Langutelo Ra Bibele

Ku Humelela Yini Loko Hi Fa?

VANA va Xikwembu lava nga vanhu va nyama a va nga vumberiwanga ku fa. (Varhoma 8:20, 21) Entiyisweni, loko Yehovha a vulavula na Adamu ro sungula hi rifu, u vule leswaku rifu a hi vuyelo lebyi munhu a faneleke a byi langutela, kambe i nxupulo wa ku nga yingisi Xikwembu. (Genesa 2:17) Adamu u swi twisisile leswi rifu a ri vula swona, tanihi leswi a a tolovele ku vona swiharhi swi fa.

Adamu u dyohile, kutani a hakela xidyoho xakwe hi ku va a fa loko a ri ni malembe ya 930 hi vukhale. (Genesa 5:5; Varhoma 6:23) Leswi a hlongoriweke endyangwini wa Xikwembu hikwalaho ka ku nga yingisi, a a nga ha tekiwi a ri n’wana wa Xikwembu. (Deteronoma 32:5) Bibele yi vula leswi malunghana ni vuyelo byo biha eka vanhu: “Xidyoho xi [nghene] emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo.”—Varhoma 5:12.

Xana Ku Humelela Yini Hi Miehleketo Ya Hina?

Bibele yi tlhela yi ku: “Ku ni makumu lama fikelaka vana va vanhu ni makumu lama fikelaka swiharhi, naswona swi ni makumu lama fanaka. Hilaha xin’wana xi faka hakona, ni lexin’wana xi fisa xisweswo; hinkwaswo swi ni moya wun’we, lerova munhu a nga tlakukanga ku tlula xiharhi, hikuva hinkwaswo i vuhava. Hinkwaswo swi ya endhawini yin’we. Hinkwaswo swi ve kona swi huma entshurini, hinkwaswo swi tlhelela entshurini.” (Eklesiasta 3:19, 20) Xana swi vula yini ku tlhelela entshurini?

Xiga lexi nge ku “tlhelela entshurini” xi hi tsundzuxa marito lawa Xikwembu xi ma byeleke munhu wo sungula lama nge: “U ntshuri u ta tlhelela entshurini.” (Genesa 3:19) Leswi swi vula leswaku vanhu, ku fana ni swiharhi, i swivumbiwa swa nyama. Hina a hi mimoya leyi nga ambala miri wa nyama. Vuswikoti bya hina byo ehleketa a byi nge sali byi hanya loko miri wa hina wu fa. Bibele yi vula leswi hi munhu la faka, yi ri: “Moya wakwe wa huma, a tlhelela entshurini wa yena; hi siku rero miehleketo yakwe ya lova.”—Pisalema 146:4.

Loko ku ri leswaku sweswo hi leswi endlekaka loko munhu a fa, hi xihi xiyimo xa vafi? Rito ra Xikwembu ri hlamula hi ku kongoma ri ku: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” (Eklesiasta 9:5) Ematshan’weni yo va rifu ri fana ni munghana loyi a hi amukelaka eka vutomi byo antswa, kambe i “nala wo hetelela” hilaha Bibele yi vulaka hakona hikuva ri hi tshikisa mintirho ya hina hinkwayo. (1 Vakorinto 15:26; Eklesiasta 9:10) Xana leswi swi vula leswaku loko munhu a file a ka ha ri na ntshembo?

Mahungu Lamanene Hi Rifu

Eka vanhu va timiliyoni, rifu ri fana ni vurhongo lebyi va nga ta pfuxiwa eka byona. Yesu u tshame a byela vadyondzisiwa vakwe hi munghana wa vona la feke a ku: “Lazaro nakulorhi u ye eku wiseni, kambe ndzi ya kona leswaku ndzi n’wi pfuxa evurhongweni.” Loko Yesu a ri karhi a ya eka sirha-bako ra xitsundzuxo, u hlangane ni ntshungu wa vakhandli va hlonge. Loko a fika eka sirha-bako, u lerise leswaku ri pfuriwa kutani a huwelela a ku: “Lazaro, huma!” Lazaro loyi a a hete mune wa masiku a file u humile. (Yohane 11:11-14, 39, 43, 44) Leswi miri wa Lazaro a wu sungule ku bola, Yesu u kombise leswaku Xikwembu xi nga tsundzuka xin’wana ni xin’wana hi vafi—vumunhu bya vona, leswi nga emiehleketweni ya vona ni xivumbeko xa vona. A nga va endla leswaku va tlhela va hanya. Siku rin’wana Yesu u te: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena [Yesu] kutani va huma.”—Yohane 5:28, 29.

Loko Bibele yi ya emahlweni, yi hi nyika rungula leri engetelekeke, yi ri: “Rifu i nala wo hetelela la nga ta herisiwa.” (1 Vakorinto 15:26) A ku nge he pfuki ku ve ni vanhu lava nga ni gome lerikulu lava nga ta ya emasirheni va ya lahla varhandziwa va vona. Bibele yi ri: “Rifu a ri nge he vi kona.” (Nhlavutelo 21:4) Langutelo ra Bibele hi leswi humelelaka hi vafi ra chavelela hakunene.

XANA U TSHAME U TIVUTISA?

◼ Xana ku ni lexi vafi va xi tivaka?—Eklesiasta 9:5.

◼ Xana loko munhu a fa a ka ha ri na ntshembo?—Yohane 5:28, 29.

[Nkomiso eka tluka 29]

“Moya wakwe wa huma, a tlhelela entshurini wa yena; hi siku rero miehleketo yakwe ya lova.”—Pisalema 146:4