Ku Tsekatseka Ka Misava Ku Onhetela Swinene eTurkey Ni Le Siriya—Xana Bibele Yi Ri Yini Hi Mhaka Leyi?

RUNGULA LERINTSHWA: February 10, 2023

Ku sukela hi Ravumune February 9, 2023, nhlayo ya vanhu lava feke eka ku tsekatseka ka misava loku veke kona eTurkey ni le Siriya hi Musumbhunuku, se yi tlula 20 000. Makume ya magidi ya vanhu va vavisekile naswona madzana ya magidi ya vanhu va sale va nga ha ri na makaya.

Tikomiti timbirhi ta Ntirho Wo Phalala leti simekiweke hi Timbhoni ta Yehovha ti ya emahlweni ti nyikela mpfuno lowu lavekaka ni ku pfuneta eka ku lava vanhu lava weriweke hi mhangu ni ku pfuna lava vavisekeke. (Vagalatiya 6:10) Vayimeri va hofisi ya rhavi ra le kusuhi va fike ku nga se hela tiawara ta 24 ku tsekatseka ka misava ku endlekile, hambileswi maxelo ya kona a ma nga lawuleki ni ku tlhela swi nononh’wa ku famba endhawini yoleyo, va fike va chavelela vamakwerhu ni ku va pfuna va tshama va ri ni vuxaka lebyinene na Yehovha. (1 Petro 5:2) Swiviko swa mayelana ni ntirho wa hina wo phalala swi ta kumeka eka Mahungu ya le ka jw.org.

Matsalwa ma hi tiyisekisa leswaku “Yehovhaa u le kusuhi ni lava tshovekeke timbilu; u ponisa lava hetiweke matimba.” (Pisalema 34:18) Switirhisiwa leswi landzelaka leswi sekeriweke eBibeleni swi nga ku pfuna hi mikarhi leyi yo tika.

Vhidiyo leyi nge, Nchavelelo Eka Lava Rilaka yi ni swiringanyeto leswi nga pfunaka lava feriweke hi vanhu lava va rhandzaka.
Nhlokomhaka leyi nge, “Pfuna Vana Va Wena Ku Va Nga Chavisiwi Hi Mahungu Lama Tsemaka Nhlana” yi ni switsundzuxo leswi kumekaka eBibeleni leswi nga pfunaka vana va wena leswaku va nga tsemiwi nhlana hi swiviko swa mahungu lama chavisaka.

Hi Musumbhunuku February 6, 2023, ku tsekatseka ka misava ku onheterile swinene eTurkey ni le Siriya.

“Hi Musumbhunuku, ku tsekatseka lokukulu ka misava ku dlaye vanhu vo tlula 3 700 endhawini leyikulu ya le Turkey ni le n’walunguvupeladyambu bya Siriya. Loko leswi swi endleka a ku titimela swinene naswona swi nyanyise xiyimo eka lava vavisekeke kumbe lava lahlekeriweke hi makaya. Nakambe maxelo lawa yo titimela ma endle leswaku swi tika ku kuma vanhu lava poneke.”—Reuters, February 6, 2023.

Timbilu ta hina ta vava loko hi hlaya hi makhombo yo tano. Hi mikarhi yo fana ni leyi, hi nga titshega hi Yehovha loyi a nga “Xikwembu xa nchavelelo hinkwawo.” (2 Vakorinto 1:3) U hi nyika ‘nchavelelo lowu humaka eMatsalweni leswaku hi ta va ni ntshembo.’—Varhoma 15:4.

EBibeleni hi dyondza hi:

Leswi profetiweke mayelana ni ku tsekatseka ka misava.
Laha hi nga kumaka nchavelelo ni ntshembo.
Ndlela leyi Xikwembu xi nga ta ku herisa hayona ku xaniseka hinkwako.

Leswaku u twa leswi Bibele yi swi vulaka mayelana ni tinhlokomhaka leti, hlaya swihloko leswi landzelaka:

a Yehovha i vito ra Xikwembu.—Pisalema 83:18.