September

Xikwembu xi nyike Yesu matimba yo tlhantlha swiphiqo hinkwaswo swa vanhu. Hi ku tirhisa masingita, Yesu u swi kombisile leswaku u ni matimba yo herisa swiphiqo leswi hina a hi nga ta pfuka hi swi kotile ku swi herisa. Hi xikombiso, u ni matimba yo herisa xidyoho lexi endlaka hi vabya ni ku fa. (Mat. 9:​1-6; Rhom. 5:​12, 18, 19) Masingita yakwe ma kombise leswaku a nga horisa mavabyi yo “hambanahambana” hambi ku ri ku pfuxa lava feke. (Mat. 4:23; Yoh. 11:​43, 44) Nakambe u ni matimba yo lawula swidzedze swa matimba ni ku hlula madimona. (Mar. 4:​37-39; Luka 8:2) Swi tiyisa nhlana ku tiva leswaku Yehovha u nyike N’wana wakwe matimba yo tano! Hi nga tiyiseka leswaku mikateko leyi hi nga ta yi kuma loko ku fuma Mfumo wa Xikwembu yi ta endleka. Masingita lama Yesu a ma endleke loko a ri laha misaveni ma hi dyondzisa hi swilo swo tala leswi a nga ta swi endla loko a ri Hosi ya le tilweni ya Mfumo wa Xikwembu. w23.04 3 ¶5-7

Loko u ri evandlheni leri nga ni vahuweleri vo tala naswona u vona onge mikarhi yo tala a wu kombiwi loko u yimise voko, u nga ha lava ku lan’wa ku hlamula etidyondzweni. Kambe u nga tshiki ku hlamula. Lunghiselela tinhlamulo to hlayanyana. Loko u nga kombiwanga leswaku u hlamula loko tidyondzo ti sungula, u ta va ni nkarhi wo tala wo hlamula loko tidyondzo ti ri karhi ti ya emahlweni. Loko u lunghiselela Xihondzo xo Rindza lexi dyondziwaka evandlheni, ehleketa hi ndlela leyi ndzimana ha yin’we yi fambisanaka hayona ni nhlokomhaka yoleyo. Loko u endla tano, a swi kanakanisi leswaku u ta nyikela tinhlamulo leti khutazaka. Nakambe u nga ha lunghiselela ku hlamula eka tindzimana leti vulavulaka hi tidyondzo ta Bibele leti enteke leti swi nga oloviki ku ti hlamusela. Hikwalahokayini? Hikuva swi nga endleka vo tala va nga yimisi mavoko eka tindzimana teto. Ku vuriwa yini loko u kuma leswaku ni sweswi endzhaku ka tinhlengeletano ta vandlha to tala a wu kombiwi loko u yimise voko? Byela mufambisi loko tidyondzo ti nga si sungula leswaku u lava ku hlamula eka xivutiso xo karhi. w23.04 21-22 ¶9-10

Yosefa a a nga bi mariri loko swi ta eka ku yingisa nkongomiso wa Yehovha naswona sweswo swi endle leswaku a va nuna lonene. Ku ringana kanharhu, Xikwembu xi n’wi nyike swiletelo leswi khumbaka ndyangu wakwe. Mikarhi hinkwayo a a hatla a yingisa hambiloko swi nga olovi. (Mat. 1:20; 2:​13-15, 19-21) Hikwalaho ka leswi Yosefa a yingiseke nkongomiso wa Xikwembu, u sirhelele Mariya, a n’wi seketela ni ku n’wi khathalela. Ehleketa ndlela leyi Mariya a yeke a rhandza Yosefa ni ku tlhela a n’wi xixima hikwalaho ka swiendlo swakwe! N’wina vavanuna lava tekeke, mi nga tekelela Yosefa hi ku lava xitsundzuxo xa le Bibeleni loko mi khathalela mindyangu ya n’wina. Loko u yingisa xitsundzuxo lexi, hambiloko swi lava leswaku u endla ku cinca ko karhi, u kombisa leswaku u rhandza nsati wa wena ni ku tiyisa vukati bya n’wina. Makwerhu waxisati wa le Vanuatu loyi a nga ni malembe yo tlula 20 a tekiwile u ri: “Loko nuna wa mina a lava ni ku tlhela a tirhisa nkongomiso wa Yehovha, ndzi ya ndzi n’wi xixima swinene. Ndzi titwa ndzi sirhelelekile naswona ndza swi tshemba swiboho swakwe.” w23.05 21 ¶5

Vayuda lava sukeke eBabilona va tlhelela eIsrayele a va ta va “vanhu vo kwetsima” eka Xikwembu xa vona. (Det. 7:6) Hambiswiritano, leswi a swi nga vuli swona leswaku a va nga fanelanga va cinca mahanyelo ya vona leswaku va tsakisa Yehovha. Vayuda vo tala lava tswaleriweke eBabilona naswona swi vonaka onge vo tala se a va ehleketa ni ku hanya ku fana ni Vababilona. Endzhaku ka malembe yo tala ntlawa wo sungula wa Vuyuda wu tlhelele eIsrayele, Ndhunankulu Nehemiya u hlamale ngopfu ku kuma leswaku vana lava tswaleriweke eIsrayele a va nga ri tivi ririmi ra Vayuda. (Det. 6:​6, 7; Neh. 13:​23, 24) Xana vana volavo a va ta swi kotisa ku yini ku dyondza ku rhandza Yehovha ni ku n’wi gandzela loko va nga xi twisisi Xiheveru, ku nga ririmi leri Rito ra Xikwembu a ri tsariwe ha rona? (Ezra 10:​3, 44) Kutani Vayuda volavo a va fanele va endla ku cinca lokukulu kambe a swi ta va olovela ku endla tano eIsrayele laha vugandzeri lebyi tengeke a byi pfuxetiwa hakatsongotsongo.—Neh. 8:​8, 9. w23.05 15 ¶6-7

