July

Hinkwaswo leswi Yesu a swi vuleke ni ku swi endla ku katsa ni masingita yakwe a ma fambisana kwatsaa, ni ndlela leyi Tata wakwe a ehleketaka ni ku titwa hayona. (Yoh. 14:9) Xana hi nga dyondza yini eka masingita ya Yesu? Yesu ni Tata wakwe va hi rhandza swinene. Loko Yesu a ri laha misaveni u kombise ndlela leyi a rhandzaka vanhu hi ku endla masingita leswaku a pfuna lava a va xaniseka. Siku rin’wana, vavanuna vambirhi lava feke mahlo va n’wi huwelerile va kombela mpfuno. (Mat. 20:​30-34) Xiya leswaku Yesu u “va twel[e] vusiwana” ivi a va horisa. Rito leri tirhisiweke laha ku nga riendli ra Xigriki leri hundzuluxeriweke ri va “ntwelavusiwana,” ri vula ntwelavusiwana lowukulu lowu endlaka leswaku munhu a khumbeka. Ntwelavusiwana wolowo lowukulu lowu kombisaka rirhandzu, wu endle leswaku Yesu a phamela vanhu lava a va ri ni ndlala ni ku horisa munhu loyi a a ri ni nhlokonho. (Mat. 15:32; Mar. 1:41) Hi nga tiyiseka leswaku Yehovha Xikwembu loyi a nga ni “ntwelavusiwana” ni N’wana wakwe va hi rhandza swinene naswona va twa ku vava loko hi xaniseka. (Luka 1:78; 1 Pet. 5:7) Va swi langutele emahlweni ku susa makhombo hinkwawo lama xanisaka vanhu! w23.04 3 ¶4-5

Hi nga tirha hi matimba leswaku hi papalata ku va ni mavonelo lama hoxeke ya vanhu va misava leyi ya Sathana. Hi nga tikarhatela ku hlaya Bibele leswaku hi tshama hi ri karhi hi ehleketa hi swilo leswinene. Loko hi ya etinhlengeletanweni ta vandlha ni ku tlhela hi chumayela swi ta sirhelela miehleketo ya hina. Yehovha u hi tshembisa leswaku a nge pfumeli hi ringiwa hi ndlela leyi hi nga taka hi nga swi koti ku yi tiyisela. (1 Kor. 10:​12, 13) Hinkwerhu hi fanele hi khongela swinene leswaku hi tshama hi tshembekile eka Yehovha emasikwini lawa yo hetelela yo tika. Yehovha u lava leswaku hi n’wi ‘chululela leswi nga etimbilwini ta hina’ hi xikhongelo. (Ps. 62:8) Dzunisa Yehovha ni ku tlhela u n’wi khensa hikwalaho ka swilo hinkwaswo leswi a swi endlaka. N’wi kombele a ku pfuna u va ni xivindzi loko u chumayela. N’wi kombele a ku pfuna u tiyisela swiphiqo ni ku lwisana ni ndzingo lowu u nga ha vaka u langutane na wona. U nga pfumeleli munhu kumbe nchumu wu ku sivela ku khongela eka Yehovha nkarhi ni nkarhi. w23.05 6-7 ¶17-18

Hikwalahokayini hi ya etinhlengeletanweni ta vandlha? Xivangelo xa nkoka hileswi hi lavaka ku dzunisa Yehovha. (Ps. 26:12; 111:1) Hi tlhela hi ya etinhlengeletanweni ta vandlha leswaku hi khutazana emikarhini leyi yo tika. (1 Tes. 5:11) Loko hi hlamula, hi kota ku fikelela swilo leswi hinkwaswo. Kambe ku ni swilo leswi nga endlaka swi hi tikela ku hlamula. Hi nga ha chava ku hlamula kumbe hi nga ha va hi swi rhandza ku hlamula kambe hi nga kombiwi ko tala hilaha hi lavaka hakona. Hi nga yi hlula njhani mitlhontlho leyi? Muapostola Pawulo u vule leswaku hi fanele hi “khutazana.” A hi nge chavi ku hlamula loko hi xiya leswaku van’wana va khutazeka hambiloko hi nyikela nhlamulo yo olova leyi kombisaka ripfumelo ra hina. Loko va nga hi kombi ko tala, hi nga tsaka ku tiva leswaku van’wana evandlheni va ta kuma nkarhi wo hlamula.—1 Pet. 3:8. w23.04 20 ¶1-3

Hosi yi endle xitiviso! Vayuda lava a va ri mahlonga eBabilona ku ringana malembe ya kwalomu ka 70, va tshunxiwile leswaku va tlhelela eka rikwavo eIsrayele. (Ezra 1:​2-4) I Yehovha ntsena loyi a endleke leswaku leswi swi koteka. Hi ntolovelo Vababilona a va nga ma tshunxi mahlonga. (Esa. 14:​4, 17) Kambe muti wa Babilona wu hluriwile naswona mufumi lontshwa u byele Vayuda leswaku va tshunxekile ku famba. Muyuda un’wana ni un’wana ngopfungopfu tinhloko ta mindyangu, a ti fanele ti endla xiboho xo tshama eBabilona kumbe leswaku ti famba ni mindyangu ya tona. Swi nga endleka a swi nga olovi ku endla xiboho xexo. Ku dyuhala ku sivele vanhu vo tala leswaku va teka riendzo leri ro tika. Nakambe leswi Vayuda vo tala a va tswaleriwe eBabilona, a va nga si tshama va tshama endhawini yin’wana. Eka vona, Israyele a ku ri tiko ra vakokwa wa vona ku nga ri ra vona. Swi vonaka onge Vayuda van’wana a va ri swigwili eBabilona kutani swi nga ha va swi va tikerile ku siya makaya ya vona lamanene kumbe mabindzu ya vona va ya tshama etikweni leri a va nga ri tolovelanga. w23.05 14 ¶1-2

