Xana Timbhoni Ta Yehovha Ta Pfumela Leswaku Misava Yi Tumbuluxiwe Hi Masiku Ya Xiviri Ya Tsevu?

Doo. Timbhoni ta Yehovha ta pfumela leswaku Xikwembu xi tumbuluxe swilo hinkwaswo. Kambe a hi pfumeli leswaku misava yi tumbuluxiwe hi masiku ya xiviri ya tsevu. Ha yini? Hikuva mavonelo yo hlayanyana ya swidyondzeki leswi pfumelaka leswaku misava yi tumbuluxiwe hi masiku ya xiviri ya tsevu ma kanetana ni Bibele. Xiya swikombiso swimbirhi leswi landzelaka:

1. Ku leha ka masiku ya tsevu ya ku tumbuluxa. Swidyondzeki swin’wana swi vula leswaku masiku ya tsevu lawa Xikwembu xi ma tirhiseke ku tumbuluxa swilo hinkwaswo a ma lehe tiawara ta 24. Kambe eBibeleni rito leri nge “siku” ri nga ha kombetela eka nkarhi wo leha.—Genesa 2:4; Pisalema 90:4.

2. Malembe lawa misava yi nga na wona. Swidyondzeki swin’wana leswi pfumelaka leswaku swilo hinkwaswo swi lo tumbuluxiwa swi vula leswaku misava yo va ni magidi ma nga ri mangani ntsena ya malembe yi ri kona. Hambiswiritano, hi ku ya hi Bibele, misava ni vuako hinkwabyo swi ve kona masiku ya tsevu lawa Xikwembu xi ma tirhiseke ku tumbuluxa swilo ma nga si sungula. (Genesa 1:1) Hikwalaho, Timbhoni ta Yehovha ti pfumelelana ni leswi ndzavisiso wo tshembeka wa sayense wu swi vulaka wa leswaku misava yi nga ha va yi ri ni tibiliyoni ta malembe yi ri kona.

Hambileswi Timbhoni ta Yehovha ti pfumelaka leswaku swilo hinkwaswo swi lo tumbuluxiwa, a ti kanetani na yona sayense. Ha tshemba leswaku sayense ya ntiyiso ya pfumelelana ni Bibele.