Swi nga ri na mhaka leswaku hi tiyimisele ku fikela kwihi ku fikelela leswi hi swi kunguhateke, ku nga ha va ni leswi hi sivelaka. Hi xikombiso, “swiendlakalo leswi nga languteriwangiki” swi nga endla leswaku hi nga ha vi na nkarhi wo endla leswi hi swi kunguhateke. (Ekl. 9:11) Hi nga langutana ni xiphiqo lexi hi tikiselaka lexi hi hetaka matimba. (Swiv. 24:10) Hi nga ha endla swilo leswi endlaka swi tika ku fikelela leswi hi swi kunguhateke hikwalaho ka xidyoho lexi hi tswariweke na xona. (Rhom. 7:23) Kumbe hi nga ha titwa hi karhele. (Mat. 26:43) I yini leswi nga hi pfunaka hi hlula swihinga? Tsundzuka leswaku loko u va na xihinga a swi vuli swona leswaku u tsandzekile. Bibele yi vula leswaku hi nga langutana ni swiphiqo hi ku phindhaphindha. Hambiswiritano, yi tlhela yi swi veka erivaleni leswaku hi nga swi kota ku ya emahlweni. Loko u ya emahlweni u fikelela swilo leswi u kunguhateke ku swi fikelela hambiloko ku ri ni swihinga, u komba Yehovha leswaku u lava ku n’wi tsakisa. Yehovha wa tsaka loko a ku vona u ya emahlweni u tikarhatela ku fikelela leswi u swi kunguhateke! w23.05 30 ¶14-15

Ku phayona swi pfuna wanuna loyi a ha riki muntshwa leswaku a dyondza ku tirha ni vanhu vo hambanahambana. Swi tlhela swi n’wi pfuna ku hlayisa mali ni ku yi tirhisa kahle. (Filp. 4:​11-13) Masungulo lamanene eka ntirho wa nkarhi hinkwawo i ku va phayona ra nkarhinyana naswona leswi swi pfuna makwerhu leswaku a kota ku va phayona ra nkarhi hinkwawo. Ku phayona swi ta ku pfulela tindlela to va eka ntirho wa nkarhi hinkwawo wo tanihi ku va eka ntirho wo aka kumbe ku tirha eBethele. Vavanuna lava nga Vakreste va fanele va lwela ku fanelekela ku va vakulu va vandlha leswaku va ta tirhela vamakwavo. Bibele yi vula leswaku vavanuna lava lwelaka ku fikelela vutihlamuleri lebyi, va “navela ntirho lowunene.” (1 Tim. 3:1) Xo sungula, makwerhu u fanele a rhanga a va nandza wa vutirheli. Malandza ya vutirheli ma pfuna vakulu hi tindlela to tala. Hi ku titsongahata, vakulu ni malandza ya vutirheli va pfuna vamakwerhu ni ku katseka hi xitalo entirhweni wo chumayela. w23.12 28 ¶14-16

Hosi Yosiya u sungule ku lava Yehovha a ha ri muntshwa. A a lava ku dyondza hi Yehovha ni ku endla ku rhandza Kakwe. Hambiswiritano, swilo a swi nga yi oloveli hosi leyi a ya ha ri xihlangi. Leswi vanhu vo tala a va gandzela swikwembu swa mavunwa, Yosiya a a fanele a va ni xivindzi leswaku a va tshikisa ku endla tano. U swi kotile ku va tshikisa! Loko Yosiya a nga si va ni malembe ya 20, u sungule ku susa swikwembu swa mavunwa etikweni. (2 Tikr. 34:​1, 2) Hambiloko wa ha ri ntsongo, u nga tekelela Yosiya hi ku dyondza hi Yehovha ni hi vumunhu Byakwe. Loko u endla tano, u ta lava ku tinyiketela eka yena. Xana ku tinyiketela swi ta byi khumba njhani vutomi bya wena? Luke loyi a khuvuriweke a ri ni malembe ya 14 u ri: “Ku sukela sweswi, ndzi ta rhangisa ku tirhela Yehovha evuton’wini bya mina naswona ndzi ta ringeta ku n’wi tsakisa.” (Mar. 12:30) Loko u navela ku endla leswi fanaka, Yehovha u ta ku katekisa! w23.09 11 ¶12-13

