhu lava va tiyimiserile ku endla ntirho wihi ni wihi lowu va averiwaka wona. Va famba ni swirho swa Huvo leyi Fumaka etinhlengeletanweni to hlawuleka ni ta matiko. Va tlhela va averiwa ku endzela marhavi va ri vayimeri lava humaka entsindza.

Makwerhu un’wana wa xinuna loyi a pfuneteke ku sukela hi 1992 u ri, “Loko ndzi endla ntirho lowu ndzi averiweke wona, Huvo leyi Fumaka yi kota ku dzika swinene eka timhaka ta moya.” Makwerhu un’wana wa xinuna loyi a veke mupfuneti ku ringana malembe ya 20 u ri, “A ku ri lunghelo leri tlulaka swilo hinkwaswo.”

Huvo leyi Fumaka yi nyike lava yi pfunaka vutihlamuleri lebyikulu naswona ya wu tlangela ntirho lowukulu lowu endliwaka hi vamakwerhu lava vo tshembeka. Hinkwerhu ka hina a hi “[hambeteni hi] va komba xichavo vanhu va muxaka wolowo.”—Vafilipiya 2:29.