Xana Timbhoni Ta Yehovha Ti Ni Bibele Ya Tona?
Timbhoni ta Yehovha ti tirhise vuhundzuluxeri byo tala loko ti ri karhi ti dyondza Bibele. Hambiswiritano, eka tindzimi leti nga ni Bibele ya Vuhundzuluxeri Bya Misava Leyintshwa Bya Matsalwa Yo Kwetsima, hi tsakela ku tirhisa yona hikuva yi ni vito ra Xikwembu, ya pakanisa naswona ya twisiseka.
Yi ni vito ra Xikwembu. Vakandziyisi van’wana va Bibele va tsandzekile ku vangamisa loyi swi n’wi fanelaka. Hi xikombiso, vuhundzuluxeri byin’wana bya Bibele byi longoloxe mavito ya vanhu vo tlula 70 lava hoxeke xandla eku yi kandziyiseni. Hambiswiritano, Bibele yoleyo yi ri suse hi ku helela vito ra Mutsari wa yona, Yehovha Xikwembu!
Ku hambana na yona, Bibele ya Vuhundzuluxeri Bya Misava Leyintshwa yi tlherisele vito ra Xikwembu etindhawini ta magidi leti a ri kumeka eka tona ematsalweni yo sungula naswona komiti leyi hundzuluxeleke Bibele yoleyo a boxanga mavito ya yona.
Ya pakanisa. A hi vuhundzuluxeri hinkwabyo lebyi hundzuluxelaka rungula ra Bibele hilaha a ri tsariwe hakona eku sunguleni. Hi xikombiso, vuhundzuluxeri byin’wana byi hundzuluxele tsalwa ra Matewu 27:40 hi ndlela leyi: “Xika la xihambanweni, loko u ri N’wana wa Xikwembu!” Hambiswiritano, rito leri tirhisiweke eka matsalwa yo sungula hi leri nge ‘mhandzi.’ Kumbexana vahundzuluxeri va tirhise rito leri nge ‘xihambano’ hileswi a va pfumela leswaku Yesu u fele exihambanweni. Kambe mhaka yoleyo a yi sekeriwanga eBibeleni. Hikokwalaho, Vuhundzuluxeri Bya Misava Leyintshwa byi hlayeka hi ndlela leyi: “Loko u ri n’wana wa Xikwembu, xika emhandzini ya nxaniso!”
Ya twisiseka. Vuhundzuluxeri lebyinene a byi fanelanga byi pakanisa ntsena kambe byi fanele byi tlhela byi twisiseka hi ku olova. Hi xikombiso, eka Varhoma 12:11, muapostola Pawulo u tirhise xiga lexi loko xi hundzuluxeriwa rito hi rito xi vulaka leswaku “ku vila ka moya.” Tanihi leswi xiga xexo xi tikaka ku xi twisisa, Vuhundzuluxeri Bya Misava Leyintshwa byi hundzuluxela ndzimana yoleyo hi ndlela leyi swi olovaka ku yi twisisa. Yi vula leswaku Vakreste va fanele va “pfurha hi moya.”
Hambileswi Bibele ya Vuhundzuluxeri Bya Misava Leyintshwa yi nga ni vito ra Xikwembu, yi pakanisaka ni ku twisiseka, ku ni nchumu wun’wana lowu yi hambaneke ha wona ni Tibibele letin’wana: Yi nyikiwa vanhu mahala. Hikokwalaho, vanhu va timiliyoni va kota ku yi hlaya hi ririmi ra vona hambi ku ri swisiwana leswi a swi nga ta swi kota ku yi xava.