Loko muapostola Pawulo a tsala papila leri, vandlha ra le Tesalonika a ro va ni tinh’weti ri ri kona. A swi kanakanisi leswaku vakulu lava a va ri kona evandlheni rero a va nga si va ni ntokoto naswona a va endla swihoxo. Hambiswiritano, a va fanele va xiximiwa. Loko nhlomulo lowukulu wu ya wu tshinela, swi nga ha lava hi titshega hi vakulu leswaku hi kuma nkongomiso ku tlula sweswi. Swi nga endleka hi nga ha swi koti ku kuma nkongomiso lowu humaka entsindza kumbe erhavini; hikwalaho i swa nkoka ku dyondza ku rhandza ni ku xixima vakulu sweswi. Swi nga ri na mhaka leswaku ku endleka yini, a hi tirhiseni mianakanyo ya hina hi nga languti ngopfu swihoxo swa vona kambe hi xiya leswaku Yehovha u kongomisa vavanuna lava vo tshembeka hi ku tirhisa Kreste. Ku fana ni leswi xihuku xi sirhelelaka nhloko ya socha, ntshembo lowu hi nga na wona wa leswaku hi ta ponisiwa wu sirhelela miehleketo ya hina. Hi kota ku xiya leswaku leswi misava leyi yi hi nyikaka swona a swi pfuni nchumu. (Filp. 3:8) Ntshembo wu hi pfuna leswaku hi tshama hi ri ni ku rhula ni ku xalamuka. w23.06 11-12 ¶11-12

Lava twaka “wansati wa xiphukuphuku” va fanele va endla xiboho: Xana va ta amukela xirhambo xakwe kumbe va xi ala? Ku ni swivangelo leswi twalaka leswi endlaka hi papalata ku tikhoma ku biha hi swa masangu. “Wansati wa xiphukuphuku” u hlamuseriwa a ri karhi a vula leswi: “Mati lama yiviweke ma tsokombela.” (Swiv. 9:17) Xana i yini “mati lama yiviweke”? Bibele yi fanisa ku tiphina hi timhaka ta masangu exikarhi ka nuna na nsati lava cateke ni mati lama phyuphyisaka. (Swiv. 5:​15-18) Wanuna ni wansati lava tekaneke hi nawu va pfumeleriwile ku tiphina hi timhaka ta masangu. Hambiswiritano, swi hambane ngopfu ni “mati lama yiviweke.” Sweswo swi nga vula ku tikhoma ku biha hi swa masangu leswi mikarhi yo tala swi endliwaka exihundleni ku fana ni khamba leri mikarhi yo tala ri yivaka ri nga voniwi hi munhu. “Mati lama yiviweke” ma nga ha vonaka ma tsokombela loko lava katsekaka va xiya leswaku a va voniwi hi munhu. Va tixisa! Yehovha u vona hinkwaswo. A ku na nchumu wo vava ngopfu ku fana ni ku onhakeriwa hi vuxaka bya wena na Yehovha, kutani a ku ‘tsokombeli’ ku lahlekeriwa koloko.—1 Kor. 6:​9, 10. w23.06 22 ¶7-9

Xana u fanele u endla yini loko u vona onge a wa ha khongeli swi huma embilwini kumbe a wa ha tsakeli nsimu ku fana ni le ku sunguleni? U nga tibyeli leswaku a wa ha ri na moya wa Yehovha. U endla swihoxo naswona ndlela leyi u titwaka hayona yi nga cincacinca. Loko u vona onge a wa ha hiseki, ehleketa hi xikombiso xa muapostola Pawulo. Hambileswi a ringeteke ku tekelela Yesu, Pawulo a a swi tiva leswaku mikarhi yin’wana a nga ta swi navela ku endla leswi a faneleke a swi endla. Pawulo a a tiyimisele ku endla ntirho wakwe wo chumayela swi nga ri na mhaka leswaku a a titwa njhani hi nkarhi wolowo. Hilaha ku fanaka, u nga endli swiboho hi ku ya hi ndlela leyi u titwaka hayona. Tiyimisele ku endla leswi nga swinene hambiloko u titwa u nga lavi ku swi endla. Loko u ya emahlweni u swi endla, ndlela leyi u titwaka hayona yi nga cinca.—1 Kor. 9:16. w24.03 11-12 ¶12-13

Hi nga kombisa vamakwerhu rirhandzu hi ku va vanghana va vona. (2 Kor. 6:​11-13) Vo tala va hina emavandlheni lawa hi nga eka wona ku ni vamakwerhu va mindhavuko yo hambanahambana naswona va nga ni vumunhu lebyi nga faniki. Leswaku hi ya hi va rhandza hinkwavo, hi fanele hi languta swilo leswinene leswi va swi endlaka. Loko hi dyondza ku languta vamakwerhu hi ndlela leyi Yehovha a va langutaka hayona, hi kombisa leswaku ha va rhandza. Swi ta va swi ri swa nkoka leswaku hi rhandzana hi nkarhi wa nhlomulo lowukulu. Loko nhlomulo wolowo wu sungula, xana hi ta chavela kwihi? Xiya leswi Yehovha a swi leriseke vanhu vakwe loko muti wa Babilona wa khale wu hlaseriwa, u te: “Fambani, n’wina vanhu va mina, nghenani emakamareni ya n’wina, mi pfala tinyangwa ta n’wina. Tumbelani swa nkarhinyana kukondza vukarhi bya Xikwembu byi hundza.” (Esa. 26:20) Swi vonaka onge ni le ka hina swi ta va tano loko nhlomulo lowukulu wu sungula. w23.07 6-7 ¶14-16

