LESWI NGA PFUNAKA NDYANGU | VUKATI

Ku Nwa Ku Tlula Mpimo eVukatini

Xana nkataku u kombise ku vilela hikwalaho ka ndlela leyi u nwaka hayona? Loko swi ri tano, ku ni tinhla leti nga ku pfunaka.

Leswi nga eka nhlokomhaka leyi

Ku nwa ngopfu ni vukati a swi fambisani

Ku nwa ngopfu swi nga endla leswaku u va ni swiphiqo swo hambanahambana swa rihanyo leswi katsaka mavabyi ya mbilu, vuvabyi bya xivindzi ni khensa. Ku nwa ngopfu a swi vangi swiphiqo swa rihanyo ntsena kambe swi vanga swiphiqo ni le vukatini, leswi katsaka ku holova endyangwini, swiphiqo swa timali, ku nga tshembeki ni ku dlaya vukati.

Bibele yi vula leswaku loko byala byi nwiwa ngopfu byi nga “luma ku fana ni nyoka, Naswona [byi] humesa vuxungu ku fana ni mhiri.” (Swivuriso 23:32) U nga swi tiva njhani loko se u lawuriwa hi byala?

Xana u lawuriwa hi byala?

Swivutiso leswi landzelaka swi ta ku pfuna ku vona loko swi ri tano:

Xana swa ku tikela ku lawula ndlela leyi u nwaka hayona?
Xana u tshamela ku ehleketa hileswaku u ta tlhela u nwa rini?
Xana u tshamela ku nwa hambiloko swi ku vangela swiphiqo evuton’wini bya wena ni le vukatini bya wena?
Xana wa vabya loko u ringeta ku tshika ku nwa ngopfu?
Xana ndlela leyi u nwaka hayona yi endla leswaku u holova ni nkataku?
Xana leswi u nwisaka swona swi nyanyile loko swi pimanisiwa ni nkarhi lowu hundzeke?
Xana u nwa hi ku yiva kumbe hi ku tumbela loko u ri ekaya kumbe entirhweni?

Loko u hlamule hi ina eka xivutiso xin’we kumbe ku tlula, u nga va u lawuriwa hi byala. Swi nga endleka se u ri xilovekelo.

Papalata ku tiyimelela

Xana nkataku u kombise ku vilela hi ndlela leyi u nwaka hayona? Loko swi ri tano, swi nga endleka u ringete ku tumbela hi rintiho kumbe u endla onge ndlela leyi u nwaka hayona a yi bihanga. U nga ha va u vone van’wana nandzu ku katsa ni nkataku hileswi u nwaka ngopfu hi ku vula u ku:

“Loko a wu ndzi khoma kahle, a ndzi nga ta boheka ku nwa.”
“Loko a wu ri ni muthori wo fana ni wa mina, na wena a wu ta byi kukutlela.”
“Ndzi tiva vo tala lava va byi chelaka ku tlula mina.”

Loko u vulavula hi ndlela yoleyo, xana u rhandza byala ku tlula ku va ni ntsako evukatini bya wena? Xana hi swihi leswi swi faneleke swi va swa nkoka ngopfu?

Nawu wa le Bibeleni: “Wanuna loyi a tekeke u vilela hi . . . ndlela leyi a nga n’wi tsakisaka ha yona nsati wakwe.”—1 Vakorinto 7:33.

Nhlamuselo ya xifaniso: Swifaniso leswi hambaneke leswi kombisaka ndlela leyi wanuna a langutaka hayona swivilelo swa nsati wakwe malunghana ni ndlela leyi a nwaka byala hayona. 1. Wanuna u tshame endzhaku ka khumbi ro leha ra muako a khome bodlhela leri nga riki na nchumu. Mabodlhela man’wana mambirhi ma le hansi. Nsati wakwe u yime hi tlhelo lerin’wana ra khumbi a nga koti ku n’wi vona naswona u khunguvanyekile. 2. Wanuna u languta nsati wakwe hi fasitere kutani a yingisela swivilelo swa nsati wakwe. — Tshika ku tiyimelela leswi endlaka leswaku u nga voni ku vilela ka nkataku

Leswi u nga swi endlaka

U nga swi bi hi makatla swivilelo swa nkataku. Hambiloko swi vonaka onge nkataku u karhateka ngopfu, hikwalahokayini u nga tikarhateli ku endla ku cinca? Loko u tsandzeka ku cinca naswona u ya emahlweni u nwa ngopfu hambiloko nkataku a karhateka swi nga va swi kombisa leswaku byala se byi hundzuke xiphiqo.

Nawu wa le Bibeleni: “Un’wana ni un’wana a a endle leswi pfunaka ni van’wana, ku nga ri leswi pfunaka yena ntsena.”—1 Vakorinto 10:24.
Xalamuka. Leswaku socha ri hlula enyimpini, ri fanele ri n’wi tiva kahle nala wa rona. Hilaha ku fanaka, leswaku u hlula nala wa wena u fanele u dyondza hi ku nwa ngopfu ni ndlela leyi swi phasaka vanhu hayona. U fanele u dyondza tindlela leti nga ku pfunaka leswaku u tshika ku lawuriwa hi byala ni ku papalata ku tlhelela eka ku nwa ngopfu.

Nawu wa le Bibeleni: “Mi papalata ku navela ka nyama, loku ku lwaka na n’wina.”—1 Petro 2:11.
Kuma mpfuno. Ku na malunghiselelo lama endleriweke vanhu lava nga ni swiphiqo swa ku nwa ngopfu byala lama ma katsaka minongonoko ya ku pfuna lava va godzomberiweke, tindhawu ta ku va tshungula ni swibedlhele. U nga kombela munghana loyi a wupfeke leswaku a ku pfuna u vona loko ku ri ni swiphiqo leswi endlaka u lawuriwa hi byala. Loko u twa u navela ku tlhelela eka mukhuva wa wena wa khale vulavula na yena.

Ringeta ku lava mpfuno eka vativi va swa rihanyo

Nawu wa le Bibeleni: “Munghana wa ntiyiso u kombisa rirhandzu mikarhi hinkwayo, I makwenu wa ntiyiso loko u ri emaxangwini.”—Swivuriso 17:17.

Ku nwa ngopfu a hi mhaka yitsongo naswona a wu nge koti ku yi lulamisa hi ku hlaya nhlokomhaka yo koma ntsena kumbe hi ku vula ntsena u ku, “A ndzi nge he nwi ngopfu.” Kambe u fanele u tsundzuka leswaku ndlela leyi u lulamisaka mhaka leyi hayona a yi khumbi rihanyo ra wena ntsena kambe yi khumba ni vukati bya wena.

Kuma leswi engetelekeke: Hlaya tinhlokomhaka leti landzelaka leswaku u vona ndlela leyi van’wana va hluleke ku nwa ngopfu hayona.

“I Am No Longer a Cruel Man”

“A Ndza Ha Titwi Ndzi Nga Pfuni Nchumu”

“A Ndzi Hanya eSwitarateni”

Nakambe, hlalela vhidiyo leyi nge ‘A ndzi lava ku Cinca Vutomi Bya Mina’