Anton Petrus/Moment via Getty Images
TSHAMANI MI RINDZILE!
Xana Nyimpi Ya Misava Hinkwayo A Yi Papalateki?—Xana Bibele Yi Ri Yini Hi Mhaka Leyi?
Eka malembe ya 30 lama hundzeke, vanhu vo tala a va vona onge vuxaka exikarhi ka matiko a byi ri kahle naswona a byi ya byi antswa. Hambiswiritano, swiendlakalo leswi endlekaka sweswi swi kombisa leswaku lowu a hi ntiyiso.
“Vanhu va vilela leswaku nyimpi ya le Gaza yi ta khumba matiko man’wana endhawini yoleyo loko Israel na Hezbollah va sungula ku lwa endzilakaneni wa Lebanon.”—Reuters, January 6, 2024.
“Mitlawa leyi lawuriwaka hi Iran ya hlasela etindhawini to hambanahambana naswona Iran hi xitshuketa yi sungule ku endla matlhari ya nyutliya, ku tlula kwalaho Russia na China sweswi ma tirhisana na Iran, leswi hinkwaswo swi vanga nxungeto eka matiko ya le vupeladyambu.”—The New York Times, January 7, 2024.
“Mihlaselo ya le Russia yi ya emahlweni yi vanga hasahasa eUkraine.”—UN News, January 11, 2024.
“Ku kula ka ikhonomi eChina ni ku andza ka masocha, ku tinyungubyisa loku kulaka ka tiko hinkwaro ra Taiwan ni ku tshwukiselana mahlo exikarhi ka China na US swi vanga xiyimo lexi nga endlaka leswaku ku tlhekeka nyimpi hi ku olova.”—The Japan Times, January 9, 2024.
Xana Bibele yi ri yini hi ku pfumaleka ka ntshamiseko ematikweni hinkwawo loku hi ku vonaka namuntlha? Xana ku ta vanga nyimpi ya misava hinkwayo?
Bibele yi profete swiendlakalo leswi nga kona
Ku hava nyimpi yo karhi leyi Bibele yi yi profeteke leyi hi yi vonaka namuntlha. Hambiswiritano, yi profete nyimpi leyi nga lawulekiki leyi tolovelekeke enkarhini wa hina naswona yi susa “ku rhula emisaveni.”—Nhlavutelo 6:4.
Buku ya Daniyele yi profete leswaku “enkarhini wa makumu” mimfumo ya misava leyi lwisanaka yi ta “susumetana” kumbe yi lwela vulawuri. Ku lwisana koloko ku ta katsa ku kombisa matimba lamakulu ya nyimpi ni ku tirhisa “xuma” xo tala, kumbe mali.—Daniyele 11:40, 42, 43.
Nyimpi leyi taka
Bibele yi kombisa leswaku xiyimo xa misava xi ta nyanya ku biha loko xi nga si antswa. Yesu u profete leswaku “ku ta va ni nhlomulo lowukulu lowu nga si tshamaka wu va kona hi mpfhuka misava yi va kona.” (Matewu 24:21) ‘Nhlomulo wolowo lowukulu’ wu ta chaputa eka nyimpi leyi vuriwaka Armagedoni, leyi hlamuseriwaka tanihi “nyimpi ya siku lerikulu ra Xikwembu xa Matimba Hinkwawo.”—Nhlavutelo 16:14, 16.
Hambiswiritano, Armagedoni yi ta ponisa vanhu, yi nge va lovisi. Enyimpini yoleyo Xikwembu xi ta herisa vulawuri bya vanhu lebyi vangeke tinyimpi to tala leti lovisaka. Leswaku u kuma ndlela leyi Armagedoni yi nga ta tisa ku rhula loku nga heriki hayona, hlaya tinhlokomhaka leti landzelaka: