August

Xiya tinhla timbirhi ta nkoka leti nga eka pisalema leyi nga laha henhla: (1) Vanhu vo lulama va weriwa hi swiphiqo. (2) Yehovha wa hi ponisa emiringweni. U swi endla njhani sweswo? Ndlela yin’wana leyi a hi pfunaka hayona i ku hi pfuna hi va ni langutelo lerinene emisaveni leyi. Hambileswi Yehovha a hi tshembisaka leswaku hi ta tiphina loko hi n’wi tirhela, a nga hi tshembisi leswaku swilo swi to khuluka kunene evuton’wini bya hina sweswi. (Esa. 66:14) U hi khutaza leswaku hi anakanyisisa hi vumundzuku bya hina, ku nga nkarhi lowu hi nga ta va ni vutomi lebyi a lavaka leswaku hi tiphina ha byona hilaha ku nga heriki. (2 Kor. 4:​16-18) Nilokoswiritano, u hi pfuna leswaku hi ya emahlweni hi n’wi tirhela siku ni siku. (Swir. 3:​22-24) Hi nga dyondza yini eka vagandzeri va Yehovha vo tshembeka va le Bibeleni ni va manguva lawa? Hi nga weriwa hi swiphiqo hi nga swi langutelanga. Kambe loko hi titshega hi Yehovha, u ta hi pfuna mikarhi hinkwayo.—Ps. 55:22. w23.04 14-15 ¶3-4

Hi nga dyondza eka Yosefa na Mariya lava a va tiyimisele ku yingisa vafumi hambiloko swi nga olovi. (Luka 2:​1-6) Loko Mariya a ri ni kwalomu ka tin’hweti ta nhungu a tikile, yena na Yosefa va langutane na xiyimo lexi a xi ta ringa ku yingisa ka vona. Awugusto loyi a a ri mufumi wa Varhoma, u humese nawu wa leswaku vanhu hinkwavo va tsarisiwa. Yosefa na Mariya a va fanele va teka riendzo ro ya eBetlehema leri leheke tikhilomitara ta kwalomu ka 150 va famba etikweni ra tintshava. A ti ta n’wi vuyela ngopfu Mariya eka riendzo rero. Kumbexana vatekani lava, a va vilela hi vuhlayiseki bya Mariya ni n’wana wa vona loyi a ha ri ekhwirini. Ku vuriwa yini loko Mariya o veleka eriendzweni? Phela a a tike n’wana loyi a a ta va Mesiya. Xana leswi a swi ta va nyika xivangelo xa ku va va nga yingisi nawu wa mfumo? Yosefa na Mariya a va swi pfumelelanga swivangelo leswi ku va swona swi endlaka va yingisa nawu kumbe doo! Yehovha u va katekisile hileswi va yingiseke. Mariya u fike eBetlehema a hlayisekile naswona u veleke n’wana la hanyeke kahle ni ku tlhela a hetisisa vuprofeta bya Bibele!—Mik. 5:2. w23.10 8 ¶9; 9 ¶11-12

Ku vuriwa yini loko ku hlamula etidyondzweni swi ku khomisa rhumbyana? Swi nga ku pfuna ku lunghiselela kahle. (Swiv. 21:5) Loko u yi tiva kahle nhlokomhaka leyi dyondziwaka, swi ta ku olovela ku hlamula. Nakambe, u nga lehisi loko u hlamula. (Swiv. 15:23; 17:27) Nhlamulo yo koma a yi nge ku karhati. Loko u hlamula hi marito ya wena naswona u nga lehisi, u ta va u kombisa leswaku u lunghiselele kahle naswona u yi twisisa kahle nhlokomhaka leyi dyondziwaka. Ku vuriwa yini loko u ringete swin’wana swa swiringanyeto leswi kambe u tama wa ha chuha loko u hlamula? Tiyiseka leswaku Yehovha u ta ma tlangela matshalatshala ya wena. (Luka 21:​1-4) Yehovha a nga lavi leswaku hi endla leswi nga ehenhla ka matimba ya hina. (Filp. 4:5) Tiva leswi u nga kotaka ku swi endla, hlela leswaku u swi fikelela naswona u khongelela ku va ni mbilu yo rhula. U nga ha sungula hi ku nyikela nhlamulo yin’we yo koma. w23.04 21 ¶6-8

Muapostola Pawulo u hi fanisa ni masocha lama tshamaka ma xalamukile naswona ma ambaleke swiambalo swa nyimpi. Socha leri nga enyimpini ri fanele ri tshama ri lunghekele ku lwa mikarhi hinkwayo. Swi tano ni le ka hina. Hi tshama hi lunghekele siku ra Yehovha hi ku ambala xisirhelelo xa xifuva xa ripfumelo, rirhandzu ni xihuku xa ntshembo. Xisirhelelo xa xifuva a xi sirhelela mbilu ya socha. Rirhandzu ni ripfumelo swi sirhelela mbilu ya hina yo fanekisela. Swi ta hi pfuna leswaku hi nga tshiki ku tirhela Xikwembu ni ku landzela Yesu. Ripfumelo ri hi tiyisekisa leswaku Yehovha u ta hi katekisa loko hi ya emahlweni hi n’wi lava hi timbilu ta hina hinkwato. (Hev. 11:6) Swi ta hi pfuna leswaku hi tshama hi tshembekile eka Yesu Murhangeri wa hina hambiloko hi fanele hi tiyisela swiphiqo. Hi nga kota ku va ni ripfumelo ro tiyisela swiphiqo hi ku dyondza eka vamakwerhu va manguva lawa lava tshameke va tshembekile hambiloko va xanisiwa kumbe loko va langutana ni swiphiqo swa timali. Hi nga tlhela hi papalata ku hlongorisa rifuwo hi ku tekelela lava tshikeke swilo swo tala evuton’wini bya vona leswaku va rhangisa Mfumo. w23.06 10 ¶8-9

Loko munhu a kota ku tikhoma hiloko a kota ku lawula ndlela leyi a titwaka hayona ni swiendlo swakwe. Ku tikhoma swa laveka leswaku hi kota ku fikelela leswi hi swi kunguhateke, ngopfungopfu loko nchumu wa kona wu tika kumbe hi nga swi naveli ku wu endla. Tsundzuka leswaku ku tikhoma i wun’wana wa mihandzu ya moya lowo kwetsima kutani kombela Yehovha leswaku a ku nyika moya wakwe leswaku wu ku pfuna u kota ku tikhoma. (Luka 11:13; Gal. 5:​22, 23) U nga tshiki ku endla swilo evuton’wini bya wena hileswi u yimeleke nkarhi lowunene. A ku nge pfuki ku ve ni nkarhi lowunene wo endla swilo emisaveni leyi. Loko ho yimela nkarhi lowunene a hi nge pfuki hi fikelele leswi hi tiyimiseleke ku swi endla. Hi nga ha va hi nga ri na ku navela hileswi swilo leswi hi swi lavaka swi vonakaka swi tika ku swi fikelela. Loko swi ri tano ni le ka wena, swi nga va njhani hi ku rhanga u fikelela swilo leswitsongo? Loko u tiyimisele ku antswisa vumunhu bya wena tanihi Mukreste, swi nga va njhani u sungula hakatsongotsongo? Loko u tiyimisele ku hlaya Bibele hinkwayo, swi nga va njhani u sungula hi ku tirhisa timinete ti nga ri tingani leswaku u yi hlaya. w23.05 29 ¶11-13

EMasikwini lawa yo hetelela, Yehovha u tirhise nhlangano wakwe ku hi phamela swakudya leswi hi tiyisaka ripfumelo leswi hi pfunaka leswaku hi ya emahlweni hi famba ‘eNdleleni yo Kwetsima.’ (Esa. 35:8; 48:17; 60:17) Loko munhu a sungula ku dyondza Bibele hi nga vula leswaku se u pfulekeriwe hi nkarhi wo famba ‘eNdleleni yo Kwetsima.’ Van’wana va famba mpfhuka wo koma ntsena ivi va suka endleleni leyi leyikulu. Kasi van’wana va tiyimisela ku famba endleleni leyi kukondza va fika emakumu. Xana hi wahi makumu wolawo? “Ndlela yo Kwetsima” yi yisa lava nga ni ntshembo wo hanya etilweni “eparadeyisini ya Xikwembu” etilweni. (Nhlav. 2:7) Kasi lava nga ni ntshembo wo hanya laha misaveni, ndlela leyi leyikulu yi va yisa emakumu ka malembe ya 1 000 ya ku fuma ka Kreste laha vanhu hinkwavo va nga ta va va nga ha ri na xidyoho. Loko ku ve namuntlha u le ku fambeni endleleni yoleyo leyikulu, yana emahlweni u endla tano. U nga tshiki ku famba eka yona kukondza u fika emisaveni leyintshwa! w23.05 17 ¶15-16; 19 ¶17-18

Loko u ehleketa hi swilo hinkwaswo leswi Yehovha a ku endleleke swona, u ta titwa u lava ku n’wi khensa ni ku tinyiketela eka yena. (Ps. 116:​12-14) Bibele yi vula leswaku Yehovha i Munyiki wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” (Yak. 1:17) Nyiko leyikulu eka tinyiko toleto hinkwato i gandzelo ra N’wana wakwe Yesu. Ehleketa hi ndlela leyi nyiko yoleyo yi nga ya nkoka hayona! Nkutsulo wu endle swi koteka leswaku u va ni vuxaka lebyikulu na Yehovha. Naswona u ku nyike ntshembo wa ku hanya hilaha ku nga heriki. (1 Yoh. 4:​9, 10) Loko u tinyiketela eka Yehovha u kombisa ndlela leyi u ri tlangelaka hayona rirhandzu lerikulu leri a ku kombeke rona, ku katsa ni mikateko leyin’wana hinkwayo leyi Yehovha a ku nyikeke yona.—Det. 16:17; 2 Kor. 5:15. w24.03 5 ¶8

Loko swi ta eka milawu ya mahanyelo leyi hlohloteriwaka hi misava leyi, hi titwa ku fana na Lota munhu wo lulama. “A a dya mbitsi hikwalaho ka manyala lawa a ma endliwa hi vanhu lava delelaka nawu,” hileswi a a swi tiva leswaku Tata wa hina u venga mahanyelo yo biha. (2 Pet. 2:​7, 8) Leswi Lota a a chava Xikwembu ni ku xi rhandza, swi endle leswaku a papalata mahanyelo yo biha ya vanhu lava a a hanya na vona. Swi tano na hi hina, hi hanya ni vanhu lava nga yi xiximiki milawu ya Yehovha ya mahanyelo. Hambiswiritano, hi nga tshama hi ri ni mahanyelo lamanene loko mikarhi hinkwayo hi rhandza Xikwembu ni ku tikarhatela ku xi chava hi ndlela leyi faneleke. Hikwalaho, Yehovha wa hi khutaza hi ku tirhisa buku ya Swivuriso. Vakreste hinkwavo va nga vuyeriwa swinene hi ku kambisisa xitsundzuxo xa vutlhari lexi nga eka buku yoleyo. Loko hi chava Yehovha, a hi nge tiyimeleli hi ku endla xinghana ni vanhu lava nga ni mahanyelo yo biha. w23.06 20 ¶1-2; 21 ¶5

Kumbexana u kanetiwile hi swirho swa ndyangu kumbe u tshike swilo swo karhi leswaku u kota ku rhangisa Mfumo. (Mat. 6:33) Loko swi ri tano, u nga tiyiseka leswaku Yehovha wa yi vona mitirho ya wena yo tshembeka. (Hev. 6:10) Kumbexana u swi vonile leswaku marito ya Yesu lama landzelaka i ntiyiso, “A nga kona loyi a siyeke yindlu kumbe vamakwavo va xinuna kumbe vamakwavo va xisati kumbe manana kumbe tatana kumbe vana kumbe masimu hikwalaho ka mina ni hikwalaho ka mahungu lamanene loyi a nga ta ka a nga kumi leswi phindhiweke ka 100 sweswi, tiyindlu, vamakwavo va xinuna, vamakwavo va xisati, vamanana, vana ni masimu, swin’we ni ku xanisiwa, kutani enkarhini lowu taka a kuma vutomi lebyi nga heriki.” (Mar. 10:​29, 30) Mikateko leyi u yi kumeke i yikulu ku tlula leswi u titsoneke swona.—Ps. 37:4. w24.03 9 ¶5

Loko Vakreste va le Yudiya va weriwa hi ndlala leyikulu, vamakwerhu evandlheni ra le Antiyoka va endle swo karhi, va ‘tibohe ku rhumela mphalalo eka vamakwavo lava tshamaka eYudiya, ha un’we u humese leswi a nga swi kotaka.’ (Mit. 11:​27-30) Hambileswi vamakwerhu lava a va hlaseriwe hi ndlala a va tshama ekule, Vakreste va le Antiyoka a va tiyimisele ku va pfuna. (1 Yoh. 3:​17, 18) Na hina hi nga kombisa vamakwerhu ntwelavusiwana loko hi twa leswaku va weriwe hi mhangu. Hi endla swo karhi hi ku hatlisa kumbexana hi ku va hi vutisa vakulu leswi hi nga swi endlaka leswaku hi pfuneta, hi ku nyikela eka ntirho wa misava hinkwayo kumbe hi khongelela lava weriweke hi mhangu. Vamakwerhu na vona va nga ha lava ku pfuniwa hi swilo leswi va swi lavaka leswaku va kota ku hanya. Loko Hosi ya hina Yesu Kreste a tela ku avanyisa vanhu, onge a nga hi kuma hi ri karhi hi kombisa vamakwerhu ntwelavusiwana ivi a hi nyika “Mfumo.”—Mat. 25:​34-40. w23.07 4 ¶9-10; 6 ¶12

Yesu u tekelele Yehovha emhakeni yo anakanyela. A a rhumeriwe emisaveni leswaku a ta chumayela “tinyimpfu leti lahlekeke ta yindlu ya Israyele.” Kambe u kombise leswaku wa anakanyela loko a endla xiavelo xexo. Siku rin’wana, wansati la nga riki Muisrayele u n’wi kombele leswaku a horisa n’wana wakwe loyi a a “xaniseka swinene hileswi a nga ni dimona.” Ntwelavusiwana wu susumete Yesu leswaku a endla leswi wansati yoloye a n’wi kombeleke swona hi ku horisa n’wana wakwe. (Mat. 15:​21-28) Xiya xikombiso xin’wana. Loko Yesu a sungula ntirho wakwe wo chumayela u te: “Loyi a ndzi landzulaka . . . , na mina ndzi ta n’wi landzula.” (Mat. 10:33) Kambe xana u n’wi landzurile Petro loyi a n’wi landzuleke kanharhu? Doo! Yesu u swi xiyile leswaku Petro u hundzukile ni leswaku u ni ripfumelo. Endzhaku ka loko Yesu a pfuxiwile, u humelele eka Petro naswona swi le rivaleni leswaku u n’wi tiyisekisile leswaku wa n’wi rivalela nileswaku wa ha n’wi rhandza. (Luka 24:​33, 34) Yehovha Xikwembu na Yesu Kreste va anakanyela. Ku vuriwa yini hi hina? Yehovha u lava hi anakanyela. w23.07 21-22 ¶6-7

U nga va tiyisekisa njhani lava kanakanaka leswaku xitshembiso xa Xikwembu xa mayelana na Paradeyisi xi ta endleka? Xo sungula, hi tshembisiwa hi Yehovha. Buku ya Nhlavutelo yi ri: “Loyi a tshameke exiluvelweni a ku: ‘Vona, ndzi endla swilo hinkwaswo swi va leswintshwa.’” U ni vutlhari, matimba naswona u swi lava hi mbilu hinkwayo ku hetisisa xitshembiso lexi. Xa vumbirhi, Yehovha wa tiyiseka leswaku xitshembiso xakwe xi ta hetiseka lerova eka yena swi fana ni loko xi hetisekile. Hi yona mhaka a vulaka a ku: “Marito lawa ma tshembeka naswona i ya ntiyiso. . . . Swi endlekile!” Xa vunharhu, loko Yehovha a sungula nchumu wo karhi, a nga wu tshiki a nga wu hetanga hilaha a tiyisekisaka hakona loko a ku: “Hi mina Alfa na Omega.” (Nhlav. 21:6) Yehovha u ta swi kombisa leswaku Sathana i muhembi ni mutsandzeki. Kutani loko munhu a ku, “Sweswo a swi nge pfuki swi endlekile,” n’wi hlayeli tindzimana 5 na 6 ni ku tlhela u n’wi hlamusela tona. Kombisa ndlela leyi Yehovha a tiyisekisaka xitshembiso xakwe hi ku xi sayina onge hiloko a xi sayina hi voko rakwe.—Esa. 65:16. w23.11 7 ¶18-19

Yehovha u endle xitshembiso xexo eka Abrahama loko a ri ni malembe ya 75 naswona a nga ri na n’wana. Xana Abrahama u xi vonile xitshembiso xexo xi hetiseka? U lo vona xiphemu xa xona. Endzhaku ko tsemakanya Nambu wa Yufrata ni ku rindza malembe ya 25, u swi vonile loko Yehovha a endla leswaku Isaka a velekiwa naswona endzhaku ka malembe man’wana ya 60, ku velekiwe vatukulu vakwe Esawu na Yakobo. (Hev. 6:15) Kambe Abrahama a nga va vonanga vatukulu vakwe va va tiko lerikulu ni ku tshama eTikweni leri Tshembisiweke. Hambiswiritano, wanuna loyi wo tshembeka u tiphinile hi ku va munghana lonkulu wa Muvumbi wakwe. (Yak. 2:23) Loko Abrahama a pfuxiwa, u ta tsaka ku tiva leswaku matiko hinkwawo ma katekisiwile hikwalaho ka ripfumelo rakwe ni leswi a lehiseke mbilu! (Gen. 22:18) Hi dyondza yini? Swi nga endleka hi nga swi voni hinkwaswo switshembiso swa Yehovha swi hetiseka sweswi. Hambiswiritano, loko hi lehisa mbilu ku fana na Abrahama, hi nga tiyiseka leswaku Yehovha u ta hi katekisa sweswi ni ku tlhela a hi katekisa hi ndlela leyikulu emisaveni Yakwe leyintshwa.—Mar. 10:​29, 30. w23.08 24 ¶14

Hosi Uziya a a titsongahata loko a ha ri muntshwa. U dyondze “ku chava Xikwembu xa ntiyiso.” U hanye malembe ya 68 naswona eka yo tala ya malembe wolawo, Yehovha u n’wi katekisile. (2 Tikr. 26:​1-4) Uziya u hlule matiko yo tala ya valala ni ku sirhelela muti wa Israyele. (2 Tikr. 26:​6-15) A swi kanakanisi leswaku Uziya a a tsakisiwa hi swilo hinkwaswo leswi Xikwembu a xi n’wi endlela swona leswaku xi n’wi pfuna. (Ekl. 3:​12, 13) Hosi Uziya a a tolovele ku chaya katara van’wana va cina. Xana sweswo swi nga va swi endle leswaku a tibyela ku a nga endla ku rhandza? Siku rin’wana, Uziya u nghene etempeleni ya Yehovha naswona hi ku tikukumuxa u ringete ku hisa murhi wo nuhela ealitarini, ku nga leswi tihosi a ti nga pfumeleriwanga ku swi endla. (2 Tikr. 26:​16-18) Muprista Lonkulu Azariya u ringete ku n’wi tshikisa kambe Uziya u dye makala. Khombo ra kona, Uziya a nga tshamanga a tshembekile naswona Yehovha u n’wi be hi nhlokonho. (2 Tikr. 26:​19-21) Loko a a lo tshama a ri karhi a titsongahata, a swi kanakanisi leswaku swilo a swi ta va swi n’wi fambele kahle! w23.09 10 ¶9-10

Hambiloko se a ri Mukreste la hlawuriweke, muapostola Petro u boheke ku langutana ni ku tsana kakwe. Petro a a ri kona hi 36 C.E., loko Korneliyo munhu wa Matiko loyi a a nga yimbanga a hlawuriwa hi moya lowo kwetsima naswona sweswo swi kombise leswaku “Xikwembu a xi na xihlawuhlawu” nileswaku vanhu va Matiko a va ta va xiphemu xa vandlha ra Vukreste. (Mit. 10:​34, 44, 45) Endzhaku ka sweswo, Petro a a nga ha chavi ku dya ni vanhu Vamatiko, ku nga leswi a a nga ta pfuka a swi endlile eku sunguleni. Hambiswiritano, Vakreste van’wana va Vayuda a va vona swi nga fanelanga leswaku Vayuda ni vanhu Vamatiko va dya swin’we. Loko Vayuda van’wana lava a va ri ni langutelo rero va fika eAntiyoka, Petro u tshike ku dya ni Vakreste lava humaka ematikweni man’wana kumbexana hileswi a a chava ku khunguvanyisa Vakreste va Vayuda. Muapostola Pawulo u byi vonile vukanganyisi lebyi kutani u tshinye Petro exikarhi ka vanhu. (Gal. 2:​13, 14) Hambileswi Petro a endleke xihoxo lexi, a nga tshikanga ku tirhela Yehovha. w23.09 22 ¶8

Loko wo tikambisisa kahle, u nga ha vona laha u faneleke u antswisa kona kambe u nga heli matimba. “Hosi yi ni musa” naswona yi ta ku pfuna leswaku u antswisa. (1 Pet. 2:3) Muapostola Petro u hi tiyisekisa leswi: “Xikwembu . . . xi ta hetisa ku leteriwa ka n’wina. Xi ta mi tiyisa.” Petro u tshame a titwa a nga faneleki ku va ekusuhi ni N’wana wa Xikwembu. (Luka 5:8) Kambe hi ku pfuniwa hi Yehovha na Yesu, Petro u landzele Yesu hi ku tshembeka. Kutani Petro u nyikiwe mpfumelelo wa “ku nghena eMfun’weni lowu nga ta va kona hilaha ku nga heriki wa Hosi tlhelo Muponisi wa hina Yesu Kreste.” (2 Pet. 1:11) Mawaku nkateko wonghasi! Loko u nga tshiki ku gandzela Yehovha ku fana na Petro ni ku pfumelela Yehovha a ku letela, na wena u ta kuma vutomi lebyi nga heriki. U ta ‘fikelela xikongomelo xa ripfumelo ra wena, ku nga ku ponisiwa ka wena.’—1 Pet. 1:9. w23.09 31 ¶16-17

Tabernakela ya khale a yi ri ni xivava xin’we, ku nga ndhawu leyi biyeleriweke leyi nga rivala leri vaprista a va endla mitirho ya vona. Alitari leyikulu ya koporo yo hisela magandzelo a yi ri exivaveni, swin’we ni xihlambelo xa koporo lexi vaprista a va xi tirhisela ku tibasisa va nga si endla mitirho ya vona yo kwetsima. (Eks. 30:​17-20; 40:​6-8) Namuntlha, vamakwavo va Kreste lava ha saleke laha misaveni va tirha hi ku tshembeka exivaveni xa le ndzeni xa laha misaveni xa tempele yo fanekisela. Leswi etabernakeleni ni le titempeleni a ku vekiwe xihlambelo lexikulu xa mati, a ku ri xitsundzuxo xa nkoka swinene eka vona hilaha swi nga hakona eka Vakreste hinkwavo leswaku va tshama va basile emahanyelweni ni ku ka va nga tithyakisi hi ku gandzela swikwembu swin’wana. Kutani, xana lava “ntshungu lowukulu” va gandzela Yehovha kwihi? Muapostola Yohane u va vone va yime “emahlweni ka xiluvelo . . . va [endlela Xikwembu] ntirho wo kwetsima vusiku ni nhlikanhi.” Ntshungu lowukulu wu endla leswi laha misaveni exivaveni xa le handle xa tempele yo fanekisela. (Nhlav. 7:​9, 13-15) Ha swi tlangela leswi Yehovha a hi nyikeke ndhawu ya risima yo va hi n’wi gandzela etempeleni yakwe leyikulu! w23.10 28 ¶15-16

Ndlela yin’wana leyi Yehovha a yi tirhisaka ku hi nyika matimba, i vakulu. (Esa. 32:​1, 2) Loko ku ri ni leswi ku karhataka, byela vakulu. Wu amukele hi mandla mambirhi mpfuno wa vona. Yehovha a nga ku tiyisa hi ku tirhisa vakulu. Ntshembo lowu hi nga na wona mayelana ni leswi nga ta endleka enkarhini lowu taka wa ku va hi hanya hilaha ku nga heriki, ku nga ha va emisaveni leyi nga ta va paradeyisi kumbe eMfun’weni wa le tilweni, wu nga hi tiyisa. (Rhom. 4:​3, 18,19) Ntshembo wa hina wu hi nyika matimba yo tiyisela miringo, hi chumayela mahungu lamanene ni ku endla swiavelo swo hambanahambana evandlheni. (1 Tes. 1:3) Ntshembo wolowo wu nyike muapostola Pawulo matimba. A a “tshikilelekile,” a a “pfilunganyekile” ni ku “tlatlalatiwa ehansi.” Mikarhi yin’wana vutomi byakwe a byi ri ekhombyeni. (2 Kor. 4:​8-10) Pawulo u kume matimba yo tiyisela hileswi a a anakanyisisa hi ntshembo wakwe. (2 Kor. 4:​16-18) Pawulo a a tshamela ku ehleketa hi vumundzuku byakwe byo ya hanya etilweni hilaha ku nga heriki. Pawulo a a anakanyisisa hi ntshembo wolowo naswona hikwalaho ka sweswo u twe “munhu loyi [a] nga yena endzeni [a] pfuxetiwa siku ni siku.” w23.10 15-16 ¶14-17

Loko u khongela, tivutise loko ku ri nkarhi wa Yehovha wa leswaku a hlamula xikhongelo xa wena. Hi nga ha lava leswaku swikhongelo swa hina swi hatla swi hlamuriwa. Kambe entiyisweni, Yehovha u tiva nkarhi lowunene wo hi pfuna. (Hev. 4:16) Loko hi nga hatli hi kuma leswi hi swi kombeleke, hi nga vona onge nhlamulo ya Yehovha i ‘E-e.’ Kambe entiyisweni nhlamulo yakwe ku nga va, ‘Rindzanyana.’ Hi xikombiso, makwerhu la ha riki muntshwa u khongelele leswaku a hola eka vuvabyi byakwe. Kambe a nga holanga. Loko Yehovha o n’wi horisa hi singita, Sathana a a ta vula leswaku makwerhu u ya emahlweni a tirhela Yehovha ntsena hileswi a horisiweke. (Yobo 1:​9-11; 2:4) Ku engetela kwalaho, Yehovha u veke nkarhi lowu a nga ta horisa mavabyi hinkwawo. (Esa. 33:24; Nhlav. 21:​3, 4) Loko nkarhi wolowo wu nga si fika, a hi nge languteli leswaku hi horisiwa hi singita. Kutani makwerhu a nga kombela Yehovha leswaku a n’wi nyika matimba ni ku rhula ka miehleketo leswaku a tiyisela vuvabyi byakwe ni ku ya emahlweni a n’wi gandzela hi ku tshembeka. w23.11 23 ¶13