Rito ra Xikwembu ri hi khutaza leswaku hi ya emahlweni hi tiyisela, hi va ni ntwelavusiwana ni ku rhandza van’wana. Luka 21:19 yi ri: “Loko mi tiyisela mi ta ponisiwa.” Vakolosa 3:12 yi ri: “Ambalani tintswalo.” 1 Vatesalonika 4:​9, 10 yi ri: “Mi dyondzisiwa hi Xikwembu leswaku mi rhandzana. . . . Kambe ha mi kombela vamakwerhu, leswaku mi ya emahlweni mi endla tano hilaha ku engetelekeke.” Marito lawa hinkwawo a ma tsaleriwe vadyondzisiwa lava se va kombiseke ku tiyisela, ntwelavusiwana ni rirhandzu. Kambe a va fanele va ya emahlweni va swi kombisa. Hi fanele hi endla tano na hina. Leswaku u endla tano, kambisisa ndlela leyi Vakreste vo sungula va ku vekeleke xikombiso hayona. Kutani u ta vona ndlela leyi u nga va tekelelaka hayona vadyondzisiwa volavo ivi u kombisa leswaku u lunghekele ku langutana ni nhlomulo lowukulu. Kutani loko nhlomulo lowukulu wu sungula, u ta va se u dyondze ku tiyisela naswona u ta tiyimisela ku ya emahlweni u endla tano. w23.07 3 ¶4, 8

Swi nga ri na mhaka leswaku hi lava hlawuriweke kumbe va “tinyimpfu tin’wana” hi fanele hi ya emahlweni hi famba ‘eNdleleni yo Kwetsima’ leswaku hi tshama hi ri karhi hi gandzela Yehovha sweswi ni le nkarhini lowu taka loko Mfumo wa Xikwembu wu tisa mikateko laha misaveni. (Yoh. 10:16) Ku sukela hi 1919 C.E., vanhu va timiliyoni va humile eBabilona Lonkulu, ku nga mfumo wa misava hinkwayo wa vukhongeri bya mavunwa ivi va sungula ku famba endleleni leyi yo fanekisela. Loko Vayuda va huma eBabilona, Yehovha u suse leswi a swi ta va kavanyeta. (Esa. 57:14) Ku vuriwa yini hi “Ndlela yo Kwetsima” ya manguva lawa? Eka malembe ya madzana ku nga si fika 1919, Yehovha u tirhise vanhu lava chavaka Xikwembu leswaku va basisa ndlela yo huma eBabilona Lonkulu. (Ringanisa Esaya 40:3.) Va endle ntirho wa nkoka wo basisa ndlela leswaku hi ku famba ka nkarhi swi koteka leswaku vanhu va timbilu letinene va huma eBabilona Lonkulu ivi va gandzela Yehovha swin’we ni vanhu vakwe. w23.05 15-16 ¶8-9

Yehovha u lava hi n’wi gandzela hi ku swi rhandza naswona hi tsakile. (2 Kor. 9:7) Xana hi fanele hi ya emahlweni hi tiyimisela ku antswisa vuxaka bya hina na Yehovha hambiloko hi nga ri na ku navela ko endla tano? Xiya xikombiso xa muapostola Pawulo. U te: “Ndzi ba miri wa mina, ndzi wu endla hlonga.” (1 Kor. 9:​25-27) Pawulo u tisindzise ku endla leswinene hambiloko a a navela ku endla leswi hambaneke. Xana Yehovha a swi n’wi tsakisa leswi Pawulo a a n’wi endlela swona? Ina! Yehovha u katekise Pawulo hikwalaho ka matshalatshala yakwe. (2 Tim. 4:​7, 8) Yehovha wa tsaka loko a hi vona hi tikarhatela ku endla leswi hi tiyimiseleke ku swi fikelela hambiloko hi nga ri na ku navela ko endla tano. Wa tsaka hikuva mikarhi yin’wana hi endla sweswo ku nga ri hileswi hi rhandzaka nchumu lowu hi wu endlaka kambe hileswi hi rhandzaka yena. Yehovha u ta hi katekisa hikwalaho ka matshalatshala ya hina hilaha a katekiseke Pawulo hakona. (Ps. 126:5) Loko hi vona ndlela leyi Yehovha a hi katekisaka hayona, hi nga ha sungula ku titwa hi ri ni matimba yo ya emahlweni na leswi hi swi kunguhateke. w23.05 29 ¶9-10

Muapostola Pawulo u fanise vanhu lava nga taka va nga poni loko siku ra Yehovha ri fika ni vanhu lava etleleke. A va wu lemuki nkarhi naswona a va swi tivi leswi nga eku endlekeni. Hikwalaho, a va swi voni swilo swa nkoka leswi nga eku endlekeni naswona a va endli nchumu. Vanhu vo tala namuntlha va etlele loko swi ta eka vuxaka bya vona ni Xikwembu. (Rhom. 11:8) A va byi tshembi vumbhoni lebyi kombisaka leswaku hi hanya “emasikwini yo hetelela” nileswaku nhlomulo lowukulu wu kwala nyongeni. (2 Pet. 3:​3, 4) Hambiswiritano, ha swi xiya leswaku siku ni siku swi ya swi va swa xihatla ku tshama hi rindzile. (1 Tes. 5:6) Hikwalaho hi fanele hi tshama hi ri ni ku rhula naswona hi xalamukile. Hikwalahokayini? Leswaku hi nga tikumi hi nghenise nhompfu eka swa tipolitiki kumbe eka swiphiqo leswi karhataka vanhu namuntlha. Loko siku ra Yehovha ri ya ri tshinela, swi ta ya swi hi tikela ku nga katseki eka swilo leswi. Kambe a hi fanelanga hi vilela hileswaku hi ta endla yini. Moya wa Xikwembu wu nga hi pfuna hi va ni ku rhula ni ku tshama hi xalamukile leswaku hi kota ku endla swiboho swa vutlhari.—Luka 12:​11, 12. w23.06 9-10 ¶6-7

