TSHAMANI MI RINDZILE!

Madzolonga Lama Tsemaka Nhlana Ya Ku Baleseriwa Ka Vanhu eMisaveni Hinkwayo—Bibele Yi Ri Yini Hi Mhaka Leyi?

LESWINTSHWA: April 27 2023

Madzolonga ya ku baleseriwa ka vanhu ya ya emahlweni ma andza emisaveni hinkwayo. Xiya swikombiso swi nga ri swingani leswi swa ha ku endlekaka.

“Amerika yi le henhla hi tinhlayo ta vanhu lava yayarheriwaka lembe ni lembe, yi vika leswaku vhiki na vhiki ku dlayiwa kwalomu ka munhu un’we.”—April 21, 2023, The Guardian.
“Swirho swa khume swa ndyangu eAfrika Dzonga swi baleseriwile endlwini, laha ku nga lova 7 wa va xisati na xifanyetana xa malembe ya 13.”—April 21, 2023, AP News.
“Wanuna loyi a a hlomile hi xibalesa u dlaye 6 wa vanhu eholweni leyi Timbhoni ta Yehovha ti gandzelaka eka yona eHamburg, endzhaku a tidlaya.”—March 10, 2023, Reuters.

Bibele yi nyika nchavelelo eka lava xanisekaka hikokwalaho ka timhangu leti tsemaka nhlana to fana ni leti. Leswaku u vona xikombiso xa xiviri xa un’wana loyi a swi tokoteke, hlalela vhidiyo leyi nge DeJanerio Brown: Ndzi Vavisekile Kambe A Ndzi Herisiwanga.

Bibele yi tlhela yi hi pfuna hi twisisa leswaku hikokwalahokayini ku humelela timhangu leti tsemaka nhlana to fana ni leti. Leswaku u kuma leswi engetelekeke hi mhaka leyi, hlalela vhidiyo leyi nge Hikwalaho Ka Yini Xikwembu Xi Pfumelele Leswaku Ku Va Ni Ku Xaniseka?

Hi July 2022, ku ve ni madzolonga lama tsemaka nhlana swinene ya ku baleseriwa ka vanhu emisaveni hinkwayo:

“Ku dlayiwa ka khale ka holobyenkulu Shinzo Abe loyi a nga n’watipolitiki loyi a dumeke wa le Japani, ku hlundzukise tiko ni ku siya vanhu emisaveni hinkwayo va tsemeke nhlana hikwalaho ka leswi tiko ra Japani ri nga riki ni madzolonga yo tala naswona nawu wa kwalaho wu tiyisa voko loko swi ta emhakeni ya ku tirhisiwa ka swibalesa.”—July 10, 2022, phephahungu ra The Japan Times.
“Tiko ra Denmark ra ha tsemeke nhlana hikwalaho ka leswi wanuna loyi a a khome xibamu a baleseleke vanhu vanharhu emolweni wa le Copenhagen.”—July 4, 2022, Reuters.
“EAfrika Dzonga: Ntlawa wa vavanuna lava a va khome swibamu va balesele 15 wa vanhu va fa eka tavern leyi nga etownship eSoweto.”—July 10, 2022, phephahungu ra The Guardian.
“Vanhu vo tlula 220 va baleseriwile va fa eU.S. hikwalaho ka madzolonga lama veke kona hi holideyi ya mahelovhiki ya ti 4 ta July.”—July 5, 2022, CBS News.

Xana wu kona ntshembo wa leswaku madzolonga yo tano ma ta hela? Xana Bibele yi ri yini hi mhaka leyi?

Ku Herisiwa Ka Madzolonga

Bibele yi vula leswaku hi hanya “emasikwini yo hetelela,” laha vanhu vo tala va nga ni tihanyi. (2 Timotiya 3:1, 3) Madzolonga ma endla leswaku vanhu va hanya hi ku chava. (Luka 21:11) Hambiswiritano, Bibele yi hi tshembisa hi nkarhi lowu madzolonga hinkwawo ma nga ta hela naswona vanhu “va ta tshama endhawini yo rhula, etindlwini leti sirhelelekeke laha ku nga riki na pongo.” (Esaya 32:18) Xana madzolonga ma ta herisiwa njhani?

Xikwembu xi ta lovisa vanhu vo biha ni ku herisa matlhari hinkwawo.

“Kambe lavo homboloka va ta lovisiwa emisaveni.”—Swivuriso 2:22.
‘Xikwembu xi herisa tinyimpi emisaveni hinkwayo. Xi tshova vurha xi tshovelela ni tlhari; xi hisa makalichi ya nyimpi hi ndzilo.’—Pisalema 46:9.

Xikwembu xi ta dyondzisa vanhu ku hanya hi ku rhula naswona sweswo swi ta endla ku nga ha vi na madzolonga.

“A swi nge vavisi munhu kumbe ku onha entshaveni ya mina yo kwetsima, hikuva misava hinkwayo yi ta tala hi ku tiva Yehovha ku fana ni mati lama funengeteke lwandle.”—Esaya 11:9.
Hambi enkarhini wa sweswi, Xikwembu xi dyondzisa vanhu emisaveni hinkwayo leswaku va tshika madzolonga kutani va “hundzula mabanga ya vona ma va swikomu ni matlhari ya vona ma va swikhutulo.”—Mikiya 4:3.

Leswaku u dyondza swo tala hi xitshembiso xa le Bibeleni mayelana ni ku hanya emisaveni leyi eka yona ku nga riki na ku chava, hlaya nhlokomhaka leyi nge: “Ku Chava—Xana Ku Ta Hela?”

Leswaku u dyondza swo tala mayelana ni xitshunxo xo ma herisela makumu madzolonga, hlaya nhlokomhaka leyi nge: “Ku Fika Ka Ku Rhula eMisaveni!”