2023: Lembe Ra Ku Karhateka​—Xana Bibele Yi Ri Yini Hi Mhaka Leyi

Hi lembe ra 2023, leswi endlekeke emisaveni hinkwayo swi nyikela vumbhoni lebyi heleleke bya leswaku hi hanya enkarhini lowu Bibele yi wu vulaka ‘masiku yo hetelela.’ (2 Timotiya 3:1) Vona ndlela leyi leswi endlekaka namuntlha swi fanaka hayona ni leswi Bibele yi swi vuleke khale leswaku swi ta endleka enkarhini wa hina.

Bibele ni leswi endlekaka emisaveni

“Tinyimpi ni swiviko swa tinyimpi.”​—Matewu 24:6.

• “Madzolonga ma tshamela ku andza ematikweni yo tala.”a

“Ku tsekatseka ka misava etindhawini to hambanahambana.”​—Marka 13:8.

• “Hi mpfhuka ku sungule 2023, emisaveni hinkwayo se ku ve ni ku tsekatseka ka misava ka 13 loku tlulaka mpimo wa 7 naswona ku tlakuke ku tlula mimpimo leyi tshameke yi rhekhodiwa.”b

“Swilo leswi nga ta va chavisa.”​—Luka 21:11.

• “Nguva ya ku hisa ka misava yi herile; se ku nghene nguva ya ku vila ka misava.”​—António Guterres, matsalanankulu wa UN.c

“Ku kayivela ka swakudya”​—Matewu 24:7.

• “2023: I lembe rin’wana ro tika eka lava va tsandzekaka ku khathalela mindyangu ya vona.”d

“Mikarhi yo nonon’hwa leyi swi tikaka ku hanya eka yona.”​—2 Timotiya 3:1.

• “Un’we eka vanhu va kwalomu ka nhungu u karhatiwa hi ntshikelelo wa miehlekeko.”e

Xana hi nga langutela yini eka lembe ra 2024?

A ku na loyi a swi tivaka leswaku ku ta humelela yini hi 2024. Kambe swilo leswi endlekaka emisaveni swi kombisa leswaku Mfumo wa Xikwembu kumbe hulumendhe ya le tilweni yi ta siva mifumo ya vanhu kutani yi herisa swilo hinkwaswo leswi vangelaka vanhu ku vilela ni ku xaniseka. —Daniyele 2:44; Nhlavutelo 21:4.

Loko ha ha rindzele leswaku leswi swi endleka, loko hi titwa hi vilela hi nga titshega hi Xikwembu leswaku xi hi pfuna. Bibele yi ri:

“Loko ndzi chava, ndzi tshemba wena.”—Pisalema 56:3.

Hi nga swi kombisa njhani leswaku hi tshemba Xikwembu? Ha ku rhamba leswaku u dyondza leswi engetelekeke hi switshembiso swa le Bibeleni leswi vulavulaka hi nkarhi lowu ku nga tava ku nga hari na ku xaniseka. Ringeta dyondzo ya hina ya Bibele ya mahala u vona ndlela leyi wena ni ndyangu wa wena mi nga vuyeriwaka ha yona eka switshembiso swa le Bibeleni.