U ehleketa hi yini loko u twa vito leri nge Samsoni? Swi nga endleka u ehleketa hi wanuna loyi a nga ni matimba swinene. Wolowo i ntiyiso. Kambe Samsoni u endle xiboho xo biha lexi n’wi twiseke ku vava swinene. Nilokoswiritano, Yehovha u hlawule ku languta swilo hinkwaswo leswi Samsoni a swi endleke hi ku tshembeka naswona Yehovha u endle swi katsiwa eBibeleni leswaku hi ta vuyeriwa. Yehovha u tirhise Samsoni ku endla swilo swo hlamarisa leswaku a pfuna vanhu Vakwe ku nga Vaisrayele. Endzhaku ka malembe ya madzana Samsoni a file, Yehovha u huhutele muapostola Pawulo leswaku a katsa ni vito ra Samsoni eka nxaxamelo wa vavanuna lava nga ni ripfumelo leri tiyeke. (Hev. 11:​32-34) Mhaka ya Samsoni yi nga hi khutaza. A a titshega hi Yehovha hambiloko swiyimo swi tika. Hi nga kuma xikhutazo ni tidyondzo ta nkoka eka xikombiso xa Samsoni. w23.09 2 ¶1-2

Hi nga dyondza ku tiyisela hi ku va nkarhi ni nkarhi hi phofulela Yehovha swilo leswi hi karhataka. (1 Tes. 5:17) Kumbexana sweswi vutomi byo khuluka kunene eka wena. Kambe, xana wa wu lava nkongomiso wa Yehovha loko u nga khomekanga kahle, u pfilunganyekile kumbe loko u nga swi tivi leswaku u endla yini? Loko u titoloveta ku kombela mpfuno eka Xikwembu leswaku u kota ku langutana ni mitlhontlho ya siku ni siku sweswi, a wu nge kanakani ku endla tano loko u langutana ni mitlhontlho leyikulu enkarhini lowu taka. U ta tiyiseka leswaku xa wu tiva nkarhi ni ndlela leyi xi nga ta ku pfuna hayona. (Ps. 27:​1, 3) Loko namuntlha hi tiyisela miringo hi nga swi kota ku tiyisela nhlomulo lowukulu lowu taka. (Rhom. 5:3) Hikwalahokayini hi vula tano? Vamakwerhu vo tala va xiye leswaku ndzingo wun’wana ni wun’wana lowu va wu tiyiselaka wu va pfuna va kota ku tiyisela lowu landzelaka. Ku tiyisela swi va pfunile ni ku tiyisa ripfumelo ra vona ra leswaku Yehovha u lunghekele ku va pfuna naswona wa swi lava. Hikwalaho, ripfumelo ri va pfunile leswaku va tiyisela ndzingo lowu landzeleke.—Yak. 1:​2-4. w23.07 3 ¶7-8

Leswi Yehovha a titsongahataka naswona a nga ni ntwelavusiwana swi endla leswaku a anakanyela. Hi xikombiso, Yehovha u kombise leswaku wa titsongahata loko a lava ku lovisa vanhu vo homboloka va le Sodoma. Hi ku tirhisa tintsumi, Yehovha u lerise Lota wanuna wo lulama leswaku a balekela etintshaveni. Lota a a chava ku ya kwale. Kutani u kombelele yena ni ndyangu wakwe leswaku va balekela eSowara, ku nga muti lowutsongo lowu na wona a wu fanele wu lovisiwa. Yehovha a a ta va a sindzise Lota leswaku a yingisa swiletelo Swakwe hilaha swi nga hakona. Hambiswiritano, Yehovha a nga n’wi alelanga Lota hambileswi ku endla tano a swi vula leswaku A A fanele A ponisa muti wa Sowara. (Gen. 19:​18-22) Endzhaku ka malembe yo tala, Yehovha u twele vanhu va le Ninivha vusiwana. U rhume muprofeta Yonasi ku ya byela vanhu vo homboloka va le Ninivha leswaku vona ni muti wa vona a va ta lovisiwa. Kambe loko Vaninivha va hundzuka, Yehovha u va twele vusiwana naswona a nga wu lovisanga muti.—Yon. 3:​1, 10; 4:​10, 11. w23.07 21 ¶5

Hi nga dyondza yini eka Yehowaxi? A a fana ni murhi lowu nga ni timitsu leti nga entangiki naswona wu tiseketelaka hi mhandzi. Loko mhandzi yoleyo ku nga Yoyada a fa naswona moya wa vagwinehi wu hunga, Yehowaxi u wile. Leswi swi kombisa kahle leswaku a hi fanelanga hi chava Xikwembu hileswi ntsena hi khutaziwaka hi Vakrestekulobye lava hi kucetelaka ku endla leswinene ku katsa ni swirho swa ndyangu. Leswaku hi tshama hi ri ni vuxaka lebyinene na Yehovha, hi fanele hi rhandza ni ku xixima Yehovha hi ku va hi dyondza, hi anakanyisisa ni ku khongela nkarhi ni nkarhi. (Yer. 17:​7, 8; Kol. 2:​6, 7) Yehovha a nga lavi swo tala eka hina. Leswi a swi lavaka swi katsakanyiwe eka Eklesiasta 12:​13, leyi nge: “Chava Xikwembu xa ntiyiso u hlayisa swileriso swa xona, hikuva leswi hi swona leswi munhu a faneleke a swi endla.” Loko hi chava Xikwembu, hi ta kota ku langutana ni miringo leya ha taka ni ku tshama hi tshembekile. A xi kona lexi nga ta onha vuxaka bya hina na Yehovha. w23.06 19 ¶17-19

