Ku Baleseriwa Ka Vana eXikolweni—Xana Bibele Yi Ri Yini Hi Mhaka Leyi?

Hi ti 24 ta May 2022, ku endleke mhaka yin’wana leyi tsemaka nhlana exidorobanini xa Texas, eAmerika. Phephahungu ra The New York Times ri vula leswaku “wanuna loyi a a ri ni xibalesa u dlaye vana vo ringana 19 ni mathicara mambirhi . . . eXikolweni xa Robb Elementary.”

Lexi twisaka ku vava, swiendlakalo swo fana ni leswi swi tshamela ku endleka. Namuntlha tiko ra Amerika ri vike leswaku eswikolweni swa le Amerika, “lembe leri nga hundza ku ve ni ku baleseriwa ka vana ku ringana ka 249 naswona sweswo a swi nga se tshama swi endleka hi mpfhuka swi endleke hi 1970.”

Hikwalahokayini ku endleka swilo swo fana ni leswi, leswi tsemaka nhlana? Hi nga swi kota njhani ku tiyisela swiendlo leswi swo biha? Xana wu kona ntshembo wa leswaku madzolonga ma ta herisiwa? Bibele yi na tinhlamulo ta swivutiso leswi.

Hikwalahokayini madzolonga ma nyanya emisaveni?

•  Bibele yi hlamusela nkarhi lowu hi hanyaka eka wona tanihi “masiku yo hetelela” laha vanhu vo tala va “nga riki na rirhandzu” naswona va “nga ni tihanyi,” leswi va susumetelaka ku va ni madzolonga. Lava endlaka swilo leswi swo biha “va ta ya emahlweni va nyanya ku biha.” (2 Timotiya 3:1-5, 13) Leswaku u kuma swo tala hi mhaka leyi, hlaya nhlokomhaka leyi nge, “Did the Bible Predict the Way People Think and Act Today?”

Vanhu vo tala va tivutisa leswi, ‘Hikwalahokayini Xikwembu xi pfumelela swilo leswi tsemaka nhlana swi endleka, swo tanihi ku baleseriwa ka vana exikolweni?’ Leswaku u kuma nhlamulo ya le Bibeleni mayelana ni mhaka leyi, hlaya nhlokomhaka leyi nge, “Ha Yini Swilo Swo Biha Swi Humelela Vanhu Vo Lulama?”

Hi nga swi tiyisela njhani swilo sweswo swo biha?

•  “Hikuva swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka . . . nchavelelo lowu humaka eMatsalweni.”—Varhoma 15:4.

Milawu ya le Bibeleni yi nga ku pfuna leswaku u kota ku tiyisela emisaveni leyi nga ni madzolonga. Leswaku u dyondza swo tala hi mhaka leyi, vona nhlokomhaka leyi nge, Xana Madzolonga Ma Ta Hela? eka magazini wa Xalamuka!

Leswaku u kuma swiringanyeto leswi vatswari va nga swi tirhisaka ku pfuna vana va vona leswaku va langutana ni swiviko swa mahungu yo chavisa, hlaya nhlokomhaka leyi nge: “Swiviko Swo Chavisa Swa Mahungu Ni Vana Va Wena.”

Xana madzolonga ma ta kala ma hela?

•  “Yi ta swi ponisa eku tshikileriweni ni le madzolongeni.”—Pisalema 72:14.

•  “Va ta hundzula mabanga ya vona ma va swikomu ni matlhari ya vona ma va swikhutulo. Tiko a ri nge he tlakusi banga ku lwa ni tiko rin’wana, naswona a va nge he dyondzi nyimpi.”—Mikiya 4:3.

Xikwembu xi ta endla swilo leswi vanhu va tsandzekaka ku swi endla. Mfumo wa xona wa le matilweni wu ta herisa matlhari hinkwawo lama nga ni khombo ni madzolonga hinkwawo. Leswaku u dyondza swo tala mayelana ni leswi Mfumo wa Xikwembu wu nga ta swi endla, hlaya nhlokomhaka leyi nge: “‘Ku Rhula Ku Ta Andza’ eHansi Ka Mfumo Wa Xikwembu.”