Tinyimpi eMiddle East​—⁠Xana Bibele yi ri yini?

Vanhu vo tala va vilela hikwalaho ka tinyimpi leti humelelaka eUnited States, Israel na Iran. Xana tinyimpi leti ti ta ya emahlweni ti nyanya ni ku tlhela ti khumba matiko man’wana? Xana mimfumo yi nga swi kota ku sivela tinyimpi ni ku endla leswaku misava yi tshama yi ri ni ku rhula?

Lava va tshameke va twa hi vuprofeta lebyi va nga ha tivutisa loko tinyimpi leti humelelaka eMiddle East ku ri masungulo ya nyimpi ya Armagedoni leyi boxiweke eka buku ya Nhlavutelo.

Xana Bibele yi ri yini?

Xana mimfumo yi ta swi kota ku herisa tinyimpi eMiddle East?

Bibele yi ri, “Mi nga tshembeli eka tihosana, Kumbe eka munhu, hikuva a nge swi koti ku mi ponisa.”—Pisalema 146:3.

Loko nkarhi wu famba swi ta ti komba loko mimfumo yi ta swi kota ku endla leswaku ku va ni ku rhula eMiddle East. Hambiswiritano Bibele yi swi veka erivaleni leswaku ku hava murhangeri wa tipolitiki, mfumo wa vanhu kumbe ntlawa wo karhi lowu nga herisaka tinyimpi ni ku tisa ku rhula. I Xikwembu ntsena le xi nga ta kota ku “herisa tinyimpi emisaveni hinkwayo.”—Pisalema 46:9.

• Ku kuma leswi engetelekeke hlaya nkandziyiso wa Xihondzo xo Rindza lexi nga ni nhlokomhaka le yi nge “Ku herisiwa ka tinyimpi​—Njhani?”

Xana tinyimpi leti nga eMiddle East ti hetisisa vuprofeta?

Bibele yi ri, “Mi ta twa hi ta tinyimpi. . . . Hikuva matiko ma ta hlaselana ni mifumo yi ta hlaselana.”—Matewu 24:6, 7.

Tinyimpi le ti nga kona eMiddle East ti kombisa “ku fika ka makumu” naswona ti nyikela vumbhoni bya leswaku hi hanya “emasikwini yo hetelela.” (Matewu 24:3; 2 Timotiya 3:1) Tinyimpi leti nga kona namuntlha ti kombisa leswaku ku nga ri khale Xikwembu xi ta teka goza ro herisa tinyimpi ni swiphiqo hinkwaswo leswi xanisaka vanhu.

• Ku kuma leswi engetelekeke hlaya nhlokomhaka leyi nge “Hi swi hi swikombiso swa ‘masiku yo hetelela,’ kumbe ‘mikarhi ya makumu’?”

Xana Armagedoni yi ta sungula eMiddle East?

Bibele yi ri, “mimoya leyi nga basangiki yi hlengeleta tihosi endhawini leyi vuriwaka Armagedoni hi Xiheveru.”—Nhlavutelo 16:16.

Nyimpi ya Armagedoni a hi nyimpi ya mimfumo ya vanhu leyi nga ta sungula eMiddle East kambe i nyimpi ya misava hinkwayo leyi katsaka mimfumo ya vanhu ni Xikwembu.

• Ku kuma leswi engetelekeke hlaya nhlokomhaka leyi nge “I yini nyimpi ya Armagedoni?”

I yini lexi nga hi pfunaka hi va ni ku rhula loko hi langutane ni swiyimo leswi hi endlaka hi vilela?

Bibele yi ri, “Mi nga vileli ha nchumu, kambe eka hinkwaswo kombelani Xikwembu hi xikhongelo leswaku xi mi pfuna, mi kombela mi ri karhi mi khensa.”—Vafilipiya 4:6.

Yehovhaa Xikwembu u lava leswaku hi khongela eka yena hikuva wa khathala ha hina, u ta yingisa swikhongelo swa hina ni ku hi pfuna hi kota ku langutana ni ku vilela. (1 Petro 5:7) U endla tano hi ku ka a nga hi byeli ntsena xivangelo lexi endlaka leswaku ku va ni tinyimpi kambe u hi byela ndlela leyi ti nga ta herisiwa hayona ni leswi a nga ta swi endla ku herisa ku twa ku vava ni ku xaniseka.—Nhlavutelo 21:3, 4.

• Ku kuma leswi engetelekeke hi ndlela leyi Xikwembu xi hi pfunaka hayona, hlaya nhlokomhaka leyi nge “U Nga Kuma Marito Lama Chavelelaka eBibeleni.”