Xana Ku Teka Tshengwe Swa Amukeleka?

Nhlamulo ya Bibele

Ku ringana nkarhi wo karhi, Xikwembu xi pfumelele wanuna ku teka vavasati vo hlayanyana. (Genesa 4:19; 16:1-4; 29:18–29) Kambe a hi xona xi sunguleke mukhuva wo teka tshengwe. Xi nyike Adamu nsati un’we.

Xikwembu xi pfumelele Yesu Kreste leswaku a wu simeka hi vuntshwa nawu wa xona wo sungula wa leswaku wanuna a teka nsati un’we ntsena. (Yohane 8:28) Loko Yesu a vutisiwe hi ta vukati, u te: “Loyi a va tumbuluxeke eku sunguleni u va endle va va waxinuna ni waxisati kutani a ku, ‘Hikwalaho ka sweswo, wanuna u ta siya tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we.’”—Matewu 19:4, 5.

Endzhaku ka nkarhi, un’wana wa vadyondzisiwa va Yesu u huhuteriwe hi Xikwembu ku tsala a ku: “Wanuna un’wana ni un’wana a a ve ni nsati wa yena, ni wansati un’wana ni un’wana a a ve ni nuna wa yena.” (1 Vakorinto 7:2) Nakambe Bibele yi vula leswaku wanuna un’wana ni un’wana loyi a tekeke evandlheni ra Vukreste naswona a nyikiwaka vutihlamuleri byo hlawuleka u fanele “a ri nuna la nga ni nsati un’we.”—1 Timotiya 3:2, 12.