Ravuntlhanu, September 26
[Yesu] u pfuke nimpundzu swinene . . . a ya endhawini leyi nga riki na vanhu a ya khongela.—Mar. 1:35.
Yesu u vekele vadyondzisiwa vakwe xikombiso lexi va faneleke va xi tekelela eka ndlela leyi a khongeleke hayona eka Yehovha. Loko a endla ntirho wakwe wo chumayela, Yesu a a khongela nkarhi ni nkarhi. Leswi mikarhi yo tala a a tshama a ri ni vanhu naswona a ri ni swo tala swo swi endla, u boheke ku tinyika nkarhi wo khongela. (Mar. 6:31, 45, 46) A a hubuta leswaku a kuma nkarhi wo va yexe leswaku a khongela. Siku rin’wana loko a nga si endla xiboho xa nkoka swinene, u khongele vusiku hinkwabyo. (Luka 6:12, 13) Nakambe hi vusiku byo hetelela a nga si fa, u khongele hi ku phindhaphindha a kombela matimba yo hetisisa xiavelo xakwe xo tika swinene xa laha misaveni. (Mat. 26:39, 42, 44) Xikombiso xa Yesu xi hi dyondzisa leswaku hi fanele hi tinyika nkarhi wo khongela hambiloko hi ri ni swo tala swo swi endla. Ku fana na Yesu, swi nga ha lava leswaku hi tinyika nkarhi wo khongela, ku nga ha va nimixo kumbe nimadyambu. Loko hi endla tano, hi kombisa Yehovha leswaku ha yi tlangela nyiko leyi yo hlawuleka. w23.05 3 ¶4-5
Mugqivela, September 27
Xikwembu xi chululele rirhandzu ra xona etimbilwini ta hina hi ku tirhisa moya lowo kwetsima lowu xi hi nyikeke wona.—Rhom. 5:5.
Xiya rito leri nga eka ndzimana leyi nga laha henhla leri nge, “chululele”. Dikixinari yin’wana ya Bibele yi hlamusela rirhandzu leri tanihi leri “khulukelaka eka hina ku fana ni nambu.” Xikombiso lexi xi kombisa rirhandzu lerikulu leri Xikwembu xi nga na rona eka vahlawuriwa! Vahlawuriwa va swi tiva leswaku va “[rhandziwa] hi Xikwembu.” (Yuda 1) Muapostola Yohane u hlamusele ndlela leyi va titwaka hayona loko a tsala a ku: “Vonani ndlela leyi Tatana a hi rhandzaka ha yona, lerova hi vuriwa vana va Xikwembu!” (1 Yoh. 3:1) Xana Yehovha u rhandza vahlawuriwa ntsena? Doo, Yehovha u kombise leswaku wa hi rhandza hinkwerhu. Hi yihi ndlela leyikulu leyi Yehovha a kombiseke rirhandzu rakwe hayona? Nkutsulo i ndlela leyikulu leyi Yehovha a swi kombiseke hayona leswaku wa hi rhandza!—Yoh. 3:16; Rhom. 5:8. w24.01 28 ¶9-10
Sonto, September 28
Valala va mina va ta baleka hi siku leri ndzi nga ta kombela mpfuno eka wena. Leswi ndza tiyiseka ha swona: Xikwembu xi na mina.—Ps. 56:9.
Ndzimana leyi yi nga laha henhla yi hlamusela ndlela leyi Davhida a hluleke ku chava kakwe hayona. Hambileswi vutomi byakwe a byi ri ekhombyeni, u anakanyisise hi leswi Yehovha a a ta n’wi endlela swona. Davhida a a swi tiva leswaku Yehovha a a ta n’wi ponisa hi nkarhi lowu faneleke. Phela Yehovha se a a vurile leswaku Davhida a a ta va hosi leyi landzelaka ya Israyele. (1 Sam. 16:1, 13) Eka Davhida, swilo hinkwaswo leswi Yehovha a a n’wi tshembisa swona a swi fana ni loko se swi endlekile. Yehovha u tshembise ku ku endlela yini? A hi langutelanga leswaku Yehovha a hi sirhelela hi nga weriwi hi swiphiqo. Nilokoswiritano, swiphiqo hinkwaswo leswi u nga ha langutanaka na swona emisaveni leyi, Yehovha u ta swi herisa emisaveni leyintshwa leyi taka. (Esa. 25:7-9) Muvumbi wa hina wa swi kota ku pfuxa lava feke, a horisa mavabyi ya hina ni ku herisa hinkwavo lava lwisanaka na hina.—1 Yoh. 4:4. w24.01 6 ¶12-13