Xitiyisekiso xa Xikwembu xi sungula hi marito lama nge: “Loyi a tshameke exiluvelweni a ku.” (Nhlav. 21:5a) Marito lawa ma hlawulekile hikuva leyi hi yin’wana ya tindzimana eka tinharhu ebukwini ya Nhlavutelo laha Yehovha a vulavulaka hi yexe. A hi nyikiwi xitiyisekiso lexi hi ntsumi ya matimba kumbe hi Yesu loyi a pfuxiweke kambe hi nyikiwa xona hi Yehovha hi yexe! Mhaka leyi yi kombisa ndlela leyi marito lama landzelaka ma tshembekaka hayona. Hikwalahokayini hi vula tano? Hikuva Yehovha a ‘nga hembi.’ (Tito 1:2) Kutani marito lawa hi hlayaka ha wona eka Nhlavutelo 21:​5, 6, ma ta hetiseka hakunene. Xiya rito “Vona!” Rito ra Xigriki leri hundzuluxeriweke ri va “vona,” ri tirhisiwe hi ku phindhaphindha ebukwini ya Nhlavutelo. Rito leri ri landzeriwa hi yini? Xikwembu xi ri: “Ndzi endla swilo hinkwaswo swi va leswintshwa.” I ntiyiso leswaku Yehovha u vulavula hi swilo leswi nga ta endleka enkarhini lowu taka kambe eka yena a swi koteki leswaku swi nga endleki lerova u vulavula hi swona onge hiloko se swi endlekile.—Esa. 46:10. w23.11 3-4 ¶7-8

Muapostola Petro a a lwisana ni ku tsana kakwe. Xiya swikombiso swi nga ri swingani. Loko Yesu a hlamusela ndlela leyi a a ta xanisiwa ni ku fa hayona leswaku ku hetiseka vuprofeta bya Bibele, Petro u n’wi tshinyile. (Mar. 8:​31-33) Petro ni vaapostola lavan’wana a va tshamela ku holova hileswaku i mani lonkulu. (Mar. 9:​33, 34) Hi vusiku byo hetelela Yesu a nga si fa, Petro u tseme ndleve ya wanuna un’wana. (Yoh. 18:10) Hi vusiku byebyo, Petro u landzule munghana wakwe Yesu kanharhu. (Mar. 14:​66-72) Sweswo swi endle leswaku Petro a rila hi xiviti. Yesu a nga n’wi lahlelanga mavoko muapostola wakwe loyi a a tshoveke mbilu. Endzhaku ka loko Yesu a pfuxiwile, u nyike Petro nkarhi wo tikombisa leswaku wa n’wi rhandza hakunene. Yesu u byele Petro leswaku a va murisi wa tinyimpfu takwe. (Yoh. 21:​15-17) Petro u pfumerile. A a ri eYerusalema hi siku ra Pentekosta naswona u ve un’wana wa vanhu vo sungula ku hlawuriwa hi moya wo kwetsima. w23.09 22 ¶6-7

Muapostola Petro u byele vakulukulobye a ku: “Risani ntlhambi wa Xikwembu.” (1 Pet. 5:​1-4) Loko u ri nkulu, ha swi tiva leswaku wa va rhandza vamakwerhu naswona u lava ku va khathalela. Hambiswiritano, mikarhi yin’wana u nga twa u karhele ngopfu kumbe u taleriwe hi swilo lerova a wu swi koti ni ku endla xiavelo xa wena. Xana u nga endla yini? Byela Yehovha leswi ku vilerisaka. Petro u tsale a ku: “Loko un’wana a tirhela van’wana, a a tirhe a titshege hi matimba lama humaka eka Xikwembu.” (1 Pet. 4:11) Vamakwerhu va nga ha va va langutane ni swiphiqo leswi nga taka swi nga lulamiseki hi ku helela emisaveni leyi. Kambe tsundzuka leswaku Yesu Kreste loyi a nga “murisi lonkulu,” u ta va pfuna ku tlula ndlela leyi a wu ta va pfuna hayona. U ta va pfuna sweswi ni le misaveni leyintshwa. Xikwembu xi lava leswaku vakulu va rhandza vamakwerhu, va va khathalela ni ku va “swikombiso entlhambini.” w23.09 29-30 ¶13-14

Hi fanele hi papalata ku tirhisa mavonelo ya vanhu. Loko hi endla swilo hi ku ya hi langutelo ra vanhu, hi nga tshika ku yingisa Yehovha ni milawu yakwe. (1 Kor. 3:19) Mikarhi yo tala “vutlhari bya misava” byi hlohlotela vanhu leswaku va nga xi yingisi Xikwembu. Vakreste van’wana va le vandlheni ra Pergamo ni ra Tiyatira a va tekelele langutelo ra vanhu lava a va gandzela swifaniso ni ku tikhoma ku biha hi swa masangu, ku nga leswi a swi tolovelekile emitini yoleyo. Yesu u tshinye mavandlha lawa swinene hikwalaho ka leswi a ma pfumelela vanhu va tikhoma ku biha hi swa masangu. (Nhlav. 2:​14, 20) Namuntlha hi langutana ni ndzingo wo amukela mavonelo lama hoxeke. Maxaka ni vanhu lava hi va toloveleke va nga ha vula leswaku hi namarhela ngopfu milawu ni ku hi hlohlotela leswaku hi yi tlula. Hi xikombiso, va nga hi byela leswaku ku enerisa ku navela ka hina a swi hoxanga naswona milawu ya Bibele i ya xikhale. Mikarhi yin’wana hi nga tibyela leswaku nkongomiso lowu Yehovha a hi nyikaka wona a wu enelanga. Hi nga ha ringeka ku nga swi ‘namarheli leswi tsariweke.’—1 Kor. 4:6. w23.07 16 ¶10-11