Duma hi ku va munhu wo anakanyela. Tivutise leswi: ‘Xana vanhu va ndzi tiva ndzi ri munhu loyi a anakanyelaka, a yingisaka mavonelo ya van’wana ni ku pfumelela van’wana va endla leswi ndzi nga swi rhandziki? Kumbe va ndzi tiva ndzi ri munhu la tiyisaka voko, la nga riki na mhaka ni van’wana kumbe la omeke nhloko? Xana ndza va yingisa van’wana ni ku amukela mavonelo ya vona loko swi fanerile?’ Ndlela leyi hi anakanyelaka hayona yi kombisa ndlela leyi hi tekelelaka Yehovha na Yesu hayona. Hi fanele hi fambisana ni swiyimo loko swi cinca. Ku cinca ka swiyimo ku nga endla swilo swi hi tikela hi nga swi langutelanga. Hi xitshuketa hi nga ha vabya, ikhonomi yi wa kumbe ku va ni hasahasa ya tipolitiki endhawini leyi hi tshama eka yona naswona sweswo swi nga endla vutomi byi tika. (Ekl. 9:11) Swi nga hi tikela loko hi nyikiwa swiavelo leswintshwa enhlanganweni wa Yehovha. Hi nga swi kota ku fambisana ni xiyimo loko hi endla swilo swa mune leswi landzelaka: (1) hi amukela xiyimo, (2) hi ehleketa hi vumundzuku ku nga ri swilo leswi hundzeke, (3) hi languta leswinene na (4) ku va hi endlela van’wana swilo. w23.07 22 ¶7-8

Muprofeta Daniyele a ha ri jaha loko Vababilona va n’wi endla hlonga ni ku n’wi yisa ekule ni tiko ra rikwavo. Kambe hambileswi a ha ri ntsongo, Daniyele u tsakise Vababilona. Va vone “ntsena leswi voniwaka hi matihlo” ku nga leswaku Daniyele a a ‘nga ri na xisolo emirini, a a sasekile’ naswona a a huma endyangwini wa rixaka ra Yuda. (1 Sam. 16:7) Hikwalaho ka sweswo, Vababilona va n’wi leterile leswaku a tirha evuhosini. (Dan. 1:​3, 4, 6) Yehovha a a rhandza Daniyele hikwalaho ka muxaka wa munhu loyi jaha leri ri hlawuleke ku va yena. Entiyisweni, loko Yehovha a vula leswaku Daniyele a a fana na Nowa na Yobo ku nga vavanuna lava heteke malembe yo tala va ri karhi va tiendlela ndhuma leyinene na Xikwembu, swi nga endleka Daniyele a a ri ni malembe ya kwalomu ka 20. (Gen. 5:32; 6:​9, 10; Yobo 42:​16, 17; Ezek. 14:14) Daniyele u tshame a ri karhi a rhandziwa hi Yehovha vutomi byakwe hinkwabyo.—Dan. 10:​11, 19. w23.08 2 ¶1-2

A hi nge u lava xava yindlu, a wu ta lava ku tikambisisela hi wexe swilo hinkwaswo leswi nga endlwini yoleyo. Hi nga endla leswi fanaka loko hi hlaya ni ku dyondza Bibele. Loko u yi hlaya hi ku tsutsuma, u nga ha dyondza swilo swi nga ri swingani, ku nga “swilo swo sungula leswi [hi] swi dyondz[aka] eritweni ra Xikwembu.” (Hev. 5:12) Tanihi leswi u faneleke u “nghena” endlwini leswaku u ta tiva vuxokoxoko bya kona kahle, hilaha ku fanaka u fanele u kambisisa Bibele hi vukheta leswaku u yi twisisa kahle. Ndlela yin’wana ya kahle ya ku dyondza Bibele, i ku vona ndlela leyi timhaka to karhi leti nga faniki ti fambisanaka hayona. Ringeta ku yi twisisa kahle mhaka leyi u yi tshembaka ni swivangelo leswi ku endlaka u yi tshemba. Leswaku hi ri twisisa kahle Rito ra Xikwembu, hi fanele hi dyondza ntiyiso wa le Bibeleni lowu enteke. Muapostola Pawulo u khutaze vamakwavo lava nga Vakreste leswaku va dyondza Rito ra Xikwembu hi vukheta leswaku va ta kota ku “twisisa ku anama ni ku leha ni ku tlakuka ni ku enta” ka ntiyiso. Sweswo a swi ta va pfuna leswaku va ya emahlweni va “dzima timitsu” eripfumelweni ra vona. (Efe. 3:​14-19) Na hina hi fanele hi endla hilaha ku fanaka. w23.10 18 ¶1-3

