Xana Nyimpi Yi Ta Hela Rini?—Xana Bibele Yi Ri Yini Hi Mhaka Leyi?

Loko a vulavula hi ku hlaseriwa ka Israel hi Iran hi Mugqivela, April 13, 2024 António Guterres Matsalana Jenerala Wa Nhlangano Wa Matiko u ri: “Sweswi i nkarhi wa leswaku xiyimo xi antswa. Naswona i nkarhi wa leswaku vanhu va tikhoma.”

Nyimpi leyi nga eMiddle East yi wela eka swilo leswi dumeke emisaveni hinkwayo.

“Misava yi ni nhlayo leyi tlakukeke ya madzolonga ku sukela hi nyimpi ya vumbirhi ya misava naswona tibiliyoni timbirhi ta vanhu—ku nga munhu un’we eka va mune—va khumbekile.”—Huvo Ya Vusirheleri Ya Nhlangano Wa Matiko, January 26, 2023.

Matiko lama katsekeke eka madzolonga wolawo ma katsa Israel, Gaza, Syria, Azerbaijan, Ukraine, Sudan, Ethiopia, Niger, Myanmar, na Haiti.a

Xana nyimpi leyi yi ta hela rini? Xana varhangeri va misava va nga swi kota ku tisa ku rhula? Xana Bibele yi ri yini hi mhaka leyi?

Nyimpi Leyi Nga eMisaveni

Ku kwetlembetana loku nga kona emisaveni hinkwayo namuntlha ku kombisa leswaku ku nga ri khale tinyimpi hinkwato ti ta herisiwa. Tinyimpi leti ti hetisisa vuprofeta bya le Bibeleni malunghana ni nkarhi lowu hi hanyaka eka wona. Bibele yi wu vitana ‘nkarhi wa makumu.’—Matewu 24:3.

• “Mi ta twa hi ta tinyimpi ni swiviko swa tinyimpi. . . . “Matiko ma ta hlaselana ni mifumo yi ta hlaselana”—Matewu 24:6, 7.

Leswaku u kota ku vona ndlela leyi tinyimpi ti hetisisaka vuprofeta bya le Bibeleni hayona namuntlha, hlaya nhlokomhaka leyi nge “Hi Swihi Swikombiso Swa ‘Masiku Yo Hetelela’ Kumbe ‘Mikarhi Ya Makumu’?.”

Nyimpi Leyi Nga Ta Herisa Tinyimpi Hinkwato

Bibele yi profeta hi ku hela ka tinyimpi leti nga kona exikarhi ka vanhu. Xana sweswo swi ta endlekisa ku yini? Ti ta herisiwa hi Armagedoni ku nga “nyimpi ya siku lerikulu ra Xikwembu xa Matimba Hinkwawo” ku nga ri hi matimba ya vanhu. (Nhlavutelo 16:14, 16) Nyimpi leyi yi ta endla leswaku Xikwembu xi hetisisa xitshembiso xa xona xa leswaku vanhu va tiphina hi ku rhula hilaha ku nga heriki.—Pisalema 37:10, 11, 29.

Leswaku u dyondza swo tala mayelana ni ndlela leyi Xikwembu xi nga ta herisa tinyimpi letin’wana hinkwato hayona, hlaya nhlokomhaka leyi nge “I Yini Nyimpi Ya Armagedoni?.”