Xana Swa Koteka Leswaku Vanhu Va Tinxaka Leti Hambaneke Va Khomiwa Ku Fana?—Xana Bibele Yi Ri Yini Hi Mhaka Leyi?

Eka vanhu vo tala, ku va vanhu va tinxaka leti hambaneke va khomiwa ku fana swi vonaka ku ri norho lowu nga se endlekaka.

• “Xihlawuhlawu xi ya emahlweni xi va ni khombo eka mihlangano yo hambanahambana, mitlawa ya vanhu vo hambanahambana ni le ka vutomi lebyi vanhu va byi hanyaka siku ni siku. Xi ya emahlweni xi endla leswaku vanhu va khomana hi ndlela yo biha.”—António Guterres, Matsalana Wa Jenerala Wa UN.

Xana swi ta pfuka swi kotile leswaku vanhu va tinxaka leti hambaneke va khomiwa ku fana? Xana Bibele yi ri yini hi mhaka leyi?

Langutelo ra Xikwembu hi vanhu va tinxaka leti hambaneke

Bibele yi hi dyondzisa ndlela leyi Xikwembu xi va langutaka hayona vanhu va tinxaka to hambanahambana.

• “[Xikwembu] xi endle tinxaka hinkwato ta vanhu leswaku va ta tshama emisaveni.”—Mitirho 17:26.

• “Xikwembu a xi na xihlawuhlawu, kambe eka tiko rin’wana ni rin’wana munhu loyi a xi chavaka a tlhela a endla leswinene wa amukeleka eka xona.”—Mitirho 10:34, 35.

Bibele yi boxa leswaku vanhu hinkwavo va huma eka ndyangu wun’we naswona Xikwembu xi amukela vanhu va tinxaka hinkwato.

Ndlela leyi ku khomiwa ku fana ka vanhu va tinxaka leti hambaneke ku nga ta endlekisa xiswona

Ku khomiwa ka vanhu hi ndlela leyi fanaka, ku ta va kona ehansi ka Mfumo wa Xikwembu lowu ku nga hulumendhe ya le tilweni. Hulumendhe yoleyo yi ta dyondzisa vanhu ku va va khoma van’wana hi ndlela leyinene. Vanhu va ta dyondza ndlela yo hlula xihlawuhlawu lexi va nga ha vaka na xona.

• “Vaakatiko va [ta] dyondza vululami.”—Esaya 26:9.

• “Ku ta va ni ku rhula hikwalaho ka ku lulama loku nga ta va kona, naswona mihandzu ya ku lulama ku ta va ku rhula ni nsirhelelo.”—Esaya 32:17.

Namuntlha vanhu va timiliyoni va dyondza eBibeleni ndlela yo khoma van’wana hi xichavo.

• Leswaku u dyondza swo tala, hlaya magazini wa Xalamuka! lowu nga ni nhlokomhaka leyi nge, “I Yini Lexi Nga Herisaka Xihlawuhlawu?”

• Leswaku u dyondza ndlela leyi vatswari va nga bulaka hayona hi nhlokomhaka leyi ekaya, hlaya nhlokomhaka leyi nge, “Talking to Children About Racism.”