Miri wa munhu wa xiviri laha mfumo wa matilo wu nga riki kona eka wona

Xana Mfumo Wa Xikwembu Wu Le Mbilwini Ya Wena?

Nhlamulo ya Bibele

Doo, Mfumo wa Xikwembu a hi nchumu lowu nga etimbilwini ta Vakreste.a Bibele yi hlamusela ndhawu ya ntiyiso leyi wu kumekaka eka yona yi ku, “mfumo wa matilo.” (Matewu 4:17, Bibele—Mahungu Lamanene) Xiya ndlela leyi Bibele yi wu kombisaka ha yona leswaku i mfumo wa xiviri lowu fumaka wu ri etilweni.

Mfumo wa Xikwembu wu ni vafumi, vanhu, milawu ni xikongomelo xo hetisisa ku rhandza ka Xikwembu etilweni ni laha misaveni.—Matewu 6:10; Nhlavutelo 5:10.
Hulumendhe ya Xikwembu kumbe Mfumo, wu ta fuma “vanhu, vanhu va matiko ni tindzimi hinkwato” laha misaveni. (Daniyele 7:13, 14) Vulawuri bya mfumo lowu a byi humi evanhwini kambe eka Xikwembu.—Pisalema 2:4-6; Esaya 9:7.
Yesu u byele vaapostola vakwe vo tshembeka leswaku va ta va na yena eMfun’weni wa matilo laha va nga ta “tshama eswiluvelweni.”—Luka 22:28, 30.
Mfumo wu ni valala lava wu nga ta va lovisa.—Pisalema 2:1, 2, 8, 9; 110:1, 2; 1 Vakorinto 15:25, 26.

Bibele a yi dyondzisi swona leswaku Mfumo wa matilo wu le mbilwini ya wena leswi vulaka leswaku wu fuma wu ri embilwini. Hambiswiritano, yi kombisa leswaku “rito ra Mfumo” kumbe “mahungu lamanene . . . ya Mfumo” ma nga khumba timbilu ta hina.—Matewu 13:19; 24:14.

Marito lama nge “mfumo wa Xikwembu wu kona exikarhi ka n’wina” ma vula yini?

Vanhu van’wana va pfilunganyekile malunghana ni laha Mfumo wu nga kona hikwalaho ka ndlela leyi Luka 17:21 yi hundzuluxeriweke ha yona eka Tibibele tin’wana. Hi xikombiso, Bibele Ya Mahungu Lamanene yi vula leswaku “mfumo wa Xikwembu wu kona exikarhi ka n’wina.” Leswaku hi twisisa ndzimana leyi kahle, hi fanele hi kambisisa mongo wa yona.

Van’wana va varhangeri va vukhongeri lava kaneteke Yesu — Mfumo wa Xikwembu a wu nga ri etimbilwini to sihalala ta vakaneti ni vadlayi va Yesu

Yesu a a vulavula ni Vafarisi, ku nga ntlawa wa varhangeri va vukhongeri lava a va n’wi kaneta naswona va tlheleke va hoxa xandla eku endleni leswaku a dlayiwa. (Matewu 12:14; Luka 17:20) Xana swa twala ku ehleketa leswaku Mfumo a wu ri etimbilwini ta vona to sihalala? Yesu u va byele a ku: “Endzeni mi tele vukanganyisi ni ku kala nawu.”—Matewu 23:27, 28.

Vuhundzuluxeri byin’wana byi ma hundzuluxele kahle marito ya Yesu lama nga eka Luka 17:21: “Mfumo wa Xikwembu wu kona exikarhi ka n’wina.” (Bibele—Mahungu Lamanene) “Mfumo wa Xikwembu wu le xikarhi ka n’wina.” (Marito lawa hi lo voyamisa; Vuhundzuluxeri Bya Misava Leyintshwa) Mfumo wa matilo a wu ri “exikarhi” ka Vafarisi, hileswi Yesu loyi a vekiweke hi Xikwembu leswaku a va Hosi, a a yime emahlweni ka vona.—Luka 1:32, 33.

a Mintlawa yo tala ya Vukreste yi dyondzisa leswaku Mfumo wa Xikwembu wu le ndzeni ka munhu kumbe wu le mbilwini. Hi xikombiso, le United States, Southern Baptist Convention yi vule leswaku Mfumo wa Xikwembu i nchumu “lowu nga embilwini ni le vuton’wini bya munhu.” Hilaha ku fanaka, ebukwini yakwe leyi vuriwaka Jesus of Nazareth, Mupapa Benedict wa vu-16 u vule leswaku “Mfumo wa Xikwembu wu va kona eka mbilu leyi yingisaka.”