Xana Bibele Yi Ri Yini Hi Ku Katseka Ka Vukhongeri eNyimpini Leyi Nga Kona eUkraine?

Twana leswi varhangeri va vukhongeri lava nga duma va swi vuleke hi nyimpi leyi nga kona eUkraine:

• “Mupatriyaka Krill loyi a nga murhangeri wa Kereke ya Orthodox eRhaxiya, a nga vonanga nchumu xo biha mayelana ni leswi Rhaxiya yi swi endlaka. . . . Kereke yakwe yi ye emahlweni yi haxa mavunwa hi Ukraine naswona Putin u tirhise mavunwa wolawo leswaku a tiyimelela hi nyimpi leyi nga kona.”—EUobserver, March 7, 2022.

• “Mupatriyaka Kirill . . . u seketele Rhaxiya loko yi ya lwa na Ukraine hi ku vula leswaku nyimpi leyi i ndlela yo lwa ni xidyoho lexi endliweke hi tiko ra Ukraine.—AP News, March 8, 2022.

• Bixopo wa vumbirhi wa le Kyiv loyi a nga murhangeri wa Kereke ya Orthodox eUkraine, u katekise vanhu vakwe hi Musumbhunuku leswaku va ya ‘lwa ni masocha ya le Rhaxiya lawa a ma tele ku hlasela’ . . . [U] tlhele a vula leswaku ku dlaya masocha ya Rhaxiya a hi xidyoho.”—Jerusalem Post, March 16, 2022.

• “Hina [Huvo ya Tikereke na Mihlangano ya Vukhongeri ya le Ukraine (UCCRO)] ha ma seketela masocha ya laha Ukraine ni hinkwavo lava lwelaka tiko ra hina, ha ma katekisa matshalatshala lawa va ma endlaka leswaku va sirhelela tiko ra Ukraine naswona ha va katsa eswikhongelweni.”—UCCROa Statement, February 24, 2022.

Xana wena u swi vona njhani? Xana vukhongeri lebyi vulaka leswaku byi landzela Yesu Kreste byi fanele byi khutaza swirho swa byona ku ya enyimpini? Xana Bibele yi ri yini hi mhaka leyi?

Matimu ya ku katseka ka vukhongeri enyimpini

Matimu ma kombisa leswaku vukhongeri bya yi pfumelela nyimpi, i yinene naswona swa boha ku ya enyimpini. Se swi endla makume ya malembe Timbhoni ta Yehovha ti ri karhi ti paluxa vukanganyisi bya vukhongeri. Xiya swikombiso swin’wana mayelana ni mhaka leyi leswi nga eka tibuku ta hina.

• Xalamuka leyi nge, “The Crusades—A ‘Tragic Illusion’” yi kombisa leswaku kereke ya Rhoma Khatoliki yi hoxe xandla eka ku yayarheriwa ka vanhu naswona a va tibyela leswaku va swi endlela Xikwembu na Kreste.

• Xalamuka leyi nge, “Kereke Ya Khatoliki eAfrika” yi kombisa ndlela leyi vukhongeri byi tsandzekeke hayona ku sivela tinyimpi ta xin’wanamanana ni ku dlayeteriwa ka vanhu.

• Tinhlokomhaka leti nge, “Xana Vukhongeri Hi Byona Byi Vangaka Madzolonga Ni Nyimpi?,” “Xiphemu Xa Vukhongeri eTinyimpini Ta Vanhu,” ni leyi nge “Vukhongeri Byi Yima Ni Tlhelo Ro Karhi” ti hlamusela ndlela leyi kereke ya Khatoliki, Orthodox ni ya Protestente ti ti seketeleke hayona tinyimpi.

Xana vukhongeri bya Vakreste byi fanele byi seketela tinyimpi?

Leswi Yesu a swi dyondziseke: “U fanele u rhandza warikwenu hi ndlela leyi u tirhandzaka ha yona.” (Matewu 22:39) “Yanani emahlweni mi rhandza valala va n’wina.”—Matewu 5:44-47.

Leswi Yesu a swi vuleke: “Mfumo wa mina a hi xiphemu xa misava leyi. Loko a wu ri xiphemu xa misava leyi, valandzeri va mina a va ta va va ndzi lwerile leswaku ndzi nga khomiwi.” (Yohane 18:36) “Hinkwavo lava khomaka banga va ta dlayiwa hi banga.”—Matewu 26:47-52.

Ehleketa hi mhaka leyi: Leswi Vakreste a va nga fanelanga va lwa hambileswi a va fanele va sirhelela Yesu, xana va fanele va lwa loko ku ri ni swivangelo swin’wana? Leswaku u vona ku Vakreste vo tshembeka va xi landzerile xikombiso xa Yesu ni tidyondzo takwe, hlaya nhlokomhaka leyi nge: “Xana Tinyimpi Ta Fambisana Ni Vukreste?”

Ku ta endleka yini hi vukhongeri lebyi hlohlotelaka tinyimpi?

Bibele yi dyondzisa leswaku Xikwembu xi venga vukhongeri lebyi vulaka leswaku byi yimela Yesu kambe byi nga landzeli tidyondzo takwe.—Matewu 7:21-23; Tito 1:16.

• Buku ya Nhlavutelo yi kombisa leswaku Xikwembu xi byi vona nandzu vukhongeri lebyi hoxeke xandla eka “hinkwavo lava dlayiweke emisaveni.” (Nhlavutelo 18:21, 24) Leswaku u tiva xivangelo, hlaya nhlokomhaka leyi nge: “I Yini Babilona Lonkulu?”

• Yesu u kombise leswaku vukhongeri hinkwabyo lebyi Xikwembu xi byi vengaka byi ta lovisiwa hikwalaho ka mitirho ya byona yo homboloka, hilaha nsinya lowu nga ‘tswaliki mihandzu leyinene wu tsemiwaka wu hoxiwa endzilweni.’ (Matewu 7:15-20) Leswaku u twa ndlela leyi sweswo swi nga ta endleka hayona, hlaya nhlokomhaka leyi nge: “Vukhongeri Bya Mavunwa Byi Ta Lovisiwa Ku Nga Ri Khale!”

Photo credits, ku suka eximatsini ku ya exineneni: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images