Xana Misava Yi Ta Hela Rini?

Nhlamulo leyi kumekaka eBibeleni

Loko hi lava ku tiva leswaku misava yi ta hela rini, I swa nkoka ku rhanga hi twisisa ndlela leyi Bibele yi tirhisaka rito “misava” hayona. Rito ra Xigriki koʹsmos, leri mikarhi yo tala ri hundzuluxeriwaka ri va “misava,” hakanyingi ri kombetela eka vanhu, ngopfungopfu lava nga hanyiki hi milawu ya Xikwembu ni ku rhandza ka xona. (Yohane 15:18, 19; 2 Petro 2:5) Mikarhi yin’wana rito koʹsmos ri kombetela eka vanhu lava nga endliki ku rhandza ka Xikwembu.—1 Vakorinto 7:31; 1 Yohane 2:15, 16.a

I yini “ku hela ka misava”?

Xiga “ku hela ka misava” lexi humelelaka eka vuhundzuluxeri byo tala bya Bibele xi nga ha tlhela xi hundzuluxeriwa hi ndlela leyi, ku “fika ka makumu” kumbe “ku hela ka mikarhi.” (Matewu 24:3; English Standard Version) Xiga lexi a xi vuli ku herisiwa ka misava kumbe vanhu hinkwavo kambe xi vula ku herisiwa ka vanhu lava nga endliki ku rhandza ka Xikwembu.—1 Yohane 2:17.

Bibele yi dyondzisa leswaku “lava endlaka swo biha va ta herisiwa” kutani sweswo swi ta endla leswaku lava endlaka leswinene va tiphina hi vutomi laha misaveni. (Pisalema 37:9-11) Ku lovisiwa loku ku ta endleka hi nkarhi wa “nhlomulo lowukulu” lowu nga ta hela enyimpini ya Armagedoni.—Matewu 24:21, 22; Nhlavutelo 16:14, 16.

Xana misava yi ta hela rini?

Yesu u te: “Mayelana ni siku ra kona ni nkarhi a ku na munhu loyi a swi tivaka, hambi tintsumi ematilweni kumbe N’wana, kambe swi tiviwa hi Tatana ntsena.” (Matewu 24:36, 42) U engetele hi ku vula leswaku makumu a ma ta fika swi nga languteriwanga, “hi nkarhi lowu mi nga wu ehleketiki.”— Matewu 24:44.

Hambileswi hi nga tiviki siku ni nkarhi wa kona hi ku kongoma kambe Yesu u hi nyike “xikombiso” kumbe swiendlakalo swo hlayanyana, leswi a swi ta kombisa leswaku nkarhi wa ku herisiwa ka misava se wu tshinele. (Matewu 24:3, 7-14) Bibele yi hlamusela nkarhi wolowo tanihi “nkarhi wa makumu,” “ku hela ka mikarhi” ni “masiku yo hetelela.”​—Daniyele 12:4; God’s Word Bible; 2 Timotiya 3:1-5.

Xana ku ni leswi nga ta sala endzhaku ka loko misava yi herisiwile?

Ina. Misava yi ta va ya ha ri kona hikuva Bibele yi vula leswaku “a yi nge susiwi endhawini ya yona hilaha ku nga heriki.” (Pisalema 104:5) Naswona yi ta tala hi vanhu hilaha Bibele yi tshembisaka hakona yi ku: “Lavo lulama va ta tshama emisaveni, va ta hanya eka yona hilaha ku nga heriki.” (Pisalema 37:29) Xikwembu xi ta tisa swilo leswi landzelaka leswi a xi swi kunguhatile ku sukela eku sunguleni:

• Paradeyisi.—Esaya 35:1; Luka 23:43.

• Nsirhelelo ni ku va swilo swi hi fambela kahle.—Mikiya 4:4.

• Hi ta va ni mitirho ya nkoka yo yi endla leyi hi nga ta eneriseka hayona.—Esaya 65:21-23.

• Vanhu va ta tshunxeka eka mavabyi naswona a va nge he dyuhali.​—Yobo 33:25; Esaya 33:24.