Bibele yi ni swikombiso swo tala swa vanhu lava lehiseke mbilu. Swi nga va kahle loko wo tinyika nkarhi wo dyondza hi swikombiso swo tano. Hi xikombiso, hambileswi Davhida a hlawuriweke a ha ri ntsongo leswaku a va hosi leyi landzelaka ya le Israyele, u boheke ku rindza malembe yo tala a nga si va hosi. Simiyoni na Ana va gandzele Yehovha hi ku tshembeka loko va ri karhi va rindzele Mesiya loyi a tshembisiweke. (Luka 2:​25, 36-38) Loko u ri karhi u dyondza hi vanhu vo tano, lava tinhlamulo ta swivutiso leswi landzelaka: I yini leswi nga ha vaka swi pfune munhu yoloye leswaku a lehisa mbilu? Swi n’wi vuyerise njhani ku lehisa mbilu? Ndzi nga n’wi tekelela njhani? U nga tlhela u vuyeriwa loko u dyondza hi vanhu lava tsandzekeke ku lehisa mbilu. (1 Sam. 13:​8-14) U nga ha vutisa leswi: ‘I yini leswi nga ha vaka swi endle leswaku va tsandzeka ku lehisa mbilu? Hi byihi vuyelo byo biha lebyi va byi kumeke hikwalaho ko tsandzeka ku lehisa mbilu?’ w23.08 25 ¶15

Muapostola Petro a a tshembekile; a nga pfumelelanga nchumu wu n’wi tshikisa ku landzela Yesu. Siku rin’wana u kombise leswaku wa tshembeka loko Yesu a vule swin’wana leswi vadyondzisiwa vakwe a va nga swi twisisi. (Yoh. 6:68) Vo tala va tshike ku landzela Yesu ematshan’weni yo rindza leswaku a va hlamusela leswi a a vula swona. Kambe Petro a nga endlanga tano. A a tshembekile naswona u vule leswaku Yesu hi yena ntsena loyi a nga ni “marito lama nga ni vutomi lebyi nga heriki.” Yesu a a swi tiva leswaku Petro ni vaapostola lavan’wana a va ta n’wi siya. Hambiswiritano, Yesu a a tiyiseka leswaku Petro a a ta tlhelela eka yena ni ku tshama a tshembekile. (Luka 22:​31, 32) Yesu a a swi twisisa leswaku “mbilu ya swi lava kambe nyama yi tsanile.” (Mar. 14:38) Hambileswi Petro a aleke leswaku wa n’wi tiva, Yesu a nga n’wi lahlelanga mavoko muapostola wakwe. Endzhaku ka loko Yesu a pfuxiwile, u humelele eka Petro loyi kumbexana a a ri yexe. (Mar. 16:7; Luka 24:34; 1 Kor. 15:5) Sweswo swi n’wi khutazile Petro tanihi leswi a a ri ni gome! w23.09 22 ¶9-10

Xikwembu xi rivalela swidyoho swa lava nga ni ripfumelo eka xona. Loko xi va rivalela, a xa ha swi tsundzuki swidyoho swa vona. (Ps. 32:​1, 2) Hikwalaho ka ripfumelo ra vona, xi va teka va nga ri na nandzu naswona va lulamile. Abrahama, Davhida ni vagandzeri van’wana va Xikwembu vo tshembeka, a va ha swi endla swihoxo hambileswi ku vuriweke leswaku va lulamile. Kambe hikwalaho ka ripfumelo ra vona, Xikwembu xi va teke va lulamile ngopfungopfu loko va pimanisiwa ni lava nga riki na ripfumelo eka xona. (Efe. 2:12) Eka papila rakwe, Muapostola Pawulo u swi veke erivaleni leswaku i swa nkoka ku va munhu a va ni ripfumelo loko a lava ku va ni vuxaka ni Xikwembu. Swi ve tano eka Abrahama na Davhida naswona swa ha ri tano ni le ka hina. w23.12 3 ¶6-7

Vakreste hinkwavo namuntlha va ni nkateko lowukulu wo endlela Yehovha magandzelo hi ku va va tirhisa nkarhi, matimba ni swilo swa vona leswaku va n’wi gandzela. Hi nga kombisa leswaku ha wu tlangela nkateko lowu hi nga na wona wo gandzela Yehovha, hi ku va hi n’wi endlela magandzelo ya xiyimo xa le henhla. Muapostola Pawulo u boxe swilo swo hlayanyana leswi khumbaka vugandzeri bya hina leswi hi nga fanelangiki hi swi honisa. (Hev. 10:​22-25) Leswi swi katsa ku va hi khongela eka Yehovha, hi byela van’wana hi ntshembo wa hina, hi hlangana tanihi vandlha ni ku khutazana “ngopfungopfu leswi hi vonaka siku [ra Yehovha] ri tshinela.” Loko buku ya Nhlavutelo yi gimeta, ntsumi ya Yehovha yi vula marito lama landzelaka kambirhi leswaku yi kandziyisa nkoka wa kona: “Gandzela Xikwembu!” (Nhlav. 19:10; 22:9) Onge hi nga tshama hi ri karhi hi tsundzuka swilo hinkwaswo leswi enteke leswi hi dyondzeke ha swona mayelana ni tempele ya Yehovha leyikulu yo fanekisela, ku katsa ni nkateko lowu hi nga na wona wo gandzela Xikwembu xa hina lexikulu! w23.10 29 ¶17-18

Hinkwerhu hi lava ku ya “emahlweni hi rhandzana.” Hambiswiritano, i swa nkoka ku tsundzuka leswaku Yesu u hi lemukise leswaku “rirhandzu ra vo tala [a] ri ta hola.” (Mat. 24:12) Yesu a nga vulanga leswaku vadyondzisiwa vakwe vo tala a va ta tshika ku rhandzana. Nilokoswiritano, hi fanele hi tshama hi xalamukile leswaku vanhu lava hi hanyaka na vona naswona va nga riki na rirhandzu va nga hi kuceteli leswaku hi fana na vona. Loko ha ha ri na mhaka leyi emiehleketweni, a hi buleni hi xivutiso lexi xa nkoka: I yini leswi nga ta hi pfuna ku tiva loko ha ha va rhandza swinene vamakwerhu? Ndlela yin’wana yo tiva loko ha ha va rhandza swinene vamakwerhu i ku kambisisa leswi hi swi endlaka loko hi ri eka swiyimo swo karhi. (2 Kor. 8:8) Xin’wana xa xiyimo xexo hi lexi boxiweke hi muapostola Petro loko a ku: “Ku tlula hinkwaswo, rhandzanani swinene hikuva rirhandzu ri funengeta swidyoho swo tala.” (1 Pet. 4:8) Leswi hi swi endlaka loko vamakwerhu va hi hoxerile kumbe va hi twise ku vava, swi ta hi pfuna ku tiva loko hi va rhandza swinene. w23.11 10-11 ¶12-13

A hi nge swi koti ku yingisa xileriso xa Yesu xa leswaku hi rhandzana loko evandlheni hi rhandza vamakwerhu vo karhi ntsena. Ku fana na Yesu, i ntiyiso leswaku a hi nge swi koti ku va vanghana lavakulu va vamakwerhu hinkwavo. (Yoh. 13:23; 20:2) Kambe muapostola Petro u hi tsundzuxa leswaku hi fanele hi tikarhatela ‘ku rhandza’ vamakwerhu hikuva i xiphemu xa ndyangu wa hina. (1 Pet. 2:17) Petro u hi khutaze leswaku hi ‘rhandzana hi mbilu hinkwayo.’ (1 Pet. 1:22) Eka mongo lowu, ku rhandza “hi mbilu hinkwayo” swi vula ku rhandza munhu hambiloko swi hi tikela ku n’wi rhandza. Hi xikombiso, a hi nge makwerhu u hi khunguvanyisile kumbe u hi twise ku vava hi ndlela yo karhi. Hi nga ha titwa hi lava ku rihisela ematshan’weni yo n’wi kombisa rirhandzu. Hambiswiritano, Petro u dyondze eka Yesu leswaku Xikwembu a xi tsaki loko hi rihisela. (Yoh. 18:​10, 11) Petro u tsale a ku: “Mi nga tlheriseli swo biha hi swo biha kumbe mi rhukana loyi a mi rhukanaka kambe tlheriselani hi ku n’wi katekisa.” (1 Pet. 3:9) Pfumelela rirhandzu ri ku endla u va ni musa ni ku anakanyela. w23.09 29 ¶9-11

Swa hi tsakisa ku vona ndlela leyi n’wana a kulaka hayona. A nga boheki ku endla swo karhi leswaku a kota ku kula. Kambe loko hi lava ku va Vakreste lava wupfeke swi ta lava leswaku hi tikarhata. (1 Kor. 13:11; Hev. 6:1) Leswaku hi kota ku fikelela sweswo, swi ta lava leswaku hi va ni vuxaka lebyi tiyeke na Yehovha. Nakambe hi lava moya wakwe lowo kwetsima leswaku hi kota ku va ni vumunhu lebyi nga ta n’wi tsakisa, hi va ni vuswikoti byo karhi ni ku lunghiselela vutihlamuleri lebyi hi nga ta va na byona enkarhini lowu taka. (Swiv. 1:5) Yehovha u vumbe vanhu va va wanuna ni wansati. (Gen. 1:27) Swi le rivaleni leswaku wanuna ni wansati va hambanile hi xivumbeko ni hi tindlela tin’wana. Hi xikombiso, Yehovha u endle wanuna ni wansati leswaku va va ni vutihlamuleri byo karhi, kutani va lava vumunhu ni vuswikoti lebyi nga ta va pfuna leswaku va kota ku byi endla kahle vutihlamuleri bya vona.—Gen. 2:18. w23.12 18 ¶1-2

Xana Yesu a a lava leswaku vanhu van’wana va tirhisa vito ra Tata wakwe? Ina. Swi nga endleka varhangeri van’wana va vukhongeri a va tibyela leswaku loko va vitana Xikwembu hi vito a swi kombisa ku delela kambe Yesu a nga wu pfumelelanga mukhuva wolowo lowu nga humiki ematsalweni wu n’wi sivela ku dzunisa vito ra Tata wakwe. Ehleketa hi nkarhi lowu Yesu a horiseke wanuna loyi a a ri ni madimona emugangeni wa Vagerasa. Vanhu va chavile ni ku kombela Yesu leswaku a famba emugangeni wa vona kutani a nga tshamanga emugangeni wolowo. (Mar. 5:​16, 17) Hambiswiritano, Yesu a a lava leswaku vanhu va kwalaho va tiva vito ra Yehovha. Kutani u byele wanuna yoloye leswaku a nga byeli vanhu hileswi yena a n’wi endleleke swona kambe a va byela hi leswi Yehovha a n’wi endleleke swona. (Mar. 5:19) Ninamuntlha Yesu u lava hi endla leswi fanaka, hi byela vanhu emisaveni hinkwayo hi vito ra Tata wakwe! (Mat. 24:14; 28:20) Loko hi endla tano, hi tsakisa Yesu Hosi ya hina. w24.02 10 ¶10

