Xana Swi Vula Yini Ku Va Mukreste?​—⁠Bibele Yi Ri Yini Hi Mhaka Leyi?

Namuntlha, vanhu vo tala emisaveni va ti ba xifuva va vula leswaku i Vakreste kambe va endla swilo leswi twisaka van’wana ku vava. Van’wana va rhangisa swilaveko swa vona vini, a va tshembeki naswona a va na musa. Van’wana a va tshembeki eka lava tekaneke na vona. Ndlela leyi va tikhomaka hayona yi endla van’wana va tivutisa leswaku: ‘Xana swi vula yini ku va Mukreste?’

Leswi ku va Mukreste swi vulaka swona

Swa olova ku va munhu a vula leswaku i Mukreste. Kambe sweswo a swi enelanga. Bibele yi vula leswaku Mukreste i mudyondzisiwa wa Yesu Kreste. (Mitirho 11:26) Yesu u te: “Loko mi yingisa leswi ndzi swi vulaka, mi vadyondzisiwa va mina.” (Yohane 8:31) I ntiyiso leswaku a nga kona loyi a nga yingisaka marito ya Yesu kwatsaa! Kambe Mukreste u tikarhatela ku landzela tidyondzo ta Yesu ni ku va siku ni siku a hanya hi ndlela leyi kombisaka leswaku i ta nkoka. Hi leswi swikombiso swin’wana.

Vakreste va rhandzana

Leswi Yesu a swi vuleke: “Ndzi mi nyika nawu lowuntshwa wa leswaku mi rhandzana; tanihi leswi ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina loko mi rhandzana.”—Yohane 13:34, 35.

Leswi Yesu a swi endleke: Yesu a a rhandza vanhu hinkwavo swi nga ri na mhaka leswaku va ni swa le mandleni, va dumile kumbe va tshama kwihi. U horise lava a va vabya, a phamela lava a va ri ni ndlala ni ku nyikela hi vutomi byakwe hikwalaho ka van’wana.—Matewu 14:14-21; 20:28.

Leswi Vakreste va swi endlaka: Vakreste va kombisa van’wana rirhandzu hi ku va ni malwandla, hi ku nga vi ni xihlawuhlawu ni ku rivalela van’wana. Va pfuna van’wana naswona va tiyimisele ku titsona swo karhi hikwalaho ka vona.—1 Yohane 3:16.

Vakreste va tshembeka

Leswi Yesu a swi vuleke: “Hi mina . . . ntiyiso.”—Yohane 14:6.

Leswi Yesu a swi endleke: Yesu a a tshembeka eka hinkwaswo leswi a swi vula ni ku swi endla. A a nga sindzisi van’wana leswaku va endla leswi a a swi lava kumbe a vulavula hi ndlela leyi kanganyisaka. A a tiviwa hi ku tshembeka hambiloko sweswo a swi ta endla leswaku a kanetiwa.—Matewu 22:16; 26:63-67.

Leswi Vakreste va swi endlaka: Vakreste a va hembi. Va hakela swibalo, a va yivi naswona va tirha hi ku tshembeka emitirhweni ya vona. (Varhoma 13:5-7; Vaefesa 4:28) A va kanganyisi van’wana, a va bi swijumbana eka swikambelo kumbe ku tsala rungula leri nga riki ntiyiso loko va lava ntirho.—Vaheveru 13:18.

Vakreste va ni musa

Leswi Yesu a swi vuleke: “Tanani eka mina, n’wina hinkwenu lava karhaleke ni lava tikeriwaka, ndzi ta mi phyuphyisa. Rhwalani joko ra mina mi tlhela mi dyondza eka mina, hikuva ndzi ni musa naswona ndza titsongahata, kutani mi ta phyuphyisiwa. Hikuva joko ra mina ra olova ni ndzhwalo wa mina wa vevuka.”—Matewu 11:28-30.

Leswi Yesu a swi endleke: Yesu a a ngheneka naswona a a ri ni musa. A a amukela vana, a chavelela lava tshikilelekeke ni ku khoma van’wana hi ndlela ya xichavo.—Marka 10:13-15; Luka 9:11.

Leswi Vakreste va swi endlaka: Vakreste va ni musa; a va khomi van’wana hi ndlela yo biha. (Vaefesa 4:29, 31, 32) Va ni mhaka ni van’wana naswona va lava tindlela to va pfuna.—Vagalatiya 6:10.

Vakreste va tshembeka eka lava tekaneke na vona

Leswi Yesu a swi vuleke: “Leswi Xikwembu xi swi paneke swin’we, ku nga tshuki ku va ni munhu la swi hambanisaka.”—Marka 10:9.

Leswi Yesu a swi endleke: Hambileswi Yesu a a nga catanga kambe u khutaze vatekani leswaku va tshembeka. (Matewu 19:9) U lemukise hi swiendlo leswi nga onhaka vukati.—Matewu 5:28.

Leswi Vakreste va swi endlaka: Vakreste va papalata swiendlo leswi nga thyakisaka vukati. (Vaheveru 13:4) Vatekani va rhandzana va tlhela va xiximana.—Vaefesa 5:28, 33.