U Nga Xi Tiva Njhani Xikwembu?

Nhlamulo ya Bibele

U nga tiva Xikwembu hi ku va u dyondza hi xona ni ku endla swo karhi leswaku u xi tsakisa. Kutani Xikwembu xi ta “tshinela eka [wena].” (Yakobo 4:8) Bibele ya hi tiyisekisa leswaku a xi le “[kule] ni un’wana ni un’wana wa hina.”—Mitirho 17:27.

• Leswi u nga swi endlaka leswaku u tiva Xikwembu

• Mavunwa mayelana ni ku tiva Xikwembu

Leswi u nga swi endlaka leswaku u tiva Xikwembu

Hlaya Bibele

• Leswi Bibele yi swi vulaka: “Matsalwa hinkwawo ma huhuteriwe hi Xikwembu.”—2 Timotiya 3:16.

• Nhlamuselo: Xikwembu hi xona Mutsari wa Bibele. Xi endle leswaku vatsari va Bibele va tsala mianakanyo ya xona. Xi tirhise buku leyi yo hlawuleka leswaku xi hi byela xikongomelo xa xona mayelana na hina. Xi tlhele xi hi paluxela vumunhu bya xona ku nga rirhandzu, vululami ni tintswalo.—Eksoda 34:6; Deteronoma 32:4.

• Leswi u nga swi endlaka: Hlaya Bibele masiku hinkwawo. (Yoxuwa 1:8) Anakanyisisa hileswi u swi hlayaka ivi u tivutisa leswi: ‘Xana leswi swi ndzi dyondzisa yini hi Xikwembu?’—Pisalema 77:12.

  Hi xikombiso, hlaya Yeremiya 29:11 ivi u tivutisa leswi: ‘Xana Xikwembu xi ndzi navelela yini, ku rhula kumbe khombo? Xana i Xikwembu lexi rihiselaka kumbe xi lava leswaku ndzi va ni vumundzuku lebyinene?’

Xiyisisa ntumbuluko

• Leswi Bibele yi swi vulaka: “Hambileswi Xikwembu xi nga vonakiki, vumunhu bya xona bya vonaka ku sukela loko misava yi tumbuluxiwile ku ya emahlweni, hikuva byi vonaka eka swilo leswi xi swi tumbuluxeke.”—Varhoma 1:20.

• Nhlamuselo: Ku fana ni leswi muchini lowu rharhanganeke kumbe swilo leswi endliweke hi munhu la nga ni vutshila swi hi byelaka swo karhi hi muendli wa swona, swi tano ni hi swilo leswi Xikwembu xi swi tumbuluxeke, swi kombisa vumunhu bya xona. Hi lexi xikombiso, ku rharhangana ka byongo ni vuswikoti bya byona byo tsundzuka swilo, byi kombisa vutlhari bya Xikwembu naswona ndlela leyi xi kotaka ku lawula matimba ya dyambu ni tinyeleti swi kombisa matimba ya xona.—Pisalema 104:24; Esaya 40:26.

• Leswi u nga swi endlaka: Tinyike nkarhi wo xiyisisa ni ku dyondza hi ntumbuluko. Loko u ri karhi u endla tano, tivutise leswi, ‘Xana ntumbuluko lowu ndzi wu vonaka wo hlamarisa wu ndzi dyondzisa yini hi Xikwembu?’a I ntiyiso leswaku ku ni swilo swo tala leswi ntumbuluko wu nga taka wu nga hi byeli hi Mutumbuluxi. Hi yona mhaka a hi nyikeke Bibele.

Tirhisa vito ra Xikwembu

• Leswi Bibele yi swi vulaka: “Ndzi ta n’wi sirhelela hikuva u tiva vito ra mina. U ta ndzi vitana, ndzi ta n’wi hlamula.”—Pisalema 91:14, 15.

• Nhlamuselo: Xikwembu lexi vito ra xona ku nga Yehovha xa va rhandza lava tivaka vito ra xona ni ku tlhela va ri xixima.b (Pisalema 83:18; Malakiya 3:16) Xikwembu xi titivisa eka hina hi ku hi byela vito ra xona. Xi ri: “Hi mina Yehovha. Rero i vito ra mina.”—Esaya 42:8.

• Leswi u nga swi endlaka: Loko u vulavula hi Xikwembu, tirhisa vito leri nge Yehovha.

Khongela eka Yehovha

• Leswi Bibele yi swi vulaka: “Yehovha u le kusuhi ni hinkwavo lava n’wi vitanaka.”—Pisalema 145:18.

