VANTSHWA VA VUTISA
Hikwalaho Ka Yini Ndzi Fanele Ndzi Khongela?
Vulavisisi byin’wana byi kombisa leswaku vantshwa va kwalomu ka 80 wa tiphesente va le Amerika va khongela kambe i hafu ya vona ntsena lava khongelaka siku ni siku. A swi kanakanisi leswaku van’wana eka vona va tivutisa leswi: ‘Xana xikhongelo xi endleriwe ku pfuna vanhu leswaku va titwa va antswa kumbe xi pfuna eka swin’wana swa nkoka?’
I yini xikhongelo?
Xikhongelo i ku vulavurisana ni Muvumbi wa swilo hinkwaswo. Anakanya hi leswi sweswo swi vulaka swona! Yehovha u tlakukile eka vanhu hi tindlela hinkwato kambe a nga le “kule ngopfu ni un’wana ni un’wana wa hina.” (Mintirho 17:27) Entiyisweni, Bibele yi tamele xirhambo lexi hlamarisaka lexi nge: “Tshinelani eka Xikwembu, kutani xi ta tshinela eka n’wina”—Yakobo 4:8.
U nga tshinela njhani eka Xikwembu?
Ndlela yin’wana i ku vulavula na xona hi xikhongelo.
Yin’wana i ku dyondza Bibele, ku nga ndlela leyi Xikwembu xi vulavulaka na wena ha yona.
Ndlela yoleyo yo vulavurisana, hi xikhongelo ni ku dyondza Bibele, yi ta ku pfuna leswaku u va ni vunghana lebyi tiyeke ni Xikwembu.
“Ku vulavurisa na Yehovha, Xikwembu lexi tlakukeke swinene, i lunghelo lerikulu leri vanhu va nga na rona.”—Jeremy.
“Ku phofulela Yehovha ndlela leyi ndzi titwaka ha yona hi xikhongelo swi endla ndzi titwa ndzi ri ekusuhi na yena.”—Miranda.
Xana Xikwembu xa xi yingisa xikhongelo?
Hambiloko u pfumela eka Xikwembu naswona u khongela eka xona, mikarhi yin’wana swi nga ku tikela ku pfumela leswaku xa ku yingisa. Nilokoswiritano, Bibele yi vula leswaku Yehovha i “Mutwi wa xikhongelo.” (Pisalema 65:2) Yi tlhela yi ku rhamba leswaku u ‘lahlela ku vilela hinkwako ka wena eka xona.’ Hikwalaho ka yini? ‘Hikuva xa ku khathalela.’—1 Petro 5:7.
Ehleketa hi mhaka leyi: Xana u tinyika nkarhi wo vulavurisana ni munghana wa wena nkarhi ni nkarhi? U nga endla leswi fanaka ni le ka Xikwembu. Vulavurisana na xona nkarhi na nkarhi hi xikhongelo naswona u xi vitana hi vito ra xona ku nga Yehovha. (Pisalema 86:5-7; 88:9) Entiyisweni, Bibele ya ku rhamba leswaku u ‘khongela mikarhi hinkwayo’—1 Vatesalonika 5:17.
“Xikhongelo i ndlela leyi ndzi vulavurisanaka ha yona ni tata wa mina wa le tilweni, ndzi n’wi phofulelaka ta le mbilwini.”—Moises
“Ndzi vulavula na Yehovha hi swilo swo tala ku fana ni loko ndzi vulavula na manana kumbe munghana wa mina.”—Karen.
I yini leswi ndzi nga swi khongelelaka?
Bibele yi ri: “Eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina.”—Vafilipiya 4:6.
Xana leswi swi vula leswaku swi LULAMILE ku byela Xikwembu hi swiphiqo swa mina? Ina! Kahlekahle Bibele yi ri: “Lahlela ndzhwalo wa wena eka Yehovha, U ta ku seketela.”—Pisalema 55:22.
Entiyisweni, a wu fanelanga u vulavula hi swiphiqo swa wena ntsena. Nhwanyana la vuriwaka Chantelle u ri: “A ku ta va ku nga ri vunghana lebyinene loko a ndzo tshamela ku kombela mpfuno ntsena eka Yehovha. Ndzi anakanya leswaku ndzi fanele ndzi sungula hi ku n’wi khensa, naswona ndzi fanele ku va ni nxaxamelo wa swilo swo tala leswi ndzi n’wi khensaka hikwalaho ka swona.”
Ehleketa hi mhaka leyi: Hi swihi swilo leswi u khensaka Yehovha hikwalaho ka swona evuton’wini bya wena? Xana u nga ehleketa hi swilo swinharhu leswi u nga khensaka Yehovha ha swona namuntlha?
“Hambi ku ri swilo switsongo swo fana ni swiluva swo saseka swi nga hi susumetela ku khongela hi khensa Yehovha.”—Anita.
“Anakanyisisa hi nchumu wo karhi wa ntumbuluko lowu ku tsakisaka kumbe ndzimana ya Bibele leyi ku khumbaka mbilu kutani u khensa Yehovha hikwalaho ka swona.”—Brian.