Mariya mana wa Yesu a a lava ku khutaziwa. A a nga tekiwanga kambe a a ta tika. A a nga ri na ntokoto wo kurisa vana kambe a a fanele a kurisa n’wana loyi a a ta va Mesiya. Leswi a a nga si tshama a etlela ni wanuna, xana Mariya a a ta n’wi byerisa ku yini Yosefa loyi a a n’wi vutile? (Luka 1:​26-33) Xana Mariya u ma kume kwihi matimba? U kombele mpfuno eka van’wana. Hi xikombiso, u kombele ntsumi Gabriyele leswaku yi n’wi nyika rungula leri engetelekeke mayelana ni xiavelo xakwe. (Luka 1:34) Endzhaku ka sweswo, u pandze mananga a ya eYuda “etikweni ra tintshava” a vhakela xaka rakwe Elizabeta. Elizabeta u bumabumele Mariya naswona Yehovha u endle leswaku Elizabeta a vula vuprofeta lebyi khutazaka lebyi vulavulaka hi n’wana wa Mariya loyi a a ri ekhwirini. (Luka 1:​39-45) Mariya u vule leswaku Yehovha u tirhise ‘voko rakwe ra matimba.’ (Luka 1:​46-51) Yehovha u tirhise ntsumi Gabriyele na Elizabeta leswaku a tiyisa Mariya. w23.10 14-15 ¶10-12

Nhlayo yi nga ri yingani ya vadyondzisiwa va Yesu yi hlawuriwe hi moya lowo kwetsima naswona va tiphina hi vuxaka byo hlawuleka na Yehovha. Vahlawuriwa lava va 144 000, va ta va vaprista swin’we na Yesu etilweni. (Nhlav. 14:1) Kamara Ro Kwetsima ra le tabernakeleni, ri yimela ku hlawuriwa ka vona hi moya lowo kwetsima tanihi vana va Xikwembu loko va ha ri laha misaveni. (Rhom. 8:​15-17) Kamara Ro Kwetsima Ngopfu ra le tabernakeleni ri yimela matilo, laha Yehovha a tshamaka kona. “Khetheni” leri a ri hambanisa Kamara Ro Kwetsima eka lero Kwetsima Ngopfu, ri yimela miri wa Yesu wa laha misaveni lowu loko a ha ri na wona a wu ta n’wi sivela ku nghena etilweni tanihi Muprista Lonkulu wa tempele ya Xikwembu yo fanekisela. Loko Yesu a nyikela hi vutomi byakwe bya laha misaveni byi va xitlhavelo eka vanhu, u pfulele vahlawuriwa ndlela yo ya hanya etilweni. Hilaha ku fanaka, na vona va fanele va siya mimiri ya vona ya laha misaveni leswaku va kota ku amukela hakelo ya le tilweni.—Hev. 10:​19, 20; 1 Kor. 15:50. w23.10 28 ¶13

Loko Vaefrayimi va n’wi xopaxopa, Gidiyoni u tikhomile. (Vaa 8:​1-3) A nga hlundzukanga. U kombise leswaku a a nga titeki a tlakukile eka van’wana hi ku yingisela leswi a swi va karhata naswona hi vutlhari u endle leswaku va ehlisa moya. Vakulu vo tlhariha va tekelela xikombiso xa Gidiyoni hi ku va va yingisela hi vurhon’wana ni ku tikhoma loko va xopaxopiwa. (Yak. 3:13) Hikwalaho va endla leswaku ku va ni ku rhula evandlheni. Loko Vaisrayele va dzunisa Gidiyoni endzhaku ka loko va hlule Vamidiyani, u yise ku dzuneka eka Yehovha. (Vaav. 8:​22, 23) Vakulu va nga n’wi tekelela njhani Gidiyoni? Va nga yisa ku dzuneka eka Yehovha hikwalaho ka leswi va koteke ku swi fikelela. (1 Kor. 4:​6, 7) Hi xikombiso, loko nkulu a bumabumeriwa hikwalaho ka vuswikoti byakwe byo dyondzisa, a nga kombisa leswaku u kota ku endla tano hi ku pfuniwa hi Xikwembu kumbe hi ku leteriwa hi nhlangano wa Yehovha. Mikarhi yin’wana vakulu va nga ha tikambela ku vona loko ndlela leyi va dyondzisaka hayona yi yisa ku dzuneka eka Yehovha kumbe va tikokela matihlo ya vanhu. w23.06 4 ¶7-8

Loko hi nga swi kumi leswi hi swi khongeleleke, hi nga ha tivutisa leswi, ‘Xana ndzi khongelela nchumu lowunene?’ Mikarhi yo tala hi ehleketa onge ha swi tiva leswi hi faneleke. Kambe swilo leswi hi swi kombelaka swi nga endleka hi ku famba ka nkarhi ku nga ri swilo leswi nga ta hi vuyerisa. Loko hi khongela hi xiphiqo xo karhi, swi nga endleka ku ri ni xitshunxo xo antswa ku tlula lexi hi xi khongelelaka. Nakambe swin’wana swa swilo leswi hi swi khongelelaka swi nga endleka swi nga fambisani ni ku rhandza ka Yehovha. (1 Yoh. 5:14) Hi xikombiso, xiya xikombiso xa vatswari lava khongeleke eka Yehovha va kombela leswaku a endla n’wana wa vona a nga hambuki entiyisweni. Xikhongelo xexo xi nga vonaka xi ri xinene. Hambiswiritano, Yehovha a nga hi sindzisi leswaku hi n’wi gandzela. U lava leswaku hinkwerhu ka hina ku katsa ni vana va hina, hi hlawula ku n’wi gandzela. (Det. 10:​12, 13; 30:​19, 20) Kutani vatswari volavo va nga kombela Yehovha a va pfuna va fikelela mbilu ya n’wana wa vona leswaku a hlawula ku rhandza Yehovha ni ku va munghana Wakwe.—Swiv. 22:6; Efe. 6:4. w23.11 21 ¶5; 23 ¶12

