Van’watipolitiki Va Vula Leswaku Armagedoni Yi Kwala Nyongeni—Xana Bibele Yi Ri Yini Hi Mhaka Leyi?

Hi Musumbhunuku wa October 10, 2022, tiko ra Rhaxiya ri hlasele madoroba ya le Ukraine hi ku tirhisa swibulukwa leswi kotaka ku famba mpfhuka wo leha emoyeni naswona sweswo va swi endle hi xivangelo xo tlherisela hikwalaho ka leswi ku bulusiweke bomo leyikulu eka masiku mambirhi lama hundzeke, leyi onheke buloho lerikulu leri hlanganisaka Crimea na Rhaxiya. Leswi swi endleke endzhaku ka loko Van’watipolitiki van’wana va ha ku lemukisa vanhu leswaku ku ta va ni Armagedoni ku nga ri khale.

•  “A hi se tshama hi va ekusuhi na Armagedoni hi ndlela leyi hi mpfhuka swi endleka loko Presidente ya le Amerika John F.] Kennedy a hlaselana ni tiko ra le Cuba hi swibulukwa leswi kotaka ku famba mpfhuka wo leha emoyeni. . . . A ndzi tshembi leswaku swa koteka ku tirhisa matlhari ya nyutliya ivi eku heteleleni ku nga vi na Armagedoni.”—Hi ku vula ka Presidente ya le Amerika, Joe Biden hi October 6, 2022.

•  “Ndza pfumela leswaku ku nga ri khale ku ta va na Armagedoni naswona misava hinkwayo yi le khombyeni.”—Hi ku vula ka Presidente ya le Ukraine Volodymyr Zelensky loko a vutisiwa hi va BBC News, hi October 8, 2022 mayelana ni switandzhaku leswi nga vaka kona loko ku tirhisiwa matlhari ya nyutliya.

Xana ku tirhisiwa ka matlhari ya nyutliya swi ta endla leswaku ku va na Armagedoni? Xana Bibele yi ri yini hi mhaka leyi?

Xana matlhari ya Nyutliya ma ta vanga Armagedoni?

Doo! Rito “Armagedoni” ri kumeka kan’we ntsena eBibeleni eka Nhlavutelo 16:16. A ri vuli nyimpi leyi nga ta va kona exikarhi ka matiko kambe ri vula nyimpi leyi nga ta va kona exikarhi ka Xikwembu na “tihosi ta misava hinkwayo.” (Nhlavutelo 16:14) Xikwembu xi ta tirhisa nyimpi ya Armagedoni leswaku xi herisa vulawuri bya vanhu.—Daniyele 2:44.

Leswaku u dyondza swo tala mayelana ni leswi Armagedoni yi nga ta swi endla emisaveni, hlaya nhlokomhaka leyi nge I Yini Nyimpi Ya Armagedoni?

Xana misava ni swivumbiwa leswi hanyaka eka yona swi ta herisiwa hi nyimpi ya nyutliya?

Doo! Hambileswi vafumi va nga ha tirhisaka matlhari ya nyutliya enkarhini lowu taka kambe Xikwembu a xi nge swi pfumeleli leswaku misava yi herisiwa. Bibele ya hlamusela:

•  “Misava yi tshama hilaha ku nga heriki.”—Eklesiasta 1:4.

•  “Lavo lulama va ta tshama emisaveni, va ta hanya eka yona hilaha ku nga heriki.”—Pisalema 37:29.

Hambiswiritano, vuprofeta bya Bibele ni leswi endlekaka namuntlha, swi kombisa leswaku ku nga ri khale ku ta va ni ku cinca lokukulu emisaveni. (Matewu 24:3-7; 2 Timotiya 3:1-5) Twana leswi Bibele yi swi vulaka mayelana ni vumundzuku hi ku va u dyondza Bibele mahala na hina.