Samsoni u endle xihoxo lexikulu kambe a nga tshikanga ku tirhela Yehovha. U lave ndlela yo va a endla xiavelo lexi a a nyikiwe hi Xikwembu ku nga leswaku a lwa ni Vafilista. (Vaav. 16:​28-30) Samsoni u kombele Yehovha a ku: “Ndzi kombela [ku] tirihisela eka Vafilista.” Xikwembu xa ntiyiso xi hlamule xikhongelo xa Samsoni ivi xi n’wi tlherisela matimba yakwe hi singita. Hikwalaho ka sweswo, Samsoni u dlaye Vafilista vo tala enkhubyeni wolowo ku tlula lava a nga tshama a va dlaya evuton’wini byakwe. Hambileswi Samsoni a kumeke vuyelo byo vava hikwalaho ka xihoxo xakwe, a nga tshikanga ku endla ku rhandza ka Yehovha. Hambiloko ho endla xihoxo ivi swi lava leswaku hi tshinyiwa kumbe hi lahlekeriwa hi vutihlamuleri lebyi a hi ri na byona evandlheni, a hi fanelanga hi tshika ku tirhela Yehovha. Tsundzuka leswaku Yehovha a nga hi lahleli mavoko. (Ps. 103:​8,9) Hambiloko hi endle swihoxo, Yehovha a nga tlhela a hi tirhisa ku fana na Samsoni. w23.09 6 ¶15-16

Ku tiyisela ka wena ku endla leswaku u amukeleka eka Yehovha. Leswi a swi vuli swona leswaku Yehovha wa tsaka loko u ri ni swiphiqo kumbe loko u ringiwa. Xikwembu xa ku amukela. Hikwalaho, mbuyelo lowu nga ta va kona hikwalaho ka ku tiyisela ka wena i ku va u amukeriwa hi xona. Mayana nkateko lowu wo tsakisa! (Ps. 5:12) Tsundzuka leswaku Abrahama u tiyisele miringo naswona swi tsakise Yehovha. Yehovha u n’wi teke a ri munghana Wakwe naswona u vule leswaku Abrahama u lulamile. (Gen. 15:6; Rhom. 4:​13, 22) Swi nga va tano ni le ka hina. Yehovha a nga hi amukeli hi ku ya hi mpimo wa ntirho lowu hi n’wi endlelaka wona kumbe vutihlamuleri lebyi hi nga na byona evandlheni. U amukela malandza yakwe hi leswi ma tiyiselaka miringo hi ku tshembeka. Hinkwerhu hi nga swi kota ku tiyisela swi nga ri na mhaka malembe ya hina, swiyimo kumbe vuswikoti bya hina. Xana enkarhini wa sweswi u le ku tiyiseleni ka ndzingo wo karhi? Loko swi ri tano, tsundzuka leswaku Yehovha wa tsaka hileswi u tiyiselaka. Ku tiva leswaku hi le ku tsakiseni ka Yehovha swi nga va ni vuyelo lebyinene. Swi nga endla hi va ni ntshembo lowu tiyeke. w23.12 11 ¶13-14

Wanuna wa Mukreste u fanele a dyondza ku yingisela ni ku vulavula kahle. Sweswo swi vula leswaku u fanele a yingisela ni ku twisisa ndlela leyi van’wana va titwaka hayona. (Swiv. 20:5) A nga dyondza vuswikoti bya ku twa ndlela leyi rito ra munhu wo karhi ri twarisaka xiswona, ndlela leyi a langutekaka hayona enghoheni ni ndlela leyi a tshukatshukisaka miri hayona. A wu nge pfuki u swi kotile ku tiva sweswo loko u nga tinyiki nkarhi wa ku va ni vanhu van’wana. Loko u tshamela ku heta nkarhi wo tala u ri karhi u burisana ni vanhu hi ku tirhisa switirhisiwa swa elektroniki swo tanihi imeyili kumbe ku tsalelana marungula, swi ta ku tikela ku vulavurisana na vona hi xiviri. Hikwalaho, lava tindlela to vulavurisana na vona hi xiviri. (2 Yoh. 12) Wanuna loyi a nga Mukreste loyi a wupfeke u fanele a tlhela a dyondza ku tihlayisa ni ku hlayisa ndyangu wakwe. (1 Tim. 5:8) Swi kahle ku dyondza vuswikoti byo karhi lebyi nga ta ku pfuna leswaku u kuma ntirho. (Mit. 18:​2, 3; 20:34; Efe. 4:28) Vana ni ndhuma ya ku tiveka tanihi munhu loyi a endlaka ntirho kahle kukondza a wu heta. Sweswo swi ta endla swi ku olovela ku kuma ntirho ni ku wu hlayisa. w23.12 27 ¶12-13

Loko Bibele yi vulavula hi “siku ra Yehovha,” yi vulavula hi nkarhi lowu Yehovha a nga ta avanyisa valala ni ku tlhela a ponisa vanhu vakwe. Enkarhini lowu hundzeke, Yehovha u xupule matiko man’wana. (Esa. 13:​1, 6; Ezek. 13:5; Sof. 1:8) Enkarhini wa hina, “siku ra Yehovha” ri ta sungula hi ku hlaseriwa ka Babilona Lonkulu ivi ri fika emakumu hi nyimpi ya Armagedoni. Leswaku hi pona “siku” rero, hi fanele hi lungheka sweswi. Yesu u dyondzise leswaku a hi fanelanga hi lunghekela “nhlomulo lowukulu” ntsena kambe hi fanele hi tlhela hi ‘tshama hi lunghekile.’ (Mat. 24:21; Luka 12:40) Eka papila rakwe ro sungula leri a ri tsaleleke Vatesalonika, muapostola Pawulo u tirhise swikombiso swo tala ku pfuna Vakreste leswaku va tshama va lunghekele siku lerikulu ra Yehovha ra vuavanyisi. Pawulo a a swi tiva leswaku siku ra Yehovha a ri nga ta fika hi nkarhi wolowo. (2 Tes. 2:​1-3) Hambiswiritano, u khutaze vamakwavo leswaku va tshama va lunghekele siku rero onge hiloko a ri ta mundzuku naswona na hina hi nga xi tirhisa xikhutazo xakwe. w23.06 8 ¶1-2

Eku heleni ka va-1970, ku akiwe muako wo leha lowu nga ni swithezi swa 60 eTokyo, Japani. Vanhu va tivutisile loko muako lowu wu ta yima wu tiyile hambiloko ku va ni ku tsekatseka ka misava loku endlekaka nkarhi ni nkarhi edorobeni rero. I yini lexi a xi ta endla leswaku wu nga wi? Vanjhiniyara va kote ku endla muako lowu leswaku wu nga wi hambiloko ku ri ni ku tsekatseka ka misava. Vakreste va fana ni muako wolowo. Hi ndlela yihi? Mukreste u fanele a tshama a ri karhi a ringanisela loko swi ta emhakeni yo namarhela nawu ni ku anakanyela. U fanele a yima a tiyile loko swi ta eka ku yingisa milawu ya Yehovha. U “tiyimisela ku yingisa” naswona a nga pfumeleli nchumu wu n’wi sivela ku endla tano. Hi hala tlhelo, u fanele a “anakanyela” loko xiyimo xi lava leswaku a endla tano. (Yak. 3:17) Mukreste loyi a nga ni langutelo leri lerinene u ta papalata ku hundzeleta swilo hi ku va a tiyisa ngopfu voko kumbe ku ri debyisa. w23.07 14 ¶1-2

Loko Yesu a kurile, u boheke ku lwisana ni miringo ya Sathana Diyavulosi, ku katsa ni leyi Sathana a n’wi byeleke hi ku kongoma leswaku a tshika ku tshembeka eka Xikwembu. (Mat. 4:​1-11) Sathana a a tiyimisele ku dyohisa Yesu leswaku a tsandzeka ku humesa nkutsulo. Loko Yesu a ri eka ntirho wakwe wo chumayela laha misaveni, u tiyisele miringo yo tala. Valala vakwe va n’wi xanisile ni ku tlhela va ringeta ku n’wi dlaya. (Luka 4:​28, 29; 13:31) A a boheka ku tiyisela swihoxo swa valandzeri vakwe. (Mar. 9:​33, 34) Loko a ri karhi a konanisiwa leswaku a gweviwa, u xanisiwile ni ku hlekuriwa. Kutani u dlayiwe hi ndlela yo vava ni leyi nyumisaka. (Hev. 12:​1-3) U boheke ku tiyisela ndzingo wo hetelela a ri yexe, a nga sirheleriwi hi Yehovha. (Mat. 27:46) Swi le rivaleni leswaku nkutsulo wu n’wi koxe swo tala Yesu. Xana leswi a swi endli hi n’wi rhandza swinene loko hi anakanyisisa hi leswi a hi endleleke swona hi ku swi rhandza? w24.01 10-11 ¶7-9

Ku lehisa mbilu ka hi pfuna loko hi tirhisana ni van’wana. Ku hi pfuna leswaku hi rhiya ndleve loko van’wana va vulavula. (Yak. 1:19) Nakambe ku lehisa mbilu ku endla hi va ni ku rhula ni vanhu van’wana. Ku hi pfuna leswaku hi nga vi na magugu ivi hi vula nchumu lowu nga ta vavisa van’wana loko ku ri ni leswi hi tshikelelaka. Nakambe loko hi lehisa mbilu, a hi nge hatliseli ku hlundzuka loko van’wana va hi twise ku vava. Ematshan’weni yo rihisela, hi ta ya “emahlweni [hi] lehiselana mbilu ni ku rivalelana hi ku tshunxeka.” (Kol. 3:​12, 13) Ku lehisa mbilu ku nga tlhela ku hi pfuna leswaku hi endla swiboho leswinene. Ematshan’weni yo jahalela ku endla xiboho, hi ta tinyika nkarhi wo endla ndzavisiso ni ku vona leswaku hi nga teka xiboho xihi. Hi xikombiso, loko hi ri eku laveni ka ntirho hi nga ha ringeka ku teka ntirho lowu hi rhangaka hi wu kuma. Hambiswiritano, loko hi lehisa mbilu, hi ta tinyika nkarhi wo anakanyisisa hi ndlela leyi ntirho wolowo wu nga ta khumba ndyangu ni vugandzeri bya hina hayona. Loko hi lehisa mbilu, hi ta papalata ku endla xiboho xo biha. w23.08 22 ¶8-9

Loko swidyoho swa wena swi ku heta matimba, ku ehleketa hi leswi u swi tshembiseke Yehovha loko u tinyiketela eka yena, swi ta ku pfuna leswaku u tiyimisela ku lwisana ni ndzingo. Njhani? Loko u tinyiketela eka Yehovha, a wa ha tihanyeli. Leswi swi vula leswaku loko u ri ni ku navela ko karhi kumbe u lava ku fikelela swo karhi leswi nga n’wi tsakisiki Yehovha, sweswo wa swi papalata. (Mat. 16:24) Kutani loko u ri endzingweni, u ta swi tiva leswi u faneleke u swi endla. U ta va u endle xiboho xa ku tshama u tshembekile eka Yehovha. U ta va u tiyimisele ku tsakisa Yehovha. Hi ndlela yoleyo, u ta fana na Yobo. Hambileswi a langutaneke ni miringo yo tika swinene, hi ku tiyimisela u te: ‘Ndzi ta tshama ndzi tshembekile!’—Yobo 27:5. w24.03 9 ¶6-7

