Tiko Ra Rhaxiya Ri Hlasela Tiko Ra Ukraine

Hambileswi varhangeri va matiko va weke va pfuka leswaku va papalata tinyimpi, hi mixo wa February 24, 2022, tiko ra Rhaxiya ri hlengelete masocha leswaku va ya lwa ni tiko ra Ukraine. Xana leswi swi yi khumbe njhani misava hinkwayo? Eka masikunyana lama hundzeke, António Guterres loyi a nga matsalana wa Nhlangano wa Matiko, u te: “Swi twisa ku vava ku vona vanhu va xaniseka, ku onheteriwa ka nhundzu ni tindhawu ta vuhlayiseki ta matiko ya le Yuropa.”

Hi ku ya hi Bibele, xana swiendlakalo swo fana ni leswi swi vula yini?

• Yesu Kreste u vulavule hi mikarhi leyi ‘matiko ma nga ta hlaselana ni mifumo yi hlaselana.’ (Matewu 24:7) Leswaku u vona ndlela leyi Bibele yi kombisaka hayona leswaku tinyimpi ta namuntlha ti hetisisa marito lama vuriweke hi Yesu, hlaya nhlokomhaka leyi nge: “What Is the Sign of ‘the Last Days,’ or ‘End Times’?”

• Buku ya Nhlavutelo yi kombisa leswaku tinyimpi leti nga kona ti yimela “hanci yin’wana ya muhlovo wo tshwuka” naswona yi “susa ku rhula emisaveni.” (Nhlavutelo 6:4) Leswaku u vona ku vuprofeta lebyi byi vulavula hi tinyimpi leti nga kona namuntlha, hlaya nhlokomhaka leyi nge: “I Vamani Vagadi Va Mune Va Tihanci?”

• Buku ya Daniyele yi vulavule hi ku nga twani loku a ku ta va kona eka “hosi ya le n’walungwini” ni “hosi ya le dzongeni.” (Daniyele 11:25-45) Leswaku u tiva ku hikwalahokayini ku vuriwa leswaku tiko ra Rhaxiya ni vaseketeri va rona va yimela hosi ya le n’walungwini, hlalela vhidiyo leyi nge, Ku Hetiseka Ka Vuprofeta Bya Daniyele Ndzima 11.a

• Buku ya Nhlavutelo yi tlhela yi vulavula hi “nyimpi ya siku lerikulu ra Xikwembu xa Matimba Hinkwawo.” (Nhlavutelo 16:14, 16) Leyi a hi nyimpi ya ku lwa ka matiko, hilaha swi nga hakona namuntlha. Leswaku u tiva swo tala hi mhaka leyi, hlaya nhlokomhaka leyi nge: “I Yini Nyimpi Ya Armagedoni?”

Hikwalahokayini u fanele u va ni ntshembo hi vumundzuku?

• Bibele yi vula leswaku Xikwembu xi ta “herisa tinyimpi emisaveni hinkwayo.” (Pisalema 46:9) Leswaku u tiva swo tala mayelana ni vumundzuku lebyi Xikwembu xi hi tshembisaka byona, hlaya nhlokomhaka leyi nge: “A Real Hope for a Better Tomorrow.”

• Yesu u dyondzise valandzeri vakwe ku khongelela Mfumo wa Xikwembu leswaku wu ta. (Matewu 6:9, 10) Mfumo wolowo i hulumendhe ya Xikwembu ya le tilweni leyi nga ta hetisisa ku rhandza ka xona laha misaveni, sweswo swi katsa ni ku rhula loku nga ta va kona emisaveni hinkwayo. Leswaku u tiva ndlela leyi Mfumo wu nga ta ku vuyerisa hayona, hlalela vhidiyo leyi nge, Mfumo Wa Xikwembu I Yini?

Ku ni Timbhoni ta Yehovha leti tlulaka 129 000 leti tshamaka eUkraine. Ku fana ni Timbhoni leti tshamaka ematikweni man’wana, na tona ti tekelela xikombiso xa Yesu xa ku nga katseki eka swa tipolitiki ni ku ala ku teka xiphemu eka swa tinyimpi. (Yohane 18:36) Timbhoni ta Yehovha emisaveni hinkwayo ti ya emahlweni ti chumayela “mahungu lawa lamanene ya Mfumo” lawa ku nga wona ma nga tlhantlhaka swiphiqo swa vanhu, ku katsa ni tinyimpi. (Matewu 24:14) Ha ku rhamba leswaku u hi fonela loko u lava ku dyondza swo tala hi rungula ra le Bibeleni leri nyikaka ntshembo.