Hikwalahokayini ku chavelela van’wana ku ri ndlela yin’wana ya nkoka yo va kombisa leswaku ha va rhandza? Hi ku ya hi buku yin’wana leyi hlamuselaka Bibele, rito “nchavelelo” leri Pawulo a ri tirhiseke ri vula “ku yima ekusuhi na munhu leswaku u n’wi khutaza loko a langutane ni miringo leyikulu.” Hikwalaho, loko hi chavelela makwerhu loyi a nga le xiyin’weni xo tika, hi n’wi pfuna leswaku a ya emahlweni a famba endleleni leyi yisaka evuton’wini. Mikarhi hinkwayo loko hi chavelela makwerhu, hi n’wi komba leswaku ha n’wi rhandza. (2 Kor. 7:​6, 7, 13) Ntwelavusiwana na ku chavelela van’wana i bandhi na buruku. Njhani? Munhu la nga ni ntwelavusiwana u susumeteleka ku chavelela van’wana ni ku tlhela a ringeta ku va rhula ndzhwalo. Hikwalaho, hi sungula hi ku twela munhu vusiwana; endzhaku hi n’wi chavelela. Pawulo u kombise leswaku ndlela leyi Yehovha a twelaka vanhu vusiwana hayona yi endla leswaku A va chavelela. Pawulo u hlamusela Yehovha a ri “Tatana la nga ni tintswalo letikulu tlhelo Xikwembu xa nchavelelo hinkwawo.”—2 Kor. 1:3. w23.11 9-10 ¶8-10

Valandzeri hinkwavo va Kreste va nga langutela ku xanisiwa. Xiya xikombiso xa Muapostola Pawulo. U byele Vatesalonika a ku: “Loko ha ha ri na n’wina, a hi mi byela leswaku hi ta xanisiwa naswona sweswo swi endlekile.” (1 Tes. 3:4) Kasi u tsalele Vakorinto a ku: “Hi lava leswaku mi swi tiva vamakwerhu leswaku hi xanisiwile . . . A hi nga ha tshembi leswaku hi ta hanya.” (2 Kor. 1:8; 11:​23-27) Ninamuntlha Vakreste va nga langutela ku xanisiwa hi tindlela to karhi. (2 Tim. 3:12) Endzhaku ka loko u pfumele eka Yesu ni ku va mulandzeri wakwe, kumbexana maxaka ni vanghana va wena va ku khome ku biha. Xana u tshame u langutana ni swiphiqo entirhweni hi leswi u tshembekaka? (Hev. 13:18) Xana mfumo wu ku xanisile hileswi u chumayelaka vanhu u va byela hi ntshembo lowu u nga na wona? Swi nga ri na mhaka ndlela leyi hi xanisiwaka hayona, Pawulo u vule leswaku hi fanele hi tsaka. w23.12 10-11 ¶9-10

Yakobo u langutane ni swiphiqo swo tala. Vana va Yakobo vambirhi ku nga Simiyoni na Levhi, va chiche ndyangu wa ka vona xindzhuti ni ku tisa xisandzu evitweni ra Yehovha. Ku engetela eka sweswo, Rahele nsati wa Yakobo loyi a n’wi rhandzaka u file loko a veleka n’wana wa vona wa vumbirhi. Yakobo loyi se a a dyuharile u boheke ku rhurhela etikweni ra Egipta hikwalaho ka ndlala leyikulu. (Gen. 35:​16-19; 37:28; 45:​9-11, 28) Eka hinkwaswo leswi n’wi endlekeleke, Yakobo a nga si tshama a tshika ku tshemba Yehovha ni switshembiso Swakwe. Hikwalaho ka sweswo, Yehovha u kombise Yakobo leswaku wa n’wi seketela. Hi xikombiso, Yehovha u katekise Yakobo hi rifuwo ro tala. Ehleketa ndlela leyi Yakobo a khenseke Yehovha hayona loko a tlhela a hlangana na Yosefa n’wana wakwe loyi a a ehleketa leswaku u fe khale! Yakobo u kote ku langutana ni miringo yakwe hileswi a a ri ni vuxaka lebyikulu na Yehovha. (Gen. 30:43; 32:​9, 10; 46:​28-30) Loko hi tshama hi ri ni vuxaka lebyikulu na Yehovha, na hina hi nga swi kota ku langutana ni miringo leyi nga hi welaka hi nga swi langutelanga. w23.04 15 ¶6-7

Eka Pisalema 23, Davhida u hlamusele ndlela leyi a a tiyiseka hayona leswaku Yehovha wa n’wi rhandza ni ku n’wi khathalela. U hlamusele vuxaka lebyikulu lebyi a nga na byona na Yehovha loyi a n’wi vitaneke Murisi wakwe. Davhida a a titwa a sirhelelekile loko a pfumelela Yehovha a n’wi kongomisa ni ku tlhela a titshega hi Yena hi ku helela. Davhida a a swi tiva leswaku Yehovha u ta n’wi rhandza vutomi byakwe hinkwabyo. I yini leswi a swi n’wi endla a tiyiseka hi ndlela leyi? Davhida u titwe a khathaleriwe swinene hikuva Yehovha a a n’wi nyika hinkwaswo leswi a a swi pfumala. Davhida u tlhele a tiphina hi ku va munghana wa Yehovha ni ku tlhela a tsakeriwa hi yena. Hi yona mhaka a a tiyiseka leswaku hambi ko endleka yini enkarhini lowu taka, Yehovha a a ta ya emahlweni a n’wi khathalela. Leswi Davhida a a tiyiseka leswaku Yehovha wa n’wi rhandza naswona a a ta n’wi khathalela, swi n’wi pfunile leswaku a nga vileli kambe a tsaka ni ku tlhela a eneriseka.—Ps. 16:11. w24.01 28-29 ¶12-13

Ku sukela hi nkarhi wa Nyimpi ya Vumbirhi ya Misava, vanhu va Yehovha ematikweni yo tala va tiphine hi ku rhula ni ku chumayela va tshunxekile. Entiyisweni, ku ve ni vuyelo lebyinene hikwalaho ka ntirho lowu. Namuntlha vamakwerhu lava nga swirho swa Huvo leyi Fumaka va ya emahlweni va titshega hi Yesu leswaku a va kongomisa. Va lava leswaku swiletelo leswi va swi nyikaka vamakwerhu swi fambisana ni langutelo ra Yehovha na Yesu. Nakambe va tlhela va tirhisa valanguteri va miganga ni vakulu leswaku va kongomisa mavandlha. Vakulu lava hlawuriweke ku ya fuma na Kreste etilweni va le ka “voko rakwe ra xinene.” (Nhlav. 2:1) I ntiyiso leswaku vakulu lava va swi endla swihoxo. Ku fana ni vaapostola, ku ve ni mikarhi leyi Muxe na Yoxuwa va endleke swihoxo. (Tinhl. 20:12; Yox. 9:​14, 15; Rhom. 3:23) Ninamuntlha Kreste u ya emahlweni a kongomisa nandza wo tshembeka ni vakulu naswona u ta ya emahlweni a endla tano. Hikwalaho hi ni swivangelo swo tshemba nkongomiso lowu a hi nyikaka wona hi ku tirhisa vavanuna lava hlawuriweke leswaku va rhangela. w24.02 23-24 ¶13-14

Namuntlha hi nga tsakisa Yehovha hi ku vulavula kahle hi yena ni ku kombisa leswaku ha swi tlangela leswi a hi endleleke swona ni rirhandzu rakwe. Loko hi chumayela, xikongomelo xa hina i ku pfuna vanhu va tshinela eka Yehovha ni ku va pfuna va titwa hi ndlela leyi hi titwaka hayona hi Tata wa hina loyi a nga ni rirhandzu. (Yak. 4:8) Swa hi tsakisa ku pfuna vanhu va vona ndlela leyi Bibele yi n’wi hlamuselaka hayona Yehovha, rirhandzu rakwe, vululami, vutlhari, matimba ni vumunhu byakwe byin’wana byo tsakisa. Hi tlhela hi dzunisa Yehovha ni ku n’wi tsakisa hi ku endla hinkwaswo leswi hi nga swi kotaka leswaku hi n’wi tekelela. Loko hi endla tano, hi kombisa leswaku a hi xiphemu xa misava leyi. Vanhu va nga ha swi xiya leswaku hi hambanile ni vanhu va misava leyi yo homboloka naswona va nga ha tivutisa leswaku hikwalahokayini. (Mat. 5:​14-16) Leswi hi hanyaka na vona, swi ta hi olovela ku va hlamusela leswaku hikwalahokayini hi hanya hi ndlela yoleyo. Sweswo swi ta va ni vuyelo lebyinene hikuva lava nga ni timbilu letinene va ta tshinela eka Xikwembu xa hina. Loko hi dzunisa Yehovha hi tindlela toleto, hi ta tsakisa mbilu yakwe.—1 Tim. 2:​3, 4. w24.02 10 ¶7

Leswaku u va wanuna wa Mukreste loyi a wupfeke, u fanele u dyondza ku va ni vuswikoti lebyi nga ta ku pfuna. Sweswo swi ta ku pfuna leswaku u amukela swiavelo leswi u nga ta nyikiwa swona evandlheni, u kota ku hlayisa ntirho lowu u nga ta wu kuma leswaku u tihlayisa ni ku hlayisa ndyangu wa wena ni ku va ni vuxaka lebyinene ni van’wana. Hi xikombiso, dyondza ku hlaya ni ku tsala kahle. Bibele yi vula leswaku wanuna loyi a tsakeke ni loyi a humeleleke, hi loyi a hlayaka Rito ra Xikwembu siku ni siku ni ku anakanyisisa hi rona. (Ps. 1:​1-3) Loko a hlaya Bibele siku ni siku, swi ta n’wi pfuna leswaku a tiva ndlela leyi Yehovha a ehleketaka hayona, leswi nga ta n’wi pfuna leswaku a ehleketa kahle ni ku tirhisa leswi a swi dyondzaka. (Swiv. 1:​3, 4) Vamakwerhu va lava mpfuno eka vavanuna lava kotaka ku dyondzisa kahle ni ku kota ku nyikela switsundzuxo leswi humaka eBibeleni. Loko u kota ku hlaya ni ku tsala kahle, u ta lunghiselela mivulavulo ni tinhlamulo leti nga vuyerisaka vamakwerhu ni ku tiyisa ripfumelo ra vona. Nakambe u ta teka tinotsi leti nga ta ku pfuna u va ni ripfumelo leri tiyeke ni ku khutaza van’wana. w23.12 26-27 ¶9-11

