Swiphiqo Swa Ikhonomi—Leswi Mfumo Wa Xikwembu Wu Nga Ta Swi Endla

Vanhu vo tala emisaveni swa va tikela ku va ni mali leyi ringaneke ya leswaku va kota ku hanya naswona swi ya emahlweni swinyanya ku tika.

• Hi ku ya hi xiviko xa misava hinkwayo,a “muholo lowu vanhu sweswi va wu kumaka a wa ha fikeleli swilaveko swa vona.” Xiviko lexi xi lemukisa leswaku loko ku nga endliwi nchumu hi mhaka leyi, “vangwa leri nga kona exikarhi ka lava nga ni mali ni lava nga riki na yona ri ta ya ri kula” naswona “vatirhi vo tala ni mindyangu ya vona va ta boheka ku cinca ndlela leyi a va hanya hi yona.”

Xana mifumo yi ta swi kota ku lulamisa swiphiqo leswi swa ikhonomi leswi yaka emahlweni swi tika?

Bibele yi hlamusela leswaku ku ni mfumo lowu nga ta tlhanthla swiphiqo hinkwaswo swa ikhonomi, ku katsa ni ku va vanhu va nga ringani hi swiyimo. Yi ri “Xikwembu xa le tilweni xi ta simeka mfumo,” ku nga mfumo lowu nga ta langutela hinkwaswo leswi endlekaka emisaveni. (Daniyele 2:44) Ehansi ka mfumo wolowo a nga kona loyi a nga ta tshikiwa kumbe ku rivariwa. (Pisalema 9:18) Mfumo wa Xikwembu wu ta tiyisekisa leswaku hinkwavo lava hanyaka ehansi ka wona, va tsakile hikwalaho ka leswi va nga ni hinkwaswo leswi va swi lavaka. Vanhu hinkwavo va ta tiphina hi mitirho leyi va nga ta yi endla.—Esaya 65:21, 22.