I nkateko ku va xiphemu xa nhlangano wa Yehovha emasikwini lawa yo hetelela naswona ma tikaka swinene. Leswi swiyimo swa misava leyi swi nyanyaka ku biha, Yehovha u hi nyike ndyangu wa vamakwerhu lowu hi pfunaka naswona wu nga ni vun’we. (Ps. 133:1) U hi pfuna leswaku hi va ni mindyangu leyi tsakeke. (Efe. 5:33–6:1) U tlhela a hi nyika vutlhari leswaku hi kota ku va ni ku rhula. Hambiswiritano, hi fanele hi tirha hi matimba leswaku hi tshama hi tirhela Yehovha hi ku tshembeka. Hikwalahokayini? Hikuva mikarhi yin’wana hi nga khunguvanyisiwa hi marito ni swiendlo swa van’wana. Nakambe hi nga hela matimba loko hi endla swihoxo, ngopfungopfu loko hi swi endla hi ku phindhaphindha. Hi fanele hi tiyisela loko hi ri karhi hi tirhela Yehovha (1) loko makwerhu a hi khunguvanyisa, (2) loko munghana wa vukati a hi khomisa tingana ni (3) loko hi hela matimba hikwalaho ka swihoxo swa hina. w24.03 14 ¶1-2

Nkarhi ni nkarhi, u ta twa hi mitokoto ya vamakwerhu lava endleke xiboho xo endla leswi engetelekeke entirhweni wa Yehovha. Kumbexana va ye eXikolweni Xa Vachumayeri Va Mfumo kumbe va rhurhele laha ku nga ni xilaveko lexikulu. Loko u swi kota ku swi fikelela, swi endle. Vanhu va Yehovha va lava tindlela to endla leswi engetelekeke entirhweni wo chumayela. (Mit. 16:9) Ku vuriwa yini loko sweswi u nga koti ku swi endla? U nga ehleketi leswaku leswi van’wana va swi kotaka, i va nkoka ku ku tlula. Leswi nga swa nkoka i ku ya emahlweni u tiyisela. (Mat. 10:22) U nga wu tekeli ehansi nkoka wo tirhela Yehovha hi ku ya hi swiyimo ni vuswikoti bya wena. Yoleyo i ndlela ya nkoka yo ya emahlweni u landzela Yesu endzhaku ka loko u khuvuriwile.—Ps. 26:1. w24.03 10 ¶11

Tata wa hina wa le matilweni u tshembisa ku hi rivalela loko hi hundzukile. (Ps. 86:5) Kutani loko hi tisola hikwalaho ka swidyoho swa hina, hi nga tshemba leswaku Yehovha u ta endla leswi a swi vuleke ni ku tlhela a hi rivalela. Tsundzuka leswaku Yehovha wa anakanyela. A nga lavi hi endla leswi nga ehenhla ka matimba ya hina. Wa swi tlangela leswi hi n’wi endlelaka swona, ntsena loko hi n’wi nyika leswi hi nga swi kotaka. Nakambe anakanyisisa hi vanhu va le Bibeleni lava tirheleke Yehovha hi mbilu hinkwayo. Ehleketa hi muapostola Pawulo. U tirhe hi ku hiseka malembe yo tala, a famba mimpfhuka yo leha ni ku sungula mavandlha yo tala. Kambe, xana Xikwembu xi tshike ku n’wi amukela loko swiyimo swi cinca evuton’wini byakwe? Doo! U ye emahlweni a endla leswi a swi kotaka naswona Yehovha u n’wi katekisile. (Mit. 28:​30, 31) Hilaha ku fanaka, ndlela leyi hi tirhelaka Yehovha hayona yi nga cinca. Kambe xa nkoka eka Yehovha i xikongomelo xa hina xa ku va hi n’wi tirhela. w24.03 27 ¶7, 9

Yesu u vekele vadyondzisiwa vakwe xikombiso lexi va faneleke va xi tekelela eka ndlela leyi a khongeleke hayona eka Yehovha. Loko a endla ntirho wakwe wo chumayela, Yesu a a khongela nkarhi ni nkarhi. Leswi mikarhi yo tala a a tshama a ri ni vanhu naswona a ri ni swo tala swo swi endla, u boheke ku tinyika nkarhi wo khongela. (Mar. 6:​31, 45, 46) A a hubuta leswaku a kuma nkarhi wo va yexe leswaku a khongela. Siku rin’wana loko a nga si endla xiboho xa nkoka swinene, u khongele vusiku hinkwabyo. (Luka 6:​12, 13) Nakambe hi vusiku byo hetelela a nga si fa, u khongele hi ku phindhaphindha a kombela matimba yo hetisisa xiavelo xakwe xo tika swinene xa laha misaveni. (Mat. 26:​39, 42, 44) Xikombiso xa Yesu xi hi dyondzisa leswaku hi fanele hi tinyika nkarhi wo khongela hambiloko hi ri ni swo tala swo swi endla. Ku fana na Yesu, swi nga ha lava leswaku hi tinyika nkarhi wo khongela, ku nga ha va nimixo kumbe nimadyambu. Loko hi endla tano, hi kombisa Yehovha leswaku ha yi tlangela nyiko leyi yo hlawuleka. w23.05 3 ¶4-5

