Ku Humelela Yini Hi Wena Loko U Fa?

Nhlamulo ya Bibele

Bibele yi ri: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” (Eklesiasta 9:5; Pisalema 146:4) Hikwalaho loko hi fa hi tshika ku va kona. Vafi a va ehleketi, a va tirhi naswona a va twi nchumu.

“U ta tlhelela entshurini”

Loko Xikwembu xi vulavula ni munhu wo sungula Adamu, xi hlamusele leswi humelelaka hi hina loko hi fa. Leswi Adamu a nga yingisangiki, Xikwembu xi n’wi byele xi ku: “U ntshuri u ta tlhelela entshurini.” (Genesa 3:19) Loko Xikwembu xi nga si vumba Adamu “hi ntshuri wa misava,” Adamu a a nga ri kona. (Genesa 2:7) Hikwalaho, loko Adamu a fa, u tlhelele entshurini kutani a nga ha vi kona.

Ku endleka leswi fanaka hi vanhu lava faka namuntlha. Loko Bibele yi vulavula hi vanhu ni swiharhi, yi ri: “Hinkwaswo swi ve kona swi huma entshurini, hinkwaswo swi tlhelela entshurini.”​—Eklesiasta 3:19, 20.

Rifu a hi makumu ya swilo hinkwaswo

Hakanyingi Bibele yi fanisa rifu ni ku etlela. (Pisalema 13:3; Yohane 11:11-14; Mintirho 7:60) Munhu la nga etlela vurhongo lebyikulu a nga swi tivi leswi humelelaka ekusuhi na yena. Hilaha ku fanaka, vafi a va tivi nchumu nikantsongo. Hambiswiritano, Bibele yi dyondzisa leswaku Xikwembu xi nga pfuxa vanhu lava feke onge hiloko xi pfuxa munhu evurhongweni. (Yobo 14:13-15) Eka vanhu lava Xikwembu xi nga ta va pfuxa, rifu a hi makumu ya swilo hinkwaswo.