Diyavulosi U Tshama Kwihi?

Nhlamulo ya Bibele

Tanihi xivumbiwa xa moya, Diyavulosi u tshama exivandleni lexi nga vonakiki. Hambiswiritano, ndhawu leyi a tshamaka eka yona a hi le tiheleni laha a xanisaka vanhu vo homboloka hilaha swi kombisiweke hakona exifanisweni lexi nga exihlokweni lexi.

“Nyimpi etilweni”

Ku ringana nkarhi wo karhi, Sathana Diyavulosi a a nyikiwe ntshunxeko wo famba-famba etilweni, ku katsa ni ku nghena emahlweni ka Xikwembu hi ku kongoma etlhelo ka tintsumi to tshembeka. (Yobo 1:6) Kambe Bibele yi vule leswaku ku ta tlhekeka “nyimpi etilweni” leyi a yi ta endla leswaku Sathana a hlongoriwa etilweni ivi a “lahleriwa ehansi emisaveni.” (Nhlavutelo 12:7-9) Nxaxamelo wa minkarhi ya Bibele swin’we ni swiendlakalo swa misava, swi tiyisekisa leswaku nyimpi yoleyo se yi humelerile. Sweswi Diyavulosi u lahleriwe laha misaveni.

Xana leswi swi vula leswaku Diyavulosi u tshama endhawini yo karhi laha misaveni? Hi xikombiso, muti wa khale wa Pergamo a ku vuriwa leswaku wu “laha xiluvelo xa Sathana xi nga kona” ni “laha Sathana a tshamaka kona.” (Nhlavutelo 2:13) Entiyisweni swiga swoleswo swi kombisa ndlela leyi vugandzeri bya sathana a byi andze hakona emutini wolowo. Bibele yi vula leswaku Diyavulosi u lawula “mimfumo hinkwayo ya misava leyi akiweke,” xisweswo a nga tshami endhawini yo karhi emisaveni kambe u kumeka hinkwako-kwako laha misaveni.​—Luka 4:​5, 6.