• Nhlamuselo: Yehovha u tshinela eka lava khongelaka eka yena hileswi va n’wi tshembaka. Ku khongela i ndlela yin’wana yo gandzela leyi kombisaka leswaku ha xi xixima swinene Xikwembu.

• Leswi u nga swi endlaka: Khongela eka Xikwembu mikarhi hinkwayo. (1 Vatesalonika 5:17) Xi byele ndlela leyi u titwaka hayona ni leswi ku vilerisaka.—Pisalema 62:8.c

Pfumela eka Xikwembu

• Leswi Bibele yi swi vulaka: “A swi koteki ku tsakisa Xikwembu kahle handle ka ripfumelo.”—Vaheveru 11:6.

• Nhlamuselo: Leswaku hi tshinela eka Xikwembu, hi fanele hi va ni ripfumelo eka xona. EBibeleni loko munhu a ri ni ripfumelo, hi loko a pfumela leswaku Xikwembu xi kona ni ku tlhela a endla swin’wana, ku nga ku xi tshemba, a pfumela leswaku switshembiso swa xona swi ta endleka ni ku tlhela a yingisa milawu ya xona. Leswaku u va ni vuxaka lebyinene na munhu wo karhi, i swa nkoka leswaku u n’wi tshemba.

• Leswi u nga swi endlaka: Munhu u va ni ripfumelo leri tiyeke hi leswi a nga ni vutivi byo karhi. (Varhoma 10:17) Hikwalaho, dyondza Bibele leswaku u kota ku tshemba Xikwembu ni switsundzuxo swa xona. Timbhoni ta Yehovha ta swi tsakela ku dyondza Bibele na wena.d

Endla leswi tsakisaka Xikwembu

• Leswi Bibele yi swi vulaka: “Ku rhandza Xikwembu swi vula ku yingisa swileriso swa xona.”—1 Yohane 5:3.

• Nhlamuselo: Yehovha u tshinela eka lava va kombisaka leswaku va n’wi rhandza hi ku endla hinkwaswo leswi va nga swi kotaka leswaku va yingisa milawu yakwe.

• Leswi u nga swi endlaka: Loko u ri karhi u dyondza Bibele, xiya leswi Xikwembu xi swi rhandzaka ni leswi xi swi vengaka. Tivutise leswi, ‘Xana ndzi nga cinca yini evuton’wini bya mina leswaku ndzi kota ku tsakisa Muvumbi wa mina?’—1 Vatesalonika 4:1.

Yingisa milawu ya Xikwembu ivi u vona ndlela leyi xi ku khathalelaka hayona

• Leswi Bibele yi swi vulaka: “Tanani mi ta vona hi n’wexe leswaku . . . Xikwembu xi ni vunene.”—Pisalema 34:8, Bibele Mahungu Lamanene.

• Nhlamuselo: Yehovha hi lonene naswona wa ku rhamba leswaku u ta tivonela hi wexe. Loko u vona ndlela leyi a ku rhandzaka hayona ni ku ku seketela, u ta lava ku tshinela eka yena.

• Leswi u nga swi endlaka: Loko u ri karhi u hlaya Bibele, tirhisa milawu ya Xikwembu ivi u vona ndlela leyi sweswo swi ku vuyerisaka hayona. (Esaya 48:17, 18) Nakambe dyondza eka vanhu lava Xikwembu xi va pfuneke va hlula swiphiqo, va cinca vutomi bya vona ku katsa ni bya mindyangu ya vona ni ku kuma ntsako wa xiviri.e

Mavunwa mayelana ni ku tiva Xikwembu

Mavunwa: A hi nge swi koti ku tiva Xikwembu hikuva a xi twisiseki.

Ntiyiso: Ku ni swilo swin’wana mayelana na Xikwembu leswi hi tikelaka ku swi twisisa, ku fana ni leswaku i Moya. Hambiswiritano, hi nga swi kota ku xi tiva. Entiyisweni, Bibele yi vula leswaku hi fanele hi xi tiva leswaku hi ta kota ku kuma vutomi lebyi nga heriki. (Yohane 17:3) Bibele yi hlamusela Muvumbi hi ndlela leyi hi nga kotaka ku yi twisisa, yi hlamusela vumunhu byakwe, swikongomelo swakwe hi vanhu ni misava ku katsa ni milawu yakwe. (Esaya 45:18, 19; 1 Timotiya 2:4) Hilaha hi dyondzeke hakona, Bibele yi boxa vito ra Xikwembu. (Pisalema 83:18) Hi ndlela yoleyo, hi kota ku tiva Xikwembu ni ku tlhela hi tshinela eka xona.—Yakobo 4:8.