Tindhambi Leti Chavisaka Swinene—Xana Bibele Yi Ri Yini Hi Mhaka Leyi?

Emisaveni hinkwayo, vanhu va languana ni tindhambi leti chavisaka swinene. Xiya swiviko leswi landzelaka:

“Eka masiku ma nga ri mangani lama hundzeke, dorobakulu ra China ri langutane ni mpfula ya matimba swinene leyi tshameke yi va kona eka malembe ya 140 lama hundzeke. Ku sukela hi Miqhivela ku ya fikela hi Ravunharhu ku ve ni 744.8 millimeters (29.3 inches) ta mpfula.”—AP News, August 2, 2023
“Hi Ravumune a ku ri siku ra vumbirhi laha xidzedze xa Typhoon Khanun xi vangeke mpfula ni moya wa matimba swinene edzongeni wa Japani naswona sweswo swi endle leswaku vanhu vambirhi va lova. . . . Xidzedze xi languteriwe ku tisa mpfula leyi nga ta fika eka 0.6 meters (2 feet) eka tintshava leti nga exikarhi ka Taiwan.”—Deutsche Welle, August 3, 2023.
“Ndhambi leyi veke kona eNova Scotia yi vangiwe hi mpfula leyi veke kona exiphen’wini xa Atlantic Canada eka malembe ya 50 lama hundzeke.”—BBC News, July 24, 2023.

Xana Bibele yi ri yini hi swiendlakalo leswi?

Xikombiso xa ‘masiku yo hetelela’

Bibele yi vula leswaku hi hanya enkarhini lowu vitaniwaka‘masiku yo hetelela.’ (2 Timotiya 3:1) Yesu u profete leswaku eminkarhini ya hina, hi ta vona ‘swilo leswi nga ta hi chavisa,’ kumbe swiendlakalo leswi chuhisaka. (Luka 21:11) Ku cinca ka maxelo i xivangelokulu lexi endlaka leswaku ku va ni swiendlakalo swo chavisa swa maxelo leswi nga languteriwangiki, leswi yaka emahlweni swi endleka naswona swi nga ni matimba swinene.

Lexi endlaka hi va ni ntshembo

Bibele yi hi byela leswaku swilo swo tala swo chavisa leswi endlekaka namuntlha swi hi nyika xivangelo xo va ni ntshembo. Hikwalahokayini? Yesu u te: “Na n’wina loko mi vona swilo leswi swi endleka, swi tiveni leswaku Mfumo wa Xikwembu wu le kusuhi.”—Luka 21:31; Matewu 24:3.

Swiendlakalo leswi hi swi vonaka swi humelela swi kombisa leswaku ku nga ri khale Mfumo wa Xikwembu wu ta lawula ntumbuluko lowu nga laha misaveni, ku katsa ni ndzendzeleko wa mati.—Yobo 36:27, 28; Pisalema 107:29.

Leswaku u dyondza swo tala hi ndlela leyi Mfumo wa Xikwembu wu nga ta vuyetela misava hayona, vona nhlokomhaka leyi nge, “I mani A Nga Ta Ponisa Misava?”