Ku Pfumaleka Ka Swakudya Emisaveni Hinkwayo Hikwalaho Ka Tinyimpi Ni Ku Cinca Ka Maxelo—Xana Bibele Yi Ri Yini Hi Mhaka Leyi?

Nyimpi leyi nga eUkraine, swin’we ni ku cinca ka maxelo swi ya emahlweni swi kavanyeta mphakelo wa swakudya emisaveni hinkwayo. Lexi i xivangelo lexi endlaka swi tikela vanhu vo tala ku kuma swakudya leswi eneleke etindhawini leta ha hluvukaka.

• “Ku endliwa na ku kumeka ka swakudya swa kavanyeteka hikwalaho ka tinyimpi, ku cinca ka maxelo, ku durha ka gezi ni swin’wana swo tala.”—António Guterres, UN secretary-general, July 17, 2023

• “Russia a ya ha ri xiphemu xa ntwanano wa ku rhumela swakudya ku suka eUkraine. Vativi va ehleketa leswaku leswi swi ta ya swinyanyisa xiphiqo xa swakudya emisaveni hinkwayo naswona swakudya leswi nga ematikweni lama ha hluvukaka ngopfungopfu en’walungwini wa Afrika ni le Middle East swi to ya swi durha.”—Atalayar.com, July 23, 2023

Xiya leswi Bibele yi swi vulaka hi xiphiqo xa swakudya ni hi vumundzuku.

Bibele yi profetile hi xiphiqo xa swakudya

• Yesu u profete a ku: “Matiko ma ta hlaselana ni mifumo yi ta hlaselana, ku ta va ni ku kayivela ka swakudya.”—Matewu 24:7.

• Buku ya Nhlavutelo yi hlamusela vagadi vamune va tihanci vo fanekisela. Un’wana wa va vagadi volavo va tihanci u yimela nyimpi. U landzela hi un’wana loyi a yimelaka ndlala, ku nga nkarhi lowu swakudya swi nga ta va swi kayivela naswona swi xavisiwa ku durha. “Ndzi vona hanci ya ntima naswona loyi a tshameke ehehla ka yona a a khome xikalo. Hiloko ndzi twa rito . . . Ri ku, Litara ya koroni yi ta xaviwa hi denari! Ni tilitara tinharhu ta maxalana ti ta xaviwa hi denari.”—Nhlavutelo 6:5, 6.

Vuprofeta lebyi bya le Bibeleni lebyi vulavulaka hi ku kayivela ka swakudya byi le ku hetisekeni namuntlha, ku nga nkarhi lowu Bibele yi wu vitanaka ‘masiku yo hetelela.’ (2 Timotiya 3:1) Ku dyondza swo tala hi ‘masiku ya makumu’ ni hi vagadi vamune va tihanci lava nga eka Nhlavutelo, hlalela vhidiyo leyi nge Misava Yi Cincile Ku Sukela Hi 1914 nakambe hlaya nhlokomhaka leyi nge “I Vamani Vagadi Vamune Va Tihanci?”

Ndlela leyi Bibele yi nga hi pfunaka ha yona

• Bibele yi ni switsundzuxo leswi nga ta hi pfuna ku tiyisela swiyimo swo tika, leswi katsaka ku tlakuka ka mixavo ya swakudya, hambi ku ri ku kayivela ka swakudya. Vona swikombiso swin’wana eka nhlokomhaka leyi nge “Ndlela Yo Hanya Hi Swimalana.”

• Bibele yi hi nyika ntshembo wa leswaku swilo swi ta antswa. Yi hi tshembisa hi nkarhi lowu ku nga ta va ni “ndzalo ya mavele emisaveni” laha vanhu hinkwavo va nga ta tiphina hi swakudya. (Pisalema 72:16) Ku dyondza swo tala hi ntshembo lowu wa vumundzuku ni leswi nga endlaka u tshembela eka wona, hlaya nhlokomhaka leyi nge “A Real Hope for a Better Tomorrow.”