Xana Xikwembu Xi Ta Swi Hlamula Swikhongelo Swa Mina?

Nhlamulo ya Bibele

Ina, xi ta swi hlamula. Bibele swin’we ni mintokoto swa kombisa leswaku Xikwembu xa swi hlamula swikhongelo. Bibele yi ri: ‘U ta enerisa ku navela ka lava chavaka Xikwembu, Naswona u ta ku twa ku rila ka vona va kombela ku pfuniwa, u ta va ponisa.’ (Pisalema 145:19) Swi titshege hi wena n’wini leswaku Xikwembu xi hlamula swikhongelo swa wena.

Leswi Xikwembu xi swi lavaka

• Khongela eka Xikwembu, ku nga ri eka Yesu, Maria, vakwetsimi, tintsumi kumbe swifaniso. Yehovha Xikwembu hi yena ntsena “Mutwi wa xikhongelo.”—Pisalema 65:2.

• Ku khongela hi ku pfumelelana ni ku rhandza ka Xikwembu loku nga eBibeleni.​—1 Yohane 5:14.

• Ku khongela hi vito ra Yesu, ku xiya xikhundla xa yena. “A nga kona loyi a taka eka Tatana handle ko ta ha mina.”—Yohane 14:6.

• Ku khongela hi ku tiyiseka, u kombela ripfumelo leri engetelekeke.​—Matewu 21:22; Luka 17:5.

• Ku titsongahata ni ku khongela swi huma embilwini. Bibele yi ri: “Yehovha u tlakukile, hambiswiritano wa n’wi vona la titsongahata.”—Pisalema 138:6.

• Ku phikelela. Yesu u te: “Hambetani mi kombela, mi ta nyikiwa.”—Luka 11:9.

Leswi Xikwembu xi nga riki na mhaka na swona

• Muvala wa wena kumbe tiko. “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mintirho 10:34, 35.

• Xiyimo xa miri wa wena. U nga khongela eka Xikwembu u tshame hansi, u korhamile, u khinsamile kumbe u yimile.—1 Tikronika 17:16; Nehemiya 8:6; Daniyele 6:10; Marka 11:25.

• Hambiloko u khongela hi rito leri twalaka kumbe hi mbilu. Xikwembu xi hlamula hambi swikhongelo leswi endliwaka embilwini leswi van’wana va nga kotiki ku swi twa.​—Nehemiya 2:1-6.

• Ku nga khathariseki leswaku u kharhateka hi swilo leswikulu kumbe leswitsongo. Xikwembu xi lava leswaku u ‘lahlela ku vilela hinkwako ka wena eka xona, hikuva xa ku khathalela.’—1 Petro 5:7.