Muhaxi wa ta Vukreste eka thelevhixini a ri karhi a chumayela

I Mani Mukaneti Wa Kreste?

Nhlamulo ya Bibele

Mukaneti wa Kreste a hi munhu wo karhi kumbe ndhawu hikuva Bibele yi vula leswaku ku ni “vakaneti va Kreste vo tala.” (1 Yohane 2:18) Ematshan’weni ya sweswo, xiga lexi nge “mukaneti wa Kreste” xa Xigriki lexi vulaka “ku lwisana na Kreste,” xi kombetela eka munhu la endlaka leswi landzelaka:

U kaneta leswaku Yesu i Kreste (Mesiya) kumbe leswaku i N’wana wa Xikwembu.—1 Yohane 2:22.
U lwisana na Kreste, Mutotiwa wa Xikwembu.—Pisalema 2:1, 2; Luka 11:23.
U tiendla Kreste.—Matewu 24:24.
U xanisa valandzeri va Kreste naswona Yesu u teka leswi va endliwaka swona ku ri leswi endliwaka yena.—Mintirho 9:5.
U tivula Mukreste hi hala tlhelo u endla swilo swo kala nawu ni vuxisi.—Matewu 7:22, 23; 2 Vakorinto 11:13.

Bibele yi tlhela yi kombetela eka hinkwavo lava endlaka swiendlo sweswo tanihi “mukaneti wa Kreste.” (2 Yohane 7) Mukaneti wa Kreste u sungule ku va kona eminkarhini ya vaapostola ku ta fikela ninamuntlha. Bibele yi profetile leswaku u ta va kona.—1 Yohane 4:3.

Ndlela leyi vakaneti va Kreste va vonakaka ha yona

Va dyondzisa mavunwa malunghana na Yesu. (Matewu 24:9, 11) Hi xikombiso, lava dyondzisaka dyondzo ya Vunharhu-un’we kumbe ya leswaku Yesu i Xikwembu xa Matimba Hinkwawo va kanetana ni leswi Yesu a swi vuleke, loko a ku: “Tatana u nkulu eka mina.”—Yohane 14:28.
Vakaneti va Kreste va kaneta leswi Yesu a swi vuleke malunghana ni ndlela leyi Mfumo wa Xikwembu wu fumaka ha yona. Hi xikombiso, varhangeri van’wana va vukhongeri va vula leswaku Kreste u tirhisa mimfumo ya vanhu. Kambe mhaka leyi yi lwisana ni leswi Yesu a swi vuleke loko a ku: “Mfumo wa mina a hi xiphemu xa misava leyi.”—Yohane 18:36.
Va vula leswaku Yesu i Hosi ya vona kambe a va swi yingisi swileriso swakwe leswi katsaka ku chumayela mahungu lamanene ya Mfumo.—Matewu 28:19, 20; Luka 6:46; Mintirho 10:42.