Timbhoni Ta Yehovha I Tingani eMisaveni Hinkwayo?

Ku laveka yini leswaku u va xirho xa tona?

Hi va Timbhoni ta Yehovha ntsena loko hi chumayela mahungu lamanene ya Mfumo wa Xikwembu n’hweti ni n’hweti hi ku hiseka. (Matewu 24:14) Leswi swi katsa Timbhoni leti khuvuriweke ni lava katsekaka eka ntirho wo chumayela hambiloko va nga si khuvuriwa.

Leswaku munhu a va xirho xa tona u fanele a humesa mali?

E-e. Minyikelo a yi endli leswaku munhu a va xirho xa Timbhoni kumbe a va ni ntirho wo karhi wo hlawuleka kumbe lunghelo ro karhi enhlengeletanweni ya hina. (Mintirho 8:​18-​20) Kahlekahle, loko munhu a nyikela swi tiviwa hi yena ntsena. Mbhoni yin’wana ni yin’wana yi nyikela hi nkarhi, matimba ni hi swilo leswi vonakaka eka ntirho wa misava hinkwayo hi ku ya hi leswi yi nga swi kotaka ni hi swiyimo swa yona.​—2 Vakorinto 9:7.

Mi swi tiva njhani leswaku i vangani lava chumayelaka hi ku hiseka?

N’hweti ni n’hweti, Timbhoni ti yisa swiviko swa tona swa ntirho wo chumayela eka vandlha ra laha ti tshamaka kona. Swiviko leswi swi vikiwa hi ku tirhandzela.

Mavandlha ma hlengeleta swiviko swa wona kutani nhlayo ya kona yi rhumeriwa ehofisini ya rhavi ra kwalaho. Hofisi ya rhavi yi rhumela tinhlayo ta matiko hinkwawo kumbe nsimu eyindlunkulu ya misava hinkwayo.

Eku heleni ka lembe rin’wana ni rin’wana ra ntirho,b ku xiyiwa ku andza ka nhlayo ya Timbhoni eka matiko hinkwawo. Tinhlayo leti ta hlanganisiwa leswaku ku ta xiyiwa nhlayo ya Timbhoni emisaveni hinkwayo. Swiviko swa matiko hinkwawo, ku katsa ni mintokoto ya ntirho wo chumayela swa kandziyisiwa eka Buku Ya Lembe Ya Timbhoni Ta Yehovha. Swiviko leswi swa hi khutaza, hi laha swiviko leswi fanaka swi va khutazeke hakona Vakreste vo sungula.​—Mintirho 2:​41; 4:4; 15:3.

Xana ma va hlaya vanhu lava hlanganyelaka na n’wina kambe va nga chumayeriki?

Hambileswi hi nga va katsiki eka nhlayo ya Timbhoni, kambe ha va amukela emavandlheni ya hina. Vo tala va vona va va kona eka Xitsundzuxo xa rifu ra Kreste lembe ni lembe, naswona nhlayo ya vona yi xiyiwa hi ku hambana ka nhlayo ya lava va vaka kona eka nhlangano lowu ni nhlayo ya Timbhoni. Hi 2015, lava va veke kona eXitsundzuxweni a va ri 19 862 783.

Vo tala lava nga tiki eminhlanganweni ya hina va vuyeriwa hi lunghiselelo ra mahala ra dyondzo ya Bibele ya le kaya. Hi 2015, ku ve ni tidyondzo ta Bibele ta kwalomu ka 9 708 968 n’hweti ni n’hweti, van’wana va vona va dyondzeriwe va ri hi ntlawa hi nkarhi wun’we.

Ha yini nhlayo ya Timbhoni leyi humesiwaka hi Mfumo yi tele ku tlula nhlayo ya n’wina?

Loko Mfumo wu hlaya wu endla hi ku vutisa vanhu leswaku vona va nghena kereke yini. Hi xikombiso, U.S. Census Bureau yi vula leswaku vahlayi “va lava ku tiva loko lava hlamulaka va ti teka va ri swirho swa vukhongeri bya le ndhawini yoleyo,” leswi kombisaka leswaku nhlayo leyi va yi tsalaka “i ya vanhu lava titekaka tano ku nga ri ya lava hakunene va nghenaka kereke.” Ku hambana ni sweswo, hina Timbhoni ta Yehovha hi hlaya ntsena vanhu lava chumayelaka van’wana naswona va vikaka ntirho wolowo, ku nga ri lava ngo titeka va ri Timbhoni.