Yehovha “Xikwembu xa rirhandzu” u na hina! (2 Kor. 13:11) Wa khathala hi hina. Ha tiyiseka leswaku wa hi “sirhelela hikuva Wa [hi] rhandza.” (Ps. 32:10) Loko hi ya hi anakanyisisa hi ndlela leyi a hi kombiseke rirhandzu rakwe hayona, u ta ya a va wa xiviri eka hina naswona hi ta ya hi tshinela eka yena. Hi nga khongela eka yena hi tshunxekile ni ku n’wi byela ndlela leyi hi lavaka rirhandzu rakwe hayona. Hi nga n’wi byela hinkwaswo leswi hi vilerisaka, hi tshemba leswaku wa hi twisisa ni leswaku u tiyimisele ku hi pfuna. (Ps. 145: 19) Ku fana ni leswi hi nga laviki ku suka endzilweni loko xirhami xi vuyisa ni n’wana evukatini, na hina a hi swi lavi ku hambana ni rirhandzu ra Yehovha. Hambileswi rirhandzu rakwe ri nga ni matimba swinene, wa khathala hi hina. Kutani tsaka hikuva Yehovha wa ku rhandza. Onge hinkwerhu hi nga amukela rirhandzu ra Yehovha hi ku vula hi ku: “Ndza n’wi rhandza Yehovha”!—Ps. 116:1. w24.01 31 ¶19-20

Yesu u endle swo tala ku tlula ku byela vanhu leswaku vito ra Xikwembu i Yehovha. Vayuda lava Yesu a va dyondziseke a va ri tiva vito ra Xikwembu. Kambe Yesu ku ve yena murhangeri loyi a ‘hlamuseleke leswaku Xikwembu i mani.’ (Yoh. 1:​17, 18) Hi xikombiso, Matsalwa ya Xiheveru ma vula leswaku Yehovha u ni tintswalo ni ntwelavusiwana. (Eks. 34:​5-7) Yesu u pfune vanhu va twisisa ntiyiso wolowo hi ku tirhisa xikombiso xa tatana loyi n’wana wakwe a lahlekeke. Loko hi hlaya leswaku tatana loyi u vone n’wana wakwe la hundzukeke “a ha ri ekulenyana,” a tsutsuma leswaku a n’wi hlanganisa, a n’wi angarha ni ku n’wi rivalela hi mbilu hinkwayo, hi kota ku swi vona kahle leswaku Yehovha u ni tintswalo ni ntwelavusiwana. (Luka 15:​11-32) Yesu u pfune vanhu va kota ku twisisa leswaku Yehovha i Xikwembu xa njhani. w24.02 10 ¶8-9

Yehovha u phyuphyisa ni ku chavelela lava karhatekeke. Hi nga n’wi tekelela njhani Yehovha loko swi ta emhakeni yo twela van’wana vusiwana ni ku tlhela hi va chavelela? Ndlela yin’wana leyi nga hi pfunaka leswaku hi endla tano, i ku va ni vumunhu lebyi nga ta hi pfuna leswaku hi twela ni ku chavelela van’wana. Hi byihi byin’wana bya vumunhu lebyi? I yini leswi nga ta hi pfuna leswaku hi ya emahlweni hi rhandza vamakwerhu ni ku ‘ya emahlweni hi chavelelana’ siku ni siku? (1 Tes. 4:18) Hi fanele hi va ni ntwelavusiwana, hi rhandzana ni ku va ni musa. (Kol. 3:12; 1 Pet. 3:8) Xana vumunhu lebyi byi ta hi pfuna njhani? Loko hi twela vamakwerhu vusiwana ni ku tlhela hi khathala hi vona, hi ta swi navela hi mbilu hinkwayo ku va chavelela loko va xaniseka. Yesu u te: “Nomu wu vulavula leswi mbilu yi taleke swona. Munhu lonene u humesa tinyiko letinene exumeni xakwe lexinene.” (Mat. 12:​34, 35) Ku chavelela vamakwerhu lava nga emaxangwini i ndlela yin’wana ya nkoka yo va komba leswaku ha va rhandza. w23.11 10 ¶10-11

Hi fanele hi kombela mpfuno leswaku hi twisisa vuprofeta bya Bibele. Xiya xikombiso lexi. A hi nge u ya endhawini leyi u nga yi tiviki kambe munghana wa wena loyi u fambaka na yena u yi tiva kahle ndhawu yoleyo. U tiva laha mi nga kona ni laha patu ri yaka kona. A swi kanakanisi leswaku a wu ta tsaka leswi munghana wa wena a pfumeleke ku famba na wena! Hilaha ku fanaka, Yehovha u tiva nkarhi lowu hi hanyaka eka wona ni leswi nga ta endleka enkarhini lowu taka. Hi fanele hi titsongahata hi kombela Yehovha a hi pfuna hi kota ku twisisa vuprofeta bya Bibele. (Dan. 2:28; 2 Pet. 1:​19, 20) Ku fana ni mutswari la rhandzaka vana vakwe, Yehovha u lava leswaku vana vakwe va va ni vumundzuku lebyinene. (Yer. 29:11) Kambe ku hambana ni mutswari la velekiweke ni xidyoho, Yehovha u kota ku hi byela leswi nga ta endleka enkarhini lowu taka. U endle leswaku eRitweni rakwe ku va ni vuprofeta leswaku hi ta tiva hi swiendlakalo swa nkoka swi nga si endleka.—Esa. 46:10. w23.08 8 ¶3-4