I Vamani Lava Yaka eTiheleni?

Nhlamulo ya Bibele

Tihele (“Sheol” ni “Hayidesi” eka tindzimi to sungula ta Bibele) i sirha ku nga ri ndhawu leyi vanhu va hisiwaka eka yona hilaha ku nga heriki. I vamani lava yaka etiheleni? I vanhu lavanene ni lavo biha. (Yobo 14:13; Pisalema 9:17) Bibele yi vula leswaku sirha rero leri tolovelekeke, i ‘yindlu leyi hinkwavo lava hanyaka va nga ta hlangana eka yona.’—Yobo 30:23.

Hambi ku ri Yesu loko a fa u ye etiheleni. Hambiswiritano, “a nga tshikiwanga etiheleni” hikuva Xikwembu xi n’wi pfuxile.—Mintirho 2:31, 32, The Bible in Basic English.

Xana tihele ti ta va kona hilaha ku nga heriki?

Hinkwavo lava nga etiheleni va ta pfuxiwa eku feni hi Yesu, a tirhisa matimba lama humaka eka Xikwembu. (Yohane 5:28, 29; Mintirho 24:15) Loko vuprofeta lebyi nga eka Nhlavutelo 20:13 byi vulavula hi ku pfuxiwa ka vafi enkarhini lowu taka, byi ri: “Rifu ni Tihele swi tlherisa vafi lava a va ri ka swona.” (Bibele—Mahungu Lamanene) Loko tihele ti nga ha ri na munhu; a ku nge he vi na la nga ta ya kona hikuva “rifu a ri nge he vi kona.”—Nhlavutelo 21:3, 4; 20:14.

Kambe a hi vanhu hinkwavo lava loko va fa va yaka etiheleni. Bibele yi kombisa leswaku vanhu van’wana va nghene hi nhloko eku endleni ka leswo biha lerova a va tiyimiselanga ku hundzuka. (Vaheveru 10:26, 27) Loko vanhu vo tano va lova a va yi etiheleni kambe va ya eGehena, leswi vulaka ku loviseriwa makumu. (Matewu 5:29, 30) Hi xikombiso, loko Yesu a ri laha misaveni u byele varhangeri van’wana va vukhongeri lava a va ri ni vukanganyisi leswaku va ta ya eGehena.—Matewu 23:27-33.