Loko u titwa u chava, anakanyisisa hi leswi Yehovha a nga ta swi endla enkarhini lowu taka loko Sathana a herisiwile. Nongonoko wa nhlengeletano ya xifundzha ya 2014 wu hlamusele tatana a ri karhi a bula ni ndyangu wakwe hi ndlela leyi 2 Timotiya 3:​1-5 a yi ta hlayeka hayona loko a yi vulavula hi leswi Paradeyisi yi nga ta va xiswona, a yi ta hlayekisa xileswi: “Emisaveni leyintshwa ku ta fika mikarhi yo tsakisa. Hikuva vanhu va ta rhandza vanhu van’wana, va rhandza ku dyondza hi Xikwembu, va va ni mahanyelo lamanene, va titsongahata, va dzunisa Xikwembu, va yingisa vatswari, va va lava khensaka, va tshembeka, va rhandza mindyangu ya vona, va tshembeka loko va endla ntwanano, va vulavula swilo leswinene hi van’wana, va tikhoma, va va lava rhuleke, va rhandza vunene, va hanya hi ntiyiso, va nga phikizani ni van’wana, va rhandza Xikwembu ku ri ni ku rhandza ku tiphina naswona va hanya hi ndlela leyi kombisaka leswaku va gandzela Xikwembu; namarhela vanhu vo tano.” Xana u pfa u bula ni ndyangu wa wena kumbe ni vamakwerhu hi ndlela leyi vutomi byi nga ta va hayona emisaveni leyintshwa? w24.01 6 ¶13-14

Swa khutaza ku tiva leswaku Yehovha u amukela vanhu vakwe hinkwavo! Bibele yi ri: “Yehovha u tsakela vanhu vakwe.” (Ps. 149:4) Hambiswiritano, mikarhi yin’wana van’wana va hela matimba ivi va sungula ku tivutisa leswi, ‘Xana Yehovha wa ndzi amukela?’ Vagandzeri va Yehovha vo hlayanyana va le mikarhini ya ku tsariwa ka Bibele, mikarhi yin’wana a va pfa va titwa hi ndlela yoleyo. (1 Sam. 1:​6-10; Yobo 29:​2, 4; Ps. 51:11) Bibele yi swi veka erivaleni leswaku swa koteka ku va vanhu lava tswariweke ni xidyoho va amukeriwa hi Yehovha. Njhani? Hi fanele hi va ni ripfumelo eka Yesu Kreste ni ku tlhela hi khuvuriwa. (Yoh. 3:16) Hi ndlela yoleyo, hi swi kombisa erivaleni leswaku hi hundzukile eswidyohweni swa hina naswona hi tshembise Xikwembu ku endla ku rhandza ka xona. (Mit. 2:38; 3:19) Yehovha wa tsaka loko hi endla sweswo leswaku hi va ni vuxaka na yena. Loko hi endla leswi hi nga swi kotaka leswaku hi hanya hi xihlambanyo lexi hi xi endleke loko hi tinyiketela, Yehovha wa hi amukela naswona u hi teka hi ri vanghana vakwe lavakulu.—Ps. 25:14. w24.03 26 ¶1-2

Hi nga tekelela vadyondzisiwa hi ku ya emahlweni hi chumayela hambiloko vafumi va lava leswaku hi tshika ku endla tano. Hi nga tiyiseka leswaku Yehovha u ta hi pfuna hi endla ntirho wa hina wo chumayela. Kutani khongelela ku va ni xivindzi, vutlhari ni leswaku Yehovha a ku pfuna u tiyisela swiphiqo. Vo tala va hina ha xaniseka hikwalaho ka mavabyi kumbe hileswi hi nga tsakangiki emoyeni, hi xanisiwaka, hi loveriweke hi munhu loyi hi n’wi rhandzaka, hi langutaneke ni xiyimo xo tika endyangwini kumbe swiphiqo swin’wana. Kambe swilo swo fana ni mintungu ni tinyimpi swi endle leswaku swiphiqo leswi se hi nga na swona swi tika swinene ku swi tiyisela. Chululela Yehovha ta le mbilwini. N’wi byele hi xiyimo xa wena ku fana ni loko u byela munghana wa wena lonkulu. Tiyiseka leswaku Yehovha “u ta ku pfuna.” (Ps. 37:​3, 5) Ku phikelela exikhongelweni swi ta hi pfuna ku “tiyisela nhlomulo.” (Rhom. 12:12) Yehovha wa swi tiva leswi vagandzeri vakwe va langutanaka na swona, “u twa xirilo xa vona xo kombela ku pfuniwa.”—Ps. 145:​18, 19. w23.05 5-6 ¶12-15

Loko hi fanele hi endla swiboho swa nkoka swinene, hi fanele hi twisisa “leswi Yehovha a swi rhandzaka” ivi hi endla swilo leswi fambisanaka ni ku rhandza kakwe. (Efe. 5:17) Loko hi kambisisa misinya ya milawu ya Bibele leyi tirhaka eka xiyimo xa hina, hi va hi lava ku tiva langutelo ra Xikwembu emhakeni yoleyo. Loko hi yi tirhisa, hi ta kota ku endla swiboho leswinene. “Lowo homboloka,” ku nga Sathana nala wa hina, u lava hi va bizi ngopfu hi swilo swa misava leyi lerova hi nga ha wu kumi nkarhi wo gandzela Xikwembu xa hina. (1 Yoh. 5:19) Mukreste a nga sungula ku rhangisa mali, dyondzo kumbe ntirho ematshan’weni yo lava tindlela to gandzela Yehovha. Loko a endla tano, u kombisa leswaku u ehleketa ku fana ni vanhu va misava leyi. I ntiyiso leswaku swilo leswi a swi hoxanga kambe a hi fanelanga hi rhangisa swona evuton’wini bya hina. w24.03 24 ¶16-17