Xiya rito leri nga eka ndzimana leyi nga laha henhla leri nge, “chululele”. Dikixinari yin’wana ya Bibele yi hlamusela rirhandzu leri tanihi leri “khulukelaka eka hina ku fana ni nambu.” Xikombiso lexi xi kombisa rirhandzu lerikulu leri Xikwembu xi nga na rona eka vahlawuriwa! Vahlawuriwa va swi tiva leswaku va “[rhandziwa] hi Xikwembu.” (Yuda 1) Muapostola Yohane u hlamusele ndlela leyi va titwaka hayona loko a tsala a ku: “Vonani ndlela leyi Tatana a hi rhandzaka ha yona, lerova hi vuriwa vana va Xikwembu!” (1 Yoh. 3:1) Xana Yehovha u rhandza vahlawuriwa ntsena? Doo, Yehovha u kombise leswaku wa hi rhandza hinkwerhu. Hi yihi ndlela leyikulu leyi Yehovha a kombiseke rirhandzu rakwe hayona? Nkutsulo i ndlela leyikulu leyi Yehovha a swi kombiseke hayona leswaku wa hi rhandza!—Yoh. 3:16; Rhom. 5:8. w24.01 28 ¶9-10

Ndzimana leyi yi nga laha henhla yi hlamusela ndlela leyi Davhida a hluleke ku chava kakwe hayona. Hambileswi vutomi byakwe a byi ri ekhombyeni, u anakanyisise hi leswi Yehovha a a ta n’wi endlela swona. Davhida a a swi tiva leswaku Yehovha a a ta n’wi ponisa hi nkarhi lowu faneleke. Phela Yehovha se a a vurile leswaku Davhida a a ta va hosi leyi landzelaka ya Israyele. (1 Sam. 16:​1, 13) Eka Davhida, swilo hinkwaswo leswi Yehovha a a n’wi tshembisa swona a swi fana ni loko se swi endlekile. Yehovha u tshembise ku ku endlela yini? A hi langutelanga leswaku Yehovha a hi sirhelela hi nga weriwi hi swiphiqo. Nilokoswiritano, swiphiqo hinkwaswo leswi u nga ha langutanaka na swona emisaveni leyi, Yehovha u ta swi herisa emisaveni leyintshwa leyi taka. (Esa. 25:​7-9) Muvumbi wa hina wa swi kota ku pfuxa lava feke, a horisa mavabyi ya hina ni ku herisa hinkwavo lava lwisanaka na hina.—1 Yoh. 4:4. w24.01 6 ¶12-13

Ehleketa hi leswi ku endleke u tinyiketela ni ku khuvuriwa. U endle tano hileswi a wu lava ku seketela Yehovha. Tsundzuka leswi ku pfuneke u tiyiseka leswaku u kume ntiyiso. U dyondze hi Yehovha ivi u sungula ku n’wi xixima ni ku n’wi rhandza tanihi Tata wa wena wa le tilweni. U ve ni ripfumelo ni ku tlhela u hundzuka. U sungule ku tshika ku endla swilo leswi Yehovha a swi vengaka kutani u endla leswi n’wi tsakisaka. U rhuliwe ndzhwalo loko u vona leswaku Xikwembu xi ku rivalerile. (Ps. 32:2) U sungule ku va kona etinhlengeletanwini ta vandlha ni ku byela van’wana swilo swo tsakisa leswi u swi dyondzeke. Tanihi Mukreste la tinyiketeleke ni ku khuvuriwa, sweswi u famba endleleni leyi yisaka evuton’wini naswona u tiyimisela ku nga hambuki eka yona. (Mat. 7:​13, 14) Onge u nga tshama u tiyile, u tinyiketela eka Yehovha ni ku yingisa swileriso swakwe. w23.07 17 ¶14; 19 ¶19

Loko u ehleketa hi xikhongelo lexi u xi endleke loko u tinyiketela eka Yehovha, u ta kuma matimba yo lwisana ni ndzingo wun’wana ni wun’wana. Hi xikombiso, xana u nga tlanga hi rirhandzu ni nsati kumbe nuna wa munhu? U nge swi endli sweswo! Hikuva u tshembise Yehovha leswaku a wu nge swi endli. Hikwalaho, a wu nge twisiwi ku vava hileswi u bohekaka ku tshika ku rhandza nsati kumbe nuna wa munhu. U ta ‘tshika,’ “ndlela ya lavo homboloka.” (Swiv. 4:​14, 15) Loko u anakanyisisa hi ku tiyimisela ka Yesu ku tsakisa Tata wakwe, u ta hatla u papalata nchumu wun’wana ni wun’wana lowu u tivaka leswaku a wu nge xi tsakisi Xikwembu lexi u tinyiketeleke eka xona. (Mat. 4:10; Yoh. 8:29) Entiyisweni miringo yi ku nyika nkarhi wo kombisa leswaku u tiyimiserile ku landzela Yesu nkarhi hinkwawo. Loko u endla tano, u nga tiyiseka leswaku Yehovha u ta ku pfuna. w24.03 9-10 ¶8-10