Ku Hisa Ka Maxelo Loku Nga Ni Khombo Emisaveni Hinkwayo Hi Ximumu Xa 2023—Xana Bibele Yi Ri Yini Hi Mhaka Leyi?

Vanhu emisaveni hinkwayo va tiyisela ku hisa ka maxelo loku nga si tshamaka ku va kona ni timhangu tin’wana leti vangiwaka hi ku hisa loku. Xiya swiviko leswi landzelaka:

• “Nhweti leyi ya June a ku ri yona yo hisa swinene hi mpfhuka vanhu va sungule ku vika mahiselo ya maxelo emisaveni hinkwayo eka malembe ya 174 lama hundzeke”—National Oceanic and Atmospheric Administration, U.S. Department of Commerce, July 13, 2023.

• “Italy, Spain, France, Germany na Poland ma langutane ni maxelo yo hisa lama languteriweke ku fika eka 48°C [118°F] eka swihlala swa Sicily na Sardinia – ku nga maxelo yo hisa lama nga tshama ma vikiwa eYuropa.”—European Space Agency, July 13, 2023.

• “Loko misava yi ya yi hisa, hi nga langutela timpfula to tala ta matimba leti nga vangaka timhangu to tala ta matimba.”—Stefan Uhlenbrook, murhangeri wa hydrology, water and cryosphere at the World Meteorological Organization, July 17, 2023.

Xana wa khumbeka hi ku tlakuka loku ka swiviko leswi swa maxelo? Xiya leswi Bibele yi swi vulaka hi mhaka leyi ya xihatla.

Xana maxelo lawa yo biha ma hetisisa vuprofeta bya le Bibeleni?

Ina. Ku hisa ka misava hinkwayo ni maxelo lawa yo biha swi fambisana kahle na leswi Bibele yi swi profeteke enkarhini wa hina. Hi xikombiso, Yesu u profete leswaku hi ta ‘vona swilo leswi nga ta hi chavisa.’ (Luka 21:11) Ku tlakuka ka mahiselo emisaveni hinkwayo swi endle leswaku vo tala va sungula ku chava leswaku vanhu va ta onha misava.

Xana misava yi ta herisiwa?

Doo. Xikwembu xi endle misava leswaku yi va kaya ra hina hilaha ku nga heriki; a xi nge pfumeli leswaku vanhu va yi lovisa. (Pisalema 115:16; Eklesiasta 1:4) Entiyisweni, xi tshembise ku “lovisa lava onhaka misava.”—Nhlavutelo 11:18.

Bibele yi kombisa leswaku Xikwembu xi ta sirhelela misava eka timhangu leti vangiwaka hi vanhu.

• “[Xikwembu] xi yimisa xidzedze; magandlati ya lwandle ma rhula.” (Pisalema 107:29) Xikwembu xi ni matimba yo lawula ntumbuluko. Xa swi kota ku lulamisa swiphiqo swa vanhu leswi vangaka maxelo yo hisa lama karhataka vanhu namuntlha.

• “U hlayisa misava, u endla leswaku yi nona yi tlhela yi va ni swakudya swo tala.” (Pisalema 65:9) Xikwembu xi ta endla misava yi va paradeyisi.

Leswaku u dyondza swo tala hi xitshembiso xa le Bibeleni xo vuyetela mbango, hlaya nhlokomhaka leyi nge “I Mani A Nga